Social Issues, ព័ត៌មានជាតិ, សង្គម

លំហូរឧក្រិដ្ឋជនឆ្លងដែនចូលប្រទេសថៃជាមន្ទិលថាកម្ពុជាមិនទាន់ផ្តាច់បណ្តាញមេខ្លោង

លី ស្រីវី
| ០៨ កក្កដា ២០២៦
ម៉ោង ២០:៥៣

លំហូរឧក្រិដ្ឋជនអនឡាញចម្រុះជាតិសាសន៍ ចូលទៅប្រទេសថៃ ដោយខុសច្បាប់ថ្មីៗនេះ ជំរុញឱ្យមានការលើកឡើងថា កម្ពុជាមិនទាន់កាត់ផ្តាច់ឫសគល់បណ្តាញមេខ្លោងឧក្រិដ្ឋជន ដូចដែលរដ្ឋាភិបាលលោក ហ៊ុន ម៉ាណែត បានអះអាងនោះទេ បើទោះបីជាមានការបង្ក្រាបច្រើនខែមកនេះ ក្នុងប្រទេសកម្ពុជា។

យោងតាមការចុះផ្សាយរបស់កាសែតថៃ សាកែវ ធូដេ ញូវ (Sa Kaeo Today News) បានឱ្យដឹងថា អាជ្ញាធរថៃរកឃើញករណីឆ្លងដែនខុសច្បាប់ពីរករណី ក្នុងរយៈពីរថ្ងៃជាប់គ្នា នៅដើមខែកក្កដានេះ។

ករណីទីមួយ កងកម្លាំងបូព៌ាថៃ នៅថ្ងៃទី៦ ខែកក្កដា បានស្ទាក់ចាប់ជនបរទេសចម្រុះជាតិសាសន៍ចំនួន ១១នាក់ ជាបុរស រួមមានជនជាតិចិនម្នាក់ បង់ក្លាដែស ៧នាក់ វៀតណាម ២នាក់ និងជនជាតិថៃម្នាក់ មានស្រុកកំណើតនៅខេត្តនគររាជសីមា។

តាមការសាកសួរ ពួកគេបានជួលថ្លៃឡានមួយគ្រឿង ដោយម្នាក់ត្រូវបង់ ៨ពាន់បាត ឬប្រមាណ ៨០ម៉ឺនរៀល ដោយធ្វើដំណើរចេញពីក្រុងប៉ោយប៉ែត ទៅកាន់ភូមិទំនប់ដាច់ ឃុំអូរបីជាន់ ស្រុកអូរជ្រៅ ដោយទម្លាក់ពួកគេនៅព្រៃក្បែរព្រំដែន។ ក្រោយមកមានបុរសជនជាតិខ្មែរបីនាក់ នាំពួកគេដើរកាត់វាលស្រែ និងព្រៃ កាត់តាមភូមិល្អាងសិលា រួចចូលដីថៃ រហូតត្រូវបានចាប់ខ្លួននៅម៉ោង២រសៀល។

ក្នុងនោះជនបរទេស ១០នាក់ បានប្រាប់ប៉ូលីសថា ពួកគេមកធ្វើការជាអ្នកលក់ដូរអនឡាញ ប៉ុន្តែត្រូវបានមេការជនជាតិចិន មិនបើកលុយឱ្យ ជាហេតុធ្វើឱ្យពួកគេចង់ឆ្លងដែនត្រឡប់ទៅប្រទេសកំណើត។ ចំណែកបុរសជនជាតិចិនម្នាក់ទៀត បានអះអាងថា រូបគេមកដើរលេងនៅកម្ពុជា ប៉ុន្តែធ្វើបាត់លិខិតឆ្លងដែន ទើបចង់ឆ្លងដែនកាត់តាមថៃដោយខុសច្បាប់រួចបន្តទៅស្រុកកំណើតវិញ។

