ច្រាំងទន្លេមេគង្គនៅចំណុចអ្នកលឿង ក្នុងស្រុកពាមរក៍ ខេត្តព្រៃវែង បន្តបាក់ស្រុតនៅរដូវភ្លៀងដើមខែកក្កដានេះ ធ្វើឱ្យអ្នកភូមិខ្លះ ដេកភ័យខ្លាចក្រែងរបូតភូមិកំណើតរបស់ពួកគាត់ ចូលផ្ទៃអាងទន្លេមេគង្គ ក្លាយជាចំណីរបស់ត្រីនៅថ្ងៃខាងមុខ។
ប្រការនេះ អ្នកភូមិបង្ខំចិត្តលើកគ្នាតវ៉ា ដោយជិះទូកទៅរារាំងសកម្មភាពសាឡង់បូមខ្សាច់ នៅកណ្ដាលទន្លេមេគង្គ នៅដើមខែកក្កដានេះ។
ពលរដ្ឋបាននិយាយថា៖ «គេនៅត្រង់ហ្នឹងគេ មិនហ៊ានបូមផង លោកឯងមកពីណា? មកដោះស្រាយគ្នា ឬក៏មកគំរាម អត់មានមកគំរាមទេ ប្រាប់ថា មិនឱ្យបូមទេ»។
ពលរដ្ឋ អះអាងថា ចាប់តាំងពីមានវត្តមានសាឡង់បូមខ្សាច់នៅតំបន់ពួកគាត់រស់នៅជាង ៥ឆ្នាំកន្លងទៅនេះ ជីវិតរស់នៅរបស់អ្នកភូមិតាមដងទន្លេមេគង្គ បាត់បង់ភាពសុខសាន្ត ព្រោះមានសំឡេងរំខានជាប់ជាប្រចាំ ទាំងយប់ថ្ងៃ ផលនេសាទក៏ថយចុះ និងបាក់ច្រាំងទន្លេជាបន្តបន្ទាប់។ បាតុភាពនេះ បានលងបន្លាចស្មារតីពលរដ្ឋ ដែលមានលំនៅឋាន តាមបណ្តោយមាត់ទន្លេមេគង្គឱ្យនៅតំបន់អ្នកលឿង។
ពលរដ្ឋរស់នៅតាមដងទន្លេមេគង្គថ្លែងសុំលាក់ឈ្មោះ ព្រោះបារម្ភពីសុវត្ថិភាពប្រាប់វីអូឌីនៅថ្ងៃទី០៧ ខែកក្កដាថា ពលរដ្ឋអស់ជំនឿលើអាជ្ញាធរពាក់ព័ន្ធ ទើបពួកគាត់ចេញតវ៉ា ដើម្បីការពារសុវត្ថិភាពផ្ទះសម្បែងរបស់ពួកគាត់ ព្រោះកន្លងមក ផ្ទះអ្នកភូមិជាច្រើនខ្នងបានធ្លាក់ចូលទឹកទន្លេ។ លោកថា អាជ្ញាធរពាក់ព័ន្ធការពារប្រយោជន៍ក្រុមហ៊ុន ហើយទម្លាក់កំហុសលើពលរដ្ឋរងគ្រោះទៅវិញ។
ពលរដ្ឋរូបនោះ និយាយថា៖ «ខ្ញុំឃើញមន្ត្រីពាក់ព័ន្ធតែងតែលើកឡើងយកត្រូវ ហើយការពារតែខាងក្រុមហ៊ុន ការពារតែខាងអ្នកមានលុយមានអំណាចទេ ប្រជាពលរដ្ឋចេញតវ៉ាបែរជាចោទប្រជាពលរដ្ឋថាមានទោសមានអីអញ្ចឹងទៅវិញ អាហ្នឹងវាដូចជាអត់ត្រូវទេ»។
