សភាស៊ើបសួរនៃសាលាឧទ្ធរណ៍ភ្នំពេញ បានបដិសេធសំណើសុំនៅក្រៅឃុំរបស់ លោក ជា វុទ្ធី អតីតព្រះសង្ឃដែលត្រូវសមត្ថកិច្ចចាប់ផ្សឹកទាំងបង្ខំ ហើយបញ្ជូនទៅឃុំខ្លួន ដោយចោទពីបទ ញុះញង់ ជុំវិញការសម្តែងមតិពីកង្វល់រឿងថៃឈ្លានពានកម្ពុជា។
អង្គការសិទ្ធិមនុស្សលីកាដូ បានឱ្យដឹងថា នៅរសៀលថ្ងៃទី២៣ ខែមិថុនា សភាស៊ើបសួរសាលាឧទ្ធរណ៍ភ្នំពេញ បានបដិសេធសំណើនៅក្រៅឃុំរបស់ លោក ជា វុទ្ធី ដែលត្រូវបានចាប់ខ្លួនកាលពីខែមេសា ឆ្នាំ២០២៦ និងត្រូវបានសាលាដំបូងរាជធានីភ្នំពេញ ចោទប្រកាន់ពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមបញ្ញត្តិមាត្រា ៤៩៤ និង ៤៩៥ នៃក្រមព្រហ្មទណ្ឌ។
ប្រភពដដែល បន្តថា ក្រោយការបដិសេធសំណើសុំនៅក្រៅឃុំពីសំណាក់សាលាឧទ្ធរណ៍ភ្នំពេញហើយ លោក ជា វុទ្ធី ត្រូវបានសមត្ថកិច្ចបញ្ជូនទៅឃុំខ្លួនបណ្តោះអាសន្ននៅពន្ធនាគាររាជធានីភ្នំពេញ (PJ) វិញ ។
អតីតភិក្ខុសង្ឃ ជា វុទ្ធី ត្រូវបានសមត្ថកិច្ចខេត្តបាត់ដំបង ចាប់ខ្លួនចេញពីវត្តពោធិ៍វាល ក្នុងក្រុងបាត់ដំបង ហើយក្រោយមកលោកត្រូវបានចាប់ផ្សឹក នៅអំឡុងពេលជួបជាមួយនឹងមន្ទីរធម្មការ និងសាសនា កាលពីថ្ងៃទី១ ខែមេសា ឆ្នាំ២០២៦។ ការចាប់ខ្លួនអតីតព្រះសង្ឃរូបនេះ ធ្វើឡើងបន្ទាប់ពីលោកធ្វើការរិះគន់ចំពោះរឿងបញ្ហាព្រំដែនកម្ពុជា-ថៃ និងការយកចិត្តទុកដាក់ចំពោះជនភៀសសឹក ខណៈដែលលោកក៏សកម្មក្នុងការលើកឡើងពីបញ្ហាសង្គមជាច្រើន រួមមានបញ្ហាព្រៃឈើ បរិស្ថាន សិទ្ធិមនុស្សជាដើម នៅលើបណ្តាញសង្គមរបស់លោក។
អតីតព្រះសង្ឃ ជា វុទ្ធី ស្ថិតនៅក្នុងចំណោមមនុស្ស ១១៧នាក់ ដែលកំពុងជាប់ឃុំដោយប្រើសិទ្ធិ ដែលចងក្រងដោយអង្គការលីកាដូ៕