បុរសចិនរូបនេះ ឱ្យដឹងថា រូបគេមានជំងឺរបេងផងដែរ។ គ្រានោះសមត្ថកិច្ចថៃ បានសង្កេតឃើញថា អាការៈមិនសូវស្រួល និងហៅរថយន្តសង្គ្រោះបន្ទាន់មក។ ផ្អែកតាមការពិនិត្យបឋមរបស់គ្រូពេទ្យបានរកឃើញថា ជនជាតិចិនរូបនោះ មានអាការៈឆ្លងរោគក្នុងសួត (សួតមានមេរោគ) និងមានកម្រិតអុកស៊ីសែនក្នុងឈាមទាប ហើយត្រូវបានបញ្ជូនទៅមន្ទីរពេទ្យស្រុកអារញ្ញ។

ករណីមួយទៀត នៅថ្ងៃទី៧ ខែកក្កដា ដដែល អាជ្ញាធរបូព៌ាថៃ បានរកឃើញជនជាតិថៃបីនាក់ទៀត ដែលឆ្លងដែនដោយខុសច្បាប់ ដោយឆ្លងស្ទឹង និងលូនក្រោមបន្លាលួសចូលមកទឹកដីថៃ ត្រង់ចំណុចឃុំប៉ារ៉ៃ ស្រុកអារញ្ញ ដែលជាប់នឹងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត។

បុរសម្នាក់ក្នុងចំណោមនោះ ត្រូវបានអាជ្ញាធរថៃរកឃើញថា មានដីកាតាមចាប់ខ្លួនចំនួន ៥ករណី។ ជនជាតិថៃទាំងបី បានសារភាពថា ពួកគេសម្រេចលួចចូលស្រុកកំណើតវិញ ក្រោយបាត់បង់ការងារអនឡាញ ដោយពួកគេថែមទាំងធ្លាប់បានជួលបន្ទប់ស្នាក់នៅក្នុងក្រុងប៉ោយប៉ែត ហើយរួមគ្នាដាំទឹកស្លឹកក្រាក់ធំ (Kratom) ដែលជាសារធាតុញៀនខុសច្បាប់ លក់ដើម្បីរកចំណូល ប៉ុន្តែអាជីវកម្មមិនទទួលបានជោគជ័យ រួមផ្សំនឹងការរឹតបន្តឹងកាន់តែខ្លាំងពីសំណាក់សមត្ថកិច្ចកម្ពុជា។

ឆ្លងតាមការសាកសួរ ពួកគេទាំងអស់គ្នា បានផ្តល់ចម្លើយសារភាពថា បានលបលួចធ្វើដំណើរទៅធ្វើការជាប្រតិបត្តិករវេបសាយល្បែងស៊ីសងអនឡាញ វ៉ាវ ស្លុត ១៦៨៨ (Wowslot1688) និង ៧៨៩ បេត (789 Bet) នៅក្នុងក្រុងប៉ោយប៉ែត ប្រទេសកម្ពុជា តាំងពីខែកក្កដា ឆ្នាំ២០២៥ ក្រោយថៅកែរើក្រុមហ៊ុនពីថៃ មកកម្ពុជា។

ទាក់ទិនរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត លើកឡើងថា ទិដ្ឋភាពនេះ ទោះបីជាមានយុទ្ធនាការបង្ក្រាបខ្លះៗ ពីសំណាក់រដ្ឋាភិបាលក៏ដោយ ក៏បទល្មើសឆបោកអនឡាញ មិនទាន់ត្រូវបានលុបបំបាត់ទាំងស្រុងនោះទេ ពោលគឺក្រុមឧក្រិដ្ឋជនទាំងនោះ បានផ្លាស់ប្តូរទម្រង់សកម្មភាព ដោយបំបែកខ្លួនជាក្រុមតូចៗទៅសម្ងំលាក់ខ្លួន និងបន្តប្រព្រឹត្តបទល្មើសតាមផ្ទះជួលនានា ដែលជាហេតុធ្វើឱ្យមានការលេចឡើងនូវសកម្មភាពខុសច្បាប់នេះ នៅតាមតំបន់មួយចំនួន។

