កងកម្លាំងអ៊ុយក្រែន បានវាយប្រហារដោយគ្រាប់មីស៊ីលទៅជ្រៅក្នុងទឹកដីរុស្ស៊ី ដោយបានបាញ់ចំរោងចក្រយោធាដ៏ធំមួយកាលពីយប់ថ្ងៃទី៩ខែមិថុនា។ នេះបើយោងតាមការលើកឡើងរបស់ប្រធានាធិបតី លោក វ៉ូឡូឌីមៀ ហ្សេឡេនស្គី។
លោកថ្លែងថា គ្រាប់មីស៊ីលគ្រូសប្រភេទ FP-5 Flamingo បានវាយប្រហារចំរោងចក្រផលិតដ្រូន និងមីស៊ីល នៅក្នុងទីក្រុង Cheboksary នៃសាធារណរដ្ឋ Chuvash ដែលមានចម្ងាយជាង ៩០០ គីឡូម៉ែត្រ ពីខ្សែត្រៀមជួរមុខ។ អ៊ុយក្រែន ក៏បាននិយាយផងដែរថា ខ្លួនបានវាយប្រហារលើកំពង់ផែ Mariupol រោងចក្រចម្រាញ់ប្រេងនៅក្នុងទីក្រុង Samara និងនាវាដឹកប្រេងមួយគ្រឿងនៅក្នុងសមុទ្រខ្មៅ។
ក្នុងរយៈពេលប៉ុន្មានខែថ្មីៗនេះ កងទ័ពអ៊ុយក្រែនបានបង្កើនការវាយប្រហារដោយដ្រូន លើទីតាំងសំខាន់ៗនៅទូទាំងប្រទេសរុស្ស៊ី។ ទីក្រុងគីវ និយាយថា ទីតាំងថាមពលគឺជាគោលដៅស្របច្បាប់ ដោយសារវាជួយឱ្យទីក្រុងម៉ូស្គូ អាចបន្តយុទ្ធនាការសង្រ្គាមរបស់ខ្លួនបាន។ ទោះជាយ៉ាងណាក៏ដោយ ការវាយប្រហារដោយមីស៊ីលនៅជ្រៅក្នុងទឹកដីរុស្ស៊ី គឺកម្រនឹងកើតមានណាស់។
កងទ័ពរុស្ស៊ី បាននិយាយថា យូនីតការពារអាកាសរបស់ខ្លួនបានស្ទាក់ចាប់ ឬបាញ់ទម្លាក់ដ្រូនអ៊ុយក្រែនចំនួន ៣២៦ គ្រឿង កាលពីយប់ថ្ងៃទី៩ខែមិថុនា ខណៈពេលដែលកងទ័ពអាកាសអ៊ុយក្រែន និយាយថា ខ្លួនបានបាញ់ទម្លាក់ដ្រូនចំនួន ១៨១ គ្រឿង ក្នុងចំណោម ២០៧ គ្រឿង ដែលបាញ់ដោយរុស្ស៊ី។
នៅក្នុងការបង្ហោះនៅលើកម្មវិធី Telegram លោក ហ្សេឡេនស្គី បានសរសេរថា៖«កាលពីយប់មិញ គ្រាប់មីស៊ីល FP-5 Flamingo របស់អ៊ុយក្រែន បានវាយប្រហារចំរោងចក្រយោធាមួយកន្លែងនៅក្នុងទីក្រុង Cheboksary ដែលជាកន្លែងផ្គត់ផ្គង់គ្រឿងបំណែកសម្រាប់ផលិតដ្រូន និងមីស៊ីលទៅឱ្យកងទ័ពឈ្លានពាន»។
ក្រោយមក កងទ័ពអ៊ុយក្រែន បានបញ្ជាក់ថា រោងចក្រ VNIIR-Progress ត្រូវបានវាយប្រហារចំ ហើយមានការឆាបឆេះនៅទីតាំងនោះ។
ប្រធានរដ្ឋនៃសាធារណរដ្ឋ Chuvash លោក Oleg Nikolaev បានបញ្ជាក់ថា ទីក្រុង Cheboksary ពិតជាត្រូវបានវាយប្រហារមែន ដោយមានរបាយការណ៍មនុស្សរងរបួស ៣ នាក់។
គ្រាប់មីស៊ីល FP-5 Flamingo មានក្បាលគ្រាប់ទម្ងន់ ១,១៥០ គីឡូក្រាម និងមានចម្ងាយបាញ់រហូតដល់ ៣,០០០ គីឡូម៉ែត្រ ដែលអាចបាញ់ដល់ទីក្រុងម៉ូស្គូ និងទីក្រុងធំៗដទៃទៀតយ៉ាងងាយស្រួល។
រួមជាមួយសម្ព័ន្ធមិត្តលោកខាងលិច អ៊ុយក្រែន បាននិងកំពុងអភិវឌ្ឍន៍មីស៊ីលប្រភេទផ្សេងទៀត ដើម្បីបង្កើនការខូចខាតដល់ការឈ្លានពានរបស់រុស្ស៊ី និងបង្ខំឱ្យទីក្រុងម៉ូស្គូស្វែងរកការចរចា។
រហូតមកដល់ពេលនេះ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបដិសេធរាល់សំណើចរចាទាំងអស់។ កាលពីសប្តាហ៍មុន លោក ពូទីន បានមានប្រសាសន៍ថា លោកមិនឃើញមានហេតុផលណាមួយដែលត្រូវជួបជាមួយលោក ហ្សេឡេនស្គី នោះទេ បន្ទាប់ពីមេដឹកនាំអ៊ុយក្រែនរូបនេះ បានស្នើសុំការចរចាផ្ទាល់ ដើម្បីព្យាយាមបញ្ចប់សង្រ្គាម៕
