ប្រជានេសាទរស់នៅស្រុកកំពង់សិលា ខេត្តព្រះសីហនុ បានអះអាងថា ក្នុងប៉ុន្មានថ្ងៃកន្លងមកនេះ មានករណីបាក់ទំនប់អាងស្តុកទឹករបស់ក្រុមហ៊ុនដូងប្រេងម៉ុងប្ញទ្ធី ហូរចូលព្រែក បណ្តាលឲ្យត្រីគ្រប់ប្រភេទ ពុលងាប់អណ្តែតពាសពេញផ្ទៃទឹក។
ពលរដ្ឋស្នើឲ្យមន្ត្រីស្ថាប័នជំនាញ ចុះពិនិត្យគុណភាពទឹកក្នុងព្រែកកំពង់សិលាឲ្យបានឆាប់ ដើម្បីទប់ស្កាត់ផលប៉ះពាល់។
លោក ឃួន ឃា អនុប្រធានសហគមន៍នេសាទសាមគ្គីព្រែកកំពង់សិលា បានឲ្យដឹងនៅថ្ងៃចន្ទនេះថា ទំនប់អាងស្តុកទឹកក្រុមហ៊ុនដូងប្រេងម៉ុងប្ញទ្ធីនេះ បានបាក់កាលពីថ្ងៃទី១២ ខែមិថុនា ឆ្នាំ២០២៦ ហើយបានហូរចូលទៅក្នុងព្រែក បណ្តាលឲ្យត្រីគ្រប់ប្រភេទងាប់អណ្តែតពេញទឹក។ លោកថា ត្រីដែលងាប់នេះ ទំនងអាចបណ្តាលមកពីសារធាតុគីមី មាននៅក្នុងទឹក ដែលបាក់ទំនប់ ឬអាងស្តុកទឹក របស់ក្រុមហ៊ុនដូងប្រេង ម៉ុងប្ញទ្ធី។
លោកស្នើឲ្យមន្ត្រីជំនាញចុះត្រួតពិនិត្យគុណភាពទឹក នៅក្នុងព្រែកកំពង់សិលា ដែលមានត្រីងាប់ឲ្យបានឆាប់ ដើម្បីផ្សព្វផ្សាយទប់ស្កាត់កុំឲ្យពលរដ្ឋ បរិភោគត្រី ឬក៏នាំយកទៅលក់នៅលើទីផ្សារ ដែលអាចប៉ះពាល់ដល់សុខភាព ឬអាយុជីវិតរបស់អ្នកបរិភោគ។
លោកបន្តថា៖ «ត្រីនៅក្នុងព្រែកកំពង់សិលាហ្នឹងពុលខ្លាំង ងាប់ទាំងត្រីតូចត្រីធំ ឲ្យតែនៅក្នុងទឹក។ ចំណុចដែលងាប់បាក់ទំនប់ហ្នឹងនៅកំពង់ដំរី អូរឡុកឡាក់ ស្ថិតក្នុងភូមិថ្មី។ ខ្ញុំសំណូមពរដល់ក្រុមហ៊ុនដូងប្រេងហ្នឹង សូមស្ថាបនាទំនប់កុំឲ្យបាក់នាំឲ្យប៉ះពាល់ដល់បរិស្ថានតាមទឹក ក្នុងសហគមន៍នេះទៀត។ ដល់ពេលបាក់ទំនប់ហ្នឹងទៅធ្វើឲ្យបាត់បង់ពូជត្រី។ ត្រីកំពុងតែកកើតឡើង ដល់ពេលងាកធ្លាយ មួយឆ្នាំពីរឆ្នាំបាក់ទំនប់ធ្លាយចឹង នាំឲ្យបាត់បង់ជីវចម្រុះអស់ អត់កើតឡើងវិញទេ»។
តំណាងសហគមន៍នេសាទរូបនេះ ក៏ស្នើដល់ក្រសួងស្ថាប័នពាក់ព័ន្ធ ជួយចុះធ្វើអន្តរាគមន៍ធ្វើយ៉ាងណា ឲ្យក្រុមហ៊ុនដូងប្រេងម៉ុងប្ញទ្ធី មានទីតាំងនៅស្រុកកំពង់សិលា ខេត្តព្រះសីហនុ ធ្វើទំនប់ឲ្យបានរឹងមាំ និងមានស្តង់ដារត្រឹមត្រូវ ដ្បិតអាងស្តុកទឹកដែលមានសារធាតុគីមីនេះ ក៏ធ្លាប់បាក់ម្តងហើយ កាលពីឆ្នាំ២០២៤ ដែលបណ្តាលឲ្យត្រីងាប់ និងបំផ្លាញដល់ជីវចម្រុះក្នុងទឹកធ្ងន់ធ្ងរបំផុត។
