ក្រោយពីប្រមូលផ្តុំគ្នាតវ៉ាទ្រង់ទ្រាយធំ នៅមុខស្ថានទូតចិនប្រចាំកម្ពុជា មិនទាន់មានដំណោះស្រាយ នៅថ្ងៃទី១៧ខែមិថុនានេះ ជនជាតិចិនមួយក្រុម ដែលរាយការណ៍ថា ១ ៣០០នាក់ បានចាញ់បោកក្រុមហ៊ុនហួយវ័ន បានបន្តតវ៉ាមុខធនាគារជាតិនៃកម្ពុជា ស្រែកទាមទារឱ្យក្រុមហ៊ុន រួមទាំងក្មួយលោក ហ៊ុន សែន គឺលោក ហ៊ុន តូ សងលុយពួកគេវិញ ក្រោយក្រុមហ៊ុននេះបិទដំណើរការដកប្រាក់ ហើយធនាគារជាតិរុញករណីនេះទៅតុលាការ។
សំឡេងស្រែកតវ៉ា៖ «ស្នើសុំជួបចរចាៗៗ ស្ថានទូតចិន និងធនាគារជាតិទាំងពីរហ្នឹង អត់មានបានដោះស្រាយអីទេ បានពួកខ្ញុំមកតវ៉ានៅមុខធនាគារជាតិហ្នឹងទៀត។ ពួកខ្ញុំចង់បានថា ថ្ងៃណាគិតលុយឱ្យពួកខ្ញុំ ព្រោះបានឱ្យពួកខ្ញុំចុះឈ្មោះយកលុយហ្នឹងរហូតមកដល់ឥឡូវហ្នឹង វាជាងកន្លះខែហើយ តែអត់ឃើញឱ្យលុយហ្នឹង។ ខ្ញុំចង់បានពាក្យពិតប្រាកដ ថាតើថ្ងៃណាឱ្យពួកខ្ញុំទទួលបានប្រាក់ហ្នឹង?»។
ពលរដ្ឋរងគ្រោះម្នាក់ដែលថ្លែងលាក់អត្តសញ្ញាណនៅមុខធនាគារជាតិ នៅថ្ងៃទី១៧ ខែមិថុនាថា ខ្លួនកំពុងជួបបញ្ហាជាប់គាំងលុយក្នុងក្រុមហ៊ុន ហួយ វ័ន និង ហេច្ឆ ផេ (H Pay) ខណៈការរកដំណោះស្រាយ តាមរយៈក្រុមហ៊ុនជម្រះបញ្ជីគ្មានតម្លាភាព។ ជនរងគ្រោះរូបនេះ បន្តថា អ្នកមានលុយតិចអាចទទួលបានការសងត្រឡប់ខ្លះ ខណៈអ្នកដែលមានលុយច្រើនមិនត្រូវបានអើពើឡើយ។ ប្រភពដដែលបន្តថា លុយទាំងនេះជាលុយដែលរកបានដោយកម្លាំងញើសឈាមស្របច្បាប់ និងមិនមែនជាលុយកខ្វក់ដែលពាក់ព័ន្ធនឹងសកម្មភាពអនឡាញទេ។
អតិថិជនរូបនោះ និយាយថា៖ «ហេតុអីបានជាធនាគារព្រីនប៊ែង អាចជំរះបញ្ជីបាន មនុស្សម្នាក់ៗមានលុយគ្រប់គ្នា អាចដកបានគ្រប់ចំនួន ហេតុអីបានជាហួយវ័ន អេចផេ មិនអាចដកលុយគ្រប់ចំនួនបាន ហេតុអ្វី? (ព្រីនប៊ែង)លុយគេ ៤ពាន់ដុល្លារ គេសងទៅវិញឱ្យបាន ១ពាន់ដុល្លារ គេសងឱ្យទៅវិញបាន១ភាគរយ ប៉ុន្តែពួកខ្ញុំមិនបានត្រូវការបែបនេះ លុយរបស់ខ្ញុំ ត្រូវតែសងមកឱ្យខ្ញុំ។ ហេតុអ្វី? ដូចខ្ញុំនិយាយខាងលើ ធនាគារព្រីន ជួយដោះស្រាយបាន ហេតុអីហួយវ័ន មិនជួយដោះស្រាយបាន»។
