ប្រជាពលរដ្ឋរស់នៅឃុំទឹកល្អក់ ស្រុកគងពិសី ខេត្តកំពង់ស្ពឺ ព្រួយបារម្ភពីបញ្ហាសុខភាព និងការរស់នៅ ដែលរងផលប៉ះពាល់ពីកាកសំណល់ទឹកស្អុយកខ្វក់ ដែលក្រុមហ៊ុនកែច្នៃដំណាប់ស្វាយ ឈ្មោះ Cambodian Gome Farm Food Co., ltd. ដឹកតាមរថយន្តយកទៅចាក់ចោលនៅតាមព្រៃភ្នំ ប្រឡាយ អូរ ទំនប់ និងទីតាំងសាធារណៈផ្សេងៗ ក្នុងមូលដ្ឋាននេះ ដោយគ្មានអាងស្តុក ឬអាចចម្រោះទឹកកខ្វក់នេះ ឲ្យបានត្រឹមត្រូវទេ។
តំណាងពលរដ្ឋរស់នៅភូមិបឹងងោង លោក តាន់ សារុន លើកឡើងថា កាកសំណល់ដែលក្រុមហ៊ុនកែច្នៃដំ ណាប់ស្វាយ ដឹកយកមកចាក់ចោលក្នុងមូលដ្ឋាននេះ គឺបានប៉ះពាល់ដល់ការរស់នៅរបស់ប្រជាពលរដ្ឋពួកគាត់ធ្ងន់ធ្ងរបំផុត។
ពលរដ្ឋថា កាកសំណល់កខ្វក់នេះ ត្រូវបានដឹកតាមរថយន្តមកចាក់ចោលនៅតាមព្រៃភ្នំ ជ្រោះ ទំនប់ អូរ ប្រឡាយ និងតាមវាលស្រែជាដើម។ ហើយថា កាកសំណល់នេះ ក៏បានបណ្តាលឲ្យមានត្រីងាប់សត្វចិញ្ចឹមដូចជាគោឈឺជាបន្តបន្ទាប់ ជាពិសេសប៉ះពាល់សុខភាពមនុស្សពិបាកដកដង្ហើមជាដើម។
ប្រភពខាងលើ ចាត់វិធានឱ្យមានប្រសិទ្ធភាព ដើម្បីការពារសុខភាពពលរដ្ឋរស់នៅជុំវិញតំបន់នេះ រួមទាំងបញ្ហាបរិស្ថាន ដោយសំអាងថា បញ្ហានេះ កើតឡើងរាប់ឆ្នាំមកហើយ។
លោកបន្តថា៖ «ក្លិនហ្នឹងជូរស្អុយពេញហ្នឹងហ្មង ជួនកាលខ្យល់បក់ពីជើងជះក្លិនដល់ខាងត្បូង ដល់ពេលខ្យល់បក់ពីទិសត្បូងជះក្លិនទៅជើងវិញម្តង។ មិនដែលឃើញមានអ្នកណាគេដឹកកាកសំណល់ស្វាយមកចាក់ចោលលើទឹកអញ្ចឹងទេ?។ ចាក់លើភ្នំ ចាក់តាមជ្រោះ ចាក់តាមព្រៃចម្ការ ពេញវាលពេញកាល ទាំងឡានៗ។ ដូចសិទ្ធិអំណាចគេក្រុមហ៊ុនហ្នឹងអត់មានកោតក្រែងនឹងការខូចបរិស្ថានអីបន្តិចទេ។ ចាក់នៅលើកម្ពោធវល្លិ៍ព្រេងហ្នឹង ហើយពេលភ្លៀងមក គឺទឹកស្អុយហូរមក ចូលក្នុងអូរទំនប់ជាដើមហ្នឹង ទឹកលែងប្រើប្រាស់កើតទៀតហើយ»។
ទាក់ទិនបញ្ហានេះ មេភូមិបឹងងោង លោក យ៉ឹម យ៉ុន ឲ្យសារព័ត៌មានក្នុងស្រុកដឹងនៅថ្ងៃសុក្រនេះថា ផលប៉ះពាល់នៃទឹកស្អុយកខ្វក់ ដែលក្រុមហ៊ុនកែច្នៃដំណាប់ស្វាយ ឈ្មោះ Cambodian Gome Farm Food Co., ltd. បានដឹកយកមកចាក់ចោលក្នុងមូលដ្ឋាននេះ គឺមិនត្រឹមធ្វើឲ្យខូចដល់បរិស្ថាននោះទេ ប៉ុន្តែក៏បានជះក្លិនស្អុយប៉ះពាល់ដល់ការរស់នៅរបស់ប្រជាពលរដ្ឋ យ៉ាងហោច ៣ភូមិ គឺភូមិឈ្នួលជ្រុំ ភូមិបឹងងោល និងភូមិព្រៃកន្តូច។
