នាយករដ្ឋមន្ត្រីអង់គ្លេស លោក Keir Starmer បានបញ្ជាក់ថា កងកម្លាំងប្រដាប់អាវុធអង់គ្លេសបានស្ទាក់ចាប់ និងឡើងត្រួតពិនិត្យលើនាវាដឹកប្រេងនៃ «កងនាវាស្រមោល» របស់រុស្ស៊ីមួយគ្រឿងឈ្មោះ Smyrtos ដែលបើកបរក្រោមទង់ជាតិប្រទេសកាមេរូន នៅច្រកសមុទ្រឡាម៉ង់ (Channel) កាលពីព្រលឹមស្រាងៗថ្ងៃទី១៤ខែមិថុនា។
នៅក្នុងប្រតិបត្តិការរយៈពេល ៦ ម៉ោង ដែលជាប្រតិបត្តិការលើកដំបូងបង្អស់ដឹកនាំដោយចក្រភពអង់គ្លេស កងកុម្មង់ដូជើងទឹកភូមិន្ទ (Royal Marine commandos) និងមន្ត្រីមកពីទីភ្នាក់ងារប្រយុទ្ធប្រឆាំងបទល្មើសជាតិ បានឡើងគ្រប់គ្រងនាវានោះ។ បច្ចុប្បន្ន នាវានេះកំពុងបោះយុថ្កានៅឆ្នេរសមុទ្រ Dorset ដើម្បីតាមដានចំពោះបញ្ហាបរិស្ថាន ឬសុវត្ថិភាព។
អាជ្ញាធរអង់គ្លេស និយាយថា នាវា Smyrtos គឺជានាវាមួយក្នុងចំណោមនាវាប្រមាណ ៧០០ គ្រឿងនៃកងនាវាស្រមោល ដែលទទួលខុសត្រូវលើការដឹកជញ្ជូន ៧៥% នៃការនាំចេញប្រេងរបស់រុស្ស៊ី។ កងនាវានេះផ្តល់ឱ្យរុស្ស៊ីនូវ «ខ្សែជីវិតដ៏សំខាន់» ក្នុងការរកចំណូលដើម្បីបន្តធ្វើសង្គ្រាមប្រឆាំងនឹងអ៊ុយក្រែន។
លោក Starmer បានសរសេរនៅលើបណ្តាញសង្គម X ថា៖ «ប្រតិបត្តិការដ៏ជោគជ័យនេះ បានផ្តល់ការវាយប្រហារមួយកម្រិតទៀតទៅលើរុស្ស៊ី និងរំលឹកដល់អ្នកដែលកំពុងជួយបង្កាត់ភ្លើងសង្គ្រាមរបស់លោក ពូទីន ថា យើងនឹងមិនបណ្តោយឱ្យពួកគេលាក់ខ្លួនឡើយ»។
ក្រសួងការពារជាតិ បានឱ្យដឹងថា ប្រតិបត្តិការយោធានេះ ទទួលបានការគាំទ្រពីឧទ្ធម្ភាគចក្រ និងនាវាជើងទឹកជាច្រើន ដោយអនុវត្តឡើងក្រោមការសហការយ៉ាងជិតស្និទ្ធជាមួយបារាំង។ ក្រសួងបានបន្ថែមថា ចក្រភពអង់គ្លេសបានដាក់ទណ្ឌកម្មលើនាវាស្រមោលជាង ៥០០ គ្រឿងរួចមកហើយ ដែលធ្វើឱ្យចំណូលពីប្រេង និងហ្គាសរបស់រុស្ស៊ីធ្លាក់ចុះ ២៤% នៅក្នុងឆ្នាំ២០២៥។ កាលពីខែមីនា លោក Starmer ក៏បានផ្តល់ការអនុញ្ញាតឱ្យយោធាអង់គ្លេសឡើងត្រួតពិនិត្យលើនាវាទាំងឡាយណាដែលស្ថិតក្រោមទណ្ឌកម្ម ដែលបើកកាត់ដែនទឹករបស់ខ្លួនផងដែរ។
លោក Al Carns អតីតរដ្ឋមន្ត្រីកងកម្លាំងប្រដាប់អាវុធ បានប្រាប់ BBC ថា ប្រតិបត្តិការនេះត្រូវបានអនុវត្តយ៉ាងល្អឥតខ្ចោះ ដោយកងទ័ពបានប្រើប្រាស់ឧទ្ធម្ភាគចក្រហោះហើរទាប និងរអិលខ្សែចុះទៅលើនាវា។ នៅពេលសួរថា ហេតុអ្វីបានជាមិនធ្វើបែបនេះពីមុនមក លោកបានពន្យល់ថា កាលពីមុនមាននាវាចម្បាំងរបស់រុស្ស៊ីនៅចាំការពារ ហើយការឡើងត្រួតពិនិត្យនេះត្រូវទាមទារឱ្យឆ្លើយតបត្រឹមត្រូវតាមលក្ខខណ្ឌច្បាប់ និងទំនិញដឹកជញ្ជូន។ លោកបានបន្ថែមថា ចក្រភពអង់គ្លេសធ្លាប់បានជួយប្រទេសផ្សេងទៀតដូចជា អាមេរិក និងបារាំង ក្នុងការធ្វើបែបនេះ ហើយបន្ទាប់ពីប្រតិបត្តិការលើកដំបូងនេះជោគជ័យ អង់គ្លេសអាចនឹងធ្វើវាកាន់តែច្រើនថែមទៀត ប្រសិនបើមានឱកាស៕