ទាក់ទិនបញ្ហានេះ លោក ម៉ុង ប្ញទ្ធី ដែលគេស្គាល់ថា ជាស្ថាបនិកក្រុមហ៊ុនដូងប្រេងម៉ុងប្ញទ្ធី ក្នុងបទសម្ភាសន៍ជាមួយកាសែតក្នុងស្រុក បានឆ្លើយបដិសេធថា មិនមានករណីបាក់ទំនប់អាងស្តុកទឹករបស់ក្រុមហ៊ុនលោកទេ ដោយបញ្ជាក់ថា ជារឿងចាស់កើតឡើងតាំងពីឆ្នាំ២០២៤។ ហើយបាននិយាយចំអកឲ្យអ្នកកាសែត ថាទទួលព័ត៌មានយឺត និងមិនច្បាស់ទៅវិញ?។
លោកបន្ថែមថា៖ «ព័ត៌មានចាស់ផ្អូមយូរពីរឆ្នាំហើយហ្នឹង ឥឡូវអត់មានធ្លាយទំនប់ឯណា ព័ត៌មានផ្អូមទេ។ ចុះសារព័ត៌មានអាហ្ហែងអន់ម៉្លេះហ្ហា តាំងពីឆ្នាំ២០២៤ ឥឡូវទើបមកនិយាយ។ អត់មានទេៗ អត់មានធ្លាយទំនប់ឯណាទេ អត់ទាន់មានទឹកឯណាឲ្យធ្លាយទំនប់ទេ អត់មានទេ។ ឆ្នាំនេះអត់ទាន់មានទឹកឯណា? បានហើយចឹង»។
ទោះជាបែបនេះក្តី លោក ប៊ូ សាម៉េត មេភូមិថ្មី ឃុំកំពង់សិលា បានទទួលស្គាល់ថា ពិតជាមានករណីបាក់ទំនប់អាងស្តុកទឹកក្រុមហ៊ុនដូងប្រេងម៉ុងប្ញទ្ធី ពិតមែន ហើយថា ករណីនេះ រូបលោក រួមជាមួយអាជ្ញាធរមូលដ្ឋាន និងមន្ត្រីស្ថាប័នជំនាញ ក៏បានចុះទៅដល់ទីតាំងកន្លែងបាក់ទំនប់នោះ ដើម្បីស្នើឲ្យក្រុមហ៊ុននេះ រកវិធីទប់ទំនប់ដែលបាក់នោះឲ្យបានឆាប់ ដោយបារម្ភខ្លាចមានផលប៉ះពាល់កាន់តែធ្ងន់ធ្ងរថែមទៀត។ លោកថា ក្រោយបាក់ទំនប់អាងស្តុកទឹកខាងលើនេះ បណ្តាលឲ្យត្រីគ្រប់ប្រភេទងាប់អណ្តែតពេញទឹកព្រែក។
លោកថា៖ «ធ្លាយកាកសំណល់ដូងប្រេងមកងាប់ត្រីពេញទឹក។ មិនដឹងធ្លាយតាំងពីថ្ងៃណាមកទេ ទើបមានគេរាយការណ៍មកខ្ញុំ ឲ្យចុះទៅពិនិត្យជាមួយប៉ុស្តិ៍ និងសហគមន៍នេសាទ ចុះទៅមើល។ ពលរដ្ឋរាយការណ៍មកខ្ញុំ ខ្ញុំតេទៅក្រុមហ៊ុន ហើយក្រុមហ៊ុនដាក់គ្រឿងចក្រមកទប់វិញហើយ។ ហើយខ្ញុំរួមជាមួយមេប៉ុស្តិ៍ និងសហគមន៍ចុះទៅពិនិត្យមើលដល់កន្លែង។ ត្រីងាប់អណ្តែតពេញទឹក ហើយខ្លះទៀតកំពុងតែប្រកាច់ ត្រីកន្ធរ ត្រីឆ្លូញ ត្រីខ្ជឹង បង្កងអីហ្នឹង ក៏ងាប់ដែរ»។
