អង្គការចលនាមាតាធម្មជាតិ រកឃើញថា មានស្លាកស្នាមនៃការកាប់ឆ្ការបំផ្លាញព្រៃកោងកាង ជាច្រើនទីតាំងស្ថិតនៅក្នុងតំបន់រ៉ាមសារកោះកាពិ ក្នុងភូមិសាស្ត្រខេត្តកោះកុង ហើយចំណុចខ្លះបានបំលែងទៅជាចំការដូងរួចរាល់ ដែលការណ៍នេះ អង្គការផ្នែកបរិស្ថានមួយនេះ ជំរុញឱ្យក្រសួងបរិស្ថាន និងអាជ្ញាធរខេត្តចាត់វិធានការទប់ស្កាត់ជាបន្ទាន់។
យោងតាមវីដេអូរយៈពេល២នាទីនិង១៨វិនាទី របស់អង្គការចលនាមាតាធម្មជាតិ ផ្សព្វផ្សាយនៅលើទំព័រហ្វេសប៊ុករបស់ខ្លួន នាល្ងាចថ្ងៃទី២៩ខែមិថុនា បានបង្ហាញថា ក្នុងពេលថ្មីៗនេះ មានស្លាកស្នាមការកាប់បំផ្លាញព្រៃកោងកាងជាច្រើនទីតាំងនៅក្នុងតំបន់រ៉ាមសារកោះកាពិ ដែលចំណុចខ្លះមានដាំបង្គោលបេតុងច្រូងច្រាង និងបានបំលែងទៅជាចំការដូងរួចរាល់ទៅហើយ។ នេះបើយោងតាមការផ្ទៀងផ្ទាត់តាមផ្កាយរណប ជាមួយនឹងនិយាមការនៃអនុក្រឹត្យលេខ ១៧០ អ.ន.ក្រ.បក ចុះថ្ងៃទី១៧ ខែកក្កដា ឆ្នាំ២០២៣។
ចលនាមាតាធម្មជាតិ បានបន្តថា ការកាប់ឆ្ការ និងការទន្ទ្រាននៅតំបន់ការពារធម្មជាតិ ក្រោមលេសថាអភិវឌ្ឍន៍ និងការវិនិយោគ វាពិតជារឿងងាយដូចបកចេកទុំ សម្រាប់មន្រ្តីគ្រាក់ៗ និងបុគ្គលមានអំណាច នៅក្នុងរបបគ្រួសារនិយមនេះ។
ប្រភពដដែលបន្តថា ព្រៃកោងកាងមានគុណសម្បតិ្តឥតគណនាបាន ដែលបម្រើដល់សេដ្ឋកិច្ច បរិស្ថាន និងវប្បធម៌ផងដែរ។ ការណ៍នេះ ពួកគេបានអំពាវនាវដល់ក្រសួងបរិស្ថាន និងរដ្ឋបាលខេត្តកោះកុង ដែលជាសេធិការរបស់រដ្ឋាភិបាល ចាត់វិធានាការសង្គ្រោះព្រៃកោងកាងជាបន្ទាន់។
ពួកគេបានលើកឡើងក្នុងសំឡេងដើមក្នុងវីដេអូនោះថា៖ «ក្នុងនាមជាម្ចាស់សន្លឹកឆ្នោត យើងសុំចង្អុរបញ្ជាចំៗដល់ក្រសួងបរិស្ថាន និងរដ្ឋបាលខេត្តកោះកុង ប្រញាប់ចាត់វិធានការដូចខាងក្រោម ទី១ ស៊ើបអង្កេតជាបន្ទាន់នូវករណីខាងលើ ហើយវែកមុខជនដែលប្រព្រឹត្តមកផ្តន្ទាទោសតាមផ្លូវច្បាប់ ទី២ ទប់ស្កាត់មិនឱ្យមានការកាប់បំផ្លាញព្រៃកោងកាងបន្តទៀត ទី៣ លើកស្ទួយជីវភាពប្រជាពលរដ្ឋនៅតំបន់នោះ តាមរយៈការនេសាទស្របច្បាប់ និងទេសចរណ៍ជាដើម។ ប្រសិនបើបញ្ហានេះគ្មានដំណោះស្រាយនោះទេ វាមានន័យថា រាជរដ្ឋាភិបាលពិតជាគ្មានសមត្ថភាពក្នុងការដោះស្រាយបញ្ហាបរិស្ថាននោះទេ»។
វីអូឌី មិនអាចសុំការអត្ថាធិប្បាយជុំវិញករណីនេះ ពីអ្នកនាំពាក្យក្រសួងបរិស្ថាន លោក ខ្វៃ អាទិត្យា និងប្រធានមន្ទីរបរិស្ថានខេត្តកោះកុង លោក ហ៊ុន ម៉ារ៉ាឌី បានទេ នៅថ្ងៃទី៣០ ខែមិថុនានេះ។
