សហរដ្ឋអាមេរិកបានដកការបិទខ្ទប់ផ្លូវទឹកប្រឆាំងនឹងប្រទេសអ៊ីរ៉ង់ បន្ទាប់ពីប្រទេសទាំងពីរបានចុះហត្ថលេខាលើកិច្ចព្រមព្រៀងមួយ ដើម្បីបញ្ចប់សង្គ្រាមនៅក្នុងតំបន់មជ្ឈិមបូព៌ា។ បញ្ជាការដ្ឋានកណ្តាលរបស់សហរដ្ឋអាមេរិក បានបញ្ជាក់ពីការបញ្ចប់ការបិទខ្ទប់នេះនៅលើបណ្តាញសង្គម X ស្របតាមការណែនាំរបស់ប្រធានាធិបតី។
ភ្លាមៗបន្ទាប់ពីនោះ មេដឹកនាំកំពូលរបស់អ៊ីរ៉ង់ លោកម៉ូចតាបា ខាមេនី (Mojtaba Khamenei) មានប្រសាសន៍ថា លោកបានអនុម័តលើកិច្ចព្រមព្រៀងនេះ ទោះបីជាមានទស្សនៈខុសគ្នាក៏ដោយ។ លោកបានបន្ថែមថា ប្រធានាធិបតី ត្រាំ បានប្រើប្រាស់ «ឥទ្ធិពលគ្រប់បែបយ៉ាង ដោយសារតែភាពអស់សង្ឃឹម» ដើម្បីបង្កើតឱ្យមានកិច្ចព្រមព្រៀងនេះឡើង ប៉ុន្តែការចរចានៅពេលអនាគត មិនមែនមានន័យថាជាការទទួលយកជំហររបស់សត្រូវនោះឡើយ។
កិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់នេះ ផ្ដោតសំខាន់លើចំណុចស្នូលចំនួន ១៤ រួមមានការបើកច្រកសមុទ្រ Hormuz ឡើងវិញ តម្រូវការមិនឱ្យអ៊ីរ៉ង់មានអាវុធនុយក្លេអ៊ែរ និងការបង្កើតមូលនិធិចំនួន ៣០០ ពាន់លានដុល្លារ សម្រាប់កសាងឡើងវិញ និងអភិវឌ្ឍសេដ្ឋកិច្ចរបស់ប្រទេសអ៊ីរ៉ង់ ដោយភ្ជាប់កាតព្វកិច្ចឱ្យភាគីទាំងពីរ ឈានទៅសម្រេចកិច្ចព្រមព្រៀងចុងក្រោយក្នុងរយៈពេល ៦០ ថ្ងៃ។
អនុប្រធានាធិបតីសហរដ្ឋអាមេរិក លោក ជេឌី វ៉ាន (JD Vance) បានការពារកិច្ចព្រមព្រៀងនេះប្រឆាំងនឹងការរិះគន់ពីសំណាក់សមាជិកបក្សសាធារណរដ្ឋ ដោយបញ្ជាក់ថា អ៊ីរ៉ង់នឹងមិនទទួលបានការបន្ធូរបន្ថយទណ្ឌកម្មនោះឡើយ លុះត្រាតែបំពេញតាមកាតព្វកិច្ចកំទេចស្តុកសារធាតុអ៊ុយរ៉ាញ៉ូមចម្រាញ់ និងបញ្ឈប់ការផ្តល់មូលនិធិដល់ក្រុមប្រូកស៊ីក្នុងតំបន់។
លោក វ៉ាន ក៏បានរិះគន់សមាជិកគណៈរដ្ឋមន្ត្រីអ៊ីស្រាអែល ដែលបានវាយប្រហារលើកិច្ចព្រមព្រៀងនេះ ដោយលោកបានមានប្រសាសន៍ថា៖ «អ្នកមិនអាចគ្រាន់តែប្រើវិធីសម្លាប់ ដើម្បីដោះស្រាយរាល់បញ្ហាសន្តិសុខជាតិទាំងអស់នោះទេ»។
លោក ណេតានីយ៉ាហូ ផ្ទាល់បានសង្កត់ធ្ងន់លើសារៈសំខាន់នៃការរក្សាទំនាក់ទំនងជិតស្និទ្ធជាមួយសហរដ្ឋអាមេរិក ប៉ុន្តែទាំងអ៊ីស្រាអែល និងក្រុមហេបូឡា នៅតែបន្តវាយប្រហារដាក់គ្នាទៅវិញទៅមក។
អ៊ីស្រាអែលលើកឡើងថា ជម្លោះរបស់ខ្លួនប្រឆាំងនឹងក្រុមហេបូឡា គឺដាច់ដោយឡែកពីសង្គ្រាមជាមួយអ៊ីរ៉ង់ ខណៈដែលលោក វ៉ាន បានបញ្ជាក់ថា ការវាយប្រហារបណ្តាលឱ្យជនស៊ីវិលស្លាប់នៅក្នុងទីក្រុងបេរូត (Beirut) គឺមិនអាចទទួលយកបានឡើយ៕
