Social Issues, ព័ត៌មានជាតិ, វប្បធម៌

ពលរដ្ឋស្នើអាជ្ញាធរខេត្តកំពតលើកកម្ពស់បេតិកភណ្ឌវប្បធម៌ក្រោយអគារសម័យបារាំងក្លាយជាកន្លែងផឹកស៊ី

លី ស្រីវី
| ១៦ មិថុនា ២០២៦
ម៉ោង ២២:២៥

ពលរដ្ឋ និងក្រុមយុវជន ឱ្យដឹងថា អាជ្ញាធរខេត្តកំពត បណ្ដែតបណ្ដោយឱ្យក្រុមអ្នករកស៊ីបើកកន្លែងផឹកស៊ី បារ(Bar)បារាំង និងសេវាកម្មកម្សាន្តពេលរាត្រីកំពុងកើនឡើងច្រើន ដោយមិនខ្វល់ខ្វាយពីវិស័យទេសចរណ៍វប្បធម៌ បេតិកភណ្ឌប្រវត្តិសាស្ត្រ ដែលរដ្ឋាភិបាលស្នើសុំចុះបញ្ជីបេតិកភណ្ឌវប្បធម៌នោះឡើយ។

ពលរដ្ឋរស់នៅក្រុងកំពត ស្នើសុំហៅឈ្មោះហៅក្រៅថា សម ពន្លក ប្រាប់វីអូឌីនៅថ្ងៃទី១៥ ខែមិថុនាថា បច្ចុប្បន្នអគារបេតិកភណ្ឌជាច្រើនទីតាំងក្នុងក្រុងកំពត អាជ្ញាធរបានជួលឱ្យអ្នករកស៊ីធ្វើជាកន្លែងបារ(Bar)បារាំង បម្រើគ្រឿងស្រវឹង សង្ស័យអាចបង្កប់នូវសេវាកម្មផ្លូវភេទ និងគ្រឿងញៀន។ ប្រការនេះធ្វើឱ្យភ្ញៀវទេសចរមានគុណភាពថយចុះច្រើន។ លោកថា ម្ចាស់អាជីវកម្មខ្លះ ចាក់ធុងបាសឮសំឡេងខ្លាំងរហូតដល់យប់ជ្រៅ រំខានខ្លាំងដោយគ្មានប្រព័ន្ធទប់សំឡេង រំខានដល់ពលរដ្ឋ និងការស្នាក់នៅរបស់អ្នកទេសចរ។

លោក សាន ពន្លក និយាយថា៖ «ឥឡូវហ្នឹងអគារអស់ហ្នឹងមានការជួលយកទៅធ្វើជាបារ កន្លែងផឹកស៊ីអីចឹងទៅ បារបារាំង ជាភោជនីយដ្ឋាន ហើយមួយចំនួននៃទីតាំងទាំងអស់ហ្នឹងគេចាក់សំឡេងឮខ្លាំង ដែលវាធ្វើឱ្យរំខានដល់ការរស់នៅ ហើយនិងការស្នាក់នៅរបស់ភ្ញៀវទេសចរនៅក្នុងក្រុងកំពត»។

ភ្ញៀវទេសចរ និងយុវជនដែលទៅកម្សាន្តនៅក្រុងកំពត ឱ្យដឹងថា ក្រុងប្រវត្តិសាស្ត្របន្សល់ពីសម័យបារាំង ហាក់ដូចមិនទាន់ឃើញមានអ្វីប្រែប្រួលនោះឡើយ ចាប់តាំងពីឆ្នាំ២០១៧ មកទល់ពេលនេះ ហើយសំណង់អគារបេតិកភណ្ឌចាស់ៗ មិនទាន់ត្រូវបានថែទាំឱ្យល្អ សមនឹងទីក្រុងបុរាណបន្សល់ពីសម័យបារាំង។ រីឯការសាងសង់អគារថ្មីៗវិញ ក៏មិនផ្អែកទៅតាមបែបបទទីក្រុងបេតិកភណ្ឌចំណាស់ដែរ។ បន្ថែមពីនេះទៀត ការបង្កើតឱ្យមានបារកម្សាន្ត សេពគ្រឿងស្រវឹង ក្លាយជាបញ្ហាប្រឈមប៉ះពាល់គុណភាពទេសចរណ៍ខេត្តកំពតទាំងមូល។

