លោកយាយ សៅ ង៉ែត ដែលត្រូវជាម្តាយបង្កើតរបស់លោក កឹម សុខា ប្រធានគណបក្សសង្គ្រោះជាតិដែលតុលាការរំលាយ បានទទួលមរណភាព នៅគេហដ្ឋានរបស់កូន ស្ថិតក្នុងខណ្ឌសែនសុខ រាជធានីភ្នំពេញ នាយប់ថ្ងៃទី៨ ខែកក្កដា ឆ្នាំ២០២៦នេះ ដោយរោគាពាធ ក្នុងជន្មាយុ១០១ឆ្នាំ។
សហមេធាវីការពារក្តីឱ្យលោក កឹម សុខា គឺលោក ផែង ហេង បានឱ្យដឹងនៅលើទំព័រហ្វេសប៊ុករបស់លោក នៅថ្ងៃទី០៩ ខែកក្កដានេះថា អ្នកម្តាយរបស់លោក កឹម សុខា គឺលោកយាយ សៅ ង៉ែត បានលាចាកលោកនេះហើយ កាលពីវេលាម៉ោង១១យប់ ថ្ងៃទី៨ ខែកក្កដា។
លោកបន្តថា សពរបស់លោកយាយ សៅ ង៉ែត តម្កល់ធ្វើបុណ្យនៅរាជធានីភ្នំពេញ ហើយនឹងដង្ហែទៅស្រុកកំណើត ក្នុងខេត្តតាកែវ នៅថ្ងៃអាទិត្យ ចុងសប្តាហ៍នេះ។
ប្រធានព្រឹទ្ធសភា លោក ហ៊ុន សែន នៅថ្ងៃទី០៩ ខែកក្កដា ឆ្នាំ២០២៦ បានផ្ញើសារលិខិតរំលែកមរណទុក្ខ ផ្ញើជូនលោក កឹម សុខា និងក្រុមគ្រួសារ ដោយក្នុងនោះលោក និងភរិយា បានបង្ហាញនូវក្តីក្តុកក្តួល និងសោកស្តាយជាពន់ពេក បន្ទាប់ពីបានទទួលដ៏ក្រៀមក្រំពីមរណភាពរបស់ឧបាសិកា សៅ ង៉ែត។
លោកបន្តថា មរណភាពរបស់ឧបាសិកា សៅ ង៉ែត គឺជាការបាត់បង់នូវពុទ្ធសាសនិកមួយរូប ដែលមានសទ្ធាជ្រះថ្លា ដែលបានបូជាកម្លាំងកាយចិត្ត ពេលវេលា និងថវិកា ចូលរួមចំណែកក្នុងការទ្រង់ទ្រង់ និងលើកស្ទួយវិស័យព្រះពុទ្ធសាសនានៅប្រទេសកម្ពុជា។
ជាមួយគ្នានេះ លោក ហ៊ុន សែន និងភរិយា បានឧទ្ទិសបួងសួងដល់វត្ថុស័ក្តិសិទ្ធិក្នុងលោក តាមជួយបីបាច់ថែរក្សាដល់ដួងវិញ្ញាណក្ខន្ធរបស់ឧបសិកា សៅ ង៉ែត សូមបានទៅចាប់បដិសន្ធិ និងសោយសុខក្នុងសុគតិភពកុំបីឃ្លៀងឃ្លាតឡើយ។
នៅព្រឹកថ្ងៃព្រហស្បតិ៍នេះ គេសង្កេតឃើញអ្នកនយោបាយដែលមានភក្តីភាពនឹងលោក កឹម សុខា និងសកម្មជនគណបក្សក្រៅរដ្ឋាភិបាលមួយចំនួន បានផ្ញើសារលើបណ្តាញសង្គម ដោយបង្ហាញការសោកស្តាយអាឡោះអាល័យ និងចូលរួមមរណទុក្ខជាមួយលោក កឹម សុខា និងក្រុមគ្រួសារ ព្រមទាំងបានបួងសួងសូមឱ្យវិញ្ញាណក្ខន្ធលោកយាយ សៅ ង៉ែត បានទៅកាន់សុគតិភព។
លោក កឹម សុខា ត្រូវបានប្រមុខរដ្ឋស្តីទី លោក ហ៊ុន សែន កាលពីថ្ងៃទី២៥ខែឧសភា បានចេញព្រះរាជក្រឹត្យលើកលែងទោសដល់លោក ដែលតុលាការផ្តន្ទាទោស២៧ឆ្នាំ ប៉ុន្តែបានភ្ជាប់ទៅនឹងលក្ខខណ្ឌមិនឱ្យលោកអាចចូលប្រលូកក្នុងឆាកនយោបាយឡើងវិញនៅឡើយទេ។
សំណុំរឿចោទប្រកាន់លោក កឹម សុខា ត្រូវបានមជ្ឈដ្ឋានជាតិនិងអន្តរជាតិនិយាយដូចគ្នាថា ជាសំណុំរឿងនយោបាយដែលប្រឌិតឡើងពីមេដឹកនាំគណបក្សកាន់អំណាច គឺលោក ហ៊ុន សែន ដើម្បីការពារអំណាច ក្រោយពលរដ្ឋភាគច្រើនបានងាកមកបោះឆ្នោតគាំទ្រគណបក្សសង្គ្រោះជាតិ ដើម្បីប្តូរមេដឹកនាំ។
ការចេញព្រះរាជក្រឹត្យលើកលែងទោសដល់ លោក កឹម សុខា នេះ គឺធ្វើឡើងស្របពេលដែលលោកយាយ សៅ ង៉ែត ដែលមានវ័យ ១០១ឆ្នាំ កំពុងមានជំងឺធ្ងន់ធ្ងរសម្រាកនៅលើគ្រែ និងចង់ជួបកូនប្រុសរបស់គាត់ គឺលោក កឹម សុខា៕
