ការដែលវៀតណាម និងថៃ សម្រេចមហិច្ឆតាលេបទឹកដីខ្មែរបានជោគជ័យនាទសវត្សរ៍ចុងក្រោយ ត្រូវគេមើលឃើញថា មកពីមេដឹកនាំខ្មែរលោភលន់អំណាចហួសហេតុ កម្ចាត់តែខ្មែរគ្នាឯង ដើម្បីតែចង់ក្រាញអំណាចតពូជ មិនឱ្យតម្លៃលើការផ្សះផ្សាជាតិ ដែលជាដើមហេតុជាប់អន្ទាក់ប្រទេសឈ្លានពាន។
បញ្ហានេះ ធ្វើឱ្យមេដឹកនាំគណបក្សប្រជាជនកម្ពុជាកាន់អំណាច៤៧ឆ្នាំ ក្រោយវៀតណាមលើកបន្តុប គឺលោក ហ៊ុន សែន ត្រូវបានក្រុមអ្នករិះគន់ចោទថា បានកាត់ដីខ្មែរទាំងព្រំដែនគោកនិងសមុទ្រមួយផ្នែកឱ្យទៅវៀតណាម តាមសន្ធិសញ្ញាព្រំដែនខុសច្បាប់ ឆ្នាំ១៩៨២ -៨៣ និង៨៥ រំលោភកិច្ចព្រមព្រៀងសន្តិភាពទីក្រុងប៉ារីស២៣តុលា ជាថ្នូរសងគុណ ដែលកិច្ចព្រមព្រៀងប៉ារីសតម្រូវឱ្យមោឃភាពចោល។
រីឯលោក ហ៊ុន ម៉ាណែត វិញ កាន់អំណាចជិត៣ឆ្នាំមកនេះ តាមការរៀបចំរបស់ឳពុក ក៏រងការរិះគន់ដែរពីអសមត្ថភាពការពារទឹកដី ធ្វើឱ្យថៃលើកទ័ពមកឈ្លានពានដណ្តើមកាន់កាន់ទឹកដីខ្មែរជាង៧០កន្លែងតាមចិត្ត ក្រោយមានបទឈប់បាញ់ ថ្ងៃទី២៧ ខែធ្នូ ឆ្នាំ២០២៥ ពោលគឺជាងកន្លះឆ្នាំមកនេះ។
តំណាងរាស្ត្រពីគណបក្សប្រឆាំង ដែលមានជំនាញកិច្ចការព្រំដែន លោក អ៊ុំ សំអាន បាននិយាយនៅថ្ងៃទី១៨ខែមិថុនា ដោយចោទប្រកាន់ចំៗថា សម័យលោក ហ៊ុន សែន ធ្វើឱ្យបាត់បង់ទឹកដីទៅវៀតណាម រីឯសម័យលោក ហ៊ុន ម៉ាណែត ដឹកនាំប្រទេស ធ្វើឱ្យបាត់បង់ទឹកដីទៅថៃ។
ការដែលលោក ហ៊ុន សែន ធ្វើឱ្យបាត់បង់ដីខ្មែរទៅប្រទេសវៀតណាម លោកសំអាងថា បង្គោលព្រំដែនលេខ២២៩ បានបោះចូលដីលំនៅឋានប្រជាពលរដ្ឋខ្មែរស្ថិតនៅស្រុកស្វាយជ្រំ ខេត្តស្វាយរៀង។
លោកថា ការបោះបង្គោលព្រំដែននេះ ធ្វើឱ្យបាត់ព្រែកកំពង់ស្នាយ ដែលបន្សល់តាំងពីសម័យបារាំង និងស្ដារឡើងវិញនៅសម័យខ្មែរក្រហម ដែលបានបាត់បង់ទៅវៀតណាមគ្រប់គ្រង ក្រោយបោះបង្គោលព្រំដែន កាលពីឆ្នាំ២០១៧។
សម្រាប់លោក អ៊ុំ សំអាន ព្រែកមួយខ្សែនេះ មានប្រវែងទទឹងចន្លោះជាង ២០ម៉ែត្រ ដល់ជាង ៤០ម៉ែត្រ បណ្តោយជាង ១០០គីឡូម៉ែត្រ ឋិតក្នុងខេត្តព្រៃវែង និងខេត្តស្វាយរៀង។
ពលរដ្ឋខ្មែររស់នៅក្បែរព្រំដែននិយាយថា ព្រំដែនចាស់កន្លងទៅ និងបង្គោលព្រំដែនបោះសម័យបារាំងឋិតនៅឆ្ងាយពីព្រែកនេះជាច្រើនគីឡូម៉ែត្រ។
