ពលរដ្ឋនៅក្រុងប៉ោយប៉ែត ភាគច្រើនជាអ្នករត់កង់បីឥណ្ឌា និងអ្នកដឹកជញ្ជូនទំនិញ ឬម្ហូបអាហារ បានឱ្យដឹងថា ប្រព័ន្ធផែនទីនៅក្រុងប៉ោយប៉ែតមានភាពមិនប្រក្រតី លោតខុសទីតាំងដោយភាគច្រើនចូលទៅក្នុងទឹកដីប្រទេសថៃ។
អ្នករត់កង់បីម្នាក់គឺលោក ឈន គន្ធា ប្រាប់វីអូឌីឱ្យដឹងនៅថ្ងៃទី១៥ ខែមិថុនា ថា បញ្ហានេះកើតឡើងជាងកន្លះខែមកហើយ ហើយវាក៏កំពុងបន្តការរំខានដល់ការរស់នៅ និងការប្រកបរបរចិញ្ចឹមជីវិត ដោយហេតុថា នៅពេលអតិថិជនប្រើកម្មវិធីកក់កង់បីលើទូរស័ព្ទដៃ នោះវានឹងលោតទីតាំងក្នុងទឹកដីថៃ ហើយណែនាំឱ្យអ្នកបើកបរជិះលើផ្លូវរញ៉េរញ៉ៃ និងមានចម្ងាយឆ្ងាយ។
លោកបន្តថា នៅពេលជិតដល់គោលដៅ នោះវានឹងលោតសញ្ញាទៅកន្លែងមួយផ្សេង។ បញ្ហានេះ បានធ្វើឱ្យអតិថិជនជាច្រើននាក់បោះបង់ការកក់ ជាហេតុធ្វើឱ្យលោកបាត់បង់ចំណូលដែលកំពុងតែធ្លាក់ចុះស្រាប់។
លោក ឈន គន្ធា និយាយថា៖ «ពេលភ្ញៀវកក់ (Booking) មក ៧-៨ ដង ចឹងយើងយកបានតែ ២ដងអីទេ ហើយ២ដងហ្នឹង យកទាំងហេងស៊យទៀត ព្រោះអីវាចាប់ទីតាំងភ្ញៀវអត់បាន។ ពេលដែលយើងទៅដល់ទីតាំងដែលគេកំណត់ឲ្យហ្នឹង ហើយយើងឆាតសួរភ្ញៀវទៅ ជួនកាលភ្ញៀវអត់តបឆាតផង ភ្ញៀវបិទទូរស័ព្ទ ហើយយើងតេទៅបិទទូរស័ព្ទទៀត។ ពេលជួនកាលតេទៅ ប៉ះជនជាតិខ្មែរទៅ គេថាពូអើយខ្ញុំនៅឆ្ងាយឯណេះទេ ដល់ពេលយើងថាយើងនៅខុសទីតាំងគ្នាឆ្ងាយណាស់ ក៏ឲ្យគេបោះបង់ការកក់ (Cancel) ទៅ ជួនកាលគេអត់ Cancel ទៀត យើងអូសផ្តាច់ខ្លួនឯងទៅ អស់លុយយើងទៀត ខាត យើងខាតទាំងជើង ខាតទាំងហ្គាស ខាតទាំងលុយក្នុងអាខោន (Account) បុកឃីង យើងទៀត»។
ក្រោយលេចឡើងបញ្ហានេះ លោក ឈន គន្ធា បានរាយការណ៍ទៅក្រុមហ៊ុនដែលភ្ជាប់កម្មវិធីកង់បីដែរ តែគ្មានចម្លើយមកទល់ពេលបច្ចុប្បន្ន។
មិនខុសពីលោក ឈន គន្ធា នៅលើបណ្ដាញសង្គមហ្វេសប៊ុក ពលរដ្ឋក្រុងប៉ោយប៉ែតជាច្រើននាក់ផ្សេងទៀតបានបង្ហោះនូវរូបភាពផែនទីដែលច្របូកច្របល់នោះ ហើយបង្ហាញការហួសចិត្ត និងឆ្ងល់ថាហេតុអ្វីបែរជាលោតគោលដៅនៅក្នុងទឹកដីថៃទៅវិញ។
ប្រព័ន្ធផែនទីដែលពលរដ្ឋកម្ពុជាប្រើប្រាស់គឺ Google Map របស់ក្រុមហ៊ុន Google ដែលចាប់រូបភាពពីផ្កាយរណបផង ប្រព័ន្ធ GPS ផង និងនៅលើដីផងតាមរយៈការថត និងការចូលរួមដាក់បញ្ចូលព័ត៌មានបន្ថែមពីអ្នកប្រើប្រាស់ (Crowdsource)។ មិនមែនមានតែ Google map នោះទេដែលមានបញ្ហា ពោលគឺសូម្បីតែ Apple map របស់ក្រុមហ៊ុន Apple ដែលដំណើរការលើកម្មវិធីផ្ញើសារ messenger និងតេឡេក្រាមក៏មានបញ្ហាដូចគ្នា។
