យ៉ាងហោចណាស់មានមនុស្ស ២៧ នាក់បានស្លាប់ និងប្រហែល ៧០ នាក់ទៀតបានរងរបួស កាលពីព្រលឹមស្រាងៗថ្ងៃទី២ខែកក្កដា នៅក្នុងទីក្រុងគៀវ (Kyiv) ក្នុងអ្វីដែលលោក Vitali Klitschko អភិបាលក្រុង បានហៅវាថា ជាការវាយប្រហារតាមអាកាសដ៏អាក្រក់បំផុតរបស់រុស្ស៊ី លើរដ្ឋធានីក្នុងរយៈពេលជាងបួនឆ្នាំនៃសង្រ្គាម។
រុស្ស៊ីបានប្រើប្រាស់ដ្រូនជិត ៥០០ គ្រឿង និងមីស៊ីលជាង ៧០ ដើម ក្នុងការវាយប្រហាររយៈពេលរាប់ម៉ោងនេះ។ កម្ទេចកំទី និងការវាយប្រហារចំ បានបង្កឱ្យមានការឆាបឆេះអគារស្នាក់នៅ និងសណ្ឋាគារនៅតាមទីតាំងនានាទូទាំងទីក្រុង ព្រមទាំងបានធ្វើឱ្យអគារអាផាតមិន ៩ ជាន់មួយ រងការខូចខាតយ៉ាងធ្ងន់ធ្ងរ។ អាជ្ញាធរក្រុង បានឱ្យដឹងថា ប្រជាជនជាង ៥០,០០០ នាក់ បានចូលទៅជ្រកកោននៅក្នុងស្ថានីយ៍រថភ្លើងក្រោមដីទូទាំងរដ្ឋធានី បន្ទាប់ពីមានការព្រមានជាមុន។
លោកប្រធានាធិបតី Volodymyr Zelenskyy បានមានប្រសាសន៍ថា ប្រសិនបើក្រុមសម្ព័ន្ធមិត្តបានអនុវត្តតាមកិច្ចព្រមព្រៀងក្នុងការផ្តល់មីស៊ីលការពារអាកាសដល់អ៊ុយក្រែន ការខូចខាតប្រហែលជាមិនធ្ងន់ធ្ងរដល់ថ្នាក់នេះទេ។
ការវាយប្រហារដ៏ធំនេះបានកើតឡើង បន្ទាប់ពីរុស្ស៊ីបានព្រមានកាលពីចុងខែឧសភា ឱ្យអ្នកការទូតបរទេសចាកចេញពីទីក្រុង ដោយសារខ្លួនមានផែនការបង្កើនការវាយប្រហារលើ «មជ្ឈមណ្ឌលធ្វើសេចក្តីសម្រេចចិត្ត»។ ក្នុងអំឡុងពេលនៃការវាយប្រហារនេះ ប្រទេសប៉ូឡូញដែលជាសមាជិកណាតូ បានបញ្ជូនយន្តហោះចម្បាំងឱ្យហោះហើរជាវិធានការបង្ការ។
នាពេលថ្មីៗនេះ អ៊ុយក្រែនបានបង្កើនយុទ្ធនាការវាយប្រហារដោយដ្រូន ប្រឆាំងនឹងរោងចក្រចម្រាញ់ប្រេងនៅក្នុងប្រទេសរុស្ស៊ី ដែលបណ្តាលឱ្យមានការខ្វះខាតប្រេងឥន្ធនៈទូទាំងប្រទេស។ ក្រសួងការពារជាតិរុស្ស៊ី បានអះអាងថា ការវាយប្រហារលើហេដ្ឋារចនាសម្ព័ន្ធថាមពល និងមូលដ្ឋានយោធារបស់អ៊ុយក្រែនកាលពីថ្ងៃព្រហស្បតិ៍ គឺជាការសងសឹកចំពោះទង្វើរបស់អ៊ុយក្រែន។
ទោះជាយ៉ាងណា រដ្ឋមន្ត្រីការបរទេសអ៊ុយក្រែន លោក Andrii Sybiha បានទាត់ចោលការអះអាងនេះ ដោយសង្កត់ធ្ងន់ថា អ៊ុយក្រែនមានសិទ្ធិគ្រប់បែបយ៉ាងក្នុងការការពារខ្លួន និងវាយប្រហារលើគោលដៅយោធាស្របច្បាប់ក្នុងប្រទេសរុស្ស៊ី។
ខណៈពេលដែលដំណើរការសន្តិភាពដែលគាំទ្រដោយសហរដ្ឋអាមេរិក បានជាប់គាំងក្នុងរយៈពេលប៉ុន្មានខែថ្មីៗនេះ លោក Zelenskyy បានបញ្ជាក់ថា មន្ត្រីអ៊ុយក្រែនបានទាក់ទងជាមួយអ្នកចរចារបស់សហរដ្ឋអាមេរិក លោក Jared Kushner ដើម្បីពិភាក្សាអំពីការចាប់ផ្តើមដំណើរការសន្តិភាពឡើងវិញ។ លោកក៏សង្ឃឹមថា នឹងបានជួបពិភាក្សាជាមួយប្រធានាធិបតីសហរដ្ឋអាមេរិក លោក Donald Trump នៅក្រៅកិច្ចប្រជុំកំពូលណាតូ នាសប្តាហ៍ក្រោយផងដែរ។
ជាលទ្ធផលនៃការវាយប្រហារដ៏ឃោរឃៅនេះ នៅថ្ងៃសុក្រនេះ ត្រូវបានប្រកាសជាថ្ងៃកាន់ទុក្ខជាផ្លូវការនៅក្នុងទីក្រុងគៀវ៕