កាលពីដើមខែកក្កដា អ្នកភូមិមួយក្រុម បានលើកគ្នាតវ៉ាដោយយកដុំថ្ម គប់សាឡង់បូមខ្សាច់ជាច្រើនគ្រឿង កំពុងទាញខ្សាច់ធម្មជាតិនៅចំណុចកណ្ដាលទន្លេអ្នកលឿង ក្នុងស្រុកពាមរក៍។ ពេលតវ៉ាអ្នកភូមិ និងមេការក្រុមហ៊ុនចតុមុខ ដែលមានថៅកែជាជនជាតិវៀតណាមគំរាមពលរដ្ឋ ដោយកម្លាំងនគរបាល ប្រសិនបើពលរដ្ឋមិនបញ្ឈប់តវ៉ាទេ។
លោកថា៖«ពួកអាយួន ពិបាកនិយាយគ្នា! ចង់និយាយគ្នាថា បងឯងរកនេសាទ មិនពាក់ព័ន្ធនេសាទទេ ពាក់ព័ន្ធនឹងបាក់ច្រាំង»។
វីអូឌីមិនទាន់អាចទាក់ទងសុំការបំភ្លឺរឿងនេះ ពីតំណាងក្រុមហ៊ុនចតុមុខ បាននៅឡើយទេ គិតត្រឹមម៉ោងផ្សាយនេះ។
តែយ៉ាងណា រដ្ឋលេខាធិការក្រសួងរ៉ែ លោក អ៊ឹង អៀង ថ្លែងក្នុងសន្និសីទសារព័ត៌មានថ្មីៗនេះថា ទីតាំងក្រុមហ៊ុនចតុមុខធ្វើអាជីវកម្មបូមខ្សាច់ ក្រសួងរ៉ែបានផ្តល់អាជ្ញាប័ណ្ណជាង ៥ ឆ្នាំមកហើយ។ លោកបញ្ជាក់ថា ទីតាំងដែលក្រសួងផ្ដល់អាជ្ញាប័ណ្ណ ក្រុមហ៊ុនអនុវត្តត្រឹមត្រូវ ស្របតាមអាជ្ញាប័ណ្ណ។
លោកថា៖«រឿងព្រឹត្តិការណ៍ដែលបងប្អូនប្រជាពលរដ្ឋប្រើប្រាស់អំពើហិង្សា ទៅលើបងប្អូនដែលជាអ្នកអនុវត្តប្រតិបត្តិការធនធានរ៉ែរបស់គាត់ វាជាអំពើមួយដែលពិបាកនឹងទទួលយកបានតាមក្របខណ្ឌច្បាប់»។
ពលរដ្ឋ ឱ្យដឹងថា ច្រាំងទន្លេមេគង្គបាក់ស្រុត ដោយសារសកម្មភាពបូមខ្សាច់ ពុំមែនមានតែក្នុងខេត្តព្រៃវែងប៉ុណ្ណោះទេ នៅខេត្តកំពង់ចាម ចំណុចថ្មដា ភូមិជ័យ ឃុំមានជ័យ ប្រវែងជាង ៣គីឡូម៉ែត្រ រហូតទាល់នឹងភូមិត្រាំងលើ ស្រុកខ្សាច់កណ្ដាល និងឃុំរកាកោង ស្រុកមុខកំពូល ខេត្តកណ្តាល បន្តបាក់ស្រុតជារៀងរាល់ឆ្នាំបណ្តាលឱ្យផ្ទះសម្បែងពលរដ្ឋជាច្រើនខ្នងផុងចូលទន្លេ។
ឆ្លើយបតរឿងនេះ នាយកប្រតិបត្តិអង្គការបណ្តាញការពារទន្លេបី លោក លាង ប៊ុនលាភ ពន្យល់ថា ការបូមខ្សាច់ចេញពីបាតទន្លេហួសកម្រិត នឹងប៉ះពាល់ដល់លំនឹងធម្មជាតិទឹកទន្លេ អាចបណ្ដាលឱ្យបាក់ច្រាំង ដែលអាជ្ញាធរពាក់ព័ន្ធគួរតែសិក្សាពីផលប៉ះពាល់បន្ថែមទៀត ដើម្បីកែលម្អចំណុចខ្វះចន្លោះ រុញឱ្យទទួលខុសត្រូវតាមច្បាប់។