ត្រង់ចំណុចនេះ លោកក៏ចង់ឃើញក្រសួង និងស្ថាប័នពាក់ព័ន្ធដទៃទៀត ជួយអន្តរាគមន៍បញ្ឈប់សកម្មភាពដឹកទឹកស្អុយ ដែលជាកាកសំណល់កខ្វក់របស់ក្រុមហ៊ុននេះជាបន្ទាន់ ដោយថាទង្វើនេះ បានប៉ះពាល់ដល់ការរស់នៅ និងការប្រកបរបរចិញ្ចឹមជីវិតរបស់ពលរដ្ឋក្នុងមូលដ្ឋាននេះធ្ងន់ធ្ងរ។
លោកមេភូមិបន្ថែមថា៖ «ស្អុយពីទឹកពេញដីពេញព្រៃអស់ហើយ ខ្ញុំមិនដឹងធ្វើម៉េចទេ? មិនថាតែភូមិខ្ញុំទេ ទាំងភូមិឈ្នួលជ្រុំ ភូមិបឹងងោង និងភូមិព្រៃកន្តូច ក៏ប៉ះពាល់ដល់ដែរ។ សំណូមពរដល់ក្រសួងឲ្យចុះមកពិនិត្យមើលផ្ទាល់ ចាក់សំណល់ស្អុយពេញទឹកពេញដីអញ្ចឹង តើត្រូវដោះស្រាយរបៀបម៉េច។ ឥឡូវនេះ កំពុងចាក់ពេញទឹកពេញដី សក្បុសអស់ហើយសុទ្ធតែទឹកស្វាយ ផ្លែស្វាយ សំរាម ឲ្យគាត់មកជួយអន្តរាគមន៍បន្តិចមក។ តៃកុងឡានដឹកមកចាក់តាមព្រៃតាមផ្សៃពេញហ្នឹងទាំងអស់»។
ដូចគ្នានេះដែរ អ្នកស្រី អ៊ំ សុខហេង សមាជិកក្រុមប្រឹក្សាឃុំទឹកល្អក់ ស្រុកគងពិសី ខេត្តកំពង់ស្ពឺ ទទួលស្គាល់ថា ពិតជាមានករណីក្រុមហ៊ុនកែច្នៃដំណាប់ផ្លែស្វាយ បានប្រើរថយន្តទឹកស្អុយកខ្វក់ មកចាក់ចោលតាមព្រៃភ្នំ និងតាមអូរប្រឡាយជាដើម នាំឲ្យប៉ះពាល់ដល់ការរស់នៅរបស់ប្រជាពលរដ្ឋពិតមែន។
អ្នកស្រីស្នើដល់ប្រធានមន្ទីរបរិស្ថាន ពិសេសរដ្ឋមន្ត្រីក្រសួងបរិស្ថាន ជួយបញ្ជូនមន្ត្រីចុះពិនិត្យជាក់ស្តែងដល់ទីតាំងមានការបំពុលបរិស្ថាននេះឲ្យបានឆាប់ ដ្បិតកាកសំណល់នេះ បានផលប៉ះពាល់ដល់ការរស់នៅ និងការប្រកបរបរចិញ្ចឹមជីវិតប្រចាំថ្ងៃរបស់ពួកគាត់។
អ្នកស្រីបន្តថា៖ «ទឹកនៅក្នុងមូលដ្ឋាននេះប្រើប្រាស់លែងកើតហើយ និយាយរួមទៅបរិស្ថានខូចអស់ហើយពីរបីភូមិហ្នឹង។ បើគេចាក់កាកសំណល់ពីខាងលើ ហើយភូមិអ្នកស្រុកនៅខាងក្រោម ម្លោះហើយទឹកវាមិនហូរមកក្រោម។ ចង់ឲ្យមន្ទីរបរិស្ថាន និងក្រសួងបរិស្ថានឲ្យគាត់ចុះមកពិនិត្យជាក់ស្តែងដល់ទីតាំង កុំឲ្យចេះតែថាប្រជាជនរាយការណ៍ទៅចេះថាអញ្ចេះចេះតែថាអញ្ចោះអីចឹង!»។
វីអូឌី នៅមិនទាន់អាចទាក់ទង លោក ជាម ច័ន្ទសោភ័ណ អភិបាលខេត្តកំពង់ស្ពឺ និងលោក ខ្វៃ អាទិត្យា អ្នកនាំពាក្យក្រសួងបរិស្ថាន ដើម្បីបំភ្លឺជុំវិញការបំពុលបរិស្ថាន របស់ ក្រុមហ៊ុនកែឆ្នៃដំណាប់ស្វាយ ឈ្មោះ Cambodian Gome Farm Food Co., ltd. បានទេ នៅថ្ងៃសុក្រនេះ។
