ប្រធានាធិបតីសហរដ្ឋអាមេរិក លោក ដូណាល់ ត្រាំ បានមានប្រសាសន៍ថា កិច្ចព្រមព្រៀងបឋមដើម្បីបញ្ចប់សង្រ្គាមជាមួយអ៊ីរ៉ង់ ត្រូវបានចុះហត្ថលេខារួចរាល់ហើយ ហើយព័ត៌មានលម្អិតនឹងត្រូវប្រកាសផ្សាយ «ក្នុងពេលឆាប់ៗនេះ»។
លោកបានថ្លែងក្នុងអំឡុងពេលកិច្ចពិភាក្សាជាមួយប្រធានាធិបតីបារាំង លោក អេម៉ានូអែល ម៉ាក្រុង នៅក្នុងកិច្ចប្រជុំកំពូល G7 ថា៖ «ខ្ញុំរីករាយណាស់ក្នុងការជម្រាបថា កិច្ចព្រមព្រៀងទាំងអស់ត្រូវបានចុះហត្ថលេខាហើយ»។
មន្ត្រីជាន់ខ្ពស់អាមេរិក បានរាយការណ៍សង្ខេបថា ច្រកសមុទ្រហរមូស (Strait of Hormuz) នឹងត្រូវបើកឡើងវិញនៅថ្ងៃទី១៩ខែមិថុនា ដែលជាថ្ងៃតែមួយដែលកិច្ចព្រមព្រៀងនេះ ត្រូវចុះហត្ថលេខាជាផ្លូវការនៅទីក្រុងហ្សឺណែវ។ ការចរចាបច្ចេកទេសលើកម្មវិធីនុយក្លេអ៊ែររបស់អ៊ីរ៉ង់ ត្រូវបានរំពឹងថា នឹងចាប់ផ្តើមនៅសប្តាហ៍នេះ ខណៈដែលការបន្ធូរបន្ថយទណ្ឌកម្ម នឹងអាស្រ័យលើការបំពេញការប្តេជ្ញាចិត្តរបស់អ៊ីរ៉ង់។
អនុប្រធានាធិបតី ជេឌី វ៉ានស៍ (JD Vance) បានប្រាប់ទូរទស្សន៍ CNN ថា អនុស្សរណៈនៃការយោគយល់គ្នា (MOU) នេះ មានប្រវែង «ប្រហែលមួយទំព័រកន្លះ» និងជាឯកសារទូទៅ ដោយព័ត៌មានលម្អិតជាច្រើន នឹងត្រូវដោះស្រាយក្នុងដំណាក់កាលចរចាបច្ចេកទេស។
លោកបានបន្ថែមថា នៅក្នុងកថាខណ្ឌទីមួយ អ៊ីរ៉ង់នឹងប្តេជ្ញាចិត្តចំពោះ «សន្តិភាព និងស្ថិរភាពក្នុងតំបន់» រួមទាំងការបញ្ឈប់ការផ្តល់មូលនិធិដល់អង្គការភេរវកម្ម និងមានការប្តេជ្ញាចិត្តដែលអាចផ្ទៀងផ្ទាត់បាន ក្នុងការមិនបង្កើតអាវុធនុយក្លេអ៊ែរ។ កិច្ចព្រមព្រៀងនេះ ត្រូវបានចុះហត្ថលេខាតាមប្រព័ន្ធអេឡិចត្រូនិកដោយលោក ត្រាំ លោក វ៉ានស៍ និងប្រធានសភាអ៊ីរ៉ង់ លោក ម៉ូហាំម៉ាត់ បាគ័រ ហ្កាលីបាហ្វ។
កិច្ចព្រមព្រៀងនេះ នឹងបន្តបទឈប់បាញ់រយៈពេល ៦០ ថ្ងៃទៀត ដើម្បីឱ្យភាគីទាំងសងខាងចរចាលើព័ត៌មានលម្អិតនៃកិច្ចព្រមព្រៀងចុងក្រោយ។