យុវជនរស់នៅរាជធានីភ្នំពេញធ្លាប់ទៅកម្សាន្តនៅក្រុងកំពត លោក ប៉ុក បុល សង្កេតឃើញថា អាជ្ញាធរគួរតែមានវិធានការណ៍លុបបំបាត់ ឬរៀបចំកែលម្អទីតាំងអាជីវកម្មទាំងនោះឡើងវិញ ព្រមទាំងហាមមិនឱ្យសាងសង់ផ្ទះអាជីវកម្មត្រចៀកកាំនៅតំបន់ទីប្រជុំជនក្នុងក្រុងកំពត ដើម្បីបន្ថយផលប៉ះពាល់សណ្ដាប់ធ្នាប់ទីក្រុងបេតិកភណ្ឌចំណាស់មួយនេះ។

លោក ប៉ុក បុល និយាយថា៖ «មន្ត្រីនៅក្នុងតំបន់គួរតែមើលដែរ អត់អាចមើលរំលងបានទេ។ ដឹងហើយ មានផលប្រយោជន៍ មានបង់ពន្ធ បង់អី ឬក៏អាចលុយក្រោមតុអីទៅ បានជាគេធ្វើមើលមិនឃើញអីចឹងទៅណា។ ផ្ទះរបស់គេ គេចង់ធ្វើម៉េចក៏បាន ប៉ុន្តែយើងភ្លេចគិតមួយចំណុចទៀត វាផ្ដល់ភាពកខ្វក់នៅក្នុងទីរួមខេត្តហ្នឹងទាំងមូលតែម្ដង។ កន្លែងហ្នឹងតូចនៅក្នុងខេត្តទេ ក៏ប៉ុន្តែវារីកសាយភាយពេញមួយទីរួមខេត្តតែម្ដង»។

យុវជនសិក្សាជំនាញផ្នែកស្រាវជ្រាវអភិវឌ្ឍន៍គម្រោងនៅកម្ពុជា លោក ថន ស័ក្កិដា យល់ថា វិស័យទេសចរណ៍វប្បធម៌ ជាប្រភពចំណូលជាតិសំខាន់ រដ្ឋាភិបាលគួរយកចិត្តទុកដាក់គ្រប់គ្រង និងអភិរក្សឱ្យបានត្រឹមត្រូវ ដោយធានាអភិបាលកិច្ចល្អ មានប្រព័ន្ធសុវត្ថិភាពសង្គម និងសណ្ដាប់ធ្នាប់សាធារណៈ។

លោក ថន ស័ក្កិដា និយាយថា៖ «តំបន់ណាត្រូវអភិរក្ស អភិរក្សទៅ ព្រោះយើង កាលណាយើងចុះបញ្ជីហើយ យើងត្រូវមានកាតព្វកិច្ចអភិរក្សហ្មង។ ហើយយើងមិនត្រឹមអភិរក្សសម្រាប់ខ្លួនយើងទេ ដូចខ្ញុំបញ្ជាក់ដដែល អភិរក្សសម្រាប់ជាទ្រព្យសម្បត្តិសកល ទ្រព្យសម្បត្តិអន្តរជាតិ។ អាហ្នឹងបើយើងគ្រប់គ្រងបានត្រឹមត្រូវ វាមានចំណូល វាខុសពីឧស្សាហកម្មផ្សេងទៀត ព្រោះអាឧស្សាហកម្មមួយនេះ អត់ចេញកាបូនទេ។ អញ្ចឹងយើងគ្រាន់តែធានា[…] រឿងសំខាន់យើងគិតតែទម្រង់អា Social Security សុវត្ថិភាពសង្គម ធ្វើម៉េចឱ្យវាមានអភិបាលកិច្ចល្អ»។

