ពលរដ្ឋមួយចំនួននៅខេត្តកំពង់ស្ពឺ ដែលថាបានរងផលប៉ះពាល់ពីក្រុមហ៊ុនកែច្នៃផ្លែស្វាយមួយក្នុងខេត្តនេះបានអះអាងមកថា ក្រុមហ៊ុននេះ បានបង្ហូរកាកសំណល់កខ្វក់ ធ្វើឱ្យត្រីងាប់ រួមទាំងសត្វចិញ្ចឹម ដែលទាមទារឱ្យអាជ្ញាធររដ្ឋទប់ស្កាត់ឱ្យមានប្រសិទ្ធភាព ដើម្បីបញ្ចៀសការគំរាមកំហែងជីវភាពពួកគេ។
លោក រស់ សម្បត្តិ រស់នៅឃុំវល្លិ៍ស ស្រុកសំរោងទង ខេត្តកំពង់ស្ពឺ ឲ្យវីអូឌីដឹងនៅថ្ងៃព្រហស្បតិ៍នេះថា ទឹកកខ្វក់ដែលបង្ហូរចេញពីក្រុមហ៊ុននេះ បានប៉ះពាល់ដល់ស្រុកសំរោងទង និងស្រុកគងពិសី ខេត្តកំពង់ស្ពឺ។ ជាងនេះក៏បានហូរធ្លាក់ទៅដល់ស្រុកកណ្តាលស្ទឹង ខេត្តកណ្តាល ជាដើម។ លោកថា នៅពេលមានភ្លៀងធ្លាក់ខ្លាំង ក្លិនស្អុយពីទឹកកខ្វក់នេះ បានថមថយបន្តិច ប៉ុន្តែគុណភាពទឹកនៅតែគំរាមកំហែងដល់ការប្រកបរបរធ្វើស្រែ និងការប្រកបរបរនេសាទរបស់ពលរដ្ឋ ជាពិសេសបានបណ្តាលឲ្យមានត្រីងាប់ និងសត្វចិញ្ចឹមកើតជំងឹជាបន្តបន្ទាប់។
ផ្តើមពីបញ្ហានេះ តំណាងពលរដ្ឋនៅឃុំវល្លិ៍ស ស្រុកសំរោងទង ជំរុញឲ្យអភិបាលខេត្តកំពង់ស្ពឺ ពិសេសរដ្ឋមន្ត្រីក្រសួងបរិស្ថាន និងរដ្ឋមន្ត្រីក្រសួងកសិកម្មជាដើម ជួយកែលម្អ ដើម្បីអាចឲ្យពលរដ្ឋក្នុងមូលដ្ឋាននេះ រស់អាស្រ័យផលដូចដើមវិញ។
លោកបន្តថា៖ «សូមសំណូមពរដល់មន្ទីរបរិស្ថានខេត្តកំពង់ស្ពឺហ្នឹង ឲ្យយកចិត្តទុកដាក់ផង។ កុំមានក្លិនស្អុយចង់បែកច្រមុះហើយ មកថាអត់ស្អុយផង។ ស្អុយទឹកហ្នឹង យកមកប្រើប្រាស់អត់កើតទេ យើងចង់បូមមកដាក់ស្រែក៏អត់កើតដែរ សូម្បីតែត្រីក៏រស់នៅអត់កើតដែរ។ ពីមុនប្រជាជនអាស្រ័យផលរកត្រីក្នុងអូរជាដើម។ តែឥឡូវសូម្បីប្រលិត ឈូក ក្នុងអូរក៏អត់មានដែរ ទឹកហ្នឹងហូរចូលមកគឺងាប់ទាំងអស់។ កាលពីមុនប្រជាពលរដ្ឋ មុខរបរដកព្រលិត រកត្រី រកក្តាម រកខ្យងអីចឹងទៅ។ តែឥឡូវរកអត់បានទេ គ្រាន់តែចូលទឹកស្អុយហ្នឹងមកព្រលិត ឈូកអីក៏ងាប់ដែរ ត្រីលែងនិយាយហើយ ងាប់ចង់ផុតពូជអស់ហើយ»។