លោកថា កាលពីសម័យ ប៉ុល ពត ខ្មែរយើងគ្រប់គ្រងព្រែកនេះទាំងស្រុង។ ការបោះង្គោលព្រំដែនតាមសន្ធិសញ្ញាបំពេញបន្ថែមឆ្នាំ២០០៥ និង២០១៩ ដែលយកតាមសន្ធិសញ្ញាព្រំដែនរដ្ឋឆ្នាំ១៩៨៥ (សម័យវៀតណាមត្រួតត្រាកម្ពុជា) ជាហេតុធ្វើឱ្យបាត់បង់ព្រែកកំពង់ស្នាយនេះនិងដីខ្មែរនៅតំបន់នោះ។
ចំណងនេះហើយ ដែលខ្មែរនិងខ្មែរ មិនអាចរកការផ្សះផ្សាជាតិបាន ដែលលោកថា មកពីគ្រួសារហ៊ុនគិតតែពីការពារអំណាចច្រើនជាងការពារទឹកដី។ ហើយថា បានព្យាយាមកម្ចាត់ខ្មែរដែលនិយាយរឿងនេះ ដើម្បីផ្គាប់ចិត្តចៅហ្វាយនាយវៀតណាម ដែលបានលើកបន្តុបអំណាចនៅឆ្នាំ១៩៧៩។
លោកថា៖ «ការបាត់បង់ទឹកដីដោយសារត្រកូលហ៊ុន គិតពីអំណាចជាធំសុខចិត្តឲ្យបាត់បង់ទឹកដី តែធ្វើម៉េចកុំឲ្យបាត់អំណាចត្រកូលហ៊ុនចឹង ហើយខំតែការពារអំណាចទេ អត់ខំការពារទឹកដីទេ ពង្រឹងតែក្រុមខ្លាហោះក្រុមអង្គរក្សបំពាក់សព្វាវុធទំនើបៗ ឯទាហានអត់បំពាក់សព្វាវុធទំនើបៗ ឱ្យទាហានជាយដែនទេបំពាក់សព្វាវុធទំនើបៗ ឱ្យតែក្រុមអង្គរក្ស ឬក្រុមបង្រ្កាបបាតុកម្មអ៊ីចឹងហើយទើបធ្វើឲ្យបាត់បង់ទឹកដីទៅប្រទេសជិតខាង ជាពិសេសទៅប្រទេសថៃ»។
មេដឹកនាំបក្សកាន់អំណាច រងការរិះគន់ជុំវិញបញ្ហាបាត់បង់ទឹកដីច្រើនឆ្មាំមកហើយ ពីក្រុមអ្នករិះគន់ ដោយសារតែការចោទប្រកាន់ពីកង្វះតម្លាភាពក្នុងការដោះស្រាយបញ្ហាព្រំដែន ជាមួយប្រទេសជិតខាង និងការចរចាទ្វេភាគី ដែលត្រូវបានគេមើលឃើញថា មានភាពទន់ខ្សោយ និងការចាត់វិធានការផ្លូវច្បាប់ទៅលើអ្នកដែលហ៊ានបញ្ចេញមតិទាមទារ ឬចោទសួរពីរឿងនេះ។
ការរិះគន់ទាំងនោះ ផ្តោតលើចំណុចសំខាន់ៗជាច្រើន ដូចជាភាពកក់ក្តៅក្នុងការចរចា ធ្វើការចរចាព្រំដែនបែបកិច្ចព្រមព្រៀងទ្វេភាគី ដែលនាំឱ្យមានការបារម្ភពីការបាត់បង់ដីធ្លីទៅប្រទេសជិតខាង ដូចជាករណីព្រំដែនថៃ និងវៀតណាម។
កង្វះតម្លាភាព ឬចេញវិធានការហាមឃាត់មិនឱ្យប្រជាពលរដ្ឋចង់ដឹង ឬសួរដេញដោលពីបញ្ហាបូរណភាពទឹកដី ដែលធ្វើឱ្យមតិមហាជនសង្ស័យថា មានចេតនាបិទបាំងកំហុសក្នុងការកាត់ដីឱ្យបរទេស គួបផ្សំនឹងការខកខានប្រើប្រាស់យន្តការអន្តរជាតិ ដូចជាមិនប្តឹងទៅតុលាការយុត្តិធម៌អន្តរជាតិ (ICJ) និងប្រើកិច្ចព្រមព្រៀងសន្តិភាពទីក្រុងប៉ារីស ដើម្បីទាមទារ ឬការពារទឹកដី ជាជាងការចរចាផ្ទៃក្នុងដែលនាំឱ្យមានការខាតបង់ ជាដើម។
