ប្រទេសរុស្ស៊ី បានចោទប្រកាន់សហរដ្ឋអាមេរិកថា បានបរាជ័យក្នុងការអនុវត្តតាម «ការយល់ដឹងគ្នា» ដែលសម្រេចបានរវាងលោក វ្ល៉ាឌីមៀ ពូទីន និងលោក ដូណាល់ ត្រាំ នៅក្នុងកិច្ចប្រជុំកំពូលមួយនៅរដ្ឋអាឡាស្កាកាលពីខែសីហាឆ្នាំមុន ដែលជាការផ្លាស់ប្តូរមួយបង្ហាញពីការកើនឡើងនូវភាពមិនពេញចិត្តនៅក្នុងទីក្រុងម៉ូស្គូ។
ក្នុងរយៈពេលបីថ្ងៃ មន្ត្រីជាន់ខ្ពស់រុស្ស៊ីចំនួនបីរូប បាននិយាយថា ទីក្រុងវ៉ាស៊ីនតោនមិនបានអនុវត្តតាមកិច្ចព្រមព្រៀងនោះទេ។ ការអត្ថាធិប្បាយរបស់ពួកគេបានធ្វើឡើង បន្ទាប់ពីមានការកើនឡើងនូវការវាយប្រហារដោយដ្រូនរបស់អ៊ុយក្រែន ចូលជ្រៅទៅក្នុងទឹកដីរុស្ស៊ី និងកិច្ចប្រជុំកំពូលរបស់ក្រុមប្រទេស G7 ដែលក្នុងនោះ លោក ហ្សេឡេនស្គី បានប្រកាសថា ទីក្រុងគីវកំពុងបង្វែរស្ថានការណ៍សង្គ្រាម។
តាមរយៈ «ស្មារតីនៃទីក្រុងអង់ខូរេច» រុស្ស៊ីរំពឹងថា លោក ត្រាំ នឹងយល់ស្របចំពោះការទាមទារឱ្យអ៊ុយក្រែនប្រគល់តំបន់ដុនបាស (Donbas) ទាំងមូល ជាការដោះដូរនឹងការបង្កកខ្សែត្រៀមប្រយុទ្ធនៅកន្លែងផ្សេងទៀត។
ទោះជាយ៉ាងណាក៏ដោយ ត្រឹមតែមួយខែបន្ទាប់ពីកិច្ចប្រជុំកំពូល លោក ត្រាំ បានផ្លាស់ប្តូរជំហរដោយលើកឡើងថា អ៊ុយក្រែនអាចដណ្តើមយកទឹកដីទាំងអស់ត្រឡប់មកវិញ ដែលធ្វើឱ្យទីក្រុងម៉ូស្គូខកចិត្តយ៉ាងខ្លាំង។
នៅក្នុងសេចក្តីថ្លែងការណ៍ជាបន្តបន្ទាប់ ជំនួយការវិមានក្រឹមឡាំង លោក យូរី អ៊ូសាកូវ បាននិយាយថា សហរដ្ឋអាមេរិកមិនបានបំពេញឱ្យភាគីរបស់ខ្លួនពេញលេញនោះទេ។ បន្ទាប់មក រដ្ឋមន្ត្រីការបរទេស លោក ស៊ែរហ្គី ឡាវរ៉ូវ បានលើកឡើងថា កិច្ចប្រជុំកំពូលនោះ ប្រហែលជាល្បិចកលរបស់អាមេរិក ដើម្បីទិញពេលវេលាបំពាក់អាវុធឱ្យអ៊ុយក្រែន។
ចំណែកឯអនុរដ្ឋមន្ត្រី លោក ស៊ែរហ្គី រីយ៉ាបកូវ ក៏បានចោទអាមេរិកថា កំពុងដើរតាមគោលនយោបាយប្រឆាំងរុស្ស៊ីរបស់អង់គ្លេស និងបារាំង ប៉ុន្តែលោកបញ្ជាក់ថា កិច្ចសន្ទនានឹងនៅតែបន្ត។
ក្រុមអ្នកវិភាគ បានពន្យល់ថា ការផ្លាស់ប្តូរជំហរនេះឆ្លុះបញ្ចាំងពីការព្រួយបារម្ភរបស់ទីក្រុងម៉ូស្គូ ចំពោះស្ថានភាពសេដ្ឋកិច្ច និងយោធារបស់ខ្លួន ស្របពេលដែលការយកចិត្តទុកដាក់របស់សហរដ្ឋអាមេរិក បានងាកទៅរកជម្លោះនៅអ៊ីរ៉ង់ចាប់តាំងពីខែកុម្ភៈមក។ បច្ចុប្បន្ន មិនមានដំណើរការការទូតជាប្រព័ន្ធ ឬកិច្ចព្រមព្រៀងណាមួយឡើយ ហើយរុស្ស៊ីពិតជាចង់ឱ្យអាមេរិកចូលរួមឡើងវិញ ដើម្បីជួយបញ្ចប់សង្គ្រាមទៅតាមលក្ខខណ្ឌរបស់រុស្ស៊ី៕
