ប្រធានព្រឹទ្ធសភា លោក ហ៊ុន សែន នៅថ្ងៃទី១០ខែកក្កដានេះ បានទៅចូលរួមគោរពវិញ្ញាណក្ខន្ធសពម្តាយ លោក កឹម សុខា ប្រធានគណបក្សសង្គ្រោះជាតិដែលតុលាការរំលាយ ក្រោយពីមេបក្សប្រឆាំងរូបនេះ ត្រូវបានលើកលែងទោស តែនៅបន្តដកសិទ្ធិធ្វើនយោបាយ។
នេះបើតាមរូបភាពច្រើនសន្លឹកដែល លោក ហ៊ុន សែន បង្ហោះលើហ្វេសប៊ុករបស់លោក នៅល្ងាចថ្ងៃសុក្រនេះ។
ម្តាយលោក កឹម សុខា គឺលោកយាយ សៅ ង៉ែត បានទទួលមរណភាព នៅថ្ងៃទី៨ ខែកក្កដា ឆ្នាំ២០២៦នេះ ក្នុងជន្មាយុ ១០១ ឆ្នាំ។
សពពេលនេះកម្កល់ធ្វើបុណ្យតាមប្រពៃណី នៅរាជធានីភ្នំពេញ ហើយគ្រោងដង្ហែទៅបញ្ចុះនៅស្រុកកំណើត នៅខេត្តតាកែវ នាថ្ងៃអាទិត្យចុងសប្តាហ៍នេះ។
លោក កឹម សុខា អាយុ ៧២ឆ្នាំ ត្រូវបានចាប់ខ្លួនក្នុងឆ្នាំ២០១៧ តាមបណ្តឹងរបស់គណបក្សប្រជាជនកម្ពុជា ជុំវិញការចោទថា គប់គិតជាមួយអាមរិក ចង់ផ្តួលរំលំរដ្ឋាភិបាល ខណៈគណបក្សប្រឆាំងនេះបានហក់ឡើងប្រជាប្រិយភាព ជិតទាន់គណបក្សប្រជាជនកម្ពុជា ដែលដឹកនាំដោយលោក ហ៊ុន សែន ។
ការណ៍នេះ ជំរុញឱ្យមានការលើកឡើងថា ការចោទលោក កឹម សុខា ជាចេតនានយោបាយ ដើម្បីបំបាត់សំឡេងប្រឆាំង ក្នុងបុព្វហេតុក្រាញអំណាច ក្រោយបក្សកាន់អំណាចធ្លាក់ចុះប្រជាប្រិយភាពខ្លាំង។
យ៉ាងណា ភ្លាមៗក្រោយតុលាការប្រកាសសាលក្រមផ្តន្ទាទោស លោក កឹម សុខា ឱ្យមានទោស ២៧ឆ្នាំសហរដ្ឋអាមេរិកតាមរយៈស្ថានទូតប្រចាំកម្ពុជា បានច្រានចោលទៅនឹងសេចក្តីសម្រេចរបស់តុលាការនេះ ដោយចាត់ទុកសាលក្រមផ្តន្ទាទោសនេះថា ជាការរំខានចិត្តជាខ្លាំងចំពោះការផ្តន្ទាទោស លោក កឹម សុខា មេដឹកនាំនយោបាយកម្ពុជា ដែលទទួលបាននូវការគោរព។
អាមេរិក គូសបញ្ជាក់ពេលនោះថា ដំណើរការច្រើនឆ្នាំ ដើម្បីបំបិទសំឡេង លោក កឹម សុខា ដោយផ្អែកលើបទសមគំនិត ប្រឌិត គឺជាបរាជ័យនៃប្រព័ន្ធយុត្តិធម៌៕
