សហរដ្ឋអាមេរិក នៅចុងខែមិថុនានេះ បានបន្ថែមទណ្ឌកម្មទៅលើបុគ្គល និងអង្គភាពជាង២០ បន្ថែមទៀត ក្រោយរកឃើញភាពជាប់ពាក់ព័ន្ធជាមួយអង្គការឧក្រិដ្ឋកម្មឆ្លងដែនព្រីនស៍ គ្រុប ក្នុងនោះសហរដ្ឋអាមេរិកបានរកឃើញបន្ថែមថា ធនាគារមួយនៅកម្ពុជា បានជាប់ពាក់ព័ន្ធជាមួយក្រុមហ៊ុនព្រីនស៍ ក្នុងឧក្រិដ្ឋកម្មឆ្លងដែនលំដាប់ពិភពលោកមួយនេះ។
បើយោងតាមសេចក្ដីប្រកាសរបស់ក្រសួងរតនាគារសហរដ្ឋអាមេរិក នៅថ្ងៃទី២៣ ខែមិថុនា ឆ្នាំ២០២៦ ស្ដីពីការដាក់ទណ្ឌកម្មទៅលើបណ្ដាញអង្គការឧក្រិដ្ឋកម្មឆ្លងដែន ដែលជាប់ពាក់ព័ន្ធជាមួយក្រុមហ៊ុន ព្រីនស៍ គ្រុប (Prince Group TCO) យ៉ាងហោចណាស់មនុស្ស ៩នាក់ និងអង្គភាពចំនួន២៦ បានរងទណ្ឌកម្មពីសហរដ្ឋអាមេរិក។
ទណ្ឌកម្មថ្មីនេះ បានសំដៅដល់បុគ្គលឈ្មោះ ហូ សៀវៃ (Hu Xiaowei) ដែលជា «អ្នកចេញបញ្ជាទី២» និងជាបងធំ បន្ទាប់ពីលោក ចេន ហ្ស៊ី (Chen Xhi) ក្នុងអង្គការឧក្រិដ្ឋកម្មឆ្លងដែន ព្រីនស៍ គ្រុប។ សហរដ្ឋអាមេរិកបានរកឃើញថា លោក ហូ គឺជាអ្នកមើលការខុសត្រូវ និងក្ដោបក្ដាប់ទ្រព្យសម្បត្តិមហាសាលរបស់លោក ចេន ហ្ស៊ី មានដូចជាជំនួញក្នុងវិស័យអាកាសចរណ៍ អចលនទ្រព្យ និងល្បែងស៊ីសង។
ទណ្ឌកម្មថ្មីនេះ ធ្វើឡើងដោយបណ្ដាញអនុវត្តន៍ច្បាប់ប្រឆាំងឧក្រិដ្ឋកម្មហិរញ្ញវត្ថុ (FinCen) ដែលបានពង្រីកវិសាលភាពទណ្ឌកម្មទៅលើក្រុមហ៊ុនផ្សេងទៀតរបស់ ហួយវ័ន ផងដែរ រួមមាន ក្រុមហ៊ុន អេច ផេ (H Pay) និងក្រុមហ៊ុនដែលស្នងអាជីវកម្មពី ហួយវ័ន ទាំងអស់។ ទន្ទឹមគ្នានេះ ក្រសួងយុត្តិធម៌អាមេរិក បានកាត់ផ្ដាច់បណ្ដាញលាងលុយ និងការឆបោករបស់ក្រុមហ៊ុន ហួយវ័ន ដោយដកហូតរឹបអូសយកគណនីមេក្នុងបណ្ដាញអ៊ីនធឺណិត។
លើសពីនេះ ធនាគារ CCU Commercial Bank PLC ដែលមានមូលដ្ឋាននៅប្រទេសកម្ពុជា ត្រូវអាមេរិករកឃើញថា ជាបណ្ដាញរកស៊ីរបស់អង្គការឧក្រិដ្ឋកម្មឆ្លងដែន ព្រីនស៍ គ្រុប ផងដែរ។
ធនាគារ CCU Commercial Bank បានបង្កើតឡើងនៅឆ្នាំ២០២២ ដោយមានលោក ចេន បូ (Chen Bo) គឺជានាយកប្រតិបត្តិ។ ការិយាល័យកណ្ដាលធនាគារនេះ មានទីតាំងនៅតាមបណ្ដោយមហាវិថីព្រះមុនីវង្ស ក្នុងសង្កាត់បឹងត្របែក ខណ្ឌចំការមន ស្ថិតនៅក្បែរផ្នែកខាងក្រោយ មណ្ឌលពាណិជ្ជកម្ម ព្រីនស៍ ថាមស៍ឃ្វែរ (Prince Time Square) និងមានចម្ងាយតែជាង ១គីឡូម៉ែត្រប៉ុណ្ណោះពីក្រសួងមហាផ្ទៃ។
