ជនជាតិដើមភាគតិចកាចក់ខេត្តរតនគិរី ដែលរងពាក្យបណ្តឹងពីក្រុមហ៊ុន ជំរុញឱ្យតុលាការពន្លឿនចាត់វិធានការលើក្រុមហ៊ុនវិញឱ្យបានឆាប់ ដើម្បីការពារដីព្រៃអារក្សរបស់សហគមន៍ ដោយសំអាងថា តុលាការខេត្តនេះ បានកោះហៅពួកគេមកសាកសួរតាមបណ្តឹងក្រុមហ៊ុន តែផ្អឹបបណ្តឹងពួកគេចោល។
ប្រជាពលរដ្ឋជនជាតិដើមភាគតិចកាចក់ ចំនួន ៧នាក់ រស់នៅឃុំតាឡាវ ស្រុកអណ្តូងមាស បានលើកឡើងថា ពាក្យបណ្តឹងរបស់ពួកគាត់ ដែលដាក់ប្តឹងមនុស្សចំនួន ១០នាក់ ដែលជាប់ពាក់ព័ន្ធនឹងការទិញលក់ និងកាប់ទន្ទ្រានដីព្រៃអារក្ស ក្នុងនោះមានទាំងមេការរបស់អ្នកស្រី ហង្ស សាវីន អ្នកកាន់កាប់ដី គឺលោក សៀត សីហា ហៅ ពៅ ផងដែរ ដែលបានប្តឹងពួកគេទៅតុលាការខេត្តនេះ។
បើតាមជនជាតិដើមកាចក់ ដីព្រៃអារក្សនេះ នៅឃុំតាឡាវ ស្រុកអណ្តូងមាស ខេត្តរតនគិរី ដែលពួកគេថា បានប្តឹងករណីនេះទៅកាន់សាលាដំបូងខេត្តរតនគិរី កាលពីថ្ងៃទី២៤ ខែមេសា ឆ្នាំ២០២៦ ប៉ុន្តែថាតុលាការមិនបានកោះហៅភាគីក្រុមហ៊ុន មកសាកសួរតាមបណ្តឹងរបស់ពួកគេទេ តែបែរជាកោះហៅពួកគេមកសាកសួរតាមបណ្តឹងក្រុមហ៊ុនទៅវិញ។
ផ្តើមពីបញ្ហានេះ លោក សល់ ថែន ពលរដ្ឋម្នាក់ក្នុងចំណោម ៥នាក់ ដែលបានដាក់ពាក្យប្តឹងទៅកាន់តុលាការខេត្តរតនគិរី ស្នើឲ្យតុលាការជួយពន្លឿនលើកយកសំណុំរឿងពួកគាត់ មកចាត់ការឲ្យបានឆាប់ ដើម្បីការពារធនធានព្រៃឈើជាតិ កុំឲ្យបាត់បង់ និងផ្តល់យុត្តិធម៌ដល់ពលរដ្ឋជនជាតិដើមភាគតិច ដែលរងនូវការប្រមាថ។
លោកថ្លែងហួសចិត្តថា អ្នកឈឺឆ្អាលការពារដីព្រៃឈើ ដែលជាសម្បត្តិធម្មជាតិ កុំឲ្យបាត់បង់ ឬមានការរំលោភបំពាន បែរជាត្រូវមានការប្តឹងផ្តល់ ឬមានទោស។ ចំណែក អ្នកគប់គិតទិញលក់ ទន្ទ្រានកាន់កាប់ និងបំផ្លាញព្រៃឈើរដ្ឋ បែរជាច្បាប់ការពារទៅវិញ។
លោកបន្ថែមថា៖ «សុំឲ្យតុលាការជួយដោះស្រាយឲ្យបានលឿនផង។ អត់ដឹងម៉េចគេអត់ដោះស្រាយឲ្យយើង ខ្ញុំអត់យល់ដែររឿងនេះ?។ ដូចថាវាយឺតយ៉ាវពេក យូរមកហើយរឿងនេះ។ ឲ្យគេដោះស្រាយ គេអត់ដោះស្រាយ ខ្ញុំដាក់ពាក្យបណ្តឹងទៅតុលាការខេត្តរតនគិរី តាំងពីថ្ងៃទី២៤ ខែមេសា ឆ្នាំ២០២៦ គេអត់ទាន់ដោះស្រាយ។ ហើយប្រជាពលរដ្ឋ ក្តៅក្រហាយពេកទ្រាំអត់បាន ក៏ធ្វើសកម្មភាពអញ្ចឹងទៅ»។