ចំណែក លោក ឆាយ សុគន្ធដា អភិបាលស្រុកកំពង់សិលា បញ្ជាក់ប្រាប់កាសែតក្នុងស្រុកថា នៅថ្ងៃទី១៥ខែមិថុនានេះថា ពិតជាមានករណីបាក់ទំនប់ សម្រាប់ស្តុកកាកសំណល់រាវ ចេញពីក្រុមហ៊ុនដូងប្រេងម៉ុងប្ញទ្ធី ពិតមែន ដែលលោកថាទទួលដំណឹងកាលពីថ្ងៃទី១៤ខែមិថុនានេះ។ ហើយរូបលោកក៏បានជូនដំណឹងនេះ ទៅកាន់មន្ទីរជំនាញរួចហើយដែរ ដើម្បីចុះមកពិនិត្យគុណភាពទឹក ដែលហូរចូលព្រែកបណ្តាលឲ្យត្រីងាប់នោះហើយ។
លោកថា៖ «ខ្ញុំបានទទួលព័ត៌មានតាំងពីម្សិលមិញម៉្លេះ។ កំពុងរាយការណ៍ទៅមន្ទីរបរិស្ថាន និងមន្ទីរកសិកម្ម។ ចាំមើលក្រុមការងារគេចុះមកមើលប្រភពទឹក និងយកទឹកទៅពិសោធន៍។ យើងអត់ទាន់ហ៊ានសន្និដ្ឋានទេ»។
ឆ្លើយតបបញ្ហានេះ លោក ម៉ើង សុភាព ប្រធានស្តីទីមន្ទីរបរិស្ថានខេត្តព្រះសីហនុ បានឲ្យដឹងថា ទំនប់ទឹកក្រុមហ៊ុនដូងប្រេងម៉ុងប្ញទ្ធីដែលបាក់នោះ គឺត្រូវបានបិទភ្ជាប់វិញហើយ។ ហើយមន្ត្រីជំនាញ ក៏បានចុះទៅយកសំណាកទឹកនោះទៅពិនិត្យ ដើម្បីរកផលប៉ះពាល់ និងឈានទៅរកវិធីទប់ស្កាត់។
លោកបន្តថា៖ «ម្សិលមិញខ្ញុំទទួលបានព័ត៌មានពីបងអភិបាលស្រុកកំពង់សិលាដែរ ប៉ុន្តែអត់ទាន់ដឹងថា ទំនប់បាក់នោះនៅខាងណាទេ។ ហើយព្រឹកនេះ មន្ត្រីជំនាញកំពុងចុះទៅពិនិត្យមើលជាមួយបងអភិបាលស្រុក ហើយបើបានព័ត៌មានយ៉ាងណា ចាំជម្រាបប្រាប់បងតាមក្រោយ»។
ប្រធានអង្គការការពារបរិស្ថានប្រចាំខេត្តព្រះសីហនុ លោក ជិន វណ្ណៈ បានឲ្យដឹងថា យ៉ាងហោចមានក្រុងស្រុកចំនួន៣ នៅខេត្តព្រះសីហនុ រួមមាន ក្រុងកំពង់សោម ស្រុកព្រៃនប់ និងស្រុកកំពង់សិលា តែងមានសកម្មភាពបង្ហូរទឹកស្អុយកខ្វក់ និងមានក្លិនឆួល ចេញពីក្រុមហ៊ុនផ្សេងៗ ចូលទៅក្នុងដៃព្រែក ឬសមុទ្រ ដោយមិនបានឆ្លងកាត់អាងចម្រោះទឹកស្អាត ឲ្យបានត្រឹមត្រូវជាមុនទេ ដែលបណ្តាលឲ្យសត្វស្លាប និងមច្ឆាសមុទ្រគ្រប់ប្រភេទ ងាប់ជាបន្តបន្ទាប់។
លោកស្នើដល់ក្រសួងបរិស្ថាន ត្រូវយកចិត្តទុកដាក់លើបញ្ហានៃការបង្ហូរទឹកពុល ឬទឹកកខ្វក់ចូលព្រែក ឬសមុទ្រ ព្រែកទឹកសាប និងព្រែកកំពង់សិលា ជាដើមនេះ ឲ្យមានប្រសិទ្ធភាព ព្រោះសកម្មភាពនេះ បានកើតមានជាបន្តបន្ទាប់ និងច្រើនឆ្នាំមកហើយ៕
