ជនជាតិចិនប្រមាណ ១០០នាក់ បានប្រមូលផ្តុំគ្នាតវ៉ាជាថ្មីទៀត នៅមុខទូតចិនប្រចាំកម្ពុជា ទាមទារឱ្យក្រុមហ៊ុនហួយវ័ន របស់លោក ហ៊ុន តូ សងលុយវិញគ្រប់ចំនួន ក្រោយពីក្រុមហ៊ុននេះ បិទដំណើរការដកប្រាក់ទាំងស្រុង ដែលស្ថាប័នពាក់ព័ន្ធមិនអាចដោះស្រាយបាន ខណៈធនាគារជាតិកម្ពុជាប្រកាសដកខ្លួន ហើយរុញករណីនេះឱ្យទៅតុលាការ។
ពលរដ្ឋរងគ្រោះខ្មែរម្នាក់ដែលថ្លែងលាក់អត្តសញ្ញាណ ប្រាប់វីអូឌីនៅថ្ងៃទី២២ ខែមិថុនា ថា ការតវ៉ារបស់ជនជាតិចិននៅមុខស្ថានទូតចិន តាមបណ្ដោយផ្លូវម៉ៅសេទុង មានប្រមាណ ១០០នាក់ ដោយពួកគេបន្តទាមទារឱ្យស្ថានទូតចិនដែលជាស្ថានបេសកកម្មតំណាងប្រទេសចិននៅកម្ពុជា អន្តរាគមន៍ទៅរដ្ឋាភិបាល និងធនាគារជាតិ ដោះស្រាយសងប្រាក់ជូនពួកគេវិញ ១០០ភាគរយ។
ពលរដ្ឋរងគ្រោះរូបនោះ និយាយថា៖ «មានមនុស្សប្រហែលជា ១០០ នាក់ ហើយអ្វីដែលពួកគេទៅទីនោះ (ស្ថានទូតចិន) គឺគាត់ស្នើសុំឲ្យស្ថានទូតចិនជួយដោះស្រាយ ដោយសារពួកគេត្រូវគេឆបោក ហើយពួកគេនៅតែប្រកាន់យកគោលជំហរដើមដដែលៗ មិនខុសពីមុនទេបង»។
ចំណែកជនជាតិចិនម្នាក់ដែលថ្លែងលាក់ឈ្មោះ តាមរយៈការបកប្រែជាភាសាអង់គ្លេស នៅមុខស្ថានទូតចិនផ្ទាល់ អះអាងថា អាជ្ញាធរកម្ពុជាបានសន្យាថា កំពុងជំរុញដំណោះស្រាយបញ្ហារបស់ពួកគេ ដែលត្រូវចាញ់បោកក្រុមហ៊ុន ហួយវ័ន របស់លោក ហ៊ុន តូ។ បុរសជនជាតិចិនរូបនេះ បន្តថា ខ្លួនបានសហការផ្ដល់ព័ត៌មានទាំងអស់ដែលធនាគារជាតិត្រូវការ ដើម្បីធ្វើយ៉ាងណាឱ្យគាត់ទទួលបានដំណោះស្រាយ។ លោកសង្កត់ធ្ងន់ថា ចង់ឲ្យមានការសងប្រាក់មកវិញ ១០០ភាគរយ ឲ្យបានឆាប់តាមដែលអាចធ្វើទៅបាន។
លោកនិយាយក្នុងសំដីដើមថា៖ «យើងសង្ឃឹមថាធនាគារជាតិ ក៏ដូចជារដ្ឋាភិបាលកម្ពុជា ព្រមទាំងសាធារណជន និងសង្គមស៊ីវិលយកចិត្តទុកដាក់លើករណីរបស់យើង និងដាក់សម្ពាធលើរដ្ឋាភិបាល ដើម្បីដោះស្រាយបញ្ហានេះ។ ដោយសារករណីនេះបានអូសបន្លាយពេលយូរពេក ហើយយើងបានខាតបង់ថវិកាជាច្រើន ដែលមានជាង ១៣,០០០ ដុល្លារអាមេរិក។ ដោយសារតែគាត់មានក្រុមហ៊ុន ហើយគាត់បានខ្ចីប្រាក់ចំនួន ១០០,០០០ យ័ន (RMB) ដើម្បីបើកប្រាក់ខែឲ្យបុគ្គលិក»។