ស្រដៀងគ្នាដែរ លោក សល់ តួ ក៏ជាពលរដ្ឋជនជាតិដើមម្នាក់ដែរ ដែលបានដាក់ពាក្យបណ្តឹង ទៅកាន់តុលាការខេត្តរតនគិរី ប្តឹងអ្នកជាប់ពាក់ព័ន្ធនឹងការទិញលក់ដីព្រៃឈើ ដែលជាសម្បត្តិសាធារណៈរបស់រដ្ឋ ដោយខុសច្បាប់ នៅមូលដ្ឋានភូមិកាណាត ឃុំតាឡាវ ស្រុកអណ្តូងមាស ។ លោកជំរុញឲ្យតុលាការខេត្តរតនគិរី ត្រូវមានចំណាត់ការរឿងនេះឲ្យបានឆាប់ ដ្បិតកុំឲ្យវិវាទនេះអូសបន្លាយពេលយូរ និងទប់ស្កាត់ការកាប់ទន្ទ្រានដីរដ្ឋខុសច្បាប់ ពិសេសដីព្រៃអារក្ស ដែលជាព្រៃជំនឿរបស់ពួកគាត់។
លោកថា៖ «ខ្ញុំចង់ឲ្យតុលាការដោះស្រាយបណ្តឹងខ្ញុំ ខ្ញុំឆ្ងល់ថា ខ្ញុំបានដាក់ពាក្យបណ្តឹងឲ្យតុលាការជួយដោះស្រាយហើយ។ តែតុលាការនៅតែចេញដីកាកោះហៅពួកខ្ញុំទៅសួរទៀត។ ហើយចុះអ្នកដែលខ្ញុំប្តឹង គប់គិតគ្នាលួចលក់ដីព្រៃអារក្ស ហេតុម៉េចអត់ឃើញតុលាការដោះស្រាយផង។ ប្រជាជនកំពុងតែឆ្ងល់រាល់ថ្ងៃនេះ»។
ជាងនេះទៀត លោកក៏ស្នើឲ្យអភិបាលខេត្តរតនគិរី ពិសេសអង្គភាពប្រឆាំងអំពើពុករលួយ ជួយបញ្ជូនមន្ត្រីស្អាតស្អំ ចុះស៊ើបអង្កេតដល់ទីតាំង មានសកម្មភាពទិញលក់ និងកាប់ទន្ទ្រានដីព្រៃរដ្ឋ ដោយខុសច្បាប់ នៅឃុំតាឡាវ ស្រុកអណ្តូងមាស ឲ្យបានឆាប់ ដើម្បីជួយទប់ស្កាត់ព្រៃឈើ ឬព្រៃអារក្ស របស់ជនជាតិដើមភាគតិច ឲ្យបានគង់វង្ស ត្បិតបច្ចុប្បន្ននេះ ត្រូវរងការកាប់បំផ្លាញធ្វើកម្មសិទ្ធិឯកជន ស្ទើរវិនាសហិនហោចអស់ទៅហើយ។
ពលរដ្ឋជនជាតិដើមភាគតិចទាំង ៧នាក់ ដែលបានដាក់ពាក្យប្តឹង អ្នកជាប់ពាក់ព័ន្ធនឹងការទិញលក់ និងកាប់ទន្ទ្រានដីព្រៃសាធារណៈរបស់រដ្ឋ នៅខេត្តរតនគិរីមានឈ្មោះ លោក សល់ ថែន, លោក រម៉ាម ហែត, លោក សល់ ជាង, លោក រចំ លីន, លោក សយ ឆោម, លោក រម៉ាម មាត និង លោក សល់ តួ ។
ទាក់ទិនបញ្ហានេះដែរ លោក ឌិន ខន្នី អ្នកសម្របសម្រួលសមាគមអាដហុកប្រចាំខេត្តរតនគិរី ក៏ជំរុញឲ្យតុលាការជួយពន្លឿន លើកយកសំណុំរឿងរបស់ប្រជាពលរដ្ឋប្តឹងអ្នកជាប់ពាក់ព័ន្ធ នឹងសកម្មភាព ទិញលក់ដីព្រៃសាធារណៈរបស់រដ្ឋ នៅឃុំតាឡាវ ស្រុកអណ្តូងមាស ឲ្យបានឆាប់ ព្រោះបទល្មើសនេះ បាននាំឲ្យវិនាសព្រៃឈើនៅតំបន់នេះធ្ងន់ធ្ងរ។ ជាពិសេសបានបំផ្លាញដល់ដីព្រៃអារក្ស ដែលជាព្រៃជំនឿរបស់ពលរដ្ឋជនជាតិដើមភាគតិចថែមទៀត។