អតិថិជនរងគ្រោះម្នាក់ទៀតជាជនជាតិចិន ថ្លែងដោយលាក់អត្តសញ្ញាណដែរនោះ អះអាងថា អ្នកស្រីជាអាជីវករតូចតាចដែលរកប្រាក់ដោយសុចរិត ខណៈប្រាក់របស់ខ្លួនត្រូវបានក្រុមហ៊ុនបង្កក និងគ្មានដំណោះស្រាយសោះ។ អ្នកស្រីសម្ដែងការងឿងឆ្ងល់យ៉ាងខ្លាំង ចំពោះភាពមិនប្រក្រតីនៃការបិទក្រុមហ៊ុន ហួយ វ័ន ក្នុងឆ្នាំ២០២៤ ខណៈកម្មវិធីនៅតែបន្តដំណើរការដល់ឆ្នាំ២០២៥។
អ្នកស្រីនិយាយក្នុងសំដីដើមថា៖ «ទោះបីជាមានការអន្តរាគមន៍ពីស្ថានទូតចិន ប៉ុន្តែដំណោះស្រាយនៅតែមានភាពស្រពិចស្រពិល និងស្ថិតក្រោមការសម្ងាត់ ដែលធ្វើឱ្យជនរងគ្រោះមានការព្រួយបារម្ភយ៉ាងខ្លាំង។ ក្នុងនាមអាជីវករនៅតែទទូចឱ្យមានការដោះស្រាយជាបន្ទាន់ និងតម្លាភាព ដោយបញ្ជាក់ថា ប្រាក់ទាំងនេះ គឺជាប្រាក់ចំណូលស្របច្បាប់សម្រាប់ទ្រទ្រង់ជីវភាពប្រចាំថ្ងៃរបស់ខ្លួនតែប៉ុណ្ណោះ»។
ចំណែកអតិថិជនរងគ្រោះម្នាក់ទៀត ដែលថ្លែងលាក់អត្តសញ្ញាណនៅមុខធនាគារជាតិដូចគ្នា បានរៀបរាប់យ៉ាងច្រើនពីបញ្ហាដែលនាំឱ្យអ្នកស្រីប្រើប្រាស់កម្មវិធីរបស់ក្រុមហ៊ុន ហួយ វ័ន គឺដោយសារតែកម្មវិធីនេះមានភាពងាយស្រួលក្នុងការដក និងដាក់លុយ ហើយនៅពេលនោះគាត់យល់ថា វាជារឿងស្របច្បាប់ជាដើម។ ប៉ុន្តែ បច្ចុប្បន្នអ្នកស្រីមិនអាចដកលុយជាង ៣០ម៉ឺនដុល្លារវិញបានឡើយ ហើយអ្នកស្រីសម្ដែងការខកចិត្តយ៉ាងខ្លាំង ចំពោះការដោះស្រាយមិនមានភាពស្មើគ្នាថែមទៀត។
អតិថិជនរូបនោះ និយាយថា៖ «ដោះស្រាយពួកខ្ញុំ តវ៉ាតទៅទៀត ព្រោះអាហ្នឹងលុយរបស់ខ្ញុំ មិនមែនលុយរបស់អ្នកណា លុយរបស់ខ្ញុំ ហេតុអីខ្ញុំយកមិនបាន។ មូលហេតុអីបានគាត់អត់មានជួយដោះស្រាយឱ្យប្រជាជន គាត់ឃើញប្រជាជនវេទនា អត់ជួយដោះស្រាយ ហេតុអី? ខ្ញុំចង់ដឹងតែប៉ុណ្ណឹង។ រាល់ថ្ងៃហ្នឹងខ្ញុំវាអត់បាយហូបទេនៀក ឱ្យខ្ញុំធ្វើម៉េច? អ្នកណាជួយខ្ញុំ បើរដ្ឋអត់ជួយប្រជាជនដែរ ធ្វើម៉េចហរ! ប្រជាជនលំបាកវេទនា ហើយធ្វើឱ្យគេជឿជាក់លើប្រទេសខ្មែរយើង ទាល់តែដោះស្រាយរឿងលុយកាក់ហ្នឹងឱ្យប្រជាជន គេអ្នក ចង់និយាយថា គេចង់មកបោះទុននៅស្រុកខ្មែរយើង ក៏អត់ហ៊ានបោះទុនដែរ ព្រោះស្រុកខ្មែរយើង សូម្បីរឿងបន្តិចបន្តួចហ្នឹងអត់មានដោះស្រាយបានផង ឱ្យធ្វើម៉េចទៀត»។
