អតិថិជនរងគ្រោះដោយសារក្រុមហ៊ុនហួយវ័ន ផេ (Huione Pay) ភាគច្រើនជាជនជាតិចិន ចេញតវ៉ាទ្រង់ទ្រាយធំជាងមុននៅមុខស្ថានទូតចិនប្រចាំកម្ពុជា នាថ្ងៃអង្គារនេះ រកកិច្ចអន្តរាគមន៍ជំរុញឱ្យក្រុមហ៊ុននេះសងលុយវិញ ក្រោយក្រុមហ៊ុនបិទទ្វារ ហើយបង្កកប្រាក់ពួកគេ ដែលជនរងគ្រោះថា ក្រុមហ៊ុននេះជាប់ពាក់ព័ន្ធនឹងក្មួយលោក ហ៊ុន សែន គឺលោក ហ៊ុន តូ។
អតិថិជនរបស់ក្រុមហ៊ុន ហួយ វ័ន ផេ ម្នាក់គឺកញ្ញា ចេ ដែលថ្លែងទាំងបិទមុខជិតជាភាសាចិន និងមានអ្នកបកប្រែ បានស្នើស្ថានទូតចិនជំរុញឱ្យអាជ្ញាធរកម្ពុជា ប្រគល់ប្រាក់ឱ្យពួកគេវិញឱ្យលឿន និងត្រូវនិយាយទៀងត្រង់ ជៀសវាងកុហកបោកប្រាស់ពួកគេម្ដងហើយម្ដងទៀតបែបនេះ ។
ស្ត្រីអ្នកតវ៉ារូបនោះ និយាយថា ការនិយាយមិនពិតបែបនេះ អាចនាំឱ្យខូចកេរ្តិ៍ឈ្មោះកម្ពុជាទៅដល់អ្នកវិនិយោគផ្សេងទៀត នាពេលអនាគត។ លើសពីនេះ ស្ត្រីរូបនេះបញ្ជាក់ថា ដោយសារប្រាក់របស់ខ្លួនប្រមាណ ៣០ម៉ឺនដុល្លារអាមេរិក ត្រូវបានក្រុមហ៊ុនបង្កក ដែលជាហេតុធ្វើឱ្យគាត់គ្មានប្រាក់សម្រាប់ដោះស្រាយជីវភាពប្រចាំថ្ងៃទេ ខណៈស្ថានទូតចិនមិនទាន់ជួយអន្តរាគមន៍ជួយដោះស្រាយនៅឡើយ ក្រៅតែពីរុញពួកគេប្ដឹងទៅតុលាការ។
កញ្ញា ចេ តាមរយៈអ្នកបកប្រែ៖ «លុយទាំងអស់(៣០ម៉ឺនដុល្លារ) ដាក់ក្នុងហួយវ័ន ឥឡូវគ្មានអីដោះស្រាយជីវភាព គ្មានអីហូបចុកទាល់តែសោះ!»។
ក្នុងពេលតវ៉ានេះ ស្ថានទូតបានហៅជនជាតិ២នាក់ ជាតំណាងចូលជួបមន្ត្រីទូត ប៉ុន្តែពុំទាន់មានលទ្ធផលនោះទេ។ នេះបើយោងតាមជនរងគ្រោះជាខ្មែរម្នាក់ ដែលចូលរួមតវ៉ានៅមុខស្ថានទូតចិន ហើយថ្លែងលាក់ឈ្មោះ។ អ្នកស្រីរៀបរាប់ថា ទិដ្ឋភាពនៅមុខស្ថានទូត មានកងកម្លាំងជាច្រើនត្រូវបានដាក់ពង្រាយ និងហាមឃាត់អ្នកតវ៉ាមិនឱ្យថតរូប និងលើកបដាដែលមានរូបលោក ហ៊ុន តូ និងថ្នាក់ដឹកនាំចិនឡើយ។
ស្ត្រីរូបនេះបន្តថា សកម្មភាពរបស់សមត្ថកិច្ចពិតជាគួរឱ្យខ្លាច ហើយរិតត្បិតខ្លាំង ខណៈការតវ៉ាកន្លងមក មន្ត្រីទូតចិនធ្លាប់លើកទឹកចិត្តឱ្យជនរងគ្រោះប្ដឹងទៅតុលាការ។ ប៉ុន្តែ អ្នកស្រីមើលឃើញថា ដំណោះស្រាយនេះ ហាក់ពុំមានប្រសិទ្ធភាពទេ ព្រោះទាំងអ្នកស្រី និងជនជាតិចិន សុទ្ធតែពុំជឿជាក់លើការរកយុត្តិធម៌ពីតុលាការ។ ហើយថា កម្ពុជាមានឈ្មោះអាក្រក់ខាងរំលោភបំពានច្បាប់ និងពោរពេញដោយអំពើពុករលួយជាដើម។
ស្ត្រីរូបនោះនិយាយថា៖ «មេធាវីឯកជនមិនហ៊ានធ្វើទេ ដោយសារគេខ្លាចខូចកេរ្តិ៍ឈ្មោះ ឬក្រេឌីតគេ ហើយធ្វើទៅអត់បានលុយ។ ហើយគាត់(មេធាវី)ថា ធ្វើរឿងហ្នឹងទៅមិនបានអី អ៊ីចឹងបើគាត់យកលុយយើង(ជនរងគ្រោះ) ទៅវាដូចជាព្រៃផ្សៃពេក»។