សម្រា់ប អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី ហៅ ដំណើរការនយោបាយ និងការគ្រប់គ្រងព្រំដែនរបស់គណបក្សប្រជាជនកម្ពុជា ក្នុងសម័យ លោក ហ៊ុន សែន ធ្វើជានាយករដ្ឋមន្ត្រី និងបន្តមកដល់ លោក ហ៊ុន ម៉ាណែត នាពេលបច្ចុប្បន្ន បានបង្កើតជាក្តីបារម្ភយ៉ាងខ្លាំង ជុំវិញធ្វើឱ្យបាត់បង់ទឹកដីទាំងទៅប្រទេសវៀតណាម និងប្រទេសថៃ គឺដោយសារកត្តាខ្វះតម្លាភាព និងឥទ្ធិពលនយោបាយពីបរទេស។
លោកថា៖ «ចំពោះការដឹកនាំរបស់លោកហ៊ុន សែន ខ្ញុំមើលឃើញថា ទំនាក់ទំនងប្រវត្តិសាស្ត្ររវាងគណបក្សប្រជាជនកម្ពុជា និងគណបក្សកុម្មុយនីស្តវៀតណាមចាប់តាំងពីឆ្នាំ១៩៧៩ មក បានបង្កើតចំណងឥទ្ធិពលដែលធ្វើឲ្យកម្ពុជាស្ថិតក្នុងស្ថានភាពចាញ់ប្រៀប ដូច្នេះមជ្ឈដ្ឋានសាធារណៈចាត់ទុកការចុះហត្ថលេខាលើសន្ធិសញ្ញាបំពេញបន្ថែមឆ្នាំ២០០៥ និងការបោះបង្គោលព្រំដែនជាបន្តបន្ទាប់ថាជាការទទួលស្គាល់កិច្ចព្រមព្រៀងនានាក្នុងទសវត្សរ៍ឆ្នាំ១៩៨០ ធ្វើឡើងនៅក្នុងរបបខុសច្បាប់ ហើយការណ៍នេះបានធ្វើឲ្យកម្ពុជាបាត់បង់ទឹកដី ព្រមទាំងបើកដៃឲ្យមានលំហូរអន្តោប្រវេសន៍វៀតណាមចូលមកដោយខុសច្បាប់ថែមទៀត»។
លោកថា ងាកមកមើលរដ្ឋាភិបាល លោក ហ៊ុន ម៉ាណែត វិញកម្ពុជាក៏រងការឈ្លានពានពីប្រទេសថៃដែរ ហើយការឈ្លានពាននេះ ក៏គ្មានសញ្ញាណាដែលអាចជឿបានថា កម្ពុជានឹងអាចទាមទារទឹកដីខ្មែរដែលថៃកំពុងកាន់កាប់ទាំងនោះបានមកវិញទេ។ ការណ៍នេះ លោកថា មូលហេតុចម្បងដែលអ្នកតាមដានមិនអាចជឿទុកចិត្តលើមេដឹកនាំទាំងពីរបាន គឺកង្វះតម្លាភាព និងការផាត់ចេញសំឡេងរិះគន់រឿងព្រំដែន។
មួយវិញទៀត លោកសំអាងថា រាល់ពេលមានការជជែករឿងបញ្ហាព្រំដែន ការបារម្ភរឿងបញ្ហាបាត់ទឹកដី រដ្ឋាភិបាលតែងតែចាប់ខ្លួនសកម្មជន រួមទាំងបក្សប្រឆាំង ដែលវិធាននេះ កាន់តែធ្វើឱ្យពលរដ្ឋមានមន្ទិលសង្ស័យថា រដ្ឋាភិបាលកំពុងលាក់បាំងការពិត ឬក៏មិនហ៊ានបើកចំហផែនទីនៃកិច្ចព្រមព្រៀមទាំងនោះ ដើម្បីឱ្យមានការពិនិត្យ និងសួរដេញដោលពីអ្នកជំនាញឯករាជ្យ។
