ការហ្វឹកហ្វឺនយោធាសម្ងាត់របស់ប្រទេសចិនដល់កងកម្លាំងរុស្ស៊ី កាលពីឆ្នាំមុន ត្រូវបានអនុម័តផ្ទាល់ដោយរដ្ឋមន្ត្រីការពារជាតិនៃប្រធានាធិបតី វ្ល៉ាឌីមៀ ពូទីន (Vladimir Putin) ហើយមានការចូលរួមដោយផ្ទាល់ពីឧត្តមសេនីយ៍រុស្ស៊ី និងចិនយ៉ាងហោចណាស់ ៤រូប។ នេះបើយោងតាមមន្ត្រីអឺរ៉ុបពីររូប និងឯកសារដែលទីភ្នាក់ងារសារព័ត៌មាន Reuters បានឃើញ។
មន្ត្រីទាំងនោះ បាននិយាយថា ការចូលរួមរបស់បុគ្គលជាន់ខ្ពស់បែបនេះ នៅក្នុងការហ្វឹកហ្វឺនដែលទាក់ទងនឹងសង្គ្រាមអ៊ុយក្រែន បានបង្ហាញពីសារៈសំខាន់សម្រាប់រុស្ស៊ី និងចិនចំពោះកិច្ចសហប្រតិបត្តិការនេះ ដែលវាបានបង្កឱ្យមានការព្រួយបារម្ភនៅក្នុងតំបន់អឺរ៉ុប ទោះបីជាទីក្រុងប៉េកាំងបានបដិសេធក៏ដោយ។
ឯកសារសម្ងាត់របស់រុស្ស៊ីមួយ បានយោងទៅលើក្រឹត្យផ្ទៃក្នុងចេញដោយរដ្ឋមន្ត្រីការពារជាតិ លោក Andrei Belousov កាលពីខែសីហា ឆ្នាំ២០២៥ ដោយអនុញ្ញាតឱ្យគណៈប្រតិភូយោធារុស្ស៊ីធ្វើដំណើរទៅកាន់ប្រទេសចិន ដើម្បីចូលរួមក្នុងលំហាត់ហ្វឹកហ្វឺននៅតាមទីតាំងនានារបស់កងទ័ពរំដោះប្រជាជនចិន (PLA)។ វគ្គសិក្សារយៈពេល ៣សប្តាហ៍នោះ ផ្តោតលើការការពារផ្នែកវិទ្យុសកម្ម គីមី និងជីវសាស្ត្រ នៅឯទីតាំងយោធាមួយក្នុងទីក្រុងប៉េកាំង កាលពីខែវិច្ឆិកា ដោយមានការបង្រៀនអំពី «ការស៊ើបការណ៍សម្ងាត់ផ្នែកគីមី និងវិទ្យុសកម្ម»។
ក្រសួងការបរទេសចិន បានបដិសេធការចោទប្រកាន់នេះ ដោយលើកឡើងថាវា «ទាំងស្រុងគ្មានមូលដ្ឋាន» ហើយអះអាងថា ខ្លួនមានភាពអព្យាក្រឹតនៅក្នុងសង្គ្រាមរបស់រុស្ស៊ីជាមួយអ៊ុយក្រែន។
យ៉ាងណាមិញ ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas បាននិយាយថា ទីក្រុងព្រុចសែលបានបញ្ជាក់តាមរយៈបណ្តាញផ្ទាល់ខ្លួនថា ការហ្វឹកហ្វឺននោះពិតជាបានកើតឡើងមែន ហើយឥឡូវនេះកំពុងវាយតម្លៃលើផលប៉ះពាល់។
ទាក់ទិននឹងប្រសិទ្ធភាពនៃការហ្វឹកហ្វឺននេះ លោក Andrei Kartapolov ប្រធានគណៈកម្មាធិការការពារជាតិនៃសភារុស្ស៊ី បានច្រានចោលរបាយការណ៍នេះថាជា «រឿងមិនសមហេតុផល» ដោយសាររុស្ស៊ីមានបទពិសោធន៍ប្រយុទ្ធច្រើនឆ្នាំទៅហើយ។ ស្របគ្នានេះ របាយការណ៍យោធាផ្ទៃក្នុងរបស់រុស្ស៊ីក៏បានកត់សម្គាល់ដែរថា ទោះបីជាចិនមានបរិក្ខារ និងទ្រឹស្តីកម្រិតខ្ពស់ក៏ដោយ ប៉ុន្តែប្រទេសនេះនៅខ្វះខាតបទពិសោធន៍ប្រយុទ្ធជាក់ស្តែងនៅលើសមរភូមិនៅឡើយ៕