ជុំវិញករណីនេះ អនុប្រធានគណបក្សឆន្ទៈខ្មែរ លោក សុន ឆ័យ នៅតែយល់ថា ករណីក្រុមហ៊ុន ហួយវ័ន ផេ នេះ គឺជាទំនួលខុសត្រូវ ១០០ភាគរយរបស់ធនាគារជាតិ ក្នុងនាមសេនាធិការរបស់រដ្ឋាភិបាល។ យ៉ាងណា លោកជំរុញឱ្យស្ថាប័នពាក់ព័ន្ធត្រូវរកយុត្តិធម៌ដល់ជនរងគ្រោះ ដើម្បីបង្កើនជំនឿលើប្រព័ន្ធតុលាការរបស់កម្ពុជា។
លោក សុន ឆ័យ ថ្លែងថា៖ «រដ្ឋាភិបាលគួរតែហ៊ានអាកាត់រឿងដោះស្រាយ ដូចយើងដឹងហើយនៅក្នុងប្រទេសដែលគេអនុវត្ត មានស្ថាប័នគេប្រើសេវាល្អដល់ពលរដ្ឋគេ គឺស្ថាប័នដែលទទួលខុសត្រូវហ្នឹង ហើយជាអ្នកជួយដោះស្រាយ ហើយក្នុងករណីនេះ យើងដឹងហើយ គឺស្ថាប័នដែលត្រូវដោះស្រាយជូនពលរដ្ឋហ្នឹង គឺធនាគារជាតិហ្នឹង តែធនាគារជាតិមិនដោះស្រាយ ហើយរុញឱ្យពលរដ្ឋទៅប្តឹងទៅតុលាការបែបនេះ គឺខ្វះការទទួលខុសត្រូវ ហើយធ្វើឱ្យមិនមែនតែពលរដ្ឋខ្មែរទេដែលអស់សង្ឃឹម គឺថាមានជនបរទេសដែលគេប្រើប្រាស់ធនាគារហើយ ក៏គេលែងជឿទុកចិត្តដែរទៅលើស្ថាប័នដែលទទួលខុសត្រូវ»។
ក្រៅពីការរិតត្បិតជនរងគ្រោះ មិនឱ្យលើកបដាបានដោយសេរី ជាប់ស្ថានទូត ដោយអហិង្សានោះ សមត្ថកិច្ចក៏បានរារាំងអ្នកសារព័ត៌មានមិនឱ្យថតរូបសកម្មភាពនេះថែមទៀតពីដំបូង ព្រមទាំងបង្ខំឱ្យអ្នកសារព័ត៌មានលុបរូបភាពចេញពីឧបករណ៍អេឡិកត្រូនិក មុនអនុញ្ញាតឱ្យចេញពីកន្លែងតវ៉ា។
នាយកប្រតិបត្តិសមាគមសម្ព័ន្ធអ្នកសារព័ត៌មានខេមបូចា លោក ណុប វី ប្រាប់វីអូឌីនៅថ្ងៃទី១៦ ខែមិថុនានេះថា ការទាមទារឱ្យអ្នកកាសែតលុបរូបភាព ដែលពួកគេថតក្នុងពេលបំពេញការងារវិជ្ជាជីវៈនៅទីសាធារណៈនោះ គឺជារូបភាពបំភិតបំភ័យ ហើយមិនគួរកើតមានទាល់តែសោះ។ លោកបន្តថា អាជ្ញាធរគួរយកចិត្តទុកដាក់ដោះស្រាយបញ្ហារបស់ជនរងគ្រោះ ជាជាងហាមអ្នកកាសែត ទោះទីនោះនៅមុខស្ថានទូតចិនក៏ដោយ។
លោក ណុប វី ថ្លែងថា៖ «បើយើងនៅតែមានរូបភាពបែបហ្នឹង វាកាន់តែរុញច្រានឱ្យស្ថានភាពនៃលំហការងាររបស់អ្នកសារព័ត៌មានហ្នឹង គឺស្ថិតនៅក្រោមការរឹតត្បិត ហើយនិងការភ័យខ្លាច ហើយវាមិនបង្ហាញនូវរូបភាពមួយល្អទេ សម្រាប់ការជំរុញឱ្យមានភាពល្អប្រសើរឡើង នៅក្នុងផ្នែកសេរីភាព ឬក៏ការងាររបស់អ្នកសារព័ត៌មាននៅក្នុងប្រទេសកម្ពុជាយើង។ ការធ្វើសកម្មភាពបែបហ្នឹង គួរតែមានការកែលម្អ ហើយខ្ញុំយល់ឃើញថា នៅក្នុងក្របខណ្ឌនៃការអនុវត្តតួនាទីភារកិច្ចការបំពេញវិជ្ជាជីវៈរបស់អ្នកសារព័ត៌មាន គួរតែត្រូវបានគាំទ្រ និងត្រូវបានលើកកម្ពស់ថែមទៀតបាទ»។
