ការវាយប្រហារសងសឹកគ្នាកាន់តែខ្លាំងឡើងជុំថ្មី រវាងអ៊ីរ៉ង់និងសហរដ្ឋអាមេរិក បានបន្តបំផ្លិចបំផ្លាញដល់កិច្ចព្រមព្រៀងសន្តិភាពបណ្តោះអាសន្ន។
កាលពីថ្ងៃទី២៨ខែមិថុនា ទីក្រុងតេហេរ៉ង់បានវាយប្រហារដោយដ្រូន និងមីស៊ីលលើបារ៉ែននិងគូវ៉ែត ហើយបានគំរាម «បញ្ឈប់ទាំងស្រុង» នូវការចរចា។ លោក ត្រាំ បានព្រមានថា សហរដ្ឋអាមេរិកនឹង «បញ្ចប់ការងារនេះដោយយោធា» ហើយបានបង្ហោះសារថា៖ «ប្រសិនបើរឿងនោះកើតឡើង សាធារណរដ្ឋឥស្លាមអ៊ីរ៉ង់នឹងលែងមានរូបរាងទៀតហើយ!»។
កាលពីព្រឹកថ្ងៃទី២៨ខែមិថុនា គូវ៉ែតបានស្ទាក់ចាប់មីស៊ីលបាលីស្ទីកពីរគ្រាប់ ខណៈបារ៉ែនថាការវាយប្រហារបានខូចខាតអគារស្នាក់នៅ។ ក្រសួងមហាផ្ទៃកាតា និយាយថា ជនជាតិកាតាម្នាក់បានស្លាប់ដោយអំបែងគ្រាប់ពី «ប្រតិបត្តិការយោធានៅក្នុងតំបន់» នៅលើទូកដែលបាត់ខ្លួនកាលពីថ្ងៃទី២៧ខែមិថុនា និងត្រូវបានរកឃើញកាលពីព្រឹកថ្ងៃទី២៨ខែមិថុនា។
ប៉ុន្តែនៅល្ងាចថ្ងៃទី២៨ខែមិថុនា មន្ត្រីអាមេរិកម្នាក់ បាននិយាយថា ភាគីទាំងពីរបានយល់ព្រមបន្តការចរចាឡើងវិញអំពីច្រកសមុទ្រ Hormuz ដោយបញ្ជាក់ថា៖ «ការចរចាបច្ចេកទេសត្រូវបានគ្រោងនឹងបន្តលើគ្រប់វិស័យនៃ MOU។ ភាគីទាំងពីរនឹងដកថយសម្រាប់ពេលនេះ ហើយនាវាអាចចរាចរណ៍ដោយសេរី»។
បញ្ជាការដ្ឋានកណ្តាលអាមេរិក ថ្លែងថា ការវាយប្រហាររបស់ខ្លួនគឺ «ជាការឆ្លើយតបដោយផ្ទាល់ទៅនឹងការរំលោភបំពានជាបន្តបន្ទាប់របស់អ៊ីរ៉ង់ ប្រឆាំងនឹងការដឹកជញ្ជូនពាណិជ្ជកម្ម» បន្ទាប់ពីនាវា Kiku ត្រូវបានវាយប្រហារកាលពីថ្ងៃទី២៧ខែមិថុនា និងនាវាមួយទៀត ត្រូវបានវាយប្រហារកាលពីសប្តាហ៍មុន។
លោក Abbas Araghchi រដ្ឋមន្ត្រីការបរទេសអ៊ីរ៉ង់ បានថ្លែងនៅទីក្រុងបាកដាដកាលពីថ្ងៃទី២៨ខែមិថុនាថា៖ «ការជ្រៀតជ្រែកណាមួយនៅក្នុងរឿងនេះ… នឹងនាំឱ្យមានភាពស្មុគស្មាញបន្ថែមទៀត គឺពន្យារពេលការបើកច្រកសមុទ្រ Hormuz ឡើងវិញ និងបង្កើនកម្រិតនៃភាពតានតឹង»។
លោកក៏បានអំពាវនាវឱ្យមានក្របខ័ណ្ឌសន្តិសុខថ្មីថា៖ «យើងគួរតែឈានទៅដល់ក្របខ័ណ្ឌថ្មីមួយ ដែលរួមបញ្ចូលគ្រប់ប្រទេសនៅក្នុងតំបន់ និងដោយគ្មានវត្តមាន ឬការជ្រៀតជ្រែកពីប្រទេសណាមួយពីខាងក្រៅតំបន់ឡើយ»។
ទោះជាយ៉ាងណា យោងតាម MOU កាលពីដើមខែនេះ ប្រទេសទាំងពីរមានពេល ៦០ ថ្ងៃ ដើម្បីដោះស្រាយព័ត៌មានលម្អិត។
កងឆ្មាំបដិវត្តន៍ឥស្លាម (IRGC) បានទទួលខុសត្រូវចំពោះការវាយប្រហារកាលពីថ្ងៃទី២៨ខែមិថុនា ដោយព្រមានថា៖ «ការរំលោភលើការឈប់បាញ់… នឹងនាំឱ្យមានការបញ្ឈប់ទាំងស្រុងនូវដំណើរការដែលកំពុងបន្ត» ហើយបញ្ជាការដ្ឋានជើងទឹករបស់ខ្លួនថាមូលដ្ឋានទ័ពអាមេរិកនឹង «ជួបប្រទះនឹងឋាននរកនៅក្នុងថ្ងៃខាងមុខ»។
ក្រសួងការបរទេសបារ៉ែន បានថ្កោលទោសថាជា «ការកើនឡើងដ៏គ្រោះថ្នាក់… ជាវិធីសាស្ត្រគិតទុកជាមុន និងជាទម្រង់ជាប្រព័ន្ធនៃការឈ្លានពានដដែលៗប្រឆាំងនឹងអធិបតេយ្យភាពរបស់ព្រះរាជាណាចក្រ»។
អំពើហិង្សាក៏បានបន្តនៅលីបង់។
មន្ត្រីយោធាអ៊ីស្រាអែលថា ទាហានម្នាក់ត្រូវបានសម្លាប់កាលពីថ្ងៃទី២៨ខែមិថុនា ពេលប្រឈមមុខនឹង «ភេរវករក្រុមហេសបូឡា បន្ទាប់ពីបានចូលទៅក្នុងសំណង់គួរឱ្យសង្ស័យមួយនៅក្នុងតំបន់ Deir Seryan នៅភាគខាងត្បូងប្រទេសលីបង់»។
ការប៉ះទង្គិចនេះ កើតឡើងពីរថ្ងៃបន្ទាប់ពីកិច្ចព្រមព្រៀងរវាងអ៊ីស្រាអែលនិងលីបង់។ ទោះបីជាមានការឈប់បាញ់សម្របសម្រួលដោយអាមេរិកចុងក្រោយ កាលពីថ្ងៃទី២៦ខែមិថុនាក៏ដោយ ប៉ុន្តែវាមានប្រសិទ្ធភាពកម្រិតកំណត់ប៉ុណ្ណោះ៕
