សេតវិមាន កាលពីថ្ងៃទី២៤ខែមិថុនា បានស្នើសុំឱ្យសមាជិកសភាអនុម័តកញ្ចប់ថវិកាចំនួន ៨៧,៦ ពាន់លានដុល្លារ ដែលភាគច្រើនសម្រាប់ «តម្រូវការបន្ទាន់» ពាក់ព័ន្ធនឹងសង្គ្រាមរបស់សហរដ្ឋអាមេរិកប្រឆាំងនឹងអ៊ីរ៉ង់ គឺតែមួយថ្ងៃប៉ុណ្ណោះ បន្ទាប់ពីសភាបានអនុម័តសេចក្តីសម្រេចកម្រិតអំណាចសង្គ្រាមរបស់ប្រធានាធិបតី។
ថវិកាភាគច្រើន ពោលគឺ ៦៧ ពាន់លានដុល្លារ គឺសម្រាប់ក្រសួងការពារជាតិ រួមមាន គ្រាប់រំសេវ ចំណាយប្រតិបត្តិការ និងកម្មវិធីសម្ងាត់។ ថវិកាដែលនៅសល់ សម្រាប់វិធានការមិនពាក់ព័ន្ធ រួមមាន ១១ ពាន់លានដុល្លារសម្រាប់កសិករអាមេរិក និង ១,៤ ពាន់លានដុល្លារ ដើម្បីដោះស្រាយការផ្ទុះឡើងនៃវីរុសអេបូឡានៅអាហ្វ្រិកកណ្តាល។
សំណើនេះប្រឈមនឹងការតស៊ូយ៉ាងស្វិតស្វាញនៅក្នុងសភា ដោយសារតែជម្លោះជាមួយអ៊ីរ៉ង់មិនទទួលបានការគាំទ្រពីអ្នកបោះឆ្នោតឡើយ ហើយការបោះឆ្នោតពាក់កណ្តាលអាណត្តិ ក៏កំពុងខិតជិតមកដល់នៅខែវិច្ឆិកានេះ។
លិខិតស្នើសុំថវិការបស់សេតវិមានដែលផ្ញើទៅកាន់ប្រធានរដ្ឋសភា លោក ម៉ៃ ចនសុន (Mike Johnson) បានបញ្ជាក់ថា ថវិកានេះគឺសម្រាប់ «ប្រតិបត្តិការ Epic Fury» និងរួមបញ្ចូលទាំងថវិកាប្រហែល ៣០០ លានដុល្លារ ដើម្បីពង្រឹងសន្តិសុខនៅតាមស្ថានទូតអាមេរិកនៅមជ្ឈិមបូព៌ា និងអាស៊ីខាងត្បូង។
ទោះបីជាបច្ចុប្បន្នមានបទឈប់បាញ់ក៏ដោយ ក៏ក្រសួងការពារជាតិចាំបាច់ត្រូវបំពេញឃ្លាំងអាវុធឡើងវិញ។ ការស្នើសុំនេះ ធ្វើឡើងចំពេលដែលសមាជិកសភាបក្សសាធារណរដ្ឋ បង្ហាញការសង្ស័យចំពោះផែនការសន្តិភាពដែលលោក ត្រាំ បានព្រមព្រៀងជាមួយអ៊ីរ៉ង់កាលពីសប្តាហ៍មុន។
មុនពេលកិច្ចប្រជុំកាលពីថ្ងៃទី២៤ខែមិថុនា នៅវិមាន Capitol លោក ត្រាំ បានពិពណ៌នាការបោះឆ្នោតលើអំណាចសង្គ្រាមនោះថាជា «ទង្វើខុសពេលវេលា និងគ្មានន័យ» ហើយបានហៅសមាជិកព្រឹទ្ធសភាបក្សខ្លួន ៤ រូប ដែលបានបោះឆ្នោតគាំទ្រខាងគណបក្សប្រជាធិបតេយ្យថាជា «អ្នកចាញ់»។
សមាជិកព្រឹទ្ធសភាម្នាក់ក្នុងចំណោមនោះ គឺលោក ប៊ីល ខាស៊ីឌី (Bill Cassidy) បានតវ៉ាទៅកាន់ប្រធានាធិបតីថា លោកមិនបានប្រាប់ប្រជាជនអំពីអ្វីដែលកំពុងកើតឡើងនោះទេ ដោយសង្គ្រាមនេះត្រូវបានគេរំពឹងថានឹងអូសបន្លាយពេលតែបួនសប្តាហ៍ប៉ុណ្ណោះ ប៉ុន្តែឥឡូវនេះវាបានអូសបន្លាយដល់បួនខែហើយ។
នៅក្នុងជំនួបជាមួយអគ្គលេខាធិការអង្គការណាតូ លោក ត្រាំ ក៏បានសម្តែងការមិនពេញចិត្តផងដែរថា ពួកគេចង់ចាញ់សង្គ្រាមព្រោះតែភាពល្ងង់ខ្លៅ។
កាលពីខែមុន មន្ត្រីហិរញ្ញវត្ថុរបស់ក្រសួងការពារជាតិបានប្រាប់សភាថា សង្គ្រាមនេះបានចំណាយអស់ប្រហែល ២៩ ពាន់លានដុល្លារហើយ ប៉ុន្តែអ្នកវិភាគ និងសមាជិកសភាបាននិយាយថា ការប៉ាន់ប្រមាណនេះមិនទាន់ឆ្លុះបញ្ចាំងពីទំហំពិតប្រាកដនៃការខូចខាតហិរញ្ញវត្ថុនោះទេ៕
