សហរដ្ឋអាមេរិក បានបើកការវាយប្រហារដំណាក់កាលថ្មីមួយទៀតលើប្រទេសអ៊ីរ៉ង់ បន្ទាប់ពីប្រធានាធិបតី ដូណាល់ ត្រាំ បានផ្ដល់សញ្ញាថា លោកនឹង «វាយប្រហារពួកគេយ៉ាងធ្ងន់ធ្ងរម្តងទៀតនៅយប់នេះ» បន្ទាប់ពីមានការវាយប្រហារតបតគ្នាកាលពីថ្ងៃទី៧ខែកក្កដា។
ប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានរាយការណ៍អំពីការផ្ទុះនៅក្នុងផ្នែកខ្លះនៃភាគខាងត្បូងប្រទេស រួមមានទីក្រុង ស៊ីរីក និងទីក្រុង បង់ដា អាបាស ដែលជាទីក្រុងកំពង់ផែស្ថិតនៅលើច្រកសមុទ្រ ហូរមូស។ បន្ទាប់ពីការវាយប្រហារចុងក្រោយបង្អស់នេះ លោក ត្រាំ បានបង្ហោះសារនៅលើបណ្តាញសង្គម Truth Social ថា៖ «នេះគឺជាការសងសឹកចំពោះការទម្លាក់គ្រាប់បែកលើកប៉ាល់ដោយអ៊ីរ៉ង់ កាលពីថ្ងៃម្សិលមិញ»។
បណ្តាប្រទេសនៅតំបន់ឈូងសមុទ្រ បានរាយការណ៍អំពីការវាយប្រហាររបស់អ៊ីរ៉ង់ បន្ទាប់ពីការវាយប្រហាររបស់សហរដ្ឋអាមេរិក ដោយមានការផ្ទុះនៅក្នុងប្រទេសបារ៉ែន ខណៈដែលប្រទេសគូវ៉ែតបានស្ទាក់ចាប់មីស៊ីលនិងដ្រូន។
អ៊ីរ៉ង់មិនទាន់បានធ្វើអត្ថាធិប្បាយនៅឡើយទេ ប៉ុន្តែមន្ត្រីជាន់ខ្ពស់ពីមុនមកបានព្រមានថា រាល់ការវាយប្រហារណាមួយពីសហរដ្ឋអាមេរិក នឹងត្រូវជួបប្រទះនូវ «ការឆ្លើយតបភ្លាមៗ»។
បញ្ជាការដ្ឋានកណ្តាលរបស់សហរដ្ឋអាមេរិក (Centcom) បាននិយាយថា ការវាយប្រហារទាំងនេះ ត្រូវបានធ្វើឡើងដើម្បីការពារសេរីភាពនៃការធ្វើនាវាចរណ៍ ប្រឆាំងនឹងការឈ្លានពានដែលគ្មានហេតុផលនាពេលថ្មីៗនេះលើនាវាពាណិជ្ជកម្ម។
ទំហំនៃការខូចខាតពីការវាយប្រហាររបស់សហរដ្ឋអាមេរិក មិនទាន់ត្រូវបានដឹងនៅឡើយទេ ប៉ុន្តែប្រព័ន្ធផ្សព្វផ្សាយអ៊ីរ៉ង់ បានរាយការណ៍ពីការដាច់ចរន្តអគ្គិសនីនៅក្នុងទីក្រុង ឆាបាហារ និងមានការឆាបឆេះនៅឯយោធភូមិភាគមួយរបស់កងឆ្មាំបដិវត្តន៍ឥស្លាម (IRGC) នៅក្នុងទីក្រុង ប៊ូស៊ែរ។
នៅក្នុងការថ្លែងទៅកាន់អ្នកយកព័ត៌មាន កាលពីល្ងាចថ្ងៃទី៨ខែកក្កដា លោក ត្រាំ បាននិយាយថា អ៊ីរ៉ង់ចង់ធ្វើកិច្ចព្រមព្រៀងមួយ «យ៉ាងខ្លាំង» ប៉ុន្តែលោកបានបន្ថែមថា៖ «ខ្ញុំគ្រាន់តែមិនដឹងថា តើពួកគេសមនឹងទទួលបានការធ្វើកិច្ចព្រមព្រៀងជាមួយដែរឬទេ – ខ្ញុំមិនដឹងថាពួកគេនឹងគោរពតាមកិច្ចព្រមព្រៀងនោះទេ»។
ពីថ្ងៃទី៧ឈានចូលថ្ងៃទី៨ខែកក្កដា គឺជាការវាយប្រហារតបតគ្នាដ៏អាក្រក់បំផុតរវាងសហរដ្ឋអាមេរិក និងអ៊ីរ៉ង់ ចាប់តាំងពីកិច្ចព្រមព្រៀង ដែលត្រូវបានគេស្គាល់ថាជាអនុស្សរណៈនៃការយោគយល់គ្នា (MoU) ត្រូវបានចុះហត្ថលេខាកាលពីថ្ងៃទី១៧ ខែមិថុនា។
លោក ត្រាំ បាននិយាយកាលពីថ្ងៃទី៨ខែកក្កដាថា កិច្ចព្រមព្រៀងបទឈប់បាញ់ដែលបានចុះហត្ថលេខាកាលពីខែមុនជាមួយអ៊ីរ៉ង់គឺ «ត្រូវបានបញ្ចប់ហើយ»។ ជាការឆ្លើយតប រដ្ឋមន្ត្រីការបរទេសអ៊ីរ៉ង់ លោក អាប់បាស អារ៉ាកជី បានបង្ហោះសារថា៖ «យើងមិនឆ្លើយតបពាក្យអសុរសដោយពាក្យអសុរសនោះទេ ប៉ុន្តែគឺដោយសកម្មភាព៖ ដោយភាពគ្មានការភ័យខ្លាច និងដោយភាពក្លាហានដ៏មហិមា»។
កិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់ រួមមានរយៈពេល ៦០ ថ្ងៃសម្រាប់បទឈប់បាញ់ ដែលក្នុងកំឡុងពេលនោះការចរចាគួរតែបន្តទៅមុខ។ រយៈពេល ៦០ ថ្ងៃ សម្រាប់ការចរចាមិនទាន់អស់នៅឡើយទេ ប៉ុន្តែលោក ត្រាំ បាននិយាយថា លោកមើលឃើញថាការចរចាបន្ថែមទៀតគឺជា «ការខាតបង់ពេលវេលា»៕