មិនខុសគ្នាទេ បុរសវ័យចំណាស់ស្នើមិនបញ្ចេញឈ្មោះ រស់នៅឃុំទឹកល្អក់ ស្រុកគងពិសី លើកឡើងថា កង្វល់របស់ពលរដ្ឋ ពួកគាត់ដែលរងផលប៉ះពាល់ពីក្រុមហ៊ុនកែច្នៃផ្លែស្វាយខាងលើនេះ ហាក់មិនត្រូវបាន មន្ត្រីក្រសួងជំនាញយកចិត្តទុកដាក់ទេកន្លងមក។ ផ្ទុយទៅវិញ តែងមានប្រតិកម្មបញ្ច្រាស តមកពលរដ្ឋវិញ ដោយមិនខ្វល់ពីទុក្ខលំបាកពលរដ្ឋទេ។ លោកថា ត្រីក្នុងទឹកនៅមូលដ្ឋានគាត់ បានងាប់ជាបន្តបន្ទាប់ ពិសេសសត្វគោក្របី ក៏បានកើតមានជំងឺជាប្រចាំដែរ។
ពលរដ្ឋរូបនេះ ហាក់គ្មានជំនឿទៅលើការដឹកនាំរបស់មន្ត្រីជំនាញទៀតទេ ព្រោះសូម្បីតែកាកសំណល់រឹងរាវស្អុយកខ្វក់របស់ក្រុមហ៊ុនកែច្នៃដំណាប់ស្វាយ ឈ្មោះ Cambodian Gome Farm Food Co., ltd. ក៏មិនអាចគ្រប់គ្រងបានផងនោះ។
ពលរដ្ឋរូបនោះបន្ថែមថា៖ «អាណាដែលចាក់សំណល់ស្វាយនៅលើទឹក ចាក់លើជ្រោះ ចាក់លើភ្នំតាមព្រៃចំការពេញវាលពេញកាលទាំងអស់។ ចាក់ទាំងឡានៗ ចាក់នៅលើគម្ពោធវ័រព្រេង ហើយភ្លៀងមកហូរតាមអូរហ្នឹង មកប្រើប្រាស់លែងកើតអស់ហើយ ។ ខូចទឹកខូចត្រពាំងស្អុយទៅលើភូមិបឹងងោងប៉ះពាល់ទាំងអស់។ ថ្ងៃមុនគោខ្ញុំឈឺ បួនប្រាំក្បាល ហើយមេគោខ្លះ កូនមកអត់មានទឹកដោះឲ្យកូនបៅ ព្រោះវាក្តៅដើរស៊ីសំណល់និងផឹកទឹកកខ្វក់នោះ។ ធ្វើម៉េចជួយទប់ស្កាត់ឲ្យបានល្អទៅ យកមកចាក់ចោលពេញទឹកពេញដី ពេញវាលពេញកាលចឹង។ សូមកុំឲ្យក្រុមហ៊ុនដឹកសំរាមចាក់ចោលតាមអំពើចិត្តគាត់ចឹង»។
យ៉ាងណា វីអូឌី នៅមិនទាន់អាចទាក់ទង លោក ជាម ច័ន្ទសោភ័ណ អភិបាលខេត្តកំពង់ស្ពឺ ដើម្បីបំភ្លឺជុំវិញការបំពុលបរិស្ថាន របស់ក្រុមហ៊ុនកែច្នៃផ្លែស្វាយ ឈ្មោះ Cambodian Gome Farm Food Co., ltd. បាននៅឡើយទេ។