យ៉ាងណា សម្រាប់ពលរដ្ឋនៅទីតាំង និងខេត្តផ្សេង នៅតែអាចមើលឃើញទីតាំងផែនទីក្រុងប៉ោយប៉ែតទាំងអស់ជាប្រក្រតី។
អ្នកជំនាញបច្ចេកវិទ្យា លោក ជី សុផាត មិនអាចសន្និដ្ឋានពីប្រភពនៃបញ្ហានេះបានទេ ព្រោះពុំមានការស៊ើបអង្កេតស៊ីជម្រៅណាមួយនៅឡើយ។ យ៉ាងណា លោកលើកឡើងថា បញ្ហាផែនទីនេះ អាចកើតឡើងដោយសារឧបករណ៍ប្រើប្រាស់ ការកំណត់មុខងារក្នុងឧបករណ៍ និងការចាប់សេវានៅតំបន់នោះ។
លោក ជី សុផាត និយាយថា៖ «តែបើតាមខ្ញុំគិត វាអត់ទាក់ទងជាមួយ Google ទេ វាទាក់ទងជាមួយគ្នានឹង Signal ដែលគេប្រើ ចឹងយើងត្រូវដឹងថា Signal ដែលគាត់ចាប់ ឬក៏ ទូរសព្ទហ្នឹងវា Lack of Signal យ៉ាងម៉េច នៅពេលដែលដំណើរការ។ ឧទាហរណ៍ថា វាអាចនឹងត្រូវបានចាប់ Signal ពីថៃ ឬក៏ Manual នៅក្នុងការ Setting របស់ទូរសព្ទគាត់របៀបម៉េច។ អ៊ីចឹងអាហ្នឹងខ្ញុំអត់ហ៊ានអាចឆ្លើយបានរបៀបណាទេ អាហ្នឹងទាល់តែយើង Base ទៅលើទូរសព្ទមួយៗ តើទូរសព្ទគាត់បើករាល់ថ្ងៃឃើញចឹងមែនអត់ ហើយទូរសព្ទផ្សេងវាឃើញចឹងដែរអត់ អាហ្នឹងបានយើងអាចវាយតម្លៃបានថាវាមានមូលហេតុអី។ បញ្ហាគឺអត់ដឹងមូលហេតុជាក់លាក់ ដោយសារយើងអត់មានការស៊ើបអង្កេតណាមួយត្រឹមត្រូវ ចឹងអាហ្នឹងអត់អាចឆ្លើយបានទេ»។
វីអូឌី មិនអាចទាក់ទងអភិបាលក្រុងប៉ោយប៉ែត លោក គាត ហ៊ុល ដើម្បីសុំការអត្ថាធិប្បាយជុំវិញបញ្ហានេះបានទេនៅថ្ងៃទី១៥ ខែមិថុនា។
ជាការកត់សម្គាល់ បញ្ហានេះបានកើតឡើងនៅក្រោយការបង្ក្រាបឧក្រិដ្ឋកម្មអនឡាញ ដែលបានទាញចំណាប់អារម្មណ៍អ្នកតាមដាន ថាអាចបណ្ដាលមកពីការប្រើប្រាស់ប្រព័ន្ធបង្វែងទីតាំងរបស់ក្រុមឧក្រិដ្ឋជន។
អ្នកតាមដានលើបញ្ហាឧក្រិដ្ឋកម្មអនឡាញ លោក ជុំ ឧទិត្យ ឱ្យដឹងតាមរយៈសារសំណេរថា ក្រុមឧក្រិដ្ឋជនអាចប្រើប្រាស់ប្រព័ន្ធប្រឆាំងទីតាំង ដើម្បីគេចពីការបង្ក្រាប ដែលប្រព័ន្ធនេះអាចរំខានដល់ការចាប់ទីតាំងទូរស័ព្ទដៃទូទៅដែរ។ យ៉ាងណា លោកក៏សង្ស័យដែរថា បញ្ហានេះអាចដោយសារភាគីថៃប្រើប្រាស់ប្រព័ន្ធបិទទីតាំង Anti Data GIS ឬការរំខានរលកសញ្ញាក្នុងរយៈកម្ពស់ណាមួយ ដើម្បីបិទបាំង រំខាន ឬធ្វើសកម្មភាពអ្វីមួយតាមបណ្ដោយព្រំដែន ដែលជារឿងគួរឱ្យព្រួយបារម្ភ។
ជុំវិញក្ដីបារម្ភនេះ លោកណែនាំឱ្យសមត្ថកិច្ចជំនាញផ្នែកបច្ចេកវិទ្យាប្រញាប់ឆែកមើលមូលហេតុពិតប្រាកដ និងដោះស្រាយបញ្ហានេះឱ្យត្រឡប់មកប្រក្រតីវិញ ព្រោះវារំខានដល់មុខរបរ និងសុវត្ថិភាពពលរដ្ឋ ជាពិសេសសន្តិសុខជាតិ ក្នុងពេលកម្ពុជាកំពុងមានវិវាទជាមួយប្រទេសជិតខាង៕
