ក្រោមតំណក់ភ្លៀងធ្លាក់ស្រិចៗ នាព្រឹកថ្ងៃចន្ទនេះ ក្រុមអ្នករងគ្រោះនៅក្រុមហ៊ុន ហួយវ័ន ប្រមាណជិត ១០០នាក់ ដែលភាគច្រើនជាជនជាតិចិន បាននាំគ្នាឈរត្រៀបត្រានៅមុខធនាគារជាតិនៃកម្ពុជា បន្តទាមទារឱ្យរដ្ឋាភិបាលកម្ពុជា រកដោះស្រាយរឿងក្រុមហ៊ុនបិទទ្វារ ហើយបានបង្កកលុយរបស់ពួកគេរាប់លានដុល្លារ ស្របពេលដែលលោក ហ៊ុន តូ ដោះខ្លួនថាមិនជាប់ពាក់ព័ន្ធ។
អ្នករងគ្រោះនៅក្រុមហ៊ុនហួយវ័ន ដែលតវ៉ានៅមុខធនាគារជាតិនៃកម្ពុជា ថ្លែងដោយសុំមិនបញ្ចេញអត្តសញ្ញាណថា ការដែលពួកគាត់នាំគ្នាមកតវ៉ានៅមុខធនាគារជាតិនៃកម្ពុជា គឺចង់ឱ្យស្ថាប័នមួយនេះ ជួយអន្តរាគមន៍រកដំណោះស្រាយឱ្យបានឆាប់ ព្រោះពួកគាត់កំពុងជួបការលំបាកក្នុងជីវភាព និងមុខរបរ រហូតដល់មានជនរងគ្រោះខ្លះជួបបញ្ហាផ្លូវចិត្តទៀត ដោយសារតែលុយជាញើសឈាមរបស់ពួកគាត់ ត្រូវបានក្រុមហ៊ុនបង្កកមិនទូទាត់សង។
ជនរងគ្រោះដែលជាប់លុយជាង ១០ម៉ឺនដុល្លារ នៅក្នុងក្រុមហ៊ុនហួយវ័នរូបនេះ បង្ហាញការខកចិត្តយ៉ាងខ្លាំង និងបាត់បង់ទំនុកចិត្ត ចំពោះស្ថាប័នរដ្ឋ និងប្រព័ន្ធធនាគារនៅកម្ពុជា ដែលព្រងើយកន្តើយ មិនរកដំណោះស្រាយជូនជនរងគ្រោះ នៅពេលដែលធនាគារ ឬក្រុមហ៊ុនហិរញ្ញវត្ថុរកស៊ីនៅកម្ពុជាបង្កបញ្ហា។
ជនរងគ្រោះរូបនេះ បាននិយាយថា៖ «រយៈពេលដែលការតវ៉ាតាំងពីខែ១២ ចុងឆ្នាំ២០២៥ រហូតមកដល់ឥឡូវ រយៈពេលនិយាយទៅ ចូលជិតប្រាំពីរប្រាំបីខែហើយ ហើយចំនួនទឹកលុយរបស់ខ្ញុំវារៀងច្រើនដែលសម្រាប់ខ្ញុំ ព្រោះពួកខ្ញុំរកលុយបានដោយលំបាក ពួកយើងខំអត់មានពេលវេលាសម្រាកគ្រប់គ្រាន់ អត់មានពេលយប់ពេលថ្ងៃ ដើម្បីតែលុយ ហើយដល់ពេលបានលុយមកហើយវាទៅមានបញ្ហាជាប់គាំងចឹង ហើយពួកគាត់ដែលជាស្ថាប័នរដ្ឋមួយទុកពួកយើងចោល ចឹងខ្ញុំមានការខកបំណងយ៉ាងខ្លាំងទៅលើការព្រងើយកន្តើយរបស់ពួកគាត់»។
បើទោះជាក្តីសង្ឃឹមហាក់នៅឆ្ងាយ ប៉ុន្តែជនរងគ្រោះរូបនេះ នៅតែបន្តអំពាវនាវដល់ប្រមុខរដ្ឋាភិបាលកម្ពុជា និងក្រសួងស្ថាប័នពាក់ព័ន្ធ ជួយអន្តរាគមន៍រកដំណោះស្រាយឱ្យពួកគាត់ឱ្យឆាប់ ខណៈពួកគាត់ក៏មិនចង់មកតវ៉ាបែបនេះដែរ ប៉ុន្តែដោយសារគ្មានជម្រើសណាផ្សេងក្រៅពីនេះ។
