ក្រសួងសុខាភិបាល អំពាវនាវឱ្យមានការប្រុងប្រយ័ត្នការកើនឡើងជំងឺគ្រុនឈាមនៅរដូវវស្សានេះ ដែលស្ថាប័នពាក់ព័ន្ធ និងសហគមន៍ត្រូវបង្កើនការប្រុងប្រយ័ត្នខ្ពស់ ដោយសំអាងថា ផ្នែកមួយនៃក្តីបារម្ភនេះដោយសារតែកម្ពុជាកំពុងទទួលឥទ្ធិពលនៃបាតុភូតកើនកម្ដៅ (El Niño)។
ក្រសួងបាននិយាយនៅក្នុងសេចក្តីណែនាំចុះថ្ងៃទី៨ខែកក្កដានេះថា ក្នុងអំឡុងពេលរដូវវស្សា ជាទូទៅធ្វើឱ្យមានការកើនឡើងវត្ថុដក់ទឹក ដែលជាកន្លែងបង្កបង្កើតកូនចៅមូសខ្លា។
សម្រាប់ក្រសួងសុខាភិបាល ស្របពេលប្រទេសកម្ពុជា កំពុងទទួលឥទ្ធិពលនៃបាតុភូតកើនកម្ដៅនេះ អាចធ្វើឱ្យមានការកើនឡើងចំនួនមូសខ្លា និងជំងឺគ្រុនឈាម ។
មូសខ្លាចូលចិត្តរស់នៅកន្លែងទឹកដក់ ដូចជា សំបកកង់ឡាន កង់ម៉ូតូ ទុកចោលពាសវាលពាសកាល ត្រឡោកដូង កែវ ធុងដាក់ទឹក ទឹកថូផ្កា ជាដើម ដែលត្រូវរួមគ្នាលុបបំបាត់ប្រភពដក់ទឹកទាំងនោះ ដើម្បីបំបាត់ជម្រកមូសខ្លា ដែលជាភ្នាក់ងារចម្លងជំងឺគ្រុនឈាម។
លើសពីនេះ មន្ទីរសុខាភិបាល រដ្ឋបាលរាជធានី-ខេត្តទាំង២៥ ត្រូវសហការជាមួយអាជ្ញាធរពាក់ព័ន្ធ ដើម្បីចុះត្រួតពិនិត្យនៅតាមការដ្ឋានសំណង់ ជំរុញការអនុវត្តការងារកាត់បន្ថយ និងទប់ស្កាត់ការកកើតមូសក្នុងមូលដ្ឋានរបស់ខ្លួនឱ្យមានប្រសិទ្ធភាព ដើម្បីចូលរួមកាត់បន្ថយអត្រាឈឺ និងស្លាប់ដោយសារជំងឺគ្រុនឈាម៕