វីអូឌី ពុំអាចសុំការឆ្លើយតបនឹងការតវ៉ារបស់អតិថិជនរងគ្រោះ ដោយសារក្រុមហ៊ុន ហួយវ័ន ផេ ពីសំណាក់អគ្គទេសាភិបាលធនាគារជាតិ អ្នកស្រី ជា សិរី បានទេនៅថ្ងៃទី១៧ ខែមិថុនា នេះ។ ខណៈកន្លងទៅ អ្នកស្រី ជា សិរី បានរុញឱ្យអតិថិជនទាំង ១៣០០នាក់ប្ដឹងទៅតុលាការដោយខ្លួនឯង។
ចំណែក អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ថា ការមិនដោះស្រាយបញ្ហាអតិថិជនរងគ្រោះដោយសារក្រុមហ៊ុន ហួយ វ័ន ផេ នឹងបង្កផលជះមិនល្អចំពោះវិស័យហិរញ្ញវត្ថុនៅកម្ពុជា។ លោកថា ស្ថាប័នជំនាញគួរកោះហៅអតិថិជនទាំងអស់ទៅបំភ្លឺតាមវិជ្ជាជីវៈ ដោយត្រូវស្ដាប់មើលថា ហេតុអ្វីបានជាការដោះស្រាយកន្លងមក មិនទទួលបានយុត្តិធម៌ ឬមានបញ្ហាជាប់គាំងនៅត្រង់ចំណុចណាមួយ។ លោកបន្តថា ការដោះស្រាយដោយតម្លាភាពតាមរយៈធនាគារជាតិ និងស្ថាប័នពាក់ព័ន្ធគឺចាំបាច់ណាស់។
ប៉ុន្តែផ្ទុយទៅវិញ លោកថា បើសិនករណីនេះ មិនអាចដោះស្រាយបានទេ គឺត្រូវមានរបាយការណ៍ប្រកាសជាសាធារណៈផងដែរ។ លោកលើកឧទាហរណ៍ថា បើអ្នកតវ៉ានេះមិនជាប់ពាក់ព័ន្ធនឹងសកម្មជនអនឡាញដែលជាបទល្មើសជាក់ស្តែង ឬធ្លាប់ទទួលលុយប្រភពមិនច្បាស់លាស់ជាដើមនោះ គឺអាជ្ញាធរត្រូវដោះស្រាយបញ្ហានេះភ្លាមៗ ដើម្បីស្ដារមុខមាត់កម្ពុជា។
លោក សេក សុជាតិ ថ្លែងថា៖ «កាលណាមិនព្រមដោះស្រាយបែបហ្នឹង ការជះ ផលឬក៏ប៉ះពាល់ដល់មុខមាត់សង្គមប្រទេសយើងនេះគឺជៀសមិនផុតទេ ហើយនេះគឺជាចំណុចមួយដែលខ្ញុំយល់ថា គួរតែដល់ពេលវេលាហើយនឹងគួរដោះស្រាយឱ្យបានប្រសើរ ដើម្បីធានាបាននៃយុត្តិធម៌សម្រាប់អតិថិជនទាំងអស់ ហើយក៏អាចផ្តល់នូវទំនុកចិត្តសម្រាប់ធនាគារនៅកម្ពុជាដែរផងដែរ»។
