ប្រជាពលរដ្ឋខ្មែរមួយចំនួន ដែលបានធ្វើដំណើរទៅទស្សនាខេត្តព្រះសីហនុ ហើយបានចូលទៅថតរូបកម្សាន្ត នៅលើស្ពានកោះពស់ បានរិះគន់ចំពោះតម្លៃសំបុត្រផ្ញើរថយន្តក្នុងមួយគ្រឿង ២ម៉ឺនរៀល និងថ្លៃផ្ញើម៉ូតូ១ម៉ឺនរៀល នៅចំណតក្បែរស្ពានកោះពស់ ដោយថាជាតម្លៃខ្ពស់ ពិបាកទទួលយកបាន ដែលអាជ្ញាធរពាក់ព័ន្ធគួរដោះស្រាយបញ្ហានេះ ដើម្បីមុខមាត់ខេត្ត និងទាក់ទាញភ្ញៀវឱ្យបន្តទៅកម្សាន្តនៅទីនោះ។
លោក កុយ សារឿន ជាភ្ញៀវទេសចរម្នាក់ ស្ថិតក្នុងចំណោមពលរដ្ឋ ក៏ដូចជាភ្ញៀវទេសចរជាតិច្រើនទៀត បានលើកឡើងថា កាលពីចុងសប្តាហ៍កន្លងទៅនេះ រូបគាត់បាននាំក្រុមគ្រួសារមកពីរាជធានីភ្នំពេញ ចូលមកទស្សនាកម្សាន្ត នៅតាមឆ្នេរនានាក្នុងខេត្តព្រះសីហនុ។ ក្នុងនោះ ក៏បានចូលទៅទស្សនា និងថតរូបកម្សាន្តនៅលើស្ពានកោះពស់។ ប៉ុន្តែអ្វីដែលលោកកត់សម្គាល់នោះ គឺតម្លៃសំបុត្រផ្ញើរថយន្ត បានកំណត់តម្លៃខ្ពស់ពេក ដោយក្នុងរថយន្ត១គ្រឿង ត្រូវបង់លុយ ២ម៉ឺនរៀល និងម៉ូតូ ១ម៉ឺនរៀលឯណោះ។
លោកថា មិនមែនត្រឹមតែរូបលោកទេ ដែលគិតថា តម្លៃផ្ញើរថយន្តហាក់មានតម្លៃខ្ពស់ សូម្បីពលរដ្ឋ ដែលជាម្ចាស់រថយន្តភាគច្រើន ក៏បានលើកឡើងដូចគ្នាដែរ។ លោកថា តម្លៃផ្ញើរថយន្តនេះ គួរកំណត់ត្រឹម ៨ពាន់រៀល ឬ១ម៉ឺនរៀលសមរម្យហើយ ប្រយោជន៍ដើម្បីកុំឲ្យប៉ះពាល់ដល់វិស័យទេសចរណ៍ ចូលមកខេត្តនេះនាថ្ងៃខាងមុខ។
លោកបន្តថា៖ «សំណូមពរឲ្យកំណត់តម្លៃចំណតរថយន្តនៅស្ពានកោះពស់ហ្នឹង ៥ពាន់រៀលហ្នឹងបានហើយ។ លេង ២ម៉ឺនរៀលចឹងងាប់បាត់ហើយ ឡានចូលមួយភ្លេតសោះហ្នឹង។ ខ្ញុំចូលទៅមើលស្ពាន ចតមួយភ្លេត មកវិញស្មានតែ ២ពាន់ ឬ៥ពាន់រៀល លេង ២ម៉ឺនរៀល ហើយម៉ូតូ ១ម៉ឺនរៀល»។
ភ្ញៀវទេសចរផ្សេងទៀត គឺលោក តុង វន្នី ដែលបានចូលមកទស្សនាក្រុងព្រះសីហនុ កាលពីថ្ងៃអាទិត្យកន្លងទៅនេះ បានឲ្យដឹងដែរថា ចំពោះតម្លៃសំបុត្រផ្ញើរថយន្ត នៅស្ពានកោះពស់នេះ គឺមានតម្លៃខ្ពស់បន្តិច ដោយរថយន្ត១គ្រឿង យកលុយ ២ម៉ឺន ជារឿងកោមិនដាក់ទឹកទេ។ លោកថា តម្លៃនេះ គួរកំណត់ត្រឹមរថយន្តមួយគ្រឿង ១ម៉ឺនរៀលបានហើយ ហើយចំពោះម៉ូតូគួរយកត្រឹម ៤ពាន់ ឬ៥ពាន់រៀលសមរម្យហើយ។