ប៉ុន្តែ អ្នកស្រី ណេ សា អ្នកបកប្រែភាសាចិនឲ្យថៅកែក្រុមហ៊ុនកែច្នៃផ្លែស្វាយខាងលើ បានប្រាប់សារព័ត៌មានក្នុងស្រុក នៅថ្ងៃព្រហស្បតិ៍នេះថា ក្រុមហ៊ុននេះ បានអនុវត្តស្របតាមការណែនាំរបស់មន្ត្រីស្ថាប័នពាក់ព័ន្ធរួចហើយ។ ហើយថា កាកសំណល់រឹងរាវដែលបង្ហូរ ឬដឹកចេញពីរោងចក្រនេះ គឺបានឆ្លងកាត់អាងប្រព្រឹត្តកម្ម និងមានប្រព័ន្ធត្រួតពិនិត្យគុណភាពទឹក ត្រឹមត្រូវតាមស្តង់ដារកំណត់។
មួយវិញទៀត អ្នកស្រីថា ចំពោះផលប៉ះពាល់ពីការដឹកកាកសំណល់រឹងរាវ ដែលក្រុមហ៊ុនម៉ៅការសំរាម ដឹកយកទៅចាក់ចោលនៅឃុំទឹកល្អក់ ស្រុកគងពិសី ខាងរោងចក្រក៏នឹងពិភាក្សាជាមួយក្រុមហ៊ុនម៉ៅការដឹកកាកសំណល់នេះឡើងវិញ ដើម្បីកុំឲ្យប៉ះពាល់ដល់បរិស្ថាន ក៏ដូចជាការរស់នៅរបស់ពលរដ្ឋ។
អ្នកស្រីបន្តថា៖ «អត់មានបញ្ហាចោទខ្លាំងទេបង ព្រោះដោយសារតែរោងចក្រហ្នឹងមានឧបករណ៍ត្រួតពិនិត្យគុណភាពទឹក និងផ្តល់ព័ត៌មានទៅក្រសួងប្រចាំថ្ងៃជារហូតហ្នឹង។ ហើយទឹកដែលខាងរោងចក្របញ្ចេញហ្នឹង គឺតាមស្តង់ដារទាំងអស់ អត់មានបញ្ហាអីទេ គឺទឹកថ្លាទេ។ មន្ត្រីជំនាញចុះពិនិត្យជាក់ស្តែងឃើញថា ប្រភពទឹក គឺមិនមែនចេញតែពីរោងចក្រខាងខ្ញុំមួយទេ គឺមានប្រភពទឹកផ្សេងទៀត ហូរចេញចូលទៅក្នុងប្រឡាយហ្នឹង។ ហើយរោងចក្រខ្ញុំនេះ ខាងក្រសួងបានតម្រូវឲ្យមានអាងប្រព្រឹត្តកម្ម មានឧបករណ៍ស្វ័យត្រួតពិនិត្យជាដើម ហើយខាងរោងចក្របានអនុវត្តតាមខាងក្រសួងគ្រប់បែបយ៉ាងទាំងអស់»។
ឆ្លើយតបបញ្ហានេះ លោក ច័ន្ទថេត ប្រធានមន្ទីរបរិស្ថានខេត្តកំពង់ស្ពឺ បានឲ្យសារព័ត៌មានក្នុងស្រុកដឹងថា ករណីផលប៉ះពាល់បរិស្ថានផ្តើមដោយក្រុមហ៊ុនកែច្នៃផ្លែស្វាយ នៅឃុំវល្លិ៍ស ស្រុកសំរោងទងនេះ មន្ត្រីជំនាញស្ថាប័នពាក់ព័ន្ធ រួមទាំងអាជ្ញាធរមូលដ្ឋាន និងភាគីរោងចក្រ បានជួបប្រជុំរកដោះស្រាយរួចហើយ កាលពីថ្ងៃទី៥ ខែមិថុនា គឺសំណល់រឹងរាវ បង្ហូរចេញពីរោងចក្រនេះ មិនប៉ះពាល់ដល់បរិស្ថាន និងការរស់នៅរបស់ពលរដ្ឋទេ។
