កាណាដា បានប្រកាសពីការជ្រើសរើសក្រុមហ៊ុនការពារជាតិអាល្លឺម៉ង់ TKMS ដើម្បីសាងសង់កងនាវាមុជទឹកថ្មីចំនួន ១២ គ្រឿង នៅក្នុងកិច្ចព្រមព្រៀងលទ្ធកម្មយោធាដ៏ធំបំផុត នៅក្នុងប្រវត្តិសាស្ត្ររបស់ខ្លួន។
ការប្រកាសនេះ ធ្វើឡើងដោយនាយករដ្ឋមន្ត្រី ម៉ាក ខានី (Mark Carney) ភ្លាមៗមុនពេលលោកចាកចេញទៅចូលរួមសន្និសីទកំពូលណាតូ (NATO) នៅក្នុងប្រទេសទួរគី ដែលជាទីកន្លែងរំពឹងថានឹងមានសម្ពាធឱ្យសមាជិកបង្កើនការវិនិយោគលើវិស័យការពារជាតិ។
ចាប់តាំងពីចូលកាន់តំណែង លោក ខានី បានដំឡើងការចំណាយលើវិស័យការពារជាតិរបស់កាណាដាដល់ ២% នៃ GDP ហើយបានប្តេជ្ញាចិត្តថានឹងឈានឱ្យដល់ ៥% នៅត្រឹមឆ្នាំ២០៣៥។
យោងតាមរដ្ឋាភិបាល បច្ចុប្បន្នមាននាវាមុជទឹករបស់កាណាដាតែមួយគ្រឿងប៉ុណ្ណោះ ក្នុងចំណោមបួនគ្រឿង ដែលអាចប្រើប្រាស់បាន។ ប្រទេសដែលមានឆ្នេរសមុទ្រវែងជាងគេបំផុតនៅលើពិភពលោកមួយនេះ កំពុងព្រួយបារម្ភកាន់តែខ្លាំងអំពីការប្រែប្រួលអាកាសធាតុដែលធ្វើឱ្យទឹកសមុទ្រនៅតំបន់អាកទិក (Arctic) កាន់តែក្តៅ និងបើកផ្លូវថ្មីសម្រាប់ឱ្យគូប្រជែងធ្វើការវាយប្រហារ។
លោក ខានី បានមានប្រសាសន៍ថា៖ «នៅក្នុងពិភពលោកដ៏គ្រោះថ្នាក់ និងបែកបាក់កាន់តែខ្លាំង កាណាដាចាំបាច់ត្រូវតែត្រៀមខ្លួនរួចជាស្រេច ដើម្បីការពារផលប្រយោជន៍ និងប្រជាពលរដ្ឋរបស់យើង។ យើងកំពុងធ្វើលទ្ធកម្មការពារជាតិដ៏ធំបំផុត នៅក្នុងប្រវត្តិសាស្ត្រជាតិរបស់យើង ប្រកបដោយល្បឿន លេចធ្លោ និងវិន័យ»។ រដ្ឋាភិបាលមិនទាន់បានបញ្ចេញការប៉ាន់ស្មានតម្លៃសម្រាប់កិច្ចព្រមព្រៀងនេះនៅឡើយទេ។
ក្រុមហ៊ុន TKMS ដែលជាក្រុមហ៊ុនផលិតនាវាមុជទឹកមិនមែននុយក្លេអ៊ែរធំបំផុតនៅលើពិភពលោក បានដេញថ្លៃឈ្នះក្រុមហ៊ុន Hanwha Ocean របស់ប្រទេសកូរ៉េខាងត្បូង។ កងនាវាថ្មីនេះ គឺជាផ្នែកមួយនៃកិច្ចខិតខំប្រឹងប្រែងរបស់លោក ខានី ក្នុងការបង្កើនការចំណាយលើយោធា ដើម្បីពង្រឹងអធិបតេយ្យភាពដែនសមុទ្រ ជាពិសេសនៅក្នុងតំបន់អាកទិក ខណៈដែលប្រធានាធិបតីអាមេរិក លោក ដូណាល់ ត្រាំ ក៏បានដាក់សម្ពាធលើសមាជិកណាតូឱ្យបង្កើនការចំណាយផងដែរ។
លោក ដេវីដ ភែរី (David Perry) ប្រធានវិទ្យាស្ថានកិច្ចការសកលកាណាដា បានមានប្រសាសន៍ថា កិច្ចសន្យានេះផ្តល់ឱ្យលោក ខានី នូវភាពជឿជាក់យ៉ាងខ្លាំង។ លោកបានបន្ថែមថា រដ្ឋាភិបាលកាណាដាក៏បានផ្តោតលើការបង្កើតភាពជាដៃគូយុទ្ធសាស្ត្រជាមួយអឺរ៉ុប ស្របពេលដែលកាណាដាកំពុងប្រឈមមុខនឹងភាពតានតឹងផ្នែកពាណិជ្ជកម្មជាមួយសហរដ្ឋអាមេរិក។
ក្រុមហ៊ុន TKMS បានបញ្ជាក់ថា ភាពជាដៃគូរួមគ្នាជាមួយប្រទេសន័រវែសនេះ នឹងផ្តល់ជូនកាណាដានូវដំណោះស្រាយដែលមានហានិភ័យទាប និងស្របតាមស្តង់ដារណាតូ ទាំងលើការថែទាំ ការបណ្តុះបណ្តាល និងប្រតិបត្តិការ។
លោក ភែរី បានបន្ថែមថា នាវាថ្មីទាំងនេះនឹងផ្តល់ឱ្យកាណាដានូវការកើនឡើងយ៉ាងខ្លាំងនៃសមត្ថភាពដែនសមុទ្រ ដោយធានាឱ្យមាននាវាមុជទឹកចំនួនបីគ្រឿងអាចដំណើរការបានយ៉ាងគួរឱ្យទុកចិត្តនៅពេលណាក៏បាន ដែលខុសពីតថភាពរាល់ដងដែលមាននាវាមុជទឹកតែមួយគ្រឿងដំណើរការម្តងម្កាល។
រដ្ឋាភិបាលកាណាដា បានសង្កត់ធ្ងន់ថា នាវាមុជទឹកថ្មីទាំងនេះ ដែលប្រើប្រាស់ថាមពលធម្មតា និងមានសមត្ថភាពដើរតួនាទីនៅក្រោមផ្ទាំងទឹកកក គឺមានសារៈសំខាន់ខ្លាំងណាស់សម្រាប់សន្តិសុខ និងអធិបតេយ្យភាពជាតិ៕
