Social Issues, បរិស្ថាន, ព័ត៌មានជាតិ

សមាជិកក្រុមប្រឹក្សាឃុំបក្សប្រជាជនមួយរូបនៅស្ទឹងត្រែងរងការចោទថា ឈូសឆាយព្រៃឡង់ធ្វើជាអាជីព

លី ស្រីវី
| ០១ កក្កដា ២០២៦
ម៉ោង ១៨:០៥

សកម្មជនការពារបរិស្ថាន ស៊ើបដឹងថា សមាជិកក្រុមប្រឹក្សាឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង លោក អ៊ីវ ព្រីង បានដឹកនាំកូន និងសាច់ញាតិ យកគ្រឿងចក្រសរុប ៥គ្រឿង ឈូសឆាយទន្ទ្រានដែនជម្រកសត្វព្រៃឡង់ នៅចំណុចភ្នំអន្ទង់វៀន ឃុំអន្លង់ភេ ស្រុកថាឡាបរិវ៉ាត់ ដើម្បីទន្ទ្រានយកដីធ្វើជាកម្មសិទ្ធិ ដោយគ្មានការទប់ស្កាត់តាមច្បាប់។

សកម្មជនការពារបរិស្ថាន លោក អ៊ុក ម៉ៅ ប្រាប់វីអូឌីនៅថ្ងៃទី០១ ខែកក្កដាថា លោកមានភស្តុតាងច្បាស់លាស់ដែលបញ្ជាក់ថា សមាជិកក្រុមប្រឹក្សាឃុំរូបនេះ ដឹកនាំកូនចៅ និងសាច់ញាតិឈូសឆាយព្រៃខុសច្បាប់ ប៉ះពាល់មុខមាត់រដ្ឋាភិបាល។

លោកបញ្ជាក់ថា លោក អ៊ីវ ព្រីង បានប្រើគ្រឿងចក្រឈូសឆាយព្រៃឡង់ជាមុខរបរអាជីពជាង ២ឆ្នាំមកហើយ ដោយគ្មានអាជ្ញាធរណាហ៊ានអនុវត្តច្បាប់ និងស៊ើបអង្កេត ដើម្បីផ្ដន្ទាទោសនៅឡើយទេ។ លោកថា កន្លងទៅលោកបានរាយការណ៍ករណីនេះ ទៅឆ្មាំអភិរក្សរបស់ក្រសួងបរិស្ថានជាច្រើនដង តែគ្មានចំណាត់ការ។

លោក អ៊ុក ម៉ៅ និយាយថា៖ «២ឆ្នាំនេះ ខ្ញុំតាមដានផ្ទាល់ភ្នែក… ឥឡូវទាន់ហើយ! និយាយរួម ដីភូមិអន្លង់ភ្នំ មួយចំហៀងហ្នឹងខាងលិចអូរ គឺលោក អ៊ី ព្រីង គាត់ប្រើប្រាស់តែគ្រឿងចក្ររបស់បងប្អូនគាត់ ៥នាក់ហ្នឹងទេ។ ចំណែកមន្ត្រីបរិស្ថាន យើងរាយការណ៍ទៅ គាត់ចុះមកមែន… ប៉ុន្តែចុះមកហូបបាយ ចងអង្រឹងដេកផ្ទះ អ៊ី ព្រីង ហ្នឹង! អត់មានអនុវត្តច្បាប់លើគ្រឿងចក្រហ្នឹងទេ។ គាត់យកតួនាទីឈូសឆាយដីព្រៃ គាត់ឱ្យកូនឈូស គាត់មើលផ្លូវ»។

កាលពីចុងខែមិថុនាថ្មីៗនេះ អ្នកភូមិមួយក្រុម និងសកម្មជនការពារបរិស្ថាន លោក អ៊ុក ម៉ៅ បានធ្វើដំណើរចូលក្នុងដែនជម្រកសត្វព្រៃឡង់ ចំណុចភ្នំអន្ទង់វៀន បានប្រទះឃើញកម្មករជាច្រើននាក់ ប្រើម៉ាស៊ីនត្រង់សឺន័រអាររំលំដើមឈើតូចធំ ដោយមានគ្រឿងចក្រពីរគ្រឿងប្រភេទអាប៊ុល (Bulldozer) ឈូសឆាយប្រមូលគំនរឈើរួចដុតបំផ្លាញចោល ក្នុងព្រៃអភិរក្សនេះអស់ជាច្រើនហិកតា។ សកម្មភាពឈូសឆាយនោះ ធ្វើឱ្យដើមឈើធំៗប្រភេទស្រឡៅ សុក្រំ និងឈើទាល ដែលជាតំបន់ជនជាតិដើមភាគតិចកួយរកអនុផលព្រៃឈើ និងជាជម្រកសត្វព្រៃ ត្រូវគេកាប់និងឈូសឆាយផ្ដួលរួចដុតបំផ្លាញចោល ឱ្យក្លាយជាវាល។

លោក អ៊ុក ម៉ៅ បានថតវីដេអូបង្ហោះតាមបណ្ដាញសង្គមហ្វេសបុក ផ្ញើសារទៅកាន់អភិបាលខេត្តស្ទឹងត្រែង លោក សរ សុពុត្រា ដើម្បីឱ្យចាត់វិធានការច្បាប់លើសមាជិកក្រុមប្រឹក្សាឃុំរូបនេះ។ លោក អ៊ុក ម៉ៅ ស៊ើបដឹងច្បាស់ថា គ្រឿងចក្រ២គ្រឿងនោះជារបស់លោក អ៊ីវ ព្រីង និងសាច់ញាតិ ហើយលោកបានរាយការណ៍ទៅមន្ត្រីបរិស្ថានប្រចាំការតំបន់នោះ តែមន្ត្រីថា កំពុងជាប់រវល់។

លោកថា៖ «ថ្ងៃនេះ នៅទឹកដីឃុំអន្លង់ភេ បាទ… នេះហៅភ្នំអន្ទង់វៀន ត្រាក់ទ័រកំពុងតែរុញដីព្រៃ។ ដីព្រៃនៅចំណុចភ្នំអន្ទង់វៀន ដីឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង គោរពជូនឯកឧត្តមអភិបាលខេត្តស្ទឹងត្រែង ពិសេសឯកឧត្តម សរ សុពុត្រា»។

វីអូឌី មិនទាន់អាចទាក់ទងសុំការបំភ្លឺរឿងនេះ ពីសមាជិកក្រុមប្រឹក្សាឃុំអន្លង់ភេ លោក អ៊ីវ ព្រីង បាននៅឡើយទេ គិតត្រឹមម៉ោងផ្សាយនេះ។

អ្នកនាំពាក្យសាលាខេត្តស្ទឹងត្រែង លោក ម៉ែន គុង មានប្រសាសន៍ថា ប្រសិនបើរកឃើញថា មានបទល្មើសកើតឡើងនៅមូលដ្ឋាន គណៈបញ្ជាការឯកភាពខេត្ត និងអាជ្ញាធរមូលដ្ឋាន ត្រូវអនុវត្តនីតិវិធី និងស្រាវជ្រាវ ដោយមិនប្រកាន់និន្នាការនយោបាយឡើយ។ លោកបញ្ជាក់ថា បើមន្ត្រីរូបណាបណ្ដែតបណ្ដោយ និងពាក់ព័ន្ធបទល្មើសធនធានធម្មជាតិ ត្រូវអនុវត្តវិន័យតាមកម្រិតនៃទោសនិងភាពអសកម្ម។