តាមរយៈចំណាត់ការថ្មីនេះ ទ្រព្យសម្បត្តិរបស់បុគ្គលដែលមានក្នុងបញ្ជីទណ្ឌកម្ម នឹងត្រូវបង្ខាំងទុក និងរាយការណ៍ទៅការិយាល័យគ្រប់គ្រងទ្រព្យសម្បត្តិជនបរទេស របស់ក្រសួងរតនាគារសហរដ្ឋអាមេរិក (OFAC)។
រដ្ឋមន្ត្រីក្រសួងរតនាគារសហរដ្ឋអាមេរិក លោក ស្កុត បេសិន (Scott Bessent) ថ្លែងក្នុងសេចក្ដីប្រកាសថា មជ្ឈមណ្ឌលបោកប្រាស់នៅអាស៊ីអាគ្នេយ៍ បានលួចលុយរាប់ពាន់លានដុល្លារ ពីជនរងគ្រោះអាមេរិកជារៀងរាល់ឆ្នាំ។ លោកបន្តថា រដ្ឋបាលលោក ដូណាល់ ត្រាំ នឹងរួបរួមគ្នាក្នុងកិច្ចខិតខំប្រឹងប្រែងរបស់ខ្លួន ក្នុងការរុះរើសហគ្រាសឧក្រិដ្ឋកម្មនៅក្រៅប្រទេសទាំងនេះ ហើយរតនាគារនឹងបន្តប្រើប្រាស់ឧបករណ៍របស់ខ្លួន ដើម្បីរំខានបណ្តាញដែលនៅពីក្រោយការក្លែងបន្លំដ៏ធ្ងន់ធ្ងរនេះ ដើម្បីការពារជនជាតិអាមេរិក។
គួររំឭកថា ចំណាត់ការរួមគ្នានេះ បង្កើតឡើងបន្ថែមលើចំណាត់ការទៅលើអង្គការឧក្រិដ្ឋកម្មឆ្លងដែន ព្រីនស៍ គ្រុប (Prince Group TCO) កាលពីខែតុលា ឆ្នាំ២០២៥ និងបន្ទាប់ពីមានការចាប់ខ្លួនមេខ្លោងឧក្រិដ្ឋកម្ម គឺលោក ចេន ហ្ស៊ី និងបក្ខពួកផ្សេងទៀត នៅដើមខែមករា ឆ្នាំ២០២៦ នេះ។
បើទោះបី លោក ចេន ហ្ស៊ី ត្រូវបានចាប់ខ្លួនដោយអាជ្ញាធរកម្ពុជា តែមានមនុស្សពីរនាក់ទៀត ដែលមិនទាន់មានចំណាត់ការផ្លូវច្បាប់ណាមួយទៅលើពួកគេ ទោះបីសហរដ្ឋអាមេរិកបានដាក់ទណ្ឌកម្ម នោះគឺសមាជិកព្រឹទ្ធសភា លោក កុក អាន និងប្រធាន LYP Group គឺលោក លី យ៉ុងផាត់ ក្រោយរកឃើញថាបុគ្គលមានអំណាចទាំងពីរនេះ ជាប់ពាក់ព័ន្ធនឹងឧក្រិដ្ឋកម្មឆ្លងដែន និងការឆបោក។
ក្នុងសេចក្ដីប្រកាសដដែល ក្រសួងរតនាគារសហរដ្ឋអាមេរិក អះអាងថា នឹងនៅតែបន្តធ្វើសកម្មភាពដោយមានការសម្របសម្រួលយ៉ាងជិតស្និទ្ធជាមួយដៃគូអន្តរជាតិ ដើម្បីដោះស្រាយការគំរាមកំហែង ដែលបង្កឡើងដោយមជ្ឈមណ្ឌលបោកប្រាស់ និងការពារការរំលោភបំពានខុសច្បាប់នៃឧស្សាហកម្មទ្រព្យសកម្មលើប្រព័ន្ធឌីជីថល។
យ៉ាងណា រដ្ឋាភិបាលកម្ពុជា មិនទាន់បញ្ចេញប្រតិកម្ម ជុំវិញវិធានដាក់ទណ្ឌកម្មថ្មីបន្ថែមទៀត របស់សហរដ្ឋអាមេរិកនៅឡើយទេ គិតត្រឹមម៉ោងផ្សាយនេះ៕