យ៉ាងណា ក្រោយមានវត្តមានអ្នកតវ៉ាកាន់តែច្រើន ការគំរាមកំហែងហាក់បានដកថយ ដែលក្រុមអ្នកតវ៉ាអាចលើកបដាបង្ហាញរូបមេដឹកនាំចិន និងរូបលោក ហ៊ុន តូ រួមទាំងស្រែកតាមឧបករណ៍បំពងសំឡេងជាភាសាចិន ដោយពួកគេឈរនៅលើចញ្ចឹមផ្លូវម្ខាងជិតស្ថានទូតចិន លើមហាវិថីម៉ៅសេទុងដដែល ដោយគ្មានការបង្ក្រាប និងចាប់ខ្លួនដូចការតវ៉ានៅមុខធនាគារជាតិកម្ពុជា នាពេលកន្លងមកឡើយ។
ការតវ៉ាជាថ្មីនេះ បន្ទាប់ពីពួកគេធ្លាប់រងការប្រើហិង្សាដោយឃោរឃៅ ពីសំណាក់អាជ្ញាធរនៅមុខធនាគារជាតិ ព្រមទាំងចាប់ខ្លួនជនរងគ្រោះ២នាក់ ដោយចោទថា ជាអ្នកដឹកនាំតវ៉ាថែមទៀត។ លើសពីនេះ លោក ហ៊ុន តូ តាមរយៈមេធាវីបានចេញលិខិតបដិសេធថ្មីៗនេះ ពីការមិនពាក់ព័ន្ធនឹងក្រុមហ៊ុន ហួយវ័ន ផេ ទោះមានភាគហ៊ុន ៣០ភាគរយ ខណៈក្រុមហ៊ុននេះ ត្រូវសហរដ្ឋអាមេរិកដាក់ទណ្ឌកម្ម ពាក់ព័ន្ធនឹងបទឧក្រិដ្ឋលាងលុយកខ្វក់ និងអំពើឆបោក។
រឿងអាស្រូវរបស់ក្រុមហ៊ុន ហួយវ័ន ផេ (Huione Pay) ដែលពាក់ព័ន្ធនឹងលោក ហ៊ុន តូ គឺជាករណីលាងលុយកខ្វក់កម្រិតអន្តរជាតិ និងការកាត់បង្កកលុយអតិថិជនរាប់ពាន់នាក់។ ករណីនេះ បានបង្កឱ្យមានការតវ៉ាយ៉ាងខ្លាំងក្លា ពីសំណាក់អតិថិជនខ្មែរ និងចិន បន្ទាប់ពីក្រុមហ៊ុនបានផ្អាកសេវាដកប្រាក់។
ក្រសួងរតនាគារសហរដ្ឋអាមេរិក បានដាក់ក្រុមហ៊ុន Huione Group ចូលក្នុងបញ្ជីខ្មៅ និងកាត់ផ្តាច់ចេញពីប្រព័ន្ធហិរញ្ញវត្ថុ។ ក្រោយមក ធនាគារជាតិនៃកម្ពុជា បានប្រកាសដកអាជ្ញាបណ្ណ និងធ្វើការជម្រះបញ្ជីក្រុមហ៊ុននេះ។ ជាមួយគ្នានេះ ក្រុមហ៊ុនក៏បានលួចប្តូរឈ្មោះទៅជា H-Pay មុនពេលប្រឈមមុខនឹងការដកប្រាក់យ៉ាងគំហុក។
ការចេញមុខទទួលស្គាល់ និងបដិសេធរបស់លោក ហ៊ុន តូ មានភាគហ៊ុន ៣០% ដែលធ្វើឡើងនៅក្នុងសេចក្តីបំភ្លឺជាសាធារណៈ គឺលោក ហ៊ុន តូ ដែលត្រូវជាបងជីដូនមួយរបស់លោកនាយករដ្ឋមន្ត្រី ហ៊ុន ម៉ាណែត បានទទួលស្គាល់ថា លោកពិតជាមានភាគហ៊ុន ៣០% នៅក្នុងក្រុមហ៊ុន Huione Pay តាំងពីឆ្នាំ២០២០ ពិតមែន។
រឿងអាស្រូវនេះ ផលប៉ះពាល់លើអតិថិជនជាច្រើន និងត្រូវបានរាយការណ៍ថា ទឹកប្រាក់នៅក្នុងគណនីរបស់ពួកគេត្រូវបានកាត់ចេញ ឬធ្លាក់ចុះដល់សូន្យដុល្លារ ធ្វើឱ្យជនរងគ្រោះជាង ១៣០០នាក់ មិនអាចដកលុយបាន បាននាំគ្នាតវ៉ានៅមុខធនាគារជាតិ និងស្ថានទូតចិន ដែលឈានដល់ការប៉ះទង្គិចគ្នា និងចាប់ខ្លួនតំណាងបាតុករកន្លងមក៕