ប៉ុន្តែកាលពីចុងខែកុម្ភៈ ឆ្នាំ២០២៦ ក្រសួងបរិស្ថាន បានចេញលិខិតមួយដោយថ្កោលទោស និងប្រកាសចាត់វិធានការតាមផ្លូវច្បាប់ ចំពោះជនដែលប្រព្រឹត្តបទល្មើសធនធានធម្មជាតិ គប់គិតគ្នា ចាក់ដី និងទន្ទ្រានយកដីព្រៃក្នុងតំបន់ការពារធម្មជាតិ ដោយគ្មានការអនុញ្ញាត។
ក្នុងលិខិតនោះ ក្រសួងក៏បានលើកឡើងពីមាត្រាមួយចំនួននៃក្រមបរិស្ថាន និងធនធានធម្មជាតិមកផ្សព្វផ្សាយផងដែរ ក្នុងនោះ មាត្រា៨៥០ ចែងថា ការគប់គិតគ្នាធ្វើសកម្មភាពចាក់ដី និងទន្ទ្រានដីព្រៃកោងកាង យកជាកម្មសិទ្ធិ ដោយពុំមានការអនុញ្ញាតពីរដ្ឋាភិបាល ត្រូវចាត់ទុកថាជាបទល្មើសធនធានធម្មជាតិថ្នាក់លេខ២ ពោលគឺត្រូវប្រឈមនឹងការផ្តន្ទាទោសដាក់ពន្ធនាគារពី ១ឆ្នាំ ទៅ ៥ឆ្នាំ និងពិន័យជាប្រាក់ពី ១០០លានរៀល ទៅ ៥០០លានរៀល។
យោងតាមអនុក្រឹត្យរបស់រដ្ឋាភិបាល ស្តីពី ការកែប្រែតំបន់រ៉ាមសារកោះកាពិ ចុះថ្ងៃទី១៧ ខែកក្កដា ឆ្នាំ២០២៣ បានសម្រេចក្រែប្រែតំបន់រ៉ាមសារកោះកាពិ ពីផ្ទៃដីទំហំ ១២ ០០០ហិកតា (មួយម៉ឺនពីរពាន់ហិកតា) មកផ្ទៃដីទំហំ ១៤ ០២៩ ហិកតា (មួយម៉ឺនបួនពាន់ម្ភៃប្រាំបួនហិកតា) ស្ថិតក្នុងភូមិសាស្ត្រខេត្តកោះកុង។
អនុក្រឹត្យនេះ មានគោលបំណងធានាការថែរក្សា និងការពារសោភណ្ឌភាពធម្មជាតិ ប្រព័ន្ធអេកូឡូស៊ី ជីវចម្រុះ និងបរិស្ថាន, ផ្តល់ផលិតផល និងសេវាកម្មធម្មជាតិសម្រាប់ការប្រើប្រាស់ដោយនិរន្តរភាព, លើកកម្ពស់ការចូលរួមរបស់សហគមន៍មូលដ្ឋាន ក៏ដូចជាសាធារណជនក្នុងការចូលរួមចំណែកដល់ការគ្រប់គ្រង ការការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់ ព្រមទាំងបង្កើនកិច្ចសហប្រតិបត្តិការ និងកិត្យានុភាពជាតិលើឆាកអន្តរជាតិ លើការគ្រប់គ្រងតំបន់ដីសើមប្រកបដោយភាពឈ្លាសវៃនិងនិរន្តរភាព។
ប្រទេសកម្ពុជា មានព្រៃកោងកាងគ្របដណ្តប់លើផ្ទៃដីទំហំប្រមាណជាង ៧ម៉ឺនហិកតា ស្ថិតក្នុងភូមិសាស្ត្រខេត្តកោះកុង កែប កំពត និងព្រះសីហនុ ក្នុងនោះខេត្តកោះកុង មានទំហំធំជាងគេ គឺប្រមាណជាង ៤ម៉ឺនហិកតា។
ព្រៃកោងកាង ជាជម្រក និងកន្លែងរកចំណីនៃសត្វមានជីវិត ដូចជា ត្រី សត្វឆ្អឹងខ្នងមានឈាមត្រជាក់ ល្មូន បក្សី និងថនិកសត្វ ដូចជាសត្វខ្លាជាដើម និងជាប្រភពផ្តល់ព្រៃឈើ និងផ្តល់ចំណីដែលមានប្រូតេអ៊ីនខ្ពស់សម្រាប់មនុស្ស និងជីវៈចម្រុះ ព្រមទាំងចូលរួមចំណែកទប់ស្កាត់ផលប៉ះពាល់លើធនធានជីវៈចម្រុះដែលកំពុងតែរងផលប៉ះពាល់ពីសកម្មភាពមនុស្ស និងមហន្តរាយធម្មជាតិ៕
