ប្រធានាធិបតី ដូណាល់ ត្រាំ បានធ្វើឱ្យកិច្ចប្រជុំកំពូលនៃមេដឹកនាំអង្គការណាតូ (NATO) ធ្លាក់ក្នុងភាពវឹកវរកាលពីថ្ងៃទី៨ខែកក្កដា ដោយលោកបានទាមទារឱ្យសហរដ្ឋអាមេរិកកាត់ផ្តាច់ទំនាក់ទំនងពាណិជ្ជកម្មជាមួយប្រទេសអេស្ប៉ាញ និងបានទាមទារកាន់កាប់ជាថ្មីលើកោះគ្រីនឡែន (Greenland) ប៉ុន្តែក្រោយមកលោកបានប្តូរឥរិយាបថវិញ ដោយនិយាយថា ណាតូមាន «សាមគ្គីភាពយ៉ាងខ្លាំង»។
នៅក្នុងការថ្លែងប្រាប់នៅរដ្ឋធានីអង់ការ៉ា ប្រទេសទួរគី លោក ត្រាំ បានហៅទីក្រុងម៉ាឌ្រីដថាជា «ដៃគូដ៏អាក្រក់» នៅក្នុងអង្គការណាតូ ចំពោះការមិនគាំទ្រសង្គ្រាមលើប្រទេសអ៊ីរ៉ង់ ហើយបានបញ្ជាឱ្យបញ្ឈប់រាល់ការធ្វើពាណិជ្ជកម្មទាំងអស់ជាមួយអេស្ប៉ាញ។ ការលើកឡើងរបស់លោកដែលបានប្រកាសផងដែរថា កិច្ចព្រមព្រៀងបទឈប់បាញ់ដ៏ផុយស្រួយជាមួយអ៊ីរ៉ង់ត្រូវបានបញ្ចប់ បានគ្របដណ្តប់លើកិច្ចប្រជុំកំពូល ដែលមេដឹកនាំអឺរ៉ុបសង្ឃឹមថា នឹងអាចរំលងផុតពីជម្លោះ។
ប៉ុន្តែបន្ទាប់ពីចេញពីកិច្ចប្រជុំបិទទ្វារ លោក ត្រាំ ក្រោយមកបាននិយាយថា៖ «មានក្តីស្រឡាញ់យ៉ាងខ្លាំងនៅក្នុងបន្ទប់នោះ និងមានសាមគ្គីភាពយ៉ាងខ្លាំង»។ លោកក៏បាននិយាយក្នុងភាពស្និទ្ធស្នាលទៅកាន់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី ដោយបញ្ជាក់ថា លោកនឹងផ្តល់អាជ្ញាប័ណ្ណឱ្យទីក្រុងគៀវផលិតមីស៊ីល Patriot។
ប្រភពមួយបាននិយាយថា លោក ត្រាំ មិនបានបញ្ជាក់ពីការរិះគន់របស់លោក នៅពីក្រោយទ្វារបិទជិតនោះទេ ហើយផ្ទុយទៅវិញចង់រក្សាសហរដ្ឋអាមេរិកនៅក្នុងអង្គការណាតូ។ ប្រធានាធិបតីបារាំង លោក អេម៉ានូអែល ម៉ាក្រុង ក៏បាននិយាយដែរថា លោកមិនបានឮការរអ៊ូរទាំណាមួយឡើយ ខណៈដែលអគ្គលេខាធិការណាតូ លោក ម៉ាក រុយតេ បាននិយាយថា សម្ព័ន្ធភាពនេះគឺ «រួបរួមគ្នាកាន់តែខ្លាំងជាងពេលណាៗទាំងអស់»។
យ៉ាងហោចណាស់ កិច្ចប្រជុំកំពូលបានបញ្ចប់ដោយសារលិខិតសាមគ្គីភាព ដោយសម្ព័ន្ធមិត្តណាតូ បានបញ្ជាក់ពី «ការប្តេជ្ញាចិត្តដ៏រឹងមាំ» ចំពោះការការពាររួមគ្នាក្រោមប្រការ ៥ (Article 5)។ សមាជិកណាតូ ក៏បានសន្យាផ្តល់ជំនួយយោធាចំនួន ៧០ ប៊ីលីយោនអឺរ៉ូ (៨០ ប៊ីលីយោនដុល្លារ) ដល់អ៊ុយក្រែនសម្រាប់ឆ្នាំ ២០២៦ ផងដែរ បន្ទាប់ពីមានគំនិតផ្តួចផ្តើមការពារជាតិចំនួន ៥០ ប៊ីលីយោនដុល្លារ ត្រូវបានលាតត្រដាងកាលពីថ្ងៃអង្គារ។
ទីក្រុងវ៉ាស៊ីនតោន និងទីក្រុងម៉ាឌ្រីដ បានខ្វែងគំនិតគ្នា ដោយអេស្ប៉ាញបានបដិសេធមិនអនុញ្ញាតឱ្យសហរដ្ឋអាមេរិកប្រើប្រាស់ដែនអាកាស ឬមូលដ្ឋានទ័ពរបស់ខ្លួនសម្រាប់សង្គ្រាមអ៊ីរ៉ង់នោះឡើយ។
នាយករដ្ឋមន្ត្រីអេស្ប៉ាញ លោក ផេដ្រូ សានឆេហ្ស ក្រោយមកបាននិយាយថា លោកមានការសន្ទនា «ដ៏ស្និទ្ធស្នាលបំផុត» ជាមួយលោក ត្រាំ អំពីកីឡា ប៉ុន្តែមិនបានពិភាក្សាអំពីការចំណាយយោធានោះទេ។
ទោះជាយ៉ាងណា រដ្ឋមន្ត្រីក្រសួងសុខាភិបាលរបស់អេស្ប៉ាញ បាននិយាយនៅលើបណ្តាញសង្គម X ថា៖ «អ្វីដែលគួរឱ្យខ្លាចនោះ គឺការភាន់ច្រឡំរវាងការទូតជាមួយនឹងការគំរាមកំហែង»។
ទាក់ទងនឹងបញ្ហាអ៊ីរ៉ង់ លោក ត្រាំ បាននិយាយនៅពេលត្រូវបានសួរថាតើកិច្ចព្រមព្រៀងបណ្តោះអាសន្នត្រូវបានបញ្ចប់ដែរឬទេ៖ «ចំពោះខ្ញុំ ខ្ញុំគិតថាវាចប់ហើយ»។ លោក ត្រាំ ក៏បានទាមទារឱ្យប្រទេសរបស់លោកគ្រប់គ្រងកោះគ្រីនឡែន ដែលជាទឹកដីស្វយ័តរបស់ដាណឺម៉ាក ប៉ុន្តែនាយករដ្ឋមន្ត្រីដាណឺម៉ាក លោកស្រី មេតតេ ហ្វ្រេដេរីកសិន បានសង្កត់ធ្ងន់ជាថ្មីថា កោះគ្រីនឡែនមិនមែនសម្រាប់លក់ ឬដណ្តើមយកនោះឡើយ៕