ទោះជាបែបនេះក្តី លោក ច័ន្ទថេត ឋានរៈ ប្រធានមន្ទីរបរិស្ថានខេត្តកំពង់ស្ពឺ ប្រាប់សារព័ត៌មានក្នុងស្រុកថា លោកមិនទាន់ទទួលបានព័ត៌មាន ពីការបំពុលបរិស្ថានរបស់ក្រុមហ៊ុនកែច្នៃដំណាប់ស្វាយខាងលើនេះទេ។ យ៉ាងណា លោកថា នឹងបញ្ជូនមន្ត្រីជំនាញចុះសហការជាមួយ អាជ្ញាធរមូលដ្ឋាន ដើម្បីដោះស្រាយរឿងនេះឲ្យបានឆាប់។
លោកថា៖ « «ភូមិអីដែរបង? សូមបងជួយបាញ់រូបថត ឬវីដេអូតាមតេឡេក្រាមបន្តិចមក ចាំខ្ញុំឲ្យមន្ត្រីចុះទៅពិនិត្យ។ ហើយបងមានទាក់ទងទៅអាជ្ញាធរដែនដីហើយឬនៅ? ចឹងបើមានករណីហ្នឹងចាំមើលខ្ញុំទាក់ទងសួរទៅអាជ្ញាធរស្រុកសិន ដើម្បីសហការជាមួយអាជ្ញាធរស្រុកទាំងអស់គ្នា។ ចាំឲ្យអាជ្ញាធរគេទៅមើលមុនសិនទៅ»។
យ៉ាងណា តាមការអះអាងរបស់ លោក យ៉ឹម យ៉ុន មេភូមិបឹងងោង ឲ្យដឹងថា កន្លងមក មិនដែលឃើញអាជ្ញាធរស្ថាប័នពាក់ព័ន្ធផ្នែកណាមួយចុះជួយឈឺឆ្អាល លើកង្វល់របស់ប្រជាពលរដ្ឋ រស់នៅឃុំទឹកល្អក់នេះទេ។
លោកបារម្ភថា នៅរដូវមានភ្លៀងធ្លាក់នេះ កាកសំណល់ដែលក្រុមហ៊ុនកែច្នៃដំណាប់ស្វាយ ដឹកយកមកចាក់ចោលអនាធិបតេយ្យក្នុងមូលដ្ឋាននេះ នឹងធ្វើឲ្យប៉ះពាល់ដល់សុខភាពពលរដ្ឋ កាន់តែធ្ងន់ធ្ងរថែមទៀត បើគ្មានការទប់ស្កាត់នោះ។
លោកបន្តថា៖ «គាត់ដឹកមកចាក់អត់ចំគោលដៅ ហើយដឹកយកមកចាក់នៅពេលយប់ឡើង។ ដើរចាក់ពាសពេញភូមិស្អុយពេញទឹកពេញដី។ ផលប៉ះពាល់មិនមែនត្រឹមសត្វចិញ្ចឹម សត្វគោទេ សំខាន់ប៉ះពាល់ដល់សុខភាពមនុស្សថែមទៀត។ ចាក់កាកសំណល់ស្អុយហ្នឹងនៅលើភ្នំ ហើយដល់ពេលភ្លៀងមក ទឹកហូរមកទឹកស្អុយនោះ វាមិនចូលទំនប់ ចូលស្រះ ជាដើម គឺវាយ៉ាប់ទាំងអស់ ទាំងមនុស្សនិងសត្វគោ។ សំរាមនៅពីលើទាំងអស់ហើយ យប់ឡើងក្លិនជូរក្រត ខ្យល់ពីជើងមក ធំក្លិនជូរទឹកស្វាយពេញហ្នឹង។ ហើយភូមិខ្ញុំ មានពលរដ្ឋរស់នៅ ២០៧គ្រួសារ និងមានមនុស្សសរុបជិត ៩៨៧នាក់»។
ផ្តើមពីបញ្ហានេះ ទាំងប្រជាពលរដ្ឋ រួមជាមួយអាជ្ញាធរភូមិឃុំទឹកល្អក់ ទទូចឲ្យមន្ត្រីជំនាញក្រសួងស្ថាប័នជំនាញពាក់ព័ន្ធ ជួយទប់ស្កាត់សកម្មភាពបំពុលបរិស្ថានរបស់ក្រុមហ៊ុនកែច្នៃដំណាប់ស្វាយ Cambodian Gome Farm Food Co., ltd. ឲ្យបានឆាប់ និងមានប្រសិទ្ធភាព។ ដោយចោទថា ក្រុមហ៊ុននេះ ហាក់មានខ្នងបង្អែករង់ចាំកាងការពារសកម្មភាពល្មើសរបស់ខ្លួន ទើបហ៊ានដឹកកាកសំណល់រឹងរាវស្អុយកខ្វក់ មកចាក់ចោលនៅតាមទីសាធារណៈ យ៉ាងអនាធិបតេយ្យ ដោយគ្មានញញើតច្បាប់បែបនេះ៕