អតិថិជនរងគ្រោះនៅក្រុមហ៊ុនហួយវ័នមួយរូបទៀត បាននិយាយក្នុងលក្ខខណ្ឌមិនបញ្ចេញឈ្មោះដែរថា ពួកគាត់បានរត់រកក្រសួងស្ថាប័នពាក់ព័ន្ធជាច្រើនមកហើយ ក្នុងរយៈពេលជាង៧ខែមកនេះ ឱ្យជួយអន្តរាគមន៍ពន្លឿនការដោះស្រាយឱ្យបានឆាប់ ដើម្បីបានលុយមកដោះស្រាយបញ្ហាជីវភាព និងបំណុលក្នុងមុខរបររកស៊ី ប៉ុន្តែនៅតែមិនមានដំណោះស្រាយ។ ស្ថាប័នដែលពួកគាត់រកអន្តរាគមន៍នោះ មានដូចជា ធនាគារជាតិនៃកម្ពុជា ក្រសួងយុត្តធម៌ ស្ថានទូតចិនប្រចាំកម្ពុជា និងស្ថានទូតអាមេរិកជាដើម។
ជនរងគ្រោះរូបនេះបន្តថា៖ «សម្រាប់ខ្ញុំគឺពិបាកខ្លាំង អយុត្តិធម៌ខ្លាំង ព្រោះលុយគឺជាកម្លាំងញើសឈាមរបស់ពួកខ្ញុំ ចឹងប្រសិនបើគាត់អត់មានដំណោះស្រាយឱ្យពួកខ្ញុំមួយ ដំណោះស្រាយណាមួយដែលសមស្រប ដែលពួកខ្ញុំទទួលយកបាន គឺពួកខ្ញុំពិបាកខ្លាំង ទី១ ពិបាកការរកស៊ី ទី២គឺត្រូវជាប់លុយក្នុងហ្នឹងហើយ ហើយត្រូវជំពាក់គេថែមទៀត វាពិបាកក្នុងការកន្លែងហ្នឹង ចឹងបានជាពួកខ្ញុំមករតវ៉ាជារៀងរាល់ថ្ងៃ របៀបមកតវ៉ារហូតចឹង គឺដោយសារតែចង់ស្នើសុំឱ្យខាងធនាគារជាតិជួយដោះស្រាយឱ្យ»។
អំឡុងការតវ៉ានោះ ក្រុមជនរងគ្រោះទាំងនោះ បាននាំគ្នាកាន់បដាដែលសរសេរទាំងភាសាចិន អង់គ្លេស និងខ្មែរថា «Hun To (ហ៊ុន តូ) សងលុយ» «Huione H-Pay សូមសងប្រាក់ភ្លាមៗ កេរ្តិ៍ឈ្មោះកម្ពុជាបានបាត់បង់ដោយសារអ្នក» «ហួរវ័ន សងលុយញើសឈាមខ្ញុំ» ជាដើម។ ក្រៅពីនោះពួកគេក៏មានការបដារូបមេដឹកនាំចិន មេដឹកនាំកម្ពុជា និងមន្ត្រីជាន់ខ្ពស់កម្ពុជាមួយចំនួន ព្រមទាំងអតីតអ្នកគ្រប់គ្រងក្រុមហ៊ុនហួយវ័ន ក្រុមហ៊ុនH-Pay និងធនាគារPanda ផងដែរ ដែលក្នុងរូបនោះដូចជារូប លោក ហ៊ុន សែន ប្រធានព្រឹទ្ធសភា, លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ, លោកស្រី ជា សិរី អគ្គទេសាភិបាលនៃធនាគារជាតិនៃកម្ពុជា និងលោក ហ៊ុន តូ ដែលមានភាគហ៊ុន៣០% ក្នុងក្រុមហ៊ុននេះជាដើម។
បើតាមជនរងគ្រោះរូបនេះ កន្លងមក ក៏មានក្រុមហ៊ុនទិញបំណុល បានហៅពួកគាត់ចរចាទិញក្នុងតម្លៃ៣០% ទៅលើប្រភេទលុយ USD (លុយដុល្លារ)ប៉ុណ្ណោះ ចំណែកលុយប្រភេទ USDP ដែលគេថាជាលុយខ្មៅនោះ ពួកគេមិនទិញនោះទេ។ អតិថិជនរូបនេះ បានអះអាងថា តាំងពីមានបញ្ហាមកដល់ការតវ៉ាបច្ចុប្បន្ន ពួកគាត់មិនបានដឹងថា ក្រុមហ៊ុននេះ មានប្រភេទលុយដុល្លារ និងលុយកង្វក់នេះទេ ខណៈពួកគាត់ជាអ្នករកស៊ីសុច្ចរិត ដោយកម្លាំងញើសឈាម។
