ប្រធានាធិបតី វ្ល៉ាឌីមៀ ពូទីន កំពុងបដិសេធការអំពាវនាវឱ្យមានការចរចាសន្តិភាពជាមួយទីក្រុងគីវ។ នេះបើយោងតាមប្រភពជិតដិតនឹងវិមានក្រឹមឡាំងចំនួនបី បានប្រាប់ទីភ្នាក់ងារសារព័ត៌មាន រ៉យទ័រ (Reuters) ខណៈដែលការវាយប្រហារដោយដ្រូនរបស់អ៊ុយក្រែន លើរោងចក្រចម្រាញ់ប្រេង និងកំពង់ផែ បានធ្វើឱ្យលោកកាន់តែប្តេជ្ញាចិត្តក្នុងការបន្តការប្រយុទ្ធ ហើយទំនងជានឹងបង្កើនទម្ងន់នៃជម្លោះដែលបានឈានចូលដល់ឆ្នាំទីប្រាំទៅហើយ។
ការលើកឡើងទាំងនេះ កើតឡើងបន្ទាប់ពីប្រធានាធិបតីអាមេរិក ដូណាល់ ត្រាំ បាននិយាយកាលពីថ្ងៃទី៦ខែកក្កដាថា ដំណោះស្រាយគឺ «ខិតជិតមកដល់ជាងអ្វីដែលមនុស្សទូទៅគិត» បន្ទាប់ពីលោកបានជួបសន្ទនាតាមទូរស័ព្ទដាច់ដោយឡែកពីគ្នាជាមួយលោក ពូទីន និងប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី កាលពីសប្តាហ៍មុន។ លោក ត្រាំ ក៏បានជួបលោក ហ្សេឡេនស្គី នៅឯកិច្ចប្រជុំកំពូលណាតូ (NATO) កាលពីថ្ងៃទី៨ខែកក្កដាផងដែរ។
ប្រភពដដែល បាននិយាយថា លោក ពូទីន បាន «ប្រកាន់ជំហរដាច់ខាត» ក្នុងការសម្រេចបាននូវគោលដៅសំខាន់ គឺការវាយយកតំបន់ដុនបាស (Donbas) ភាគខាងកើតដែលនៅសេសសល់។ លោក ពូទីន ក៏បានបដិសេធជាសាធារណៈនូវការអំពាវនាវរបស់លោក ហ្សេឡេនស្គី កាលពីខែមិថុនា សម្រាប់ការជួបពិភាក្សា និងការឈប់បាញ់គ្នា។ ផ្ទុយទៅវិញ មន្ត្រីជាន់ខ្ពស់អ៊ុយក្រែនម្នាក់ បាននិយាយថា របាយការណ៍ស៊ើបការណ៍សម្ងាត់ឆ្លុះបញ្ចាំងថា រុស្ស៊ីកំពុងរៀបចំខ្លួនសម្រាប់ជំហានបន្ទាប់នៅក្នុងសង្គ្រាម។
អតីតមន្ត្រីក្រសួងការពារជាតិរុស្ស៊ីម្នាក់ គឺលោក អានដ្រេ អ៊ីលនីតស្គី (Andrei Ilnitsky) បានសរសេរនៅក្នុងអត្ថបទមួយកាលពីថ្ងៃទី២៩ ខែមិថុនា ថា ការបង្កើនទម្ងន់សង្គ្រាមអាចចាប់ផ្តើមជាមួយនឹងការបំផ្លិចបំផ្លាញទីតាំងឧស្សាហកម្មធំៗចំនួន ៣០ នៅក្នុងប្រទេសអ៊ុយក្រែន ហើយដំណាក់កាលបន្ទាប់អាចជាការវាយប្រហារលើមូលដ្ឋានណាតូនៅក្នុងបណ្តាប្រទេសបាល់ទិក និងរូម៉ានី។
ការស្ទង់មតិមួយ បានបង្ហាញថា ថ្វីបើការគាំទ្ររបស់លោក ពូទីន នៅតែមានកម្រិតខ្ពស់ ប៉ុន្តែថ្មីៗនេះវាបានធ្លាក់ចុះដល់ចំណុចទាបបំផុតចាប់តាំងពីសង្គ្រាមបានចាប់ផ្តើមក្នុងឆ្នាំ២០២២។ រហូតមកទល់ពេលនេះ ទាហានប្រហែលពីរលាននាក់ ត្រូវបានសម្លាប់ របួស ឬបាត់ខ្លួន ចាប់តាំងពីការឈ្លានពានទ្រង់ទ្រាយធំលើអ៊ុយក្រែននៅដើមឆ្នាំ២០២២ នោះមក។
កាលពីថ្ងៃទី៣ ខែកក្កដា លោក ពូទីន បានប្រកាសថា កងកម្លាំងរុស្ស៊ីបានដណ្តើមយកទីក្រុង កូស្តង់ទីនីវកា (Kostiantynivka) ដែលជាខ្សែត្រៀមការពារដ៏សំខាន់ ប៉ុន្តែអ៊ុយក្រែនបានបដិសេធ។ មួយថ្ងៃក្រោយមក ក្នុងកំឡុងពេលសន្ទនាតាមទូរស័ព្ទជាមួយ លោក ត្រាំ លោក ពូទីន បានព្យាយាមបញ្ចុះបញ្ចូលថា រុស្ស៊ីនឹងវាយយកទឹកដីមួយភាគប្រាំដែលនៅសេសសល់នៃតំបន់ដូណេតស្ក៍ឱ្យបាន ព្រោះលោកចាត់ទុកការគ្រប់គ្រងតំបន់នេះថាជាបញ្ហាគោលការណ៍ដែល «ត្រូវការជ័យជម្នះណាមួយដើម្បីបង្ហាញ»៕