លោកថា កិច្ចប្រជុំដឹកនាំដោយ លោក ជេត ជុំ នាយករងរដ្ឋបាលខេត្តកំពង់ស្ពឺ គឺមន្ត្រីជំនាញ រកឃើញថា រោងចក្រ ឬក្រុមហ៊ុនស្វាយនេះ បានចូលរួមកែលម្អ និងបំពេញបន្ថែមប្រព័ន្ធប្រព្រឹត្តកម្ម ព្រមទាំងបំពាក់ប្រព័ន្ធត្រួតពិនិត្យកាកកំណល់រឹងរាវ ដោយស្វ័យប្រវត្តិតាមស្តង់ដារត្រឹមត្រូវផងដែរ។
យ៉ាងណា លោក ជិន វណ្ណៈ ប្រធានអង្គការការពារបរិស្ថាន បានលើកឡើងថា ផលប៉ះពាល់ពីកាកសំណល់រឹងរាវ ចេញពីរោងចក្រ ឬក្រុមហ៊ុនកែច្នៃផ្លែស្វាយ គឺពិតជាបានរងផលប៉ះពាល់ធ្ងន់ធ្ងរ បើកាកសំណល់ទាំងនោះ មិនបានឆ្លងកាត់អាងប្រព័ន្ធប្រព្រឹត្តកម្មឲ្យបានត្រឹមត្រូវជាមុនទេ។ លោកថា ករណីនេះ គួរត្រូវបានរដ្ឋាភិបាល ឬថ្នាក់ដឹកនាំក្រសួងស្ថាប័នពាក់ព័ន្ធ យកចិត្តទុកដាក់ និងតាមដានឲ្យបានជាប្រចាំ។
លោកថា៖ «ខាងមន្ត្រីរដ្ឋាភិបាល ចុះត្រួតពិនិត្យនិងណែនាំឲ្យខាងរោងចក្រហ្នឹង ឲ្យធ្វើអាងចម្រោះៗទឹកស្អាតហើយ ចាំបង្ហូរចូលព្រែក ប្រឡាយបឹងអូរ ទើបវាអត់ប៉ះពាល់ដល់ជីវចម្រុះ វាអត់ប៉ះពាល់ប្រយោជន៍ប្រជាពលរដ្ឋរស់នៅតំបន់នោះ ដែលគាត់រករបរនេសាទត្រីជាដើម។ រោងចក្រកែច្នៃផ្លែស្វាយហ្នឹង ប្រើជាតិគីមីច្រើនណាស់ ព្រោះលាងត្រូវប្រើថ្នាំច្រើន។ យើងម្យ៉ាងសំបកស្វាយ ឬសំបកផ្លែឈើហ្នឹងស្អុយណស់ ដល់ពេលវារលួយទៅស្អុយខ្លាំង និងធ្វើឲ្យប៉ះពាល់ខ្លាំង។ ហើយបើគាត់បង្ហូរទៅទាំងស្រុងទៅ ធ្វើឲ្យទឹកខូច និងប៉ះពាល់ដល់ជីវចម្រុះ។ ទឹកស្វាយហ្នឹងហូរដល់ណាងាប់ និងខូចទឹកដល់ហ្នឹង។ សត្វគោក្របី ឬសត្វផ្សេងៗហ្នឹង បើផឹកទឹកហ្នឹង គឺមានតែពុលងាប់ទាំងអស់»។
យ៉ាងនេះក្តី មន្ត្រីជំនាញ ក៏បានតម្រូវឲ្យក្រុមហ៊ុន Cambodian Gome Farm Food Co., ltd ត្រូវកែលម្អការដឹកកាកសំណល់រាវ មិនឲ្យហៀរ ឬកំពប់នៅលើដងផ្លូវ ដែលនាំឲ្យប៉ះពាល់ដល់សណ្តាប់ធ្នាប់សាធារណៈឡើយ ហើយត្រូវចូលរួមសហការជាមួយអាជ្ញាធរមូលដ្ឋាន និងមន្ត្រីជំនាញពាក់ព័ន្ធឲ្យបានជាប្រចាំ៕