ស្ត្រីរូបនេះ និយាយថា៖ «សម្រាប់ខ្ញុំជាអ្នកប្រើអត់ដឹងថាមាន USD និង USDP ទេ ព្រោះខ្ញុំបើកហាងចឹងទៅ គឺគេបាញ់មក គឺខ្ញុំដឹងតែលុយចូលម៉ង អត់ដឹងថាលុយហ្នឹងជា USD ឬក៏ជាUSDP ប៉ុន្តែសម្រាប់ពួកគាត់ទិញ គឺគាត់ទិញតែUSD ទេ សម្រាប់ USDP ពួកគាត់អត់ទិញទេ អាហ្នឹងគឺជាផលវិបាកសម្រាប់ពួកខ្ញុំជាជនរងគ្រោះដូចគ្នា មានជនរងគ្រោះជាច្រើន ដែលជាប់លុយក្នុងហួយវ័ន គឺភាគច្រើនគឺ USDP ទាំងអស់»។
វីអូឌី មិនអាចសុំការអត្ថាធិប្បាយជុំវិញការតវ៉ានេះ ពីលោកស្រី ជា សិរី អគ្គទេសាភិបាលនៃធនាគារជាតិនៃកម្ពុជា បានទេ នៅថ្ងៃទី១៣ខែកក្កដានេះ។
ការបន្តការតវ៉ារបស់ជនរងគ្រោះនៅក្រុមហ៊ុន ហួយវ័ន នាពេលនេះ បានធ្វើឡើងបន្ទាប់ពីក្រុមហ៊ុន REACHS & Partners (រីចឆ៍ & ផាតនើរ) ដែលទទួលបន្ទុកជម្រះបញ្ជីក្រៅផ្លូវតុលាការរបស់គ្រឹះស្ថានផ្តល់សេវាទូទាត់សាច់ប្រាក់ H-Pay កាលពីថ្ងៃទី០៨ ខែកក្កដា ឆ្នាំ២០២៦ បានប្រកាសថា គ្រឹះស្ថាន H-Pay បានប្រតិបត្តិការហួសដែនកំណត់អាជ្ញាបណ្ណរបស់ធនាគារជាតិកម្ពុជា និងគ្មានប្រាក់គ្រប់គ្រាន់សម្រាប់ទូទាត់បំណុល។ ក្រុមហ៊ុនជម្រះបញ្ជី អះអាងថា ខ្លួនឈប់ជម្រះបញ្ជីឱ្យម្ចាស់បំណុលតទៅទៀតហើយ និងរុញទៅឲ្យតុលាការជម្រះបញ្ជីតាមផ្លូវច្បាប់វិញ។
តំណាងអតិថិជនរងគ្រោះ ១៣០០នាក់ ដោយសារក្រុមហ៊ុន ហួយ វ័ន ដែលមាន លោក ហ៊ុន តូ ជាសហប្រធាន បានចេញតវ៉ាជាច្រើនលើកមកហើយ ទាំងនៅធនាគារជាតិនៃកម្ពុជា និងស្ថានទូតចិន។ ប៉ុន្តែ ការតវ៉ាទាមទាររបស់ពួកគេ ពុំត្រូវបានដោះស្រាយឡើយ ក្រៅពីការប្រើហិង្សាបង្ក្រាបលើជនជាតិចិនឱ្យរបួសធ្ងន់ និងចាប់ពលរដ្ឋដែលជាជនរងគ្រោះ ២នាក់ដាក់ពន្ធនាគារ និងបន្តគំរាមចាត់ការលើពលរដ្ឋរងគ្រោះណា ដែលហ៊ានចេញតវ៉ាបិទផ្លូវសាធារណៈជាដើម។
លោក អ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា និងជាអតីតអ្នកតំណាងរាស្ត្រគណបក្សសង្គ្រោះជាតិ មានប្រសាសន៍ថា ជាទូទៅ រដ្ឋាភិបាល ត្រូវមានចំណែកទទួលខុសត្រូវដើម្បីរកដំណោះស្រាយជូនជនរងគ្រោះ ទោះជាក្រុមហ៊ុននោះមិនមានលទ្ធភាពសងក៏ដោយ ព្រោះរដ្ឋាភិបាលជាអ្នកបានចេញអាជ្ញាប័ណ្ណឱ្យធនាគារ មីក្រូហិរញ្ញវត្ថុ និងក្រុមហ៊ុនទាំងអស់ ដើម្បីធ្វើសកម្មភាព និងវិនិយោគនៅកម្ពុជា។