លោកថា៖ «ខ្ញុំយល់ស្របទាំងស្រុងថា កត្តាបែកបាក់ជាតិ គឺជាឫសគល់នៃបញ្ហាទាំងអស់នេះសម្រាប់ខ្ញុំព្រំដែនមិនមែនគ្រាន់តែជាខ្សែបន្ទាត់លើផែនទីនោះទេ ប៉ុន្តែវាជាជញ្ជាំងការពារជាតិដែលទាមទារឲ្យមានសាមគ្គីភាពផ្ទៃក្នុងនៅពេលដែលសង្គមកម្ពុជា ត្រូវបានបែងចែកជាពីរ គឺក្រុមរដ្ឋាភិបាល និងក្រុមអ្នករិះគន់ដែលរងការចោទប្រកាន់ថា ជាអ្នកបំភ្លៃការពិត វានាំឲ្យបាត់បង់នូវមតិឯករាជ្យ និងឯកភាពជាតិលើបញ្ហាបូរណភាពទឹកដី»។
ការបែកបាក់ជាតិយ៉ាងជ្រាលជ្រៅនេះ លោកមើលឃើញថា វានឹងធ្វើឱ្យភាគីខ្មែរម្ខាងៗ មើលឃើញគ្នាក្នុងភាពអវិជ្ជមានជានិច្ច ដែលជាហេតុធ្វើឱ្យការសង្ស័យរឿងបាត់បង់ទឹកដី នៅតែជាដំបៅរលួយក្នុងទឹកចិត្តប្រជាពលរដ្ឋ។ ហើយវាក៏បានកាត់បន្ថយនូវឥទ្ធិពលចរចារបស់ខ្មែរនៅលើឆាកអន្តរជាតិផងដែរ ដោយសារខ្មែរមិនអាចរួបរួមគ្នាជាធ្លុងមួយ ដើម្បីការពារផលប្រយោជន៍ ដើម្បីតទល់ទៅនឹងប្រទេសឈ្លានពាន។
ងាកទៅមើលការលើកឡើងរបស់ លោក អ៊ុំ សំអាន វិញ ហាក់ស៊ីគ្នាទៅនឹងអតីតនាយករដ្ឋមន្ត្រីកម្ពុជាលោក ប៉ែន សុវណ្ណ ដែលបានលើកឡើងថា លោក ហ៊ុន សែន ជាអ្នកឡើងចាប់គាត់ដល់លើផ្ទះ ហើយចងមុខ និងដៃ ដោយចោទថាលោកមានចិត្តចង្អៀតចង្អល់ជាមួយវៀតណាម។
លោក ប៉ែន សុវណ្ណ មុនស្លាប់បានថ្លែងជាសាធារណៈ ថាការចាប់ខ្លួនលោក ដោយសារតែលោកជំទាស់ច្រើនដង ទៅនឹងការស្នើរបស់មេដឹកនាំវៀតណាម ដែលវៀតណាមចង់បង្ហូរជនអន្តោប្រវេសន៍របស់ខ្លួនចូលមកកម្ពុជា និងស្នើឱ្យលោកកាត់ដីខ្មែរតាមព្រំដែនមួយចំនួន តែលោកមិនព្រម ទើបវៀតណាមចាប់លោកយកទៅដាក់គុកងងឹតនៅប្រទេសវៀតណាម។
អំឡុងខែមករា ឆ្នាំ២០២២ លោក ហ៊ុន សែន ធ្លាប់ចោទ លោក ប៉ែន សុវណ្ណ ថា ជាមនុស្សស្អប់វៀតណាម បើទោះបីគាត់បានរត់ទៅនៅវៀតណាមតាំងពីអាយុ១៥ឆ្នាំ និងយកប្រពន្ធវៀតណាមក៏ដោយ។
លោក ប៉ែន សុវណ្ណ កាន់តំណែងជានាយករដ្ឋមន្ដ្រីបានតែប្រមាណ៦ខែប៉ុណ្ណោះ ចាប់ពីថ្ងៃទី២៧ ខែមិថុនា ដល់ថ្ងៃទី២ ខែធ្នូ ឆ្នាំ១៩៨១។
