តំណាងរាស្ត្រពីបក្សប្រឆាំង លោក អ៊ុំ សំអាន បានអះអាងនៅថ្ងៃទី២ខែកក្កដានេះថា រដ្ឋអាជ្ញានៃតុលាការព្រហ្មទណ្ឌអន្តរជាតិ (ICC) បានកោះហៅតំណាងរដ្ឋាភិបាលកម្ពុជាឯករាជ្យ២៣តុលា និងមេធាវីអន្តរជាតិឱ្យទៅជួបនៅចុងខែសីហា ឆ្នាំ២០២៦ នៅទីស្នាក់ការតុលាការព្រហ្មទណ្ឌអន្តរជាតិ (ICC) នៅទីក្រុងឡាអេ ប្រទេសហូឡង់។
បើតាមលោក អ៊ុំ សំអាន នេះជាដំណឹងល្អជំហានដំបូងសម្រាប់ពលរដ្ឋខ្មែរ ដែលថាពួកគេបានប្តឹង មេដឹកនាំថៃនិងមេដឹកនាំយោធាថៃទៅ ICC ស្តីពីបទឧក្រិដ្ឋកម្មសង្រ្គាមដែលយោធាថៃបានទម្លាក់គ្រាប់បែកលើជនរងគ្រោះខ្មែរ ផ្ទះសម្បែង ប្រាសាទខ្មែរនិងសាលារៀន។
លោកបង្ហាញក្តីសង្ឃឹមថា អគ្គរដ្ឋអាជ្ញានៃតុលាការព្រហ្មទណ្ឌអន្តរជាតិនឹងបើកការស៊ើបអង្កេត និងចោទប្រកាន់មេដឹកនាំថៃនិងមេដឹកនាំយោធាថៃលើឧក្រិដ្ឋកម្មសង្គ្រាម និងឧក្រិដ្ឋកម្មឈ្លានពាន។
លោកថា៖ «យើងចង់ឃើញតុលាការព្រហ្មទណ្ឌអន្តរជាតិ ចេញដីកាចាប់ខ្លួនមេដឹកនាំថៃ និងមេដឹកនាំយោធាថៃ ព្រមទាំងបង្ខំឱ្យថៃសងសំណងការខូចខាតដល់ជនរងគ្រោះខ្មែរ ផ្ទះសម្បែង ប្រាសាទខ្មែរ សាលារៀន និងស្ពាន»។
ក្នុងឆ្នាំ២០២៥ ថៃបានបើកការឈ្លានពានកម្ពុជា ចំនួនពីរលើក គឺនៅក្នុងខែកក្កដា និងខែធ្នូ ឆ្នាំ២០២៥ រហូតដណ្តើមគ្រប់គ្រងទឹកដីកម្ពុជាជិត៧០ទីតាំង រួមទាំងប្រាសាទបូររាណ។
សេចក្តីរាយការណ៍នានា បង្ហាញថា ការឈ្លានពានរបស់ថៃនេះ ធ្វើឱ្យជនស៊ីវិលខ្មែរចំនួន ៣១ នាក់ បានបាត់បង់ជីវិត និងជិត ១០០ នាក់ ផ្សេងទៀតបានរងរបួស ក្នុងនោះ ពលរដ្ឋជាង ៦៤ម៉ឺននាក់ នៅតាមបណ្តាខេត្តជាប់ព្រំដែន ក្នុងខេត្តឧត្តរមានជ័យ ព្រះវិហារ បន្ទាយមានជ័យ និងពោធិ៍សាត់ ត្រូវបានជម្លៀសចេញពីលំនៅឋាន។
ហេដ្ឋារចនាសម្ព័ន្ធជាច្រើន ត្រូវបានយោធាថៃបំផ្លាញ រួមទាំងផ្ទះពលរដ្ឋខ្មែររាប់ពាន់ខ្នង ត្រូវបានទាហានថៃបំផ្លាញចោលដូចគ្នា។ ហើយបច្ចុប្បន្ន អ្នកឃ្លាំមើលថា ថៃកំពុងបន្តរំកិលព្រំដែនរំលោភយកដីកម្ពុជាទោះមានបទឈប់បាញ់ និងបានធ្វើរបងព្រំដែនរំលោភយកដីខ្មែរ ដោយឯកតោភាគី ទាំងគ្មានការទប់ស្កាត់លើដីជាក់ស្តែងពីក្រសួងការពារជាតិកម្ពុជាទៀតផង៕