នាយករដ្ឋមន្ត្រីប៉ាគីស្ថាន លោក សេបាស ហ្សារីហ្វ ដែលជាអ្នកសម្របសម្រួល បានមានប្រសាសន៍ថា វាបានរាប់បញ្ចូលទាំង «ការបញ្ចប់ជាបន្ទាន់ និងជាអចិន្ត្រៃយ៍នៃប្រតិបត្តិការយោធានៅគ្រប់មុខព្រួញទាំងអស់ រួមទាំងនៅក្នុងប្រទេសលីបង់ផងដែរ»។
ទោះជាយ៉ាងណា មន្ត្រីអាមេរិកបានបញ្ជាក់ថា ការដកកងទ័ពអ៊ីស្រាអែលចេញពីទឹកដីលីបង់ មិនមែនជាលក្ខខណ្ឌនៃកិច្ចព្រមព្រៀងនោះទេ ហើយអ៊ីស្រាអែលនៅតែរក្សាសិទ្ធិក្នុងការការពារខ្លួន។
នាយករដ្ឋមន្ត្រីអ៊ីស្រាអែល លោក បេនយ៉ាមីន ណេតានីយ៉ាហ៊ូ បានមានប្រសាសន៍ថា កងកម្លាំងអ៊ីស្រាអែលនឹងបន្តស្ថិតនៅក្នុងតំបន់សន្តិសុខក្នុងប្រទេសលីបង់ ស៊ីរី និងហ្គាហ្សា «ដរាបណាមានការចាំបាច់» ហើយអ៊ីរ៉ង់នឹងមិនត្រូវបានអនុញ្ញាតឱ្យទទួលបានអាវុធនុយក្លេអ៊ែរឡើយ ទោះជាមាន ឬមិនមានកិច្ចព្រមព្រៀងក៏ដោយ។
លោក ត្រាំ ក៏បានប្រកាសថា លោកបានបញ្ជាឱ្យដកការបិទផ្លូវទឹករបស់កងទ័ពជើងទឹកអាមេរិក លើកំពង់ផែអ៊ីរ៉ង់ជាបន្ទាន់។
អនុរដ្ឋមន្ត្រីការបរទេសអ៊ីរ៉ង់ លោក កាហ្សេម ហ្គារីបាបាឌី បានបញ្ជាក់ពីការបញ្ចប់ប្រតិបត្តិការយោធា ដោយលើកឡើងថា អ្នកសម្របសម្រួលកាតា បានធ្វើការចរចាជិត ១៥ ម៉ោង នៅទីក្រុងតេហេរ៉ង់។ ទោះជាយ៉ាងណា ក្រសួងការបរទេសអ៊ីរ៉ង់ បាននិយាយថា ទីក្រុងតេហេរ៉ង់នៅតែមាន «ការមិនទុកចិត្តយ៉ាងខ្លាំង» ចំពោះអាមេរិក ហើយកិច្ចព្រមព្រៀងនេះ គ្រាន់តែជាជំហានមួយឆ្ពោះទៅរកការកាត់បន្ថយភាពតានតឹង។
នៅក្នុងសេចក្តីថ្លែងការណ៍រួម មេដឹកនាំនៃប្រទេសអង់គ្លេស បារាំង អាល្លឺម៉ង់ និងអ៊ីតាលី បាននិយាយថា ពួកគេ «ត្រៀមខ្លួនជាស្រេចក្នុងការលើកលែងទណ្ឌកម្មដែលពាក់ព័ន្ធ ដើម្បីជាការឆ្លើយតបទៅនឹងជំហានដ៏ច្បាស់លាស់ និងអាចផ្ទៀងផ្ទាត់បានដោយអ៊ីរ៉ង់ លើកម្មវិធីនុយក្លេអ៊ែររបស់ខ្លួន» ខណៈដែលនាយករដ្ឋមន្ត្រីអង់គ្លេស លោក សឺ គៀ ស្តាម័រ បានហៅការប្រកាសនេះថាជាជំហានទៅមុខដ៏មានសារៈសំខាន់បំផុត ក្នុងការធានាស្ថិរភាពក្នុងតំបន់៕
