កម្ពុជាបានទម្លាយឱ្យដឹងថា ខ្លួនបានចេញកំណត់ទូតថ្មីមួយទៀតទៅភាគីថៃ ដើម្បីពន្លឿនការបោះបង្គោលព្រំដែនបណ្តោះអាសន្ន និងដោះស្រាយការងារដែលនៅសេសសល់ ខណៈថៃចេះតែពន្យាពេលម្តងហើយម្តងទៀត ក្រោយមានបទឈប់បាញ់ជាងកន្លះឆ្នាំមកនេះ។
រដ្ឋលេខាធិការដ្ឋានកិច្ចការព្រំដែនកម្ពុជា បាននិយាយក្នុងសេចក្តីប្រកាសព័ត៌មាន ចុះថ្ងៃទី១៦ ខែមិថុនានេះថា ដើម្បីបន្តការងារវាស់វែង និងបោះបង្គោលព្រំដែនបណ្តោះអាសន្ន និងការងារដែលនៅសេសសល់ក្រុមការងារកម្រិតបច្ចេកទេស នៅតែបន្តអនុវត្តការងាររបស់ខ្លួនដដែល។
ក្នុងន័យនេះ គណៈកម្មការ JBC ភាគីកម្ពុជា បានផ្ញើជាថ្មីម្តងទៀតនូវកំណត់ទូត ចុះថ្ងៃទី១៥ ខែមិថុនា ឆ្នាំ២០២៦ «ស្នើឱ្យភាគីថៃចាត់បញ្ជូនក្រុមវាស់វែងចម្រុះ (JSTs) ដើម្បីបន្តចុះអនុវត្តការងារនៅលើដីជាក់ស្តែងឱ្យបានឆាប់បំផុត»។
កម្ពុជាបញ្ជាក់ថា ខ្លួនប្រកាន់ជំហរយ៉ាងម៉ឺងម៉ាត់ក្នុងការតវ៉ាប្រឆាំងយ៉ាងដាច់អហង្ការ ទៅនឹងសកម្មភាពឈ្លានពានកាន់កាប់ទឹកដីកម្ពុជា ដោយខុសច្បាប់របស់យោធាថៃ និងសកម្មភាពបន្តរំលោភបំពានលើបូរណភាពទឹកដី និងអធិបតេយ្យកម្ពុជា ព្រមទាំងការបង្កើតស្ថានភាពថ្មីនៅលើដីជាក់ស្តែង។ ហើយកម្ពុជា ប្រកាសមិនទទួលស្គាល់ជាដាច់ខាត នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំង ទាំងពេលកន្លងមក ទាំងពេលបច្ចុប្បន្ន និងអនាគត។
ការចេញកំណត់ទូតថ្មីទៀតរបស់កម្ពុជា ជំរុញឱ្យថៃងាកមកពន្លឿនការបោះបង្គោលព្រំដែននេះ ក៏ចំពេល មានសេចក្តីរាយការណ៍ជាបន្តបន្ទាប់មកថា ថៃបន្តពង្រីកព្រំដែនថ្មី ដោយឯកតោភាគី រំលោភយកដីខ្មែរ ជាងកន្លះឆ្នាំមកនេះ ទាំងគ្មានការរំខានពីក្រសួងការពារជាតិកម្ពុជា។ ការរំលោភបំពានរបស់ថៃនេះ កម្ពុជាបានតវ៉ាជាង ៧រយលើករួចមកហើយដែលថៃមិនគោរពបទឈប់បាញ់។
ជុំវិញបញ្ហានេះ ក្រោយមានបទឈប់បាញ់ចុះថ្ងៃទី២៧ ខែធ្នូ ឆ្នាំ២០២៥ កម្ពុជា បានចេញកំណត់ទូតដូចគ្នានេះច្រើនលើករួចមកហើយ ដើម្បីជំរុញការវាស់វែងដីជាក់ស្តែងនេះ តែភាគីថៃចេះតែរកលេសពន្យាពេល ខណៈថៃមានប្រៀបលើកម្ពុជា ដែលថៃបានដណ្តើមគ្រប់គ្រងទឹកដីកម្ពុជាជាង ៧០ទីតាំង។
ទីតាំងទាំងនោះ នៅតាមបណ្តាខេត្តចំនួន៦ជាប់ព្រំដែន រួមមាន ខេត្តពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ និងព្រះវិហារ។ លើសពីនេះ ថៃក៏វាយដណ្តើមគ្រប់គ្រងប្រាសាទបូរាណខ្មែរជាច្រើនផងដែរ ដូចជា ប្រាសាទតាមាន់ធំ ប្រាសាទតាក្របី និងប្រាសាទខ្នាជាដើម។ ហើយមកទល់ពេលនេះ អ្នកតាមដានពីគណបក្សប្រឆាំង បានអះអាងថា ថៃបន្តពង្រីកព្រំដែនថ្មីរំលោភយកដីខ្មែរ ដោយឯកតោភាគី ថៃសម្រុកធ្វើហេដ្ឋារចនាសម្ព័ន្ធលើដីខ្មែរដែលថៃដណ្តើមគ្រប់គ្រង រួមទាំងថៃនៅតែបន្តរុលចូលច្បាមយកដីខ្មែរ ទាំងគ្មានការរំខានពីក្រសួងការពារជាតិកម្ពុជា ខណៈមេដឹកនាំមិនព្រមប្តឹងថៃ ដើម្បីទាមទារទឹកដីទាំងនោះយកត្រឡប់មកវិញ ហើយប្រកាន់ជំហរចរចាទ្វេភាគីជាមួយថៃ ទោះមានសង្ឃឹមតែ១ភាគរយក្តី៕
