អន្តរជាតិ

អាមេរិកបន្ធូរបន្ថយទណ្ឌកម្មប្រេង ខណៈអ៊ីរ៉ង់បដិសេធការអះអាងជុំវិញរឿងអ្នកត្រួតពិនិត្យនុយក្លេអ៊ែរ

កញ្ញា រតនៈ ម៉ូនីកា
| ២៣ មិថុនា ២០២៦
ម៉ោង ១៥:៤២

អ៊ីរ៉ង់បានបដិសេធការអះអាងរបស់អនុប្រធានាធិបតីអាមេរិក លោក JD Vance ដែលថាខ្លួននឹងអនុញ្ញាតឱ្យអ្នកត្រួតពិនិត្យនុយក្លេអ៊ែរត្រឡប់ចូលប្រទេសវិញ បន្ទាប់ពីកិច្ចចរចាជុំដំបូងរវាងទីក្រុងវ៉ាស៊ីនតោន និងទីក្រុងតេហេរ៉ង់ នៅប្រទេសស្វ៊ីស ដើម្បីឈានទៅរកកិច្ចព្រមព្រៀងចុងក្រោយក្នុងការបញ្ចប់សង្គ្រាម។

ទោះបីជាលោក Vance និងប្រធានាធិបតី Donald Trump បានបង្ហាញក្តីសង្ឃឹមថា ការពិភាក្សាជាមួយទីភ្នាក់ងារថាមពលបរមាណូអន្តរជាតិ (IAEA) អាចនឹងចាប់ផ្តើមភ្លាមៗក៏ដោយ ក្រសួងការបរទេសអ៊ីរ៉ង់បានបញ្ជាក់ថា ខ្លួន “មិនទាន់មានការប្តេជ្ញាចិត្តថ្មីណាមួយ” ឡើយ ដោយរាល់ការចូលរួមត្រូវធ្វើឡើងតាមនីតិវិធីច្បាប់ដែលមានស្រាប់។

ការបដិសេធនេះ បានធ្វើឡើងចំពេលដែលក្រសួងហិរញ្ញវត្ថុអាមេរិក បានប្រកាសផ្អាកទណ្ឌកម្មជាបណ្តោះអាសន្នរយៈពេល ៦០ ថ្ងៃ ដែលអនុញ្ញាតឱ្យអ៊ីរ៉ង់លក់ និងដឹកជញ្ជូនប្រេងឆៅជាប្រាក់ដុល្លារអាមេរិកឡើងវិញ រួមទាំងការនាំចូលទៅអាមេរិកដោយផ្ទាល់ផងដែរ។

ជាការដោះដូរ រដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent បានថ្លែងថា ទីក្រុងតេហេរ៉ង់ បានប្តេជ្ញាចិត្តរក្សាច្រកសមុទ្រយុទ្ធសាស្ត្រ Hormuz ឱ្យបើកចំហ និងអនុញ្ញាតឱ្យអ្នកត្រួតពិនិត្យរបស់ IAEA ត្រឡប់ចូលប្រទេសវិញ (ដែលត្រូវបានដកចេញកាលពីឆ្នាំមុន បន្ទាប់ពីមានការទម្លាក់គ្រាប់បែកពីអ៊ីស្រាអែល និងអាមេរិក)។

នៅក្នុងសេចក្តីថ្លែងការណ៍រួមមួយ ប្រទេសសម្របសម្រួល គឺកាតានិងប៉ាគីស្ថាន បានបញ្ជាក់ថា ភាគីទាំងពីរបានព្រមព្រៀងលើ “ផែនទីបង្ហាញផ្លូវឆ្ពោះទៅរកការសម្រេចបាននូវកិច្ចព្រមព្រៀងចុងក្រោយ ក្នុងរយៈពេល ៦០ ថ្ងៃ”។ ក្រៅពីនេះ ភាគីទាំងសងខាងបានយល់ព្រមបង្កើត “ខ្សែទូរស័ព្ទទាក់ទង” ដើម្បីធានាសុវត្ថិភាពនាវាពាណិជ្ជកម្មតាមច្រកសមុទ្រ Hormuz និងបង្កើត “អង្គភាពកាត់បន្ថយជម្លោះ” រវាងសហរដ្ឋអាមេរិក អ៊ីរ៉ង់ និងលីបង់ ដើម្បីបញ្ចប់ប្រតិបត្តិការយោធានៅលីបង់ ដែលបច្ចុប្បន្នកំពុងស្ថិតក្រោមបទឈប់បាញ់ដ៏ផុយស្រួយរវាងអ៊ីស្រាអែល និងក្រុមហេសបូឡា។

ទោះជាយ៉ាងណា ដំណើរការចរចាមានភាពរកាំរកូស ដោយលោក Vance បានបង្ហើបថា ភាគីអ៊ីរ៉ង់ធ្លាប់បានគំរាមដើរចេញពីការចរចា បន្ទាប់ពីលោក Trump បានបង្ហោះសារព្រមានវាយប្រហារអ៊ីរ៉ង់ជាថ្មី។

ជាមួយគ្នានេះ លោក Trump ក៏បានចេញមុខព្រមានជាថ្មីម្តងទៀត ពីការិយាល័យ Oval Office ថា អាមេរិកនឹងចាត់វិធានការខ្លាំងក្លាភ្លាមៗ ប្រសិនបើអ៊ីរ៉ង់មិនគោរពតាមកិច្ចព្រមព្រៀង។ គិតត្រឹមថ្ងៃទី២២ខែមិថុនា ក្រុមអ្នកចរចាឈានមុខរបស់អ៊ីរ៉ង់បានចាកចេញពីការចរចា ប៉ុន្តែការពិភាក្សាផ្នែកបច្ចេកទេសរវាងភាគីពាក់ព័ន្ធនៅតែបន្តធ្វើឡើង៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។