ប្រធានាធិបតីអាមេរិក លោក ដូណាល់ ត្រាំ និងមន្ត្រីជាន់ខ្ពស់របស់ប្រទេសអ៊ីរ៉ង់ បានផ្លាស់ប្តូរការគំរាមកំហែងថ្មីៗដាក់គ្នា ក្រោយពីភាគីទាំងពីរបានបើកការវាយប្រហារតបតគ្នា។ លោក ត្រាំ លើកឡើងថា ទីក្រុងតេអេរ៉ង់បានប្រើពេល «យូរពេកក្នុងការចរចា» ហើយឥឡូវនេះ «ត្រូវតែសងការខូចខាត» ខណៈរដ្ឋមន្ត្រីការបរទេសអ៊ីរ៉ង់ លោក Abbas Araghchi ព្រមានថា ប្រទេសលោកនឹង «មិនទុកឱ្យការវាយប្រហារណាមួយដោយគ្មានការឆ្លើយតបឡើយ»។
សហរដ្ឋអាមេរិក បាននិយាយថា ខ្លួនបានវាយប្រហារលើទីតាំងការពារជាតិ ស្ថានីយគ្រប់គ្រង និងប្រព័ន្ធរ៉ាដារបស់អ៊ីរ៉ង់ នៅជិតច្រកសមុទ្រ Hormuz កាលពីថ្ងៃទី៩ខែមិថុនា ដើម្បីឆ្លើយតបទៅនឹងការបាញ់ទម្លាក់ឧទ្ធម្ភាគចក្រកងទ័ពអាមេរិកមួយគ្រឿង។ ជាការឆ្លើយតប អ៊ីរ៉ង់បានបើកការវាយប្រហារលើគោលដៅចំនួន ២១ កន្លែង នៅឯមូលដ្ឋានទ័ពអាមេរិកក្នុងតំបន់ រួមមាន នៅបារ៉ែន និងហ្សកដានី។
លោក ត្រាំ បានសរសេរនៅលើ Truth Social កាលពីថ្ងៃទី១០ខែមិថុនាថា៖ «យោធារបស់អ៊ីរ៉ង់គឺស្ថិតក្នុងស្ថានភាពវឹកវរ និងខ្ទេចខ្ទាំទាំងស្រុង។ ពួកគេបានប្រើពេលយូរពេកក្នុងការចរចាលើកិច្ចព្រមព្រៀងដ៏ល្អមួយ ឥឡូវនេះពួកគេនឹងត្រូវតែសងការខូចខាត!»។
មតិយោបល់នេះ មានភាពផ្ទុយគ្នាទៅនឹងការថ្លែងកាលពីថ្ងៃអង្គារ ដែលលោកប្រាប់ថា ភាគីទាំងពីរស្ថិតក្នុង «ដំណាក់កាលចុងក្រោយនៃកិច្ចព្រមព្រៀងដ៏ល្អប្រពៃបំផុត»។
នៅថ្ងៃទី១០ខែមិថុនាដដែលនោះ អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baqai បានចោទប្រកាន់សហរដ្ឋអាមេរិកថា បានធ្វើឱ្យខូចខាតដល់ដំណើរការការទូត តាមរយៈសារដែលមានលក្ខណៈផ្ទុយគ្នា និងការរំលោភលើបទឈប់បាញ់ជាញឹកញាប់។
លោក ត្រាំ និងសារព័ត៌មាន Fox News បានឱ្យដឹងថា ឧទ្ធម្ភាគចក្រ Apache របស់អាមេរិក ត្រូវបានដ្រូនអ៊ីរ៉ង់មួយគ្រឿងហោះបុក ប៉ុន្តែមិនបានផ្ទុះឡើយ ខណៈល្បាតនៅច្រកសមុទ្រ Hormuz។ សមាជិកនាវិកទាំងពីរនាក់បានរស់រានមានជីវិត ប៉ុន្តែទីភ្នាក់ងារសារព័ត៌មាន Mehr របស់អ៊ីរ៉ង់ បានរាយការណ៍ថា អ៊ីរ៉ង់មិនបានប្រកាសទទួលខុសត្រូវចំពោះរឿងនេះទេ។ អាមេរិកបញ្ជាក់ថា កាំជ្រួច និងដ្រូនរបស់អ៊ីរ៉ង់ស្ទើរតែទាំងអស់ដែលបាញ់តបតមកលើមូលដ្ឋានទ័ពខ្លួន ត្រូវបានស្ទាក់ចាប់បាន ដោយមិនមានអ្នករងគ្រោះថ្នាក់ឡើយ។
សង្រ្គាមនេះបានចាប់ផ្តើមកាលពីថ្ងៃទី២៨ខែកុម្ភៈ បន្ទាប់ពីសហរដ្ឋអាមេរិកនិងអ៊ីស្រាអែល បានបើកការវាយប្រហារសម្លាប់មេដឹកនាំកំពូលរបស់អ៊ីរ៉ង់។ ជម្លោះបានរីករាលដាលយ៉ាងលឿនពាសពេញតំបន់ រហូតឈានដល់មានបទឈប់បាញ់ រយៈពេលពីរសប្តាហ៍កាលពីខែមេសា។ ចាប់តាំងពីពេលនោះមក ភាគីទាំងពីរបានបាញ់តបតគ្នាទៅវិញទៅមកម្តងម្កាល ខណៈតំណាងប្រទេសទាំងពីរ បានបន្តចូលរួមក្នុងការចរចាដ៏តានតឹងនៅក្នុងប្រទេសប៉ាគីស្ថាន ដើម្បីស្វែងរកដំណោះស្រាយយូរអង្វែង៕