ចំណែកជនជាតិចិនម្នាក់ទៀតដែលថ្លែងលាក់ឈ្មោះដែរ បានលើកឡើងថា បញ្ហាដែលបង្កឡើងដោយក្រុមហ៊ុន ហួយវ័ន ដែលមានលោក ហ៊ុន តូ ជាសហប្រធាន បានធ្វើឱ្យលោកជាប់បំណុលយ៉ាងច្រើនមិនអាចដោះស្រាយបាន។ លោកបន្តថា ទោះបីជាលោកមិនទាន់ទទួលបានប្រាក់ពីធនាគារវិញក៏ដោយ ក៏លោកចាំបាច់ត្រូវតែបើកប្រាក់ខែឲ្យបុគ្គលិកកម្ពុជារបស់លោកដែរ។ បុរសជនជាតិចិនរូបនេះ បន្តថា បើសិនលោកមិនបើកប្រាក់ខែឲ្យពួកគេទេ នោះពួកគេនឹងត្រូវគ្មានការងារធ្វើ។
លោកនិយាយក្នុងសម្ដីដើមថា៖ «ដោយសារតែគាត់មិនទាន់ទទួលបានប្រាក់ពីធនាគារ ប៉ុន្តែគាត់នៅតែចាំបាច់ត្រូវតែបើកប្រាក់ខែឲ្យបុគ្គលិកកម្ពុជារបស់គាត់។ ហើយគាត់បានខ្ចីប្រាក់ពីធនាគារជាប្រាក់យ័ន (RMB) ចំនួន ២០០,០០០ ដើម្បីបើកប្រាក់ខែឲ្យបុគ្គលិករបស់គាត់»។
ក្រៅពីការតវ៉ារបស់ជនជាតិចិននៅមុខស្ថានទូតចិនប្រចាំកម្ពុជា នៅព្រឹកថ្ងៃទី២២ ខែមិថុនា ប្រភពជាពលរដ្ឋខ្មែរឯណោះ ក៏បានឱ្យដឹងថា មានពលរដ្ឋខ្មែរ ៥នាក់ ជាតំណាងនៃអ្នករងគ្រោះទាំងអស់ ក្នុងចំណោម ១៣០០នាក់ បានដាក់លិខិតស្នើសុំអន្តរាគមន៍បន្ថែមពីក្រសួងយុត្តិធម៌។ ប្រភពដដែល ព្រមានថា ពួកគេទាំងខ្មែរ និងចិន នឹងទៅតវ៉ានៅមុខធនាគារជាតិសារជាថ្មីទៀត នៅថ្ងៃទី២៣ ខែមិថុនា បើសិនពុំមានការឆ្លើយតបសមហេតុផល ឈានទៅដោះស្រាយឱ្យពួកគេនោះទេ។
វីអូឌី ពុំអាចសុំការឆ្លើយតបពីស្ថានទូតចិន និងរដ្ឋលេខាធិការប្រចាំការនៃក្រសួងយុត្តិធម៌ លោក ជិន ម៉ាលីន បានទេ នៅថ្ងៃទី២២ ខែមិថុនា នេះ។
ទាក់ទងករណីនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត យល់ឃើញថា ការរុញរបស់ធនាគារជាតិឱ្យជនរងគ្រោះដោយសារក្រុមហ៊ុន ហួយវ័ន ដោះស្រាយតាមប្រព័ន្ធតុលាការ គឺជារឿងមួយ ក៏ប៉ុន្តែលោកថា នីតិវិធីតាមផ្លូវតុលាការមានភាពស្មុគស្មាញ និងអូសបន្លាយពេលវេលាយូរ។ ដូច្នេះលោកយល់ថា អ្នករងគ្រោះហាក់ចង់បានលទ្ធផលដោះស្រាយឲ្យបានឆាប់ ក្រៅប្រព័ន្ធតុលាការ ទើបពួកគេបន្តតវ៉ាម្ដងហើយម្ដងទៀត។ លោកបន្តថា ការសម្របសម្រួលដោះស្រាយឲ្យបានឆាប់ គឺជារឿងល្អ ប៉ុន្តែបើសិនជាបណ្តោយឲ្យអូសបន្លាយពេលយូរវិញនោះ វានឹងជះឥទ្ធិពលមិនល្អឡើយសម្រាប់មុខមាត់កម្ពុជា។
លោក អំ សំអាត ថ្លែងថា៖ «នៅពេលដែលពួកគាត់ ធ្វើការទាមទារតវ៉ាជាបន្តបន្ទាប់ទៅ វាធ្វើឲ្យប៉ះពាល់សម្រាប់មុខមាត់កម្ពុជាយើង ជាពិសេសគឺសម្រាប់អ្នកវិនិយោគទុន និងផ្សេងៗទៀត ដែលគេមានការពិចារណាអីជាដើម។ អញ្ចឹងខ្ញុំគិតថាករណីនេះ វាគួរតែមានដំណោះស្រាយណាមួយ តាមផ្លូវសម្របសម្រួលណាមួយ ដើម្បីឲ្យបានចប់ឆាប់ វាកាន់តែល្អទៅលើរឿងទាំងអស់ហ្នឹងណា បាទ»។
រឿងអាស្រូវរបស់ក្រុមហ៊ុន ហួយវ័ន ផេ (Huione Pay) ដែលពាក់ព័ន្ធនឹងលោក ហ៊ុន តូ គឺជាករណីលាងលុយកខ្វក់កម្រិតអន្តរជាតិ។ អ្នករងគ្រោះទាំងខ្មែរ ចិន និងវៀតណាម បានចេញតវ៉ាយ៉ាងខ្លាំងក្លា បន្ទាប់ពីក្រុមហ៊ុនបានផ្អាកសេវាដកប្រាក់ បន្ទាប់ពីក្រសួងរតនាគារសហរដ្ឋអាមេរិក បានដាក់ក្រុមហ៊ុន Huione Group ចូលក្នុងបញ្ជីខ្មៅ និងកាត់ផ្តាច់ចេញពីប្រព័ន្ធហិរញ្ញវត្ថុ។
ចំណែក ធនាគារជាតិ ក៏បានប្រកាសដកអាជ្ញាប័ណ្ណ និងធ្វើការជម្រះបញ្ជីក្រុមហ៊ុននេះ។ យ៉ាងណា ក្រុមហ៊ុននេះ បានលួចប្តូរឈ្មោះទៅជា H-Pay មុនពេលប្រឈមមុខនឹងការដកប្រាក់យ៉ាងគំហុក។
ទន្ទឹមនឹងនេះ លោក ហ៊ុន តូ ក៏ចេញមុខបដិសេធលែងពាក់ព័ន្ធថែមទៀត ទោះលោកទទួលស្គាល់ថា មានភាគហ៊ុន ៣០ភាគរយ ក្នុងក្រុមហ៊ុន Huione Pay តាំងពីឆ្នាំ២០២០ ក៏ដោយ។
ចំណែក មន្ត្រីបក្សប្រឆាំង និងអ្នកឃ្លាំមើល ធ្លាប់អះអាងថា អតិថិជនហួយវ័ន នឹងមិនទទួលបានលុយរបស់ខ្លួនវិញ តាមរយៈប្រព័ន្ធច្បាប់នៅកម្ពុជាឡើយ បើគ្មានសម្ពាធពីអន្តរជាតិ និងការស៊ើបអង្កេតពីស្ថាប័នឃ្លាំមើលហិរញ្ញវត្ថុពិភពលោក ឬចាប់ខ្លួនលោក ហ៊ុន តូ ឱ្យមកទទួលខុសត្រូវទេនោះ៕
