អង្គការលម្ហសមុទ្រអន្តរជាតិ (IMO) របស់អង្គការសហប្រជាជាតិ គ្រោងនឹងជម្លៀសនាវិកជាង ១១,០០០ នាក់ ដែលបានជាប់គាំងនៅក្នុងឈូងសមុទ្រ ដោយសារតែសង្គ្រាមរបស់អាមេរិក និងអ៊ីស្រាអែលប្រឆាំងនឹងអ៊ីរ៉ង់។
អគ្គលេខាធិការ IMO លោក អាសេនីយ៉ូ ដូមីងហ្គេស បាននិយាយថា ប្រតិបត្តិការទ្រង់ទ្រាយធំនេះ នឹងត្រូវអនុវត្តឡើងក្រោមសហប្រតិបត្តិការជាមួយអ៊ីរ៉ង់ អូម៉ង់ សហរដ្ឋអាមេរិក និងបណ្តារដ្ឋឆ្នេរសមុទ្រដទៃទៀត បន្ទាប់ពីទទួលបានការធានាសុវត្ថិភាពចាំបាច់ និងផ្ទៀងផ្ទាត់យ៉ាងហ្មត់ចត់នូវលក្ខខណ្ឌសម្រាប់ការធ្វើនាវាចរណ៍ប្រកបដោយសុវត្ថិភាព។
ទោះបីជាកិច្ចព្រមព្រៀងបណ្តោះអាសន្នមួយ ត្រូវបានចុះហត្ថលេខាកាលពីសប្តាហ៍មុន ដើម្បីបញ្ចប់ជម្លោះក៏ដោយ ទាំងសហរដ្ឋអាមេរិក និងអ៊ីរ៉ង់ នៅតែបន្តទាស់ទែងគ្នាលើព័ត៌មានលម្អិតនៃអនុស្សរណៈនៃការយោគយល់គ្នា (MoU)។
លោក ដូណាល់ ត្រាំ បានប្រកាសថា អ៊ីរ៉ង់បានយល់ព្រមទាំងស្រុងលើការត្រួតពិនិត្យនុយក្លេអ៊ែរកម្រិតខ្ពស់បំផុតទៅថ្ងៃអនាគត ប៉ុន្តែភាគីអ៊ីរ៉ង់បាននិយាយថា ស្ថាប័នឃ្លាំមើលរបស់ UN នឹងមិនអាចត្រួតពិនិត្យទីតាំងនុយក្លេអ៊ែរដែលត្រូវបានទម្លាក់គ្រាប់បែកកាលពីឆ្នាំមុននោះឡើយ។ ចំណែកឯប្រធានាធិបតីអ៊ីរ៉ង់ លោក ម៉ាស៊ូដ ប៉េសេសគីយ៉ាន និងនាយករដ្ឋមន្ត្រីប៉ាគីស្ថាន បានបញ្ជាក់ថា សមត្ថភាពការពារខ្លួន និងមីស៊ីលបាលីស្ទីករបស់អ៊ីរ៉ង់ មិនត្រូវបានពិភាក្សា និងមិនស្ថិតនៅលើតុចរចាទាល់តែសោះ។
ស្របពេលជាមួយគ្នានេះ រដ្ឋមន្ត្រីការបរទេសអាមេរិក លោកម៉ាកូ រូប៊ីអូ បានចាប់ផ្តើមដំណើរទស្សនកិច្ចនៅតំបន់ឈូងសមុទ្រ រួមមានសហភាពអារ៉ាប់រួម គូវែត និងបារ៉ែន ដើម្បីពិភាក្សាអំពីកិច្ចព្រមព្រៀងនេះ។ លោកបានព្រមានថា គ្មានប្រទេសណាមួយត្រូវបានអនុញ្ញាតឱ្យទារកម្រៃធ្វើដំណើរលើច្រកសមុទ្រហរមូសនោះទេ ព្រោះវាជាផ្លូវទឹកអន្តរជាតិស្របតាមច្បាប់អន្តរជាតិដែលមានស្រាប់ ហើយលោកជឿថា ប្រទេសទាំងអស់នៅក្នុងតំបន់នឹងយល់ស្របលើរឿងនេះ។
ការជម្លៀសនាវិកដែលជាប់គាំងនេះ គឺពឹងផ្អែកទាំងស្រុងទៅលើការបើកចំហនៃច្រកសមុទ្រហរមូស។ តាមផែនការរបស់ IMO ផ្លូវបណ្តោះអាសន្នចំនួនពីរឆ្លងកាត់ច្រកសមុទ្រនេះនឹងត្រូវប្រើប្រាស់សម្រាប់ការជម្លៀស ដោយនាវានីមួយៗនឹងត្រូវទាក់ទងផ្ទាល់សម្រាប់ការណែនាំបន្ថែម។
ច្រកសមុទ្រនេះ ត្រូវបានអ៊ីរ៉ង់បិទបន្ទាប់ពីការវាយប្រហារបានចាប់ផ្តើមកាលពីចុងខែកុម្ភៈ ដែលបានធ្វើឱ្យតម្លៃប្រេងពិភពលោកហក់ឡើងហួស ១០០ ដុល្លារក្នុងមួយបារ៉ែល និងរឹតត្បិតការដឹកជញ្ជូនថាមពលរួមទាំងទំនិញសំខាន់ៗ។ បច្ចុប្បន្ន ចំនួននាវាដែលធ្វើដំណើរឆ្លងកាត់ចាប់តាំងពីការចុះហត្ថលេខាលើកិច្ចព្រមព្រៀងបានកើនឡើងវិញខ្លះហើយ ប៉ុន្តែវានៅតែមានកម្រិតទាបជាងមធ្យមភាគមុនពេលមានជម្លោះ ខណៈទិន្នន័យបង្ហាញថាមាននាវាដឹកប្រេងជាង ២០០ គ្រឿងកំពុងរង់ចាំនៅក្នុងច្រកសមុទ្រនៅឡើយ៕