លោកត្រូវបានចាប់ខ្លួនដោយជំនាញការវៀតណាម នៅថ្ងៃទី២ ខែធ្នូ ឆ្នាំ១៩៨១ និងបញ្ជូនទៅឃុំខ្លួននៅប្រទេសវៀតណាមអស់រយៈពេល ១០ឆ្នាំ និង ៥២ថ្ងៃ។ ក្នុងសៀវភៅ សុបិននិងការពិត របស់លោក វ៉ាន់ឌី កាអុន ដែលបាននិយាយពីបញ្ហាកម្ពុជា ។
បើតាមសៀវភៅនោះ ការដកហូតដំណែង លោក ប៉ែន សុវណ្ណ គឺបណ្ដាលមកពីលោក ប៉ែន សុវណ្ណ ប្រមាថទីក្រុងហាណូយយ៉ាងខ្លាំង ដោយចង់មានទំនាក់ទំនងផ្ទាល់ជាមួយទីក្រុងមូស្គូ រំលងទីក្រុងហាណូយ។ មួយវិញទៀត បណ្ដាលមកពី លោក ប៉ែន សុវណ្ណ ប៉ុនប៉ងរំដោះកម្ពុជា ពីការគាបសង្កត់របស់វៀតណាម ហើយប្រឆាំងនឹងនយោបាយអន្តោប្រវេសន៍វៀតណាមនៅកម្ពុជា។
លោក ប៉ែន សុវណ្ណ ក្រោយមានសេរីភាព បានហក់ចូលប្រឡូកក្នុងឆាកនយបោយឡើងវិញ ជាមួយគណបក្សសង្គ្រោះជាតិ កូតាពីគណបក្សសិទ្ធិមនុស្សរបស់លោក កឹម សុខា ។
ប៉ុន្តែគណបក្សសង្គ្រោះជាតិ ត្រូវបានតុលាការរំលាយនៅចុងឆ្នាំ២០១៧ ក្រោយពីកោះហៅ លោក ហ៊ុន សែន ឱ្យចូលបំភ្លឺ ជុំវិញការបោះបង្គោលព្រំដែនជាមួយវៀតណាមទាំងចម្រូងចម្រាស តាមសន្ធិសញ្ញាបំពេញបន្ថែមឆ្នាំ២០០៥។
សន្ធិសញ្ញានេះ បក្សប្រឆាំងចោទថា សន្ធិសញ្ញាព្រំដែនធ្វើឡើងតាមការចង់បានរបស់វៀតណាម ដើម្បីសម្រេចមហិច្ឆតាលេបទឹកដីខ្មែរ។
ការបោះបង្គោលព្រំដែនជាមួយប្រទេសជិតខាង ទាំងចម្រូងច្រាសផ្ទៃក្នុងជាតិ បានប្រាសចាកពីស្មារតីរដ្ឋធម្មនុញ្ញដែលជាច្បាប់កំពូលរបស់ជាតិ។
មាត្រា៥៥ នៃរដ្ឋធម្មនុញ្ញកម្ពុជា ចែងថា សន្ធិសញ្ញា និងកិច្ចព្រមព្រៀងទាំងឡាយណា ដែលមិនស្របនឹងឯករាជ្យអធិបតេយ្យ បូរណភាពទឹកដី និងឯកភាពជាតិ ត្រូវលុបចោល។
រីឯមាត្រា៤៤០ នៃក្រមព្រហ្មទណ្ឌកម្ពុជា ចែងថា បទប្រគល់ឱ្យរដ្ឋបរទេសនូវដែនដីជាតិទាំងស្រុង ឬមួយផ្នែក ជាអំពើក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជិវិត។
ចំណែក លោក ហ៊ុន សែន កាលពីឆ្នាំ២០១២ នៅពេលចូលបំភ្លឺក្នុងសភា តាមការកោះហៅរបស់តំណាងរាស្ត្រពីបក្សប្រឆាំងពេលនោះ ត្រូវបានគេរៀបចំឱ្យបិទម៉ាយក្រូហ្វូនតំណាងរាស្ត្រទាំងអស់ មិនឱ្យសួរដេញដោលលោក ដោយទុកឱ្យលោក ហ៊ុន សែន និយាយបកស្រាយតែម្នាក់ឯង។
