ក្រុមអ្នកជួយសង្គ្រោះគិតមកដល់ត្រឹមថ្ងៃទី២៦ខែមិថុនានេះ នៅតែកំពុងស្វែងរកមនុស្សតាមគំនរអគារបាក់បែក បន្ទាប់ពីគ្រោះរញ្ជួយដីដ៏ខ្លាំងក្លាចំនួនពីរលើក បានវាយប្រហារប្រទេសវេណេស៊ុយអេឡា នៅជិតរដ្ឋធានី ដោយបានសម្លាប់មនុស្សយ៉ាងហោចណាស់ ២៣៥ នាក់ និងរបួសជាង ១,៥០០ នាក់។ គ្រោះរញ្ជួយដីនេះ បានវាយប្រហារនៅម៉ោង ១៨:០៤ (២២:០៤ GMT) កាលពីថ្ងៃទី២៤ខែមិថុនា ដែលជាថ្ងៃឈប់សម្រាកជាតិ។
លោក Jorge Rodríguez ប្រធានសភាជាតិបានរាយការណ៍កាលពីថ្ងៃព្រហស្បតិ៍ថា ចំនួនអ្នកស្លាប់បានកើនឡើង បន្ទាប់ពីប្រធានាធិបតីស្តីទី លោកស្រី Delcy Rodríguez បានប្រកាសដាក់ប្រទេសក្នុងស្ថានភាពអាសន្ន។ ជាមួយគ្នានេះ សហរដ្ឋអាមេរិកបានសន្យាផ្តល់ជំនួយចំនួន ១៥០ លានដុល្លារ។ លោក Jorge Rodríguez បាននិយាយថា អគារចំនួន ២៥០ ខ្នង ត្រូវបានខូចខាត។
លោក Gustavo Duque អភិបាលក្រុង Chacao បាននិយាយកាលពីថ្ងៃព្រហស្បតិ៍ថា៖ «យើងកំពុងព្យាយាមជួយសង្គ្រោះមនុស្សដែលនៅរស់រានមានជីវិតឱ្យបានច្រើន តាមដែលអាចធ្វើទៅបាន»។
លោកស្រី Delcy Rodríguez បានប្រាប់ថា មានការរញ្ជួយដីបន្ទាប់បន្សំយ៉ាងហោចណាស់ ៣០ លើក ត្រូវបានកត់ត្រាទុក។
កំណត់ត្រារបស់ USGS បង្ហាញថា គ្រោះរញ្ជួយដីលើកទីពីរនេះ គឺជាគ្រោះរញ្ជួយដីដ៏ខ្លាំងបំផុត ដែលបានវាយប្រហារប្រទេសវេណេស៊ុយអេឡា ចាប់តាំងពីឆ្នាំ១៩០០ មក។ តំបន់រងគ្រោះទាំងនេះ ក៏ស្ថិតក្នុងចំណោមតំបន់ដែលរងគ្រោះធ្ងន់ធ្ងរបំផុត កាលពីឆ្នាំ១៩៦៧ ដែលកាលនោះបានសម្លាប់មនុស្ស ២០០ នាក់។
គ្រោះមហន្តរាយនេះ គឺជាការសាកល្បងលើកដំបូងនៃទំនាក់ទំនងថ្មីរបស់វេណេស៊ុយអេឡា ជាមួយអាមេរិក ចាប់តាំងពីប្រធានាធិបតី ដូណាល់ ត្រាំ បានបញ្ជាឱ្យចាប់ខ្លួនលោក នីកូឡាស ម៉ាឌូរ៉ូ កាលពីខែមករា។
លោក ដូណាល់ ត្រាំ បានសរសេរនៅលើ Truth Social ថា៖ «គ្រោះរញ្ជួយដីដ៏ធំទាំងពីរ… បានបន្សល់ទុកនូវចំនួនអ្នកស្លាប់យ៉ាងច្រើនគួរឱ្យរន្ធត់» ដោយលោកបានបន្ថែមថា សហរដ្ឋអាមេរិក «ត្រៀមខ្លួនជាស្រេច មានឆន្ទៈ និងអាចជួយបាន!»។
រដ្ឋមន្ត្រីការបរទេស លោក Marco Rubio បាននិយាយថា សហរដ្ឋអាមេរិកកំពុង «ដាក់ពង្រាយក្រុមស្វែងរកនិងជួយសង្គ្រោះ និងជំនួយមនុស្សធម៌ជាបន្ទាន់»៕