លោក លាង ប៊ុនលាភ ថ្លែងថា៖ «ដើម្បីជាដំណោះស្រាយល្អ គឺមានតែរឿងដែលយើងធ្វើការរួមគ្នា ពិនិត្យមើល របាយការណ៍វាយតម្លៃហេតុប៉ះពាល់បរិស្ថាននោះ តើគួរតែគិតគូរធ្វើការយ៉ាងណាវិញ ដើម្បីដោះស្រាយបញ្ហាដែលវាកំពុងតែកើតមានហ្នឹងបាទ!»។
ទោះយ៉ាងណា អនុប្រធានគណបក្សប្រជាធិបតេយ្យជឿនលឿន លោក សួន សូរីដា បានបង្ហោះសារតាមបណ្ដាញសង្គមថា ការបូមខ្សាច់ដើម្បីកុំឱ្យបាក់ច្រាំង, ស្រូវចុះថោកដោយសារដាំច្រើនពេក, នាំកង្កែបចេញពីអណ្ដូង។ ហេតុអ្វីមន្ត្រីធំៗ និយាយបែបហ្នឹង? ព្រោះគេយល់ថា ទោះនិយាយបែបណា ក៏រាស្ត្រនៅតែបោះឆ្នោតឱ្យដដែល។
ចំណែកអតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន យល់ថា អំពើពុករលួយ គឺជាដើមចមធ្វើឱ្យបាក់ច្រាំងទន្លេ ដោយសារបូមខ្សាច់មិនត្រឹមត្រូវតាមស្តង់ដារបច្ចេកទេស រំខានសុភមង្គលរបស់ពលរដ្ឋជាច្រើនឆ្នាំមកហើយ។ លោកស្នើឱ្យក្រសួងរ៉ែពិនិត្យឡើងវិញ និងដោះស្រាយការតវ៉ារបស់ពលរដ្ឋឱ្យត្រឹមត្រូវ។
លោក អ៊ុំ សំអាន ថ្លែងថា៖ «ត្រូវពិនិត្យមើលចំណុចហ្នឹងជាពិសេស កុំចង់បានលុយពេក ដោយមិនគិតពីការប៉ះពាល់ប្រជាពលរដ្ឋ និងប៉ះពាល់ទៅដល់បរិស្ថានដែរណា»។
លោក អ៊ុំ សំអាន បារម្ភថា ផលប៉ះពាល់ ដោយបាតុភូតបាក់ច្រាំងទន្លេ បង្កឱ្យបាត់បង់ចំនួនត្រីក្នុងអាងទន្លេមេគង្គ ប៉ះពាល់ដល់ជីវភាពសហគមន៍ដែលមានមុខរបរពីការនេសាទ។ រីឯពលរដ្ឋបន្តរងគ្រោះកាន់តែរាលធំឡើយ ពីមួយឆ្នាំទៅមួយឆ្នាំ ហើយអ្នកដែលទទួលផលប្រយោជន៍ពីសម្បត្តិជាតិទាំងនេះ គឺក្រុមហ៊ុនឯកជន អាជ្ញាធរខិលខូច និងក្រុមអ្នកមានអំណាច។
មកទល់ពេលនេះ មន្ត្រីជំនាញបានសម្រេចផ្អាកសកម្មភាពបូមខ្សាច់របស់ក្រុមហ៊ុនចតុមុខ (Chaktomuk Resources Supply Import Export Co., Ltd) រង់ចាំការដោះស្រាយ និងពិនិត្យបន្ថែម៕