លោក ម៉ែន គុង និយាយថា៖ «ការអនុវត្តវិធានការ គឺអនុវត្តស្មើៗគ្នាទាំងអស់ អត់អាស្រ័យទៅលើការរកឃើញនៃបទល្មើសទាំងអស់នោះទេ។ ក៏ប៉ុន្តែ បើសិនជាករណីដែលមន្ត្រីរូបណាមានការទាក់ទងទៅនឹងបទល្មើស ឬក៏មានភាពអសកម្ម គឺត្រូវអនុវត្តតាមទណ្ឌកម្ម ឬវិន័យរបស់មន្ត្រី ទៅតាមកម្រិតនៃទោសទណ្ឌ»។

ជុំវិញរឿងនេះ សកម្មជនសិទ្ធិមនុស្ស និងធនធានធម្មជាតិ លោក ប៊ី វ៉ាន់នី សង្កេតឃើញថា កន្លងទៅមន្ត្រីអនុវត្តច្បាប់ ឃើញតែចំពោះពលរដ្ឋ កម្រឃើញមន្ត្រីអនុវត្តច្បាប់លើអ្នកមានលុយមានអំណាច និងអាជ្ញាធរខិលខូចពាក់ព័ន្ធបទល្មើសធនធានធម្មជាតិ។ លោកបារម្ភថា ប្រសិនបើក្រសួងបរិស្ថាន និងអភិបាលខេត្តស្ទឹងត្រែងបន្តបណ្ដែតបណ្ដោយឱ្យអាជ្ញាធរឃុំរូបនេះប្រព្រឹត្តអំពើល្មើសច្បាប់ នឹងប៉ះពាល់ទំនុកចិត្តពលរដ្ឋ និងមុខមាត់គណបក្សកាន់អំណាច។

លោក ប៊ី វ៉ាន់នី ថ្លែងថា៖ «បើសិនជាក្រសួងបរិស្ថាន និងក្រសួងមហាផ្ទៃអត់មានវិធានការទេ វាធ្វើឱ្យប៉ះពាល់ដល់ទំនុកចិត្តលើការដឹកនាំរបស់រដ្ឋាភិបាល ក៏ដូចជាអាជ្ញាធរមន្ត្រី។ បើសិនជាមន្ត្រីធ្វើខុសច្បាប់ តើពលរដ្ឋទៅរកមន្ត្រីថ្នាក់ក្រោមជាតិ ឬមន្ត្រីណាផ្សេងទៀត ដើម្បីស្វែងរកយុត្តិធម៌តាមបែបណា? »។

ក្រសួងបរិស្ថាន បានចុះបញ្ជីដែនជម្រកសត្វព្រៃឡង់មានទំហំជាង ៤៣ម៉ឺនហិកតា កាលពីឆ្នាំ២០១៦ ហើយក្រោយមករាជរដ្ឋាភិបាលសម្រេចពង្រីកដែនអភិរក្សនេះ រហូតដល់ជិត ៥០ម៉ឺនហិកតា (៤៨៩.៦៦៣ ហិកតា) កាលពីឆ្នាំ២០២៣។

ដែនអភិរក្សនេះ ជាតំបន់ព្រៃទឹកភ្លៀងទំនាបធំបំផុតចុងក្រោយនៅកម្ពុជា និងជាដីគោកនៃតំបន់អាស៊ីអាគ្នេយ៍លាតសន្ធឹងក្នុងខេត្តចំនួន ៤ រួមមាន ខេត្តកំពង់ធំ ព្រះវិហារ ក្រចេះ និងខេត្តស្ទឹងត្រែង ដែលមានពលរដ្ឋយ៉ាងណាស់ ៣ សែននាក់ រស់នៅជុំវិញព្រៃឡង់នេះអាស្រ័យផលពីព្រៃឈើ។ ដែនអភិរក្សនេះ រងការកាប់ឈើមានតម្លៃ និងឈូសឆាយព្រៃរានយកដីអស់មួយផ្នែកធំ នៅរយៈពេលជាង ១០ ឆ្នាំចុងក្រោយនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។