វត្តអារាមដែលមានអាយុកាល ១,០០0 ឆ្នាំ ដែលជានិមិត្តរូបនៃបេតិកភណ្ឌវប្បធម៌របស់អ៊ុយក្រែន បានរងការខូចខាតយ៉ាងធ្ងន់ធ្ងរកាលពីថ្ងៃទី១៥ខែមិថុនា នៅក្នុងការវាយប្រហារដ៏ធំមួយដោយរុស្ស៊ី ដែលបានសម្លាប់មនុស្ស ១០ នាក់ នៅទូទាំងប្រទេស តែប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានជជែកជាមួយមេដឹកនាំនៃប្រទេសទាំងពីរអំពីការបញ្ចប់សង្រ្គាម។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បាននិយាយថា លោកបានពិភាក្សាជាមួយលោក ត្រាំ អំពីកិច្ចខិតខំប្រឹងប្រែងបញ្ចប់ជម្លោះរយៈពេលបួនឆ្នាំនេះ មុនពេលកិច្ចប្រជុំ G7 នៅប្រទេសបារាំង។ លោក ត្រាំ ក៏បានប្រាប់មេដឹកនាំរុស្ស៊ី លោក វ្ល៉ាឌីមៀ ពូទីន តាមទូរស័ព្ទផងដែរថា វាជារឿងសំខាន់ណាស់ក្នុងការបញ្ចប់សង្រ្គាមនេះ។
ការខូចខាតលើវត្តអារាម Kyiv Pechersk Lavra ដែលជាទីតាំងបេតិកភណ្ឌពិភពលោករបស់ UNESCO ត្រូវបានបង្កើតឡើងក្នុងឆ្នាំ១០៥១ បានទាក់ទាញការថ្កោលទោសពីអន្តរជាតិ។ រដ្ឋមន្ត្រីការបរទេសបារាំងបាននិយាយថា ការវាយប្រហារនេះ គឺប្រៀបដូចជាការទម្លាក់គ្រាប់បែកលើព្រះវិហារ Notre Dame ក្នុងទីក្រុងប៉ារីសដែរ។
លោក ហ្សេឡេនស្គី ដែលបានទៅពិនិត្យការខូចខាត និងបានហៅវាថាជា «ឧក្រិដ្ឋកម្មដ៏ធ្ងន់ធ្ងរបំផុតមួយរបស់រុស្ស៊ីប្រឆាំងនឹងវប្បធម៌គ្រិស្តសាសនា»។ ប៉ុន្តែលោកបានសង្កត់ធ្ងន់ថា អ្វីៗគ្រប់យ៉ាងនឹងត្រូវជួសជុលឡើងវិញ។
រុស្ស៊ីបានបដិសេធការវាយប្រហារលើវត្តអារាមនេះ ដោយហៅការចោទប្រកាន់នេះថាជា «ការប្រឌិត» ហើយបាននិយាយថា វាត្រូវបានខូចខាតដោយសារមីស៊ីលការពារអាកាស Patriot របស់អ៊ុយក្រែនវិញទេ។ ទោះជាយ៉ាងណា អង្គភាពសន្តិសុខ SBU របស់អ៊ុយក្រែន បាននិយាយថា ខ្លួនបានប្រមូលបំណែកដ្រូន Geran-2 ដែលជាដ្រូនអត្តឃាតរបស់រុស្ស៊ី នៅកន្លែងវាយប្រហារ។
មន្ត្រីអ៊ុយក្រែន បានរាយការណ៍ថា មនុស្ស ៥ នាក់បានស្លាប់ នៅក្នុងការវាយប្រហារលើទីក្រុងគៀវ និង ៥ នាក់ទៀតបានស្លាប់នៅក្នុងទីក្រុងខាកៀវ (Kharkiv)។ ទន្ទឹមនឹងនេះ ការវាយប្រហារដោយដ្រូនរបស់អ៊ុយក្រែនលើទីក្រុង Tula របស់រុស្ស៊ី ក៏បានសម្លាប់មនុស្ស ៣ នាក់ផងដែរ។
កងទ័ពអ៊ុយក្រែន បានបញ្ជាក់ថា រុស្ស៊ីបានបាញ់បង្ហោះមីស៊ីល ៧០ គ្រាប់ និងដ្រូន ៦១១ គ្រឿងក្នុងមួយយប់ ហើយប្រព័ន្ធការពារអាកាសរបស់ខ្លួនបាញ់ទម្លាក់បានភាគច្រើន ប៉ុន្តែមីស៊ីលបាលីស្ទីកនៅតែជាបញ្ហាប្រឈមធំ។
ប្រមុខគោលនយោបាយការបរទេសរបស់សហភាពអឺរ៉ុប លោកស្រី Kaja Kallas បានហៅការវាយប្រហារនេះថាជា «ឧក្រិដ្ឋកម្មសង្រ្គាម» ខណៈដែលរដ្ឋមន្ត្រីការបរទេសអ៊ុយក្រែន បានស្នើសុំកិច្ចប្រជុំបន្ទាន់មួយនៃក្រុមប្រឹក្សាសន្តិសុខអង្គការសហប្រជាជាតិ។
មុនកិច្ចប្រជុំ G7 លោក ហ្សេឡេនស្គី បាននិយាយថា លោកបានស្នើឱ្យមានការចរចាដោយផ្ទាល់ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន សម្រាប់ដំណោះស្រាយបទឈប់បាញ់ ប៉ុន្តែលោក ពូទីន បានបដិសេធ។ លោកបានបន្ថែមថា លោកបានផ្តល់ជម្រើសក្នុងការជួប លោក ពូទីន នៅក្នុងកិច្ចប្រជុំកំពូល G7 នៅប្រទេសបារាំង ឬនៅសហរដ្ឋអាមេរិក៕
