ជំនួយការវិមានក្រឹមឡាំង លោក យូរី អ៊ូសាកូវ (Yuri Ushakov) បានប្រកាសកាលពីព្រឹកថ្ងៃទី៥ខែកក្កដាថា ប្រធានាធិបតី ដូណាល់ ត្រាំ បានពិភាក្សាតាមទូរស័ព្ទជិត ៩០ នាទី ជាមួយមេដឹកនាំរុស្ស៊ី លោក វ៉្លាឌីមៀ ពូទីន ដើម្បីជួយស្វែងរកដំណោះស្រាយចំពោះសង្រ្គាមអ៊ុយក្រែន។
លោក អ៊ូសាកូវ បាននិយាយថា លោក ត្រាំ បានផ្ដល់ការជូនដំណឹងនេះក្នុងអំឡុងពេលហៅទូរស័ព្ទកាលពីថ្ងៃទី៤ខែកក្កដា ដែលជាថ្ងៃបុណ្យឯករាជ្យជាតិសហរដ្ឋអាមេរិក នៅក្នុងបរិបទនៃការចូលរួមរបស់លោកនៅក្នុងកិច្ចប្រជុំកំពូលរបស់អង្គការណាតូ (NATO) នៅក្នុងប្រទេសទួរគី នាដើមសប្តាហ៍ក្រោយ។
ចំណែកឯប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelenskyy) ក៏បានប្រកាសដែរថា លោកបានពិភាក្សាជាមួយលោក ត្រាំ ផងដែរ។
លោក អ៊ូសាកូវ បានបញ្ជាក់ថា លោក ត្រាំ បានបង្ហាញការត្រៀមខ្លួនក្នុងការបញ្ចប់ការប្រយុទ្ធគ្នាឱ្យបានឆាប់រហ័ស ខណៈដែលរុស្ស៊ីស្វែងរកដំណោះស្រាយតាមផ្លូវនយោបាយ-ការទូត ដោយគិតគូរពីវិធីសាស្ត្ររបស់ខ្លួន។ លោក អ៊ូសាកូវ ក៏បានចោទប្រកាន់ទីក្រុងគីវ និងសម្ព័ន្ធមិត្តអឺរ៉ុបថាចង់បន្លាយសង្រ្គាម តាមរយៈការវាយប្រហាររយៈចម្ងាយឆ្ងាយរបស់អ៊ុយក្រែនលើគោលដៅឧស្សាហកម្មប្រេងរបស់រុស្ស៊ី ដែលបង្កឱ្យមានការខ្វះខាតប្រេងឥន្ធនៈនៅក្នុងតំបន់មួយចំនួន។
ទាក់ទងនឹងសមរភូមិ មេបញ្ជាការរុស្ស៊ី បានប្រាប់លោក ពូទីន កាលពីថ្ងៃសុក្រថា កងទ័ពទីក្រុងម៉ូស្គូបានដណ្តើមបានទីក្រុងយុទ្ធសាស្ត្រ កូស្ទីយ៉ាន់ទីនីវកា (Kostiantynivka) នៅភាគខាងកើតអ៊ុយក្រែន។ ប៉ុន្តែកាលពីថ្ងៃទី៤ខែកក្កដា លោក ហ្សេឡេនស្គី និងអគ្គសេនាធិការអ៊ុយក្រែន បានទាត់ចោលការអះអាងនោះ ដោយនិយាយថា កងកម្លាំងទីក្រុងគីវនៅតែគ្រប់គ្រងទីក្រុងនោះនៅឡើយ។
រុស្ស៊ីបានបញ្ជាក់ថា ដំណោះស្រាយណាមួយត្រូវតែរួមបញ្ចូលការគ្រប់គ្រងទាំងស្រុង លើតំបន់ដុនបាស (Donbas) ខណៈដែលអ៊ុយក្រែនបានបដិសេធ ហើយលោក ហ្សេឡេនស្គី បានជម្រុញឱ្យលោក ពូទីន រៀបចំជំនួបផ្ទាល់ជាមួយលោកកាលពីខែមុន ប៉ុន្តែត្រូវបានបដិសេធ។
លោក អ៊ូសាកូវ បានបន្ថែមថា ប្រេសិតរបស់លោក ត្រាំ គឺលោក ស្ទីវ វីតកូហ្វ (Steve Witkoff) និងលោក ជារេដ គូស្នឺ (Jared Kushner) ត្រៀមខ្លួនធ្វើទស្សនកិច្ចនៅទីក្រុងម៉ូស្គូម្តងទៀត ទោះបីជាកិច្ចខិតខំប្រឹងប្រែងការទូតរបស់អាមេរិកបច្ចុប្បន្នស្ទើរតែគាំង ខណៈកំពុងផ្តោតលើសង្រ្គាមជាមួយអ៊ីរ៉ង់ក៏ដោយ។
លោក ពូទីន ក៏បានសម្តែងក្តីសង្ឃឹមថា កិច្ចខិតខំប្រឹងប្រែងរបស់អាមេរិកក្នុងជម្លោះអ៊ីរ៉ង់នឹងនាំមកនូវដំណោះស្រាយរយៈពេលវែង។
លោក ហ្សេឡេនស្គី បានសរសេរនៅលើគណនីតេឡេក្រាម (Telegram) របស់លោកដោយពិពណ៌នាថា ការសន្ទនារបស់លោកជាមួយប្រធានាធិបតីអាមេរិកគឺ «ល្អណាស់» រួមទាំងការពិភាក្សាអំពីខ្សែត្រៀមជួរមុខប្រវែង ៧៤៦ ម៉ាយ។ លោកបាននិយាយថា មានការរំពឹងទុកពិតប្រាកដក្នុងការបញ្ចប់សង្រ្គាមនេះ ហើយលោក និងលោក ត្រាំ បានព្រមព្រៀងគ្នាបន្តការពិភាក្សានៅក្នុងកិច្ចប្រជុំរបស់អង្គការណាតូ ព្រមទាំងបានថ្លែងអំណរគុណដល់សហរដ្ឋអាមេរិកសម្រាប់ការជួយជ្រោមជ្រែងកន្លងមក៕
