ប្រធានាធិបតីសហរដ្ឋអាមេរិក លោក ដូណាល់ ត្រាំ បានមានប្រសាសន៍កាលពីថ្ងៃទី៦ខែកក្កដាថា ដំណោះស្រាយចំពោះសង្គ្រាមដែលមានរយៈពេលជាងបួនឆ្នាំនៅអ៊ុយក្រែនគឺ «កំពុងខិតជិតមកដល់ជាងអ្វីដែលមនុស្សទូទៅបានដឹង» ហើយលោកនឹងលើកយកបញ្ហានេះ មកពិភាក្សានៅក្នុងសន្និសីទកំពូលណាតូ (NATO) ក្នុងប្រទេសទួរគីនៅសប្តាហ៍នេះ។
លោក ត្រាំ បានធ្វើការកត់សម្គាល់បែបនេះ បន្ទាប់ពីបានពិភាក្សាតាមទូរស័ព្ទកាលពីចុងសប្តាហ៍ជាមួយទាំងប្រធានាធិបតីរុស្ស៊ី លោក វ៉្លាឌីមៀ ពូទី និងប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី។ លោកមិនបានផ្តល់ហេតុផលជាក់លាក់ណាមួយឡើយ ខណៈដែលកាលពីយប់មិញ រុស្ស៊ីបានវាយប្រហារទីក្រុងគៀវ (Kyiv) យ៉ាងខ្លាំងក្លាដោយកាំជ្រួច និងដ្រូន ដែលបានសម្លាប់មនុស្សយ៉ាងហោចណាស់ ២៨ នាក់។
នៅទីក្រុងមូស្គូ អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) ជឿជាក់ថា ជំហររបស់អាមេរិកលើការដោះស្រាយជម្លោះនេះ គឺនៅតែមិនផ្លាស់ប្តូរ។ ប៉ុន្តែ លោក ហ្សេឡេនស្គី បានប្រាប់កាសែត Financial Times ថា លោកជឿជាក់ថាប្រធានាធិបតីអាមេរិក កំពុងមើលឃើញជម្លោះនេះក្នុងពន្លឺថ្មីមួយ ដោយសារតែជោគជ័យនាពេលថ្មីៗនេះរបស់អ៊ុយក្រែន។
លោក ត្រាំ បានប្រាប់អ្នកយកព័ត៌មានថា៖ «ខ្ញុំគិតថា យើងកំពុងខិតជិតដល់ដំណោះស្រាយខ្លាំងណាស់។ ហើយប្រធានាធិបតី ពូទីន ចង់ឱ្យវាបញ្ចប់ ហើយប្រធានាធិបតី ហ្សេឡេនស្គី ក៏ពិតជាចង់ឱ្យវាបញ្ចប់នៅពេលនេះដែរ»។
លោកបានបន្ថែមថា លោកមានការសន្ទនារយៈពេល ៨៥ នាទី យ៉ាងល្អជាមួយលោក ពូទីន ក្នុងថ្ងៃបុណ្យឯករាជ្យជាតិ ៤ កក្កដា ដោយលោកបានផ្តល់ការជួយជ្រោមជ្រែង ដើម្បីឆ្ពោះទៅរកសន្តិភាព។ តាមកាលវិភាគ លោក ត្រាំ ត្រូវជួបពិភាក្សាជាមួយលោក ហ្សេឡេនស្គី នៅថ្ងៃទី៨ ខែកក្កដានេះ នៅក្រៅកិច្ចប្រជុំកំពូលណាតូ ក្នុងទីក្រុងអង់ការ៉ា ដើម្បីជំរុញជាថ្មីក្នុងការបញ្ចប់សង្គ្រាម ហើយលោកក៏ទំនងជានឹងបន្តទាក់ទងជាមួយលោក ពូទីន បន្ថែមទៀតបន្ទាប់ពីនោះ។
លោក ប៉េស្កូវ បានបញ្ជាក់ថា លោក ពូទីន និងលោក ត្រាំ បានព្រមព្រៀងគ្នាបន្តការទាក់ទងគ្នានៅពេលដ៏ខ្លីខាងមុខ ហើយបានការពារលោក ត្រាំ ពីការរិះគន់ដោយនិយាយថា លោក ត្រាំ មានជំហររឹងមាំ ម៉ឺងម៉ាត់ និងបើកចិត្តក្នុងការស្តាប់ព័ត៌មានពីលោក ពូទីន។
ចំណែកលោក ហ្សេឡេនស្គី ក៏បានពិពណ៌នាការសន្ទនាជាមួយលោក ត្រាំ ថា «ល្អខ្លាំងណាស់» ដោយលោក ត្រាំ បានកោតសរសើរចំពោះយុទ្ធនាការដ្រូនរយៈចម្ងាយឆ្ងាយរបស់អ៊ុយក្រែនលើគោលដៅឧស្សាហកម្មប្រេងរុស្ស៊ី។ លោក ហ្សេឡេនស្គី បានកត់សម្គាល់ថា៖ «ប្រធានាធិបតី ត្រាំ ចង់ស្ថិតនៅកន្លែងណាដែលមានភាពជោគជ័យ» ដែលរឿងនេះទាក់ទងនឹងបុគ្គលិកលក្ខណៈផង និងការបោះឆ្នោតពាក់កណ្តាលអាណត្តិរបស់អាមេរិកដែលជិតមកដល់ផង។
បន្ទាប់ពីការជួបគ្នាកាលពីឆ្នាំមុនបានប្រែទៅជាការឈ្លោះប្រកែកគ្នា ប្រធានាធិបតីអ៊ុយក្រែនបានខិតខំពង្រឹងទំនាក់ទំនងឡើងវិញជាបន្តបន្ទាប់។ ការអត្ថាធិប្បាយចុងក្រោយរបស់លោក ត្រាំ មិនបានរំឮកដល់ការទាមទារពីមុន ដែលសុំឱ្យអ៊ុយក្រែនប្រញាប់ប្រញាល់ព្រមព្រៀងជាមួយរុស្ស៊ី ដោយសារតែគ្មានប្រៀបនោះឡើយ៕