លោកបន្តថា រឿងនេះ បើគិតទៅហាក់ដូចជារឿងតូចតាចទេ ប៉ុន្តែបានធ្វើឲ្យប៉ះពាល់ដល់អារម្មណ៍របស់ភ្ញៀវទេសចរ ចូលមកទស្សនាខេត្តព្រះសីហនុខ្លះដែរ។
លោកបន្ថែមថា៖ «ខ្ញុំជាប្រជាពលរដ្ឋម្នាក់ ដែលបានទៅលេងកំពង់សោម កោះពស់។ ហើយចូលលេងកោះពស់មួយភ្លេតចេញមកវិញ ខាងចំណតរថយន្តគេយកថ្លៃចត ៥ដុល្លារ ឬស្មើ ២ម៉ឺនរៀល។ ចឹងចង់សំណូមពរដល់អភិបាលខេត្តព្រះសីហនុ ជួយទម្លាក់តម្លៃចំណតបន្តិចទៅ ដើម្បីបានកំណើនភ្ញៀវទេសចរយើងបានច្រើនជាងនេះ។ គ្រាន់តែចំណតធម្មតាសោះ យកលុយច្រើនពេក។ ខ្ញុំគិតថា ២ម៉ឺនរៀលហ្នឹងថ្លៃពេក សូមចុះមកត្រឹម ១ម៉ឺនរៀលបានហើយ ហើយចំណតម៉ូតូ គឺសុំយកត្រឹម ៤ពាន់ ឬ៥ពាន់បានហើយ»។
ឆ្លើយតបបញ្ហានេះ លោក ឡង់ ឌីម៉ង អភិបាលរងខេត្តព្រះសីហនុ បានប្រាប់សារព័ត៌មានក្នុងស្រុក កាលពីពេលថ្មីៗនេះថា តំបន់កោះពស់ គឺជាទីតាំងឯកជន ហើយកន្លងមកតំបន់នេះ មិនបានបើកឲ្យភ្ញៀវទេសចរ ចូលទៅទស្សនាទេ។ ប៉ុន្តែក្រោយមក ក៏ត្រូវបានថ្នាក់ដឹកនាំរដ្ឋបាលខេត្តព្រះសីហនុ ស្នើឲ្យម្ចាស់ទីតាំងនោះ សម្របសម្រួលបើកទីតាំងស្ពានកោះពស់នេះ ដើម្បីអាចឲ្យភ្ញៀវទេសចរ ចូលទៅកម្សាន្តបានមួយកន្លែងថ្មីទៀត។ តែយ៉ាងណា លោកថា ចំពោះកង្វល់ភ្ញៀវទេសចរ លើតម្លៃសំបុត្រផ្ញើយានយន្តនេះ រដ្ឋបាលខេត្ត និងព្យាយាមសម្របសម្រួល ជាមួយក្រុមហ៊ុន ដើម្បីកំណត់តម្លៃនេះជាថ្មីឡើងវិញ។
លោកថា៖ «បាទ!រឿងកោះពស់ហ្នឹងពិបាកណាស់ វាគឺជាទីតាំងឯកជន កោះហ្នឹងគឺជាទីតាំងឯកជន។ តែដោយសារយើងទេ មិនចង់ឲ្យទុកកោះហ្នឹងទុកចោលអញ្ចឹង ក៏រៀបចំឲ្យមានសមិទ្ធផលទេសចរណ៍មួយកន្លែងទៀតទៅ? ហើយក៏បានកំណត់សង្កត់ឲ្យក្រុមហ៊ុនហ្នឹង បើកឲ្យសាធារណជន បានចូលទៅលេង។ ហើយជាធម្មតាទេ ដល់ពេលបងប្អូនចូលទៅលេងទៅ វាមានសំរាម បន្ទោរបង់ គេក៏មានរៀបចំជាបង្គន់ គេរៀបចំកន្លែងចតឡាន គេរៀបចំកន្លែងងូតទឹកសាប គេរៀបចំដឹកសំរាមចេញជាដើម។ អាហ្នឹងវាត្រូវនឹងតម្លៃហ្នឹង ថ្លៃសំរាមថ្លៃអីហ្នឹង តែគ្រាន់តែគាត់ៗដាក់ជាតម្លៃប៉ុណ្ណឹង។ តែឡានចតនៅខាងលើនេះ គឺអត់យកលុយទេ»។
ទាក់ទិនបញ្ហានេះដែរ លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា ចាត់ទុកការកំណត់តម្លៃសំបុត្រ ថ្លៃចតរថយន្តមួយគ្រឿង រហូតដល់ ២ម៉ឺនរៀល សម្រាប់ចូលទៅទស្សនាស្ពានកោះពស់ នាក្រុងព្រះសីហនុនេះ ថាជាតម្លៃមួយខ្ពស់ហួសហេតុពេក ដែលទាមទារឲ្យថ្នាក់ដឹកនាំរដ្ឋខេត្តព្រះសីហនុ គួរជួបពិភាក្សាជាមួយម្ចាស់ចំណត កំណត់តម្លៃនេះជាថ្មីឡើងវិញ ដើម្បីកុំឲ្យប៉ះពាល់ដល់កំណើនភ្ញៀវទេសចរ និងកិត្តិយសខេត្តនេះធ្ងន់ធ្ងរថែមទៀត។
លោកបន្ថែមថា៖ «បាទ! តម្លៃចំណតរហូតដល់ទៅ ២ម៉ឺនរៀលនេះ គឺជាតម្លៃមួយដ៏ថ្លៃ។ ខ្ញុំគិតថា គួរតែពិនិត្យមើលឡើងវិញដែរ ហើយចំណុចនេះ អាជ្ញាធរ គួរធ្វើការជាមួយអ្នកផ្តល់សេវានេះ ដើម្បីពិនិត្យមើលទៅលើតម្លៃ ដែលពិបាកទទួលយកដោយអតិថិជន។ ហើយខ្ញុំយល់ថា វា ក៏អាចប៉ះពាល់ដល់មុខមាត់ខេត្តទេសចរណ៍មួយនេះដែរ»។
យ៉ាងណាក៏ដោយចុះ ភ្ញៀវទេសចរជាតិភាគច្រើន បានទទូចស្នើដល់ លោក ម៉ាង ស៊ីណេត អភិបាលខេត្តព្រះសីហនុ ឲ្យកំណត់តម្លៃថ្លៃសំបុត្រ សម្រាប់ចតរថយន្ត នៅចំណតស្ពានកោះពស់នេះ ឲ្យដូចគ្នានឹងចំណតនៅតាមឆ្នេរមួយចំនួនទៀត នាក្រុងព្រះសីហនុ ដូចជាឆ្នេរអូរឈើទាល ដែលយកថ្លៃសំបុត្រចតរថយន្តត្រឹម ១ដុល្លារ ឬស្មើ ៤ពាន់រៀលប៉ុណ្ណោះ។ បើមិនដូច្នេះទេ ចំណុចអវិជ្ជមានទាំងនេះ អាចនឹងធ្វើឲ្យប៉ះពាល់ដល់កិត្តិយស របស់ខេត្តជាប់ឆ្នេរសមុទ្រដ៏ស៊ីវិល័យមួយនេះជាមិនខានទេ ជាពិសេសនឹងអាចនាំឲ្យប៉ះពាល់ដល់កំណើនភ្ញៀវទេសចរ ចូលមកទស្សនាខេត្តនេះនាថ្ងៃខាងមុខផងដែរ៕