វីអូឌី មិនទាន់អាចទាក់ទងសុំការបំភ្លឺជុំវិញរឿងនេះ ពីអភិបាលខេត្តកំពត លោក ម៉ៅ ធនិន្ទ បាននៅឡើយទេ គិតត្រឹមម៉ោងផ្សាយនេះ។ រីឯអ្នកនាំពាក្យក្រសួងវប្បធម៌ លោក ស៊ុម ម៉ាប់ និងអ្នកនាំពាក្យក្រសួងទេសចរណ៍ លោក ជុក ជំនោរ ក៏ពុំទាន់អាចអាចទាក់ទងបានដែរ ដោយទូរសព្ទហៅចូលច្រើនដង តែគ្មានអ្នកលើក នៅថ្ងៃទី១៦ ខែមិថុនា។

អ្នកឃ្លាំមើលបញ្ហាបរិស្ថាននិងសង្គម លោក អូត ឡាទីន យល់ថា រដ្ឋាភិបាលគួរតែយកចិត្តទុកដាក់ការពារ និងអភិរក្សតំបន់បេតិកភណ្ឌឱ្យល្អ ដោយមិនត្រូវបណ្ដោយឱ្យតំបន់នោះក្លាយជាតំបន់អនាធិបតេយ្យ បម្រើប្រយោជន៍អ្នករកស៊ី ប៉ះពាល់មុខមាត់ជាតិនោះឡើយ។

លោកថា អាគារបារាំងជួលឱ្យវិស័យឯកជនដោយខ្វះការគិតគូរវែងឆ្ងាយ នឹងបំផ្លាញគុណតម្លៃ កិត្តិយស និងកេរ្តិ៍ឈ្មោះនៃតំបន់បេតិកភណ្ឌប្រវត្តិសាស្ត្រ ប៉ះពាល់ដល់កិត្តិយសរដ្ឋាភិបាល។

លោក អូត ឡាទីន ថ្លែងថា៖ «ពួកគាត់យកទៅអភិវឌ្ឍន៍ គាត់អត់បានគិតគូរអំពីនិរន្តរភាពវែងឆ្ងាយ នាំឱ្យមានបញ្ហាប៉ះពាល់តំបន់បេតិកភណ្ឌវប្បធម៌ ខូចនូវគុណតម្លៃ ហើយខូចនូវកិត្តិយសកេរ្តិ៍ឈ្មោះ ហើយអាចខូចទៅដល់ឈ្មោះល្អនៃទីតាំងនោះផង ហើយប៉ះពាល់ទៅដល់កិត្តិយសរបស់រដ្ឋាភិបាលផង។ ខ្ញុំយល់ថា ការអភិរក្ស ការថែរក្សាបានល្អ ដោយយោងទៅលើការពលរដ្ឋចូលរួមចំណែក នៅក្នុងការការពារថែរក្សាតំបន់នោះ ហើយផ្សាភ្ជាប់ឱ្យពួកគាត់រកចំណូលបានពីតំបន់នោះ»។

កន្លងទៅ ក្រសួងវប្បធម៌ សហការជាមួយក្រសួងទេសចរណ៍ និងអាជ្ញាធរខេត្តកំពត ចងក្រងឯកសារស្នើសុំចុះបញ្ជី ក្រុងកំពត ជាតំបន់បេតិកភណ្ឌវប្បធម៌ និងត្រៀមដាក់បញ្ចូលជាទីក្រុងបេតិកភណ្ឌពិភពលោក របស់អង្គការយូណេស្កូ (UNESCO) ដោយសារទីក្រុងនេះសម្បូរទៅដោយសំណង់ស្ថាបត្យកម្មបុរាណរចនាបថបារាំង ។

ក្រសួងថា ខេត្តកំពតមានអគាររចនាបថបារាំងចំនួន ៣៥៥ អគារ ចុះបញ្ជីរួចរាល់ដែលរក្សាបានទម្រង់ទ្រង់ទ្រាយដើមល្អ។ រីឯ អាគារខ្លះ ស្ថិតនៅទីតាំងសំខាន់ៗ ដូចជា អគាររដ្ឋបាលខេត្ត តំបន់ផ្សារក្រណាត់ចាស់ និងអគារអមដងព្រែកកំពត ជាដើម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។