តុលាការកម្ពុជា ក្រោមការដឹកនាំរបស់គ្រួសារលោក ហ៊ុន សែន ដែលក្រុមប្រឆំាំងចោទថា ធ្វើឱ្យបាត់ទឹកដីទៅប្រទេសវៀតណាម និងថៃផងនោះ បានផ្តន្ទាទោសបុរសម្នាក់ទៀត ឱ្យជាប់ពន្ធនាគារ ១ឆ្នាំកន្លះ ពាក់ព័ន្ធនឹងការនិយាយរឿងថៃឈ្លានពានកម្ពុជា ដែលវិធាននេះ ធ្វើឱ្យអ្នកប្រើប្រាស់សិទ្ធិត្រូវបានចាប់ឃុំខ្លួនកើនឡើងដល់ ១០៩នាក់។
អង្គការការពារសិទ្ធិមនុស្សលីកាដូ បាននិយាយនៅថ្ងៃទី១១ ខែមិថុនា ឆ្នាំ២០២៦នេះថា ចុងភៅម្ហូបការមួយរូប ត្រូវបានផ្តន្ទាទោស ពីបទ ញុះញង់ ជុំវិញការបង្ហោះសារពីបញ្ហាព្រំដែន លើហ្វេសប៊ុករបស់ខ្លួន។ ហើយថា បុរសនោះ ឈ្មោះ គង់ សុភាព អាយុ ៤៦ ឆ្នាំ នៅរាជធានីភ្នំពេញ ដែលគាត់ត្រូវបានសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគារ ១៨ខែ និងពិន័យជាប្រាក់ចំនួន ២លានរៀល។
ប្រភពនោះ បញ្ជាក់ថា ការផ្តន្ទាទោសនេះ ធ្វើឡើងនៅថ្ងៃទី២៩ ខែឧសភា ឆ្នាំ២០២៦ ដោយតុលាការ ចោទពីបទ ញុះញង់ បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមបញ្ញត្តិមាត្រា ៤៩៤ និង ៤៩៥ នៃក្រមព្រហ្មទណ្ឌ។
លោក សុភាព ត្រូវបានចាប់ខ្លួន ពាក់ព័ន្ធនឹងការចែករំលែកមតិរិះគន់នៅលើគណនីហ្វេសប៊ុករបស់លោក ជុំវិញបញ្ហាជម្លោះព្រំដែនកម្ពុជា-ថៃ ។ លោកត្រូវបានចាប់ខ្លួន នៅហាងកាហ្វេមួយក្នុងរាជធានីភ្នំពេញ នៅថ្ងៃទី២៣ ខែកុម្ភៈ ឆ្នាំ២០២៦ ដោយនគរបាលមកពីស្នងការដ្ឋាននគរបាលរាជធានីភ្នំពេញ។
ក្រុមគ្រួសាររបស់ លោក សុភាព ពុំដឹងពីការចាប់ខ្លួននេះទេ រហូតដល់លោកត្រូវបានបញ្ជូនទៅឃុំខ្លួននៅពន្ធនាគារនៅថ្ងៃបន្ទាប់។ លោក សុភាព កំពុងជាប់ឃុំនៅមណ្ឌលអប់រំកែប្រែទី១ព្រៃស រាជធានីភ្នំពេញ។ បុរសរូបនេះ សិ្ថតនៅក្នុងចំណោមមនុស្ស ១០៩នាក់ កំពុងជាប់ឃុំដោយប្រើប្រាស់សិទ្ធិ ដែលចងក្រងដោយអង្គការលីកាដូ។
ជុំវិញរឿងនេះ តំណាងរាស្ត្រពីបក្សប្រឆាំង ដែលមានជំនាញកិច្ចការព្រំដែនគឺ លោក អ៊ុំ សំអាន ធ្លាប់ប្រាប់វីអូឌីថា លោក ហ៊ុន សែន ធ្លាប់កាត់ទឹកដីខ្មែរទាំងនៅព្រំដែនគោក និងដែនសមុទ្រ រួមទាំងកោះត្រល់ ឱ្យទៅវៀតណាម តាមរយៈសន្ធិសញ្ញាព្រំដែនខុសច្បាប់ ឆ្នាំ១៩៨២-៨៣ និងឆ្នាំ១៩៨៥ ដើម្បីសងគុណវៀតណាមដែលបានលើកបន្ទប់លោក ឱ្យឡើងកាន់អំណាចនៅកម្ពុជាអំឡុងឆ្នាំ១៩៧៩។
ចំណែក លោក ហ៊ុន ម៉ាណែត ធ្វើឱ្យបាត់ទឹកដីទៅប្រទេសថៃ ជាង៧០ទីតាំង ក្នុងឆ្នាំ២០២៥ តែមិនមានអ្នកច្បាប់ណា ហ៊ានកាត់ទោសមេដឹកនាំទាំងពីរជំនាន់នេះទេ បើទោះបីមាត្រា៤៤០ នៃក្រមព្រហ្មទណ្ឌចែងថា អ្នកធ្វើឱ្យបាត់បង់ទឹកដី មានទោសក្បត់ជាតិ ត្រូវបានផ្តន្ទាទោសដល់ពន្ធនាគារអស់មួយជីវិតក្តី។
ប៉ុន្តែថា ផ្ទុយទៅវិញ ពលរដ្ឋដែលនិយាយពីទង្វើបរទេសឈ្លានពានខ្មែរ បែរជាត្រូវចោទប្រកាន់ ពីបទញុះញង់ និងចាប់ដាក់គុក ជាបន្តបន្ទាប់ច្រើនឆ្នាំមកនេះ។
បញ្ហានេះ លោកថា ជាហានិភ័យធ្ងន់ធ្ងរសម្រាប់ជាតិសាសន៍ខ្មែរ និងបូរណភាពទឹកដី ចាប់ពីពេលនេះ រហូតទៅថ្ងៃអនាគត បើគ្មានការផ្លាស់ប្តូរមេដឹកនាំឱ្យបានទាន់ពេលទេនោះ៕