លោកថា៖ «អញ្ចឹងហើយ គឺមានតែបើកការស៊ើបអង្កេតដោយយុត្តិធម៌ គឺមានន័យថា ទាំងបណ្តឹងរបស់ប្រជាពលរដ្ឋ ទាំងបណ្តឹងរបស់មេការលោកស្រី ហង្ស សាវីន ឈ្មោះ សៀត សីហា ប្តឹងពលរដ្ឋ គឺត្រូវបើកការស៊ើបអង្កេតដូចគ្នា។ យើងដឹងហើយថា ការកាប់ទន្ទ្រានដីព្រៃ ការឆ្ការ ការដុតដីព្រៃ ការរំលំព្រៃឈើដែលជាសម្បត្តិរបស់រដ្ឋ ជាបទល្មើសដែលមានចែងនៅក្នុងច្បាប់ ដែលត្រូវបើកការស៊ើបអង្កេត និងផ្តន្ទាទោស។ ដូច្នេះខ្ញុំសូមស្នើសុំតំណាងអយ្យការមេត្តាពន្លឿនបើកការស៊ើបអង្កេតលើអំពើកាប់ទន្ទ្រានដីព្រៃ ដែលជាសម្បត្តិរបស់រដ្ឋ ខណៈដែលប្រជាពលរដ្ឋ បានដាក់ពាក្យបណ្តឹងបរិហារចូលទៅតំណាងអយ្យការយូរដែរហើយ ដើម្បីឈានដល់បញ្ចប់វិវាទ និងផ្តន្ទាទោសជនល្មើស និងអ្នកពាក់ព័ន្ធដទៃទៀត»។
កាលពីថ្ងៃសៅរ៍ ទី២៥ ខែមិថុនា ម្សិលមិញ តុលាការខេត្តរតនគិរី បានចេញដីកាកោះហៅពលរដ្ឋជនជាតិដើមភាគតិចកាចក់ចំនួន ៤នាក់ ឲ្យទៅបំភ្លឺនៅតុលាការ ជុំវិញបណ្តឹងរបស់ឈ្មោះ សៀត សីហា មេការតំណាងក្រុមហ៊ុន ប្តឹងពីបទ «ធ្វើឲ្យខូចខាតដោយចេតនាមានស្ថានទម្ងន់ទោស» ប្រព្រឹត្តនៅថកងៃទី២៦ ខែឧសភា ឆ្នាំ២០២៦ នៅភូមិកាណាត ឃុំតាឡាវ ស្រុកអណ្តូងមាស។ ប៉ុនែ្តក្រោយបញ្ចប់ការសាកសួរ តុលាការក៏បានអនុញ្ញាតឲ្យពលរដ្ឋទាំងនោះ វិលត្រឡប់ទៅលំនៅដ្ឋានរឿងៗខ្លួនវិញ។
ក្នុងបរិបទសាធារណៈ លោកស្រី ហង្ស សាវីន គឺជាឈ្មោះរបស់បុគ្គលម្នាក់ ដែលត្រូវបានផ្សារភ្ជាប់ជាមួយទំនាស់ដីធ្លីដ៏រសើបមួយនៅខេត្តរតនគិរី ។
យោងតាមសេចក្តីរាយការណ៍នានា លោកស្រី ហង្ស សាវីន និងតំណាងមេការគឺ លោក សៀត សីហា ត្រូវបានសហគមន៍ជនជាតិដើមភាគតិចកាចក់ នៅភូមិកាណាត ឃុំតាឡាវ ស្រុកអណ្ដូងមាស ចោទប្រកាន់ពីបទបញ្ជាកងកម្លាំង និងគ្រឿងចក្រចូលឈូសឆាយទន្ទ្រានយកដីព្រៃអារក្សរបស់សហគមន៍។
ដីព្រៃនេះ គឺជាទីតាំងសក្ការៈបូជាប្រពៃណីរបស់ជនជាតិដើមភាគតិច ដែលពួកគេកាន់កាប់តាំងពីមុនឆ្នាំ១៩៧៩។ ជម្លោះនេះបានឈានដល់ការផ្ទុះហិង្សា និងការដាក់ពាក្យបណ្ដឹងនៅសាលាដំបូងខេត្តរតនគិរី ដោយសហគមន៍ប្រជាពលរដ្ឋជាង ៦០នាក់ បានតវ៉ាប្រឆាំងនឹងសកម្មភាពរបស់ភាគីលោកស្រី ហង្ស សាវីន៕
