លោក Keir Starmer បានប្រកាសលាលែងពីតំណែងជាប្រធានគណបក្សពលករ (Labour Party) ដែលជាការបើកផ្លូវសម្រាប់ការជ្រើសរើសនាយករដ្ឋមន្ត្រីអង់គ្លេសថ្មី។ ថ្លែងនៅវិមាន Downing Street លោកបានបញ្ជាក់ថា រូបលោកមិនមែនជាបុគ្គលដែលស័ក្តិសមបំផុត ក្នុងការដឹកនាំគណបក្សឆ្ពោះទៅកាន់ការបោះឆ្នោតសកលលើកក្រោយនោះទេ ហើយលោកបានទូលថ្វាយព្រះចៅ Charles ទី៣ រួចរាល់ហើយ។
លោកបានស្នើឱ្យកំណត់កាលវិភាគជ្រើសរើសអ្នកជំនួស ដោយចាប់ផ្តើមបេក្ខភាពនៅថ្ងៃទី៩ ខែកក្កដា និងបញ្ចប់ត្រឹមថ្ងៃទី១៦ ខែកក្កដា ដើម្បីឱ្យប្រធានបក្សថ្មីអាចចូលកាន់តំណែងមុនពេលសភាត្រឡប់មកប្រជុំវិញនៅខែកញ្ញា។ លោកនឹងបន្តជានាយករដ្ឋមន្ត្រីបណ្តោះអាសន្ន និងសន្យាផ្តល់ការគាំទ្រពេញទំហឹងដល់អ្នកបន្តវេន។
លោក Andy Burnham ត្រូវបានចាត់ទុកថា ជាបេក្ខជនឈានមុខគេ បន្ទាប់ពីបានឈ្នះឆ្នោតដាច់ស្រឡះនៅក្នុងការបោះឆ្នោតបំពេញបន្ថែមនៅមណ្ឌល Makerfield កាលពីសប្តាហ៍មុន។ លោក Burnham បានប្រកាសជាផ្លូវការថា នឹងឈរឈ្មោះ ហើយឱកាសរបស់លោកត្រូវបានជំរុញបន្ថែមភ្លាមៗ បន្ទាប់ពីលោក Wes Streeting ដែលជាគូប្រជែងដ៏ធំ បានប្រកាសដកខ្លួននិងងាកមកគាំទ្ររូបលោកវិញ។ លោក Burnham បានសន្យាថា នឹងធ្វើឱ្យសេដ្ឋកិច្ចរីកចម្រើន ខណៈមានការរក្សាច្បាប់សារពើពន្ធរបស់រដ្ឋាភិបាល។
លោក Starmer បានក្លាយជានាយករដ្ឋមន្ត្រី កាលពីថ្ងៃទី៥ ខែកក្កដា ឆ្នាំ២០២៤ បន្ទាប់ពីគណបក្សពលករបានឈ្នះឆ្នោតយ៉ាងភ្លូកទឹកភ្លូកដី។ ការចុះចេញពីតំណែងនេះ ធ្វើឱ្យលោកក្លាយជានាយករដ្ឋមន្ត្រីមកពីគណបក្សពលករដែលមានអាណត្តិខ្លីបំផុតនៅក្នុងប្រវត្តិសាស្ត្រ ហើយចក្រភពអង់គ្លេសនឹងមាននាយករដ្ឋមន្ត្រីទី៧ ចាប់តាំងពីឆ្នាំ២០១៦ មក។
នៅក្នុងសុន្ទរកថា លោកបានការពារសមិទ្ធផលរបស់លោកលើសិទ្ធិការងារ អន្តោប្រវេសន៍ និងភាពក្រីក្ររបស់កុមារ ដោយបញ្ជាក់ថា លោកបានស្តារគណបក្សឡើងវិញ ពីភាពក្ស័យធនទាំងផ្នែកនយោបាយ ហិរញ្ញវត្ថុ និងសីលធម៌។
សម្ពាធផ្ទៃក្នុងបក្សឱ្យលោកចុះចេញពីតំណែងបានកើនឡើងជាលំដាប់ បន្ទាប់ពីលទ្ធផលបោះឆ្នោតក្នុងស្រុកមិនសូវល្អកាលពីខែឧសភា រួមទាំងការមិនពេញចិត្តលើការផ្លាស់ប្តូរទិសដៅគោលនយោបាយធំៗចំនួនបីក្នុងរយៈពេលមួយខែ។ លើសពីនេះ ការសម្រេចចិត្តតែងតាំងលោក Lord Mandelson ជាឯកអគ្គរដ្ឋទូតប្រចាំសហរដ្ឋអាមេរិក ក៏បានបង្កើតជាសំណួរដេញដោលយ៉ាងខ្លាំង ដែលក្រោយមកលោក Mandelson ត្រូវបានដកតំណែងវិញ ដោយសាររឿងអាស្រូវទំនាក់ទំនងជាមួយ Jeffrey Epstein។
ជុំវិញការចាកចេញនេះ ប្រធានាធិបតីអាមេរិក លោក Donald Trump បាននិយាយថា លោក Starmer ជាមនុស្សល្អ ប៉ុន្តែបានរិះគន់ជំហររបស់លោកលើសង្គ្រាមអ៊ីរ៉ង់ និងការខួងយកប្រេង។
នៅក្នុងប្រទេស មេដឹកនាំគណបក្សប្រឆាំង រួមមាន លោកស្រី Kemi Badenoch (គណបក្សអភិរក្សនិយម) បានរិះគន់ថា លោកជានាយករដ្ឋមន្ត្រីដ៏អាក្រក់ និងបានវាយប្រហារលើគោលនយោបាយដំឡើងពន្ធ។ ចំណែកឯ លោក Sir Ed Davey (គណបក្សសេរីប្រជាធិបតេយ្យ) និងលោក Nigel Farage (គណបក្ស Reform UK) បានសម្តែងការធុញទ្រាន់នឹងការផ្លាស់ប្តូរនាយករដ្ឋមន្ត្រីមិនចេះចប់ ហើយបានទាមទារឱ្យមានការបោះឆ្នោតសកលឡើងវិញជាបន្ទាន់៕