ចំណែក នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត យល់ថា ការបន្តអូសបន្លាយមិនដោះស្រាយករណីក្រុមហ៊ុន ហួយ វ័ន គឺកាន់តែបង្កផលប៉ះពាល់ដល់ជនរងគ្រោះបន្តទៀត ខណៈពួកគេហាក់មិនចង់ដោះស្រាយតាមផ្លូវតុលាការតាមការជំរុញរបស់ធនាគារជាតិឡើយ ដោយចង់ដោះស្រាយក្រៅប្រព័ន្ធតុលាការទៅវិញ។ លោកបន្តថា បើអាជ្ញាធរពាក់ព័ន្ធមិនដោះស្រាយករណីនេះឱ្យបានឆាប់ទេ លោកបារម្ភថា អាចនឹងមានបាតុភាពកើតឡើងនេះជាបន្តបន្ទាប់ ឬឈានទៅមានហិង្សាឡើងវិញជាដើម។
លោក អំ សំអាត ថ្លែងថា៖ «បើសិនជាក្រសួងស្ថាប័នពាក់ព័ន្ធហ្នឹង នៅតែបណ្តោយឱ្យបញ្ហានេះវាអូសបន្លាយទៅ អានឹងវាជារឿងមួយដែលបាតុភាពមិនសមស្របត្រូវបានកើតឡើងជាបន្តទៀត! ហើយយើងបារម្ភថាថ្ងៃណាមួយ វាអាចឈានដល់អំពើហិង្សាកើតឡើងវិញណាស់ បាទ»។
រឿងអាស្រូវរបស់ក្រុមហ៊ុន ហួយវ័ន ផេ (Huione Pay) ដែលពាក់ព័ន្ធនឹងលោក ហ៊ុន តូ គឺជាករណីលាងលុយកខ្វក់កម្រិតអន្តរជាតិ និងការកាត់បង្កកលុយអតិថិជន១៣០០នាក់។ ករណីនេះបានបង្កឱ្យមានការតវ៉ាយ៉ាងខ្លាំងក្លាពីសំណាក់អតិថិជនខ្មែរ ចិន និងវៀតណាម បន្ទាប់ពីក្រុមហ៊ុនបានផ្អាកសេវាដកប្រាក់។ ក្រសួងរតនាគារសហរដ្ឋអាមេរិក បានដាក់ក្រុមហ៊ុន Huione Group ចូលក្នុងបញ្ជីខ្មៅ និងកាត់ផ្តាច់ចេញពីប្រព័ន្ធហិរញ្ញវត្ថុ។ ក្រោយមកធនាគារជាតិនៃកម្ពុជា បានប្រកាសដកអាជ្ញាប័ណ្ណ និងធ្វើការជម្រះបញ្ជីក្រុមហ៊ុននេះ។ ក្រោយមកក្រុមហ៊ុននេះ បានលួចប្តូរឈ្មោះទៅជា H-Pay មុនពេលប្រឈមមុខនឹងការដកប្រាក់យ៉ាងគំហុក។
ទន្ទឹមនឹងនេះ លោក ហ៊ុន តូ ក៏ចេញមុខបដិសេធលែងពាក់ព័ន្ធថែមទៀត ទោះលោកទទួលស្គាល់ថា មានភាគហ៊ុន ៣០ភាគរយ ក្នុងក្រុមហ៊ុន Huione Pay តាំងពីឆ្នាំ២០២០ ក៏ដោយ។
ចំណែក មន្ត្រីបក្សប្រឆាំង និងអ្នកឃ្លាំមើលធ្លាប់អះអាងថា អតិថិជនហួយវ័ន នឹងមិនទទួលបានយុត្តិធម៌ពីប្រព័ន្ធច្បាប់នៅកម្ពុជា ឬទទួលបានលុយមកវិញឡើយ បើគ្មានសម្ពាធពីអន្តរជាតិ និងការស៊ើបអង្កេតពីស្ថាប័នឃ្លាំមើលហិរញ្ញវត្ថុពិភពលោក ឬចាប់ខ្លួនលោក ហ៊ុន តូ ឱ្យមកទទួលខុសត្រូវទេនោះ៕