មួយវិញទៀត លោកថា ខាងតុលាការ ក៏ត្រូវចេញមុខជួយអន្តរាគមន៍លើរឿងនេះដែរ ដោយមិនចាំបាច់ជនរងគ្រោះប្តឹងនោះទេ ព្រោះករណីនេះ មិនមែនជារឿងកើតឡើងរវាងបុគ្គល និងបុគ្គលនោះទេ ប៉ុន្តែរឿងនេះជាបញ្ហារួម ដែលក្រុមហ៊ុនបង្កកប្រាក់ ឬមិនសងប្រាក់ត្រឡប់ដល់អតិថិជនរបស់ខ្លួនរាប់រយនាក់។
លោកថា៖ «ដូច្នេះវាជារឿងសំខាន់ណាស់ រដ្ឋត្រូវតែចេញមុខសម្របសម្រួល ឬក៏រកដំណោះស្រាយ ឬក៏អាចនិយាយឱ្យខ្លះថា អាចនឹងសងទៅអតិថិជនតាមរបៀបម៉េច[…] បើមិនដូច្នោះទេ អ្នកដែលប្រើប្រាស់វិស័យធនាគារហ្នឹង បាត់បង់ទំនុកចិត្តហើយ មិនអាចយកប្រាក់ទៅផ្ញើធនាគារណាមួយបានទេ ព្រោះបើមួយអាចធ្វើចឹងកើត ហើយគេចវេសបាន ដោយមិនមានសំណងអីជាដើមហ្នឹង ធនាគារផ្សេងក៏អាចធ្វើចឹងកើត ហើយបើប្រជាពលរដ្ឋអ្នកប្រើប្រាស់សេវាធនាគារហ្នឹងយល់ថាចឹង អ្នកដែលយកលុយយកទៅដាក់ធនាគារក្តី ផ្ញើធនាគារក្តីអីក្តីហ្នឹង ដកទំនុកចិត្តហើយ អាហ្នឹងអាចធ្វើឱ្យអ្នកដែលមានលុយច្រើនៗ អាចយកលុយទៅដាក់នៅប្រទេសក្រៅ»។
ចំណែក នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត យល់ថា ការដែលជនរងគ្រោះនៅក្រុមហ៊ុន ហួយវ័ន បន្តការតវ៉ានៅតាមស្ថាប័នរដ្ឋ និងស្ថានទូតមួយចំនួនជាបន្តបន្ទាប់ ហើយជាប់ជាប្រចាំ ដោយមិនមានការអន្តរាគមន៍ដោះស្រាយនេះ អាចនឹងជាសញ្ញាមិនល្អទេសម្រាប់មុខមាត់កម្ពុជា ហើយអាចនឹងមានការរិះគន់លើប្រព័ន្ធយុត្តិធម៌ផងដែរ។
លោកថា៖ «ចឹងខ្ញុំយល់ថា ភាគីដែលពាក់ព័ន្ធ ស្ថាប័នដែលពាក់ព័ន្ធ គួរតែពិនិត្យលទ្ធភាព នៅក្នុងការដោះស្រាយបញ្ហានេះឱ្យបានលឿន វាកាន់តែល្អ បើមិនចឹងទេ យើងក៏មានការបារម្ភដែរ ព្រោះថាការតវ៉ា ការទាមទារជាប់ជាប្រចាំទៅ វាធ្វើឱ្យមនុស្សឬក៏អ្នកតវ៉ាទាំងអស់ហ្នឹង វាប៉ះទង្គិចបញ្ហាផ្លូវចិត្ត អាចនឹងកើតនូវជំងឺថប់បារម្ភ ហើយអាចនឹងកើតចេញជាបញ្ហាផ្សេងៗទៀត ដែលពិបាកនៅក្នុងការគ្រប់គ្រង ឬក៏បញ្ហាដោះស្រាយហ្នឹងបន្តទៅទៀត ចឹងជម្រើសដែលសំខាន់ គឺគ្រប់ភាគីពាក់ព័ន្ធ និងស្ថាប័នពាក់ព័ន្ធហ្នឹង គួរតែពិនិត្យទៅលើលទ្ធភាព ជម្រើសដែលល្អ មុននឹងឈានដល់ដំណោះស្រាយតាមផ្លូវតុលាការ»។
រឿងអាស្រូវរបស់ក្រុមហ៊ុន ហួយវ័ន ផេ (Huione Pay) ដែលពាក់ព័ន្ធនឹងលោក ហ៊ុន តូ គឺជាករណីលាងលុយកខ្វក់កម្រិតអន្តរជាតិ។ អ្នករងគ្រោះទាំងខ្មែរ ចិន និងវៀតណាម បានចេញតវ៉ាយ៉ាងខ្លាំងក្លា បន្ទាប់ពីក្រុមហ៊ុនបានផ្អាកសេវាដកប្រាក់ បន្ទាប់ពីក្រសួងរតនាគារសហរដ្ឋអាមេរិក