ប្រធានាធិបតី លោក វ៉ូឡូឌីមៀ ហ្សេឡេនស្គី (Volodymyr Zelenskiy) បានថ្លែងកាលពីថ្ងៃទី៧ ខែកក្កដាថា អ៊ុយក្រែនបានចុះហត្ថលេខាលើ «កិច្ចព្រមព្រៀងដ្រូន» ចំនួនបីបន្ថែមទៀតជាមួយប្រទេសដាណឺម៉ាក អេស្តូនី និងហូឡង់ ដោយចែករំលែកនូវបទពិសោធន៍ជំនាញរបស់ខ្លួន ដែលទទួលបានពីសង្គ្រាមជាមួយរុស្ស៊ីអស់រយៈពេលជាងបួនឆ្នាំមកនេះ។
លោក ហ្សេឡេនស្គី បានប្រកាសពីកិច្ចព្រមព្រៀងទាំងនេះ តាមរយៈការបង្ហោះលើបណ្តាញសង្គម ក្នុងអំឡុងពេលចូលរួមកិច្ចប្រជុំកំពូលណាតូ (NATO) នៅទីក្រុងអង់ការ៉ា រដ្ឋធានីនៃប្រទេសតួកគី ដោយលោកបានបញ្ជាក់ថា រហូតមកដល់ពេលនេះ ទីក្រុងគៀវ (Kyiv) សម្រេចបានកិច្ចព្រមព្រៀងបែបនេះសរុបចំនួនប្រាំបួនហើយ។
អ៊ុយក្រែន បានអភិវឌ្ឍន៍ឧស្សាហកម្មដ្រូនដ៏ទំនើបបំផុតមួយ បន្ទាប់ពីធ្លាប់មានបទពិសោធន៍ជំនាញកម្រិតមានកំណត់នៅក្នុងវិស័យនេះ នៅពេលដែលរុស្ស៊ីបានបើកការឈ្លានពានប្រទេសជិតខាងតូចមួយនេះកាលពីខែកុម្ភៈ ឆ្នាំ២០២២។
លោក ហ្សេឡេនស្គី បានធ្វើដំណើរទៅកាន់ប្រទេសជាច្រើន ដើម្បីជំរុញកិច្ចព្រមព្រៀងទាំងនេះ ជាពិសេសនៅតំបន់មជ្ឈិមបូព៌ា ដែលជាកន្លែងបណ្តាប្រទេសឈូងសមុទ្រ ត្រូវបានបង្ខំឱ្យទប់ទល់នឹងការវាយប្រហាររបស់អ៊ីរ៉ង់នាឆ្នាំនេះ។
ក្នុងការប្រកាសអំពីកិច្ចព្រមព្រៀងជាមួយប្រទេសដាណឺម៉ាក លោក ហ្សេឡេនស្គី បានមានប្រសាសន៍ថា កិច្ចព្រមព្រៀងនេះ “បើកឱកាសកាន់តែធំសម្រាប់ផលិតកម្មការពារជាតិរួមគ្នា ការផ្លាស់ប្តូរបទពិសោធន៍ជំនាញ និងតម្លាភាពក្នុងការនាំចេញអាវុធ”។
លោកបានបន្តថា ដាណឺម៉ាកគឺជាប្រទេសដំបូងគេដែលបានផ្តល់ការផលិតរួមគ្នា នៅក្នុងប្រទេសអ៊ុយក្រែន “ហើយវាជារឿងដ៏ត្រឹមត្រូវបំផុតដែលដាណឺម៉ាក នឹងទទួលបានសិទ្ធិទិញអាវុធនាំចេញរបស់អ៊ុយក្រែន ដែលត្រូវបានសាកល្បងនៅក្នុងសមរភូមិសង្គ្រាមពិតប្រាកដ”។
នៅក្នុងការបង្ហោះលើបណ្តាញសង្គម X នៅចុងបញ្ចប់នៃកិច្ចប្រជុំថ្ងៃដំបូង លោក ហ្សេឡេនស្គី បាននិយាយថា អ៊ុយក្រែន “មានសិទ្ធិស្របច្បាប់ក្នុងការស្ថិតនៅទីនេះ” ហើយបានសង្កត់ធ្ងន់ជាថ្មីថា គោលដៅចម្បងរបស់ទីក្រុងគៀវនៅក្នុងការជួបជុំនេះ គឺដើម្បី “ធានាឱ្យបាននូវប្រព័ន្ធការពារដែនអាកាសបន្ថែមទៀត និងជំហរការទូតដ៏រឹងមាំជាងមុន”។
លោក ហ្សេឡេនស្គី បានចង្អុលបង្ហាញពីតម្រូវការរបស់អ៊ុយក្រែនក្នុងការបង្កើនការការពារប្រឆាំងនឹងគ្រាប់មីស៊ីលបាលីស្ទីករបស់រុស្ស៊ី បន្ទាប់ពីមានការវាយប្រហារចំនួនពីរលើកលើរដ្ឋធានីរបស់អ៊ុយក្រែនក្នុងសប្តាហ៍កន្លងទៅនេះ។ មនុស្សចំនួន ១៩ នាក់ បានស្លាប់នៅក្នុងទីក្រុងគៀវ ក្នុងការវាយប្រហារចុងក្រោយបង្អស់កាលពីថ្ងៃទី៦ខែកក្កដា៕