លោកសំអាងថា ពេលនោះថា ការបោះបង្គោលព្រំដែនជាមួយវៀតណាម មិនបានធ្វើឱ្យកម្ពុជាបាត់បង់ទឹកដីទេ បើទោះបីបង្គោលព្រំដែនជាច្រើន ត្រូវបានគេរាយការណ៍ថាបានបោះចូលដីស្រែ និងលំនៅឋានរបស់កសិករខ្មែរនៅខេត្តជាប់ព្រំដែនក៏ដោយ។
សម័យលោក ហ៊ុន ម៉ាណែត ដឹកនាំប្រទេសក៏ដូចគ្នា ទោះថៃបានវាយដណ្តើមឈ្លានពានទឹកដីខ្មែរបានរាប់សិបទីតាំង នៅតាមបណ្តាខេត្តចំនួន៦ក៏ដោយ ក៏រដ្ឋាភិបាលនេះនៅតែចាប់ពលរដ្ឋដាក់ពន្ធនាគារជាបន្តបន្ទាប់ ចំពោះអ្នកបានចែករំលែករឿងថៃឈ្លានពានទឹកដីខ្មែរ ក្នុងនោះមានទាំងស្រ្តីផងត្រូវចាប់ខ្លួន ដែលភាគច្រើនពួកគេរងការចោទពីបទញុះញង់។
ជុំវិញបញ្ហានេះ ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្រ្តាលី លោក ស៊ឹង សែនករុណា និយាយថា កិច្ចព្រមព្រៀងសន្តិភាពទីក្រុងប៉ារីស ឱ្យកម្ពុជាផ្សះផ្សាជាតិ អនុវត្តរបបប្រជាធិបតេយ្យ សេរីពហុបក្ស ដែលកិច្ចព្រមព្រៀងនេះ តម្រូវឱ្យកម្ពុជាគោរពសិទ្ធិមនុស្ស សិទ្ធិនយោបាយ ថែមទាំងការពារបូរណភាពទឹកដីខ្មែរ។
ប៉ុន្តែលោកថា វាគួរឱ្យសោកស្តាយ ដោយសារមហិច្ឆតាក្រាញអំណាច មេដឹកនាំគណបក្សប្រជាជនកម្ពុជា ធ្វើផ្ទុយពីនេះ ធ្វើឱ្យជាតិបែកបាក់ និងបាត់បង់ទឹកដីរហូតបច្ចុប្បន្ន។ ហើយមិនព្រមប្តឹងសត្រូវឈ្លានពានទៀត ដែលនេះលោកថា សញ្ញាហានិភ័យជាតិ និងបូរណភាពទឹកដី។
លោកថា៖ «រឿងបែកបាក់ជាតិនេះ គឺដោយសារតែគណបក្សកាន់អំណាចហ្នឹងឯង ដែលសុខចិត្តការពារនូវអំណាចការពារនូវផលប្រយោជន៍ខ្លួនឯង គ្រួសារនិងបក្ខពួកដោយទាត់ចោលនូវផលប្រយោជន៍របស់ប្រជាពលរដ្ឋ និងផលប្រយោជន៍ជាតិ ត្រង់សំណួរដែលហើយក៏មិនអាចរួបរួមបាន ដោយសារតែគណបក្សកាន់អំណាចតែម្ដង»។
លើសពីនេះ លោកគិតថា មេដឹកនាំដែលធ្វើនយោបាយសុខចិត្តបំបែកបំបាក់ជាតិ ដើម្បីតែកា្រញអំណាចតពូជ ពួកគេនឹងមិនហ៊ានប្រកួតអំណាច តាមរយៈរៀបចំឱ្យមានការបោះឆ្នោតមួយដោយសេរី ត្រឹមត្រូវ និងយុត្តិធម៌ និងផ្សះផ្សាជាតិ តាមគន្លងប្រជាធិបតេយ្យ ដើម្បីរួមគ្នាការពារផលប្រយោជន៍ជាតិ។
លោកគូសបញ្ជាក់ថា ចំណងនេះ នឹងធ្វើឱ្យពលរដ្ឋខ្មែរបន្តរងគ្រោះកាន់តែច្រើន និងយូរឆ្នាំទៅមុខទៀត រួមទាំងបូរណភាពទឹកដី បើកម្ពុជាខ្វះការគាំទ្រពីសហគមន៍អន្តរជាតិ និងការផ្សះផ្សាជាតិនោះ៕