លោក ម៉ែន ណាត ថ្លែងថា៖ «វាជាការបរាជ័យរួចទៅហើយ នៅពេលដែលដាក់កំហិត ដើម្បីលាងសម្អាតឱ្យអស់កាលពីខែមេសា ឆ្នាំ២០២៦ ប៉ុន្តែមិនអស់មកដល់បច្ចុប្បន្នហ្នឹង រប៉េះរប៉ោះប្រព្រឹត្តបទល្មើសបាន មកដល់ខែ៧ ខែ៨ នៅតែប្រព្រឹត្តិបានដដែល»។

លោក ម៉ែន ណាត បញ្ជាក់បន្ថែមថា ប្រសិទ្ធភាពពិតប្រាកដនៃការបង្ក្រាបនឹងមិនអាចទទួលបាននោះឡើយ ដរាបណាមេខ្លោងធំៗ ដែលជាអ្នកមានអំណាចទាំងក្នុងជួរដ្ឋាភិបាល និងគ្រួសារថ្នាក់ដឹកនាំ បន្តរួចខ្លួនក្រៅសំណាញ់ច្បាប់ ខណៈតុលាការមានភាពទន់ខ្សោយ និងពុករលួយ។ លោកជំរុញឱ្យរដ្ឋាភិបាលស៊ើបអង្កេតដោយតម្លាភាព វែកមុខមេខ្លោងពិតប្រាកដ ទោះជាជនជាតិណា ឬមានងារជាអ្វីក៏ដោយ ដើម្បីកសាងភាពស្អាតស្អំសម្រាប់ជាតិ និងទំនុកចិត្តពីវិនិយោគិនបរទេស។

លោក ម៉ែន ណាត ថែងថា៖ «ដូច្នេះវិស័យផ្លូវច្បាប់ត្រូវតែរឹងមាំឡើងវិញ នីតិរដ្ឋត្រូវតែរឹងមាំឡើងវិញ ដើម្បីពង្រឹងសន្តិសុខជាតិ និងសុវត្ថិភាពជូនជនបរទេសដទៃទៀត ដែលពួកគេចង់មកកសាងអាជីវកម្មនៅស្រុកខ្មែរ ចង់មកវិនិយោគ ឬចង់មកកម្សាន្តនៅស្រុកខ្មែរ ឱ្យពួកគេមានសុវត្ថិភាព»។

យោងតាមរបាយការណ៍ស្រាវជ្រាវរបស់អង្គការលើកលែងទោសអន្តរជាតិ បានរកឃើញថា ប្រតិបត្តិករអនឡាញជាច្រើននាក់ និងច្រើនជាតិសាសន៍ កំពុងសម្រុកចាកចេញពីប្រទេសកម្ពុជា ឆ្ពោះទៅកាន់ប្រទេសភូមា ឡាវ ហ្វីលីពីន និងស្រីលង្កា ដើម្បីបើកឧស្សាហកម្មឆបោក ក្រោយរដ្ឋាភិបាលកម្ពុជាបើកការបង្ក្រាប ចាប់តាំងពីដើមឆ្នាំ២០២៦នេះ។

គិតត្រឹមខែមេសា ហោចណាស់មានជនបរទេសប្រមាណ ២៤ម៉ឺននាក់ បានចាកចេញពីកម្ពុជាដោយខ្លួនឯង និង១ម៉ឺន៣ពាន់នាក់ផ្សេងទៀត ត្រូវបានចាប់ខ្លួន និងបណ្ដេញចេញពីប្រទេសកម្ពុជា ក្រោយរកឃើញថាពួកគេពាក់ព័ន្ធករណីឆបោកតាមប្រព័ន្ធអនឡាញ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។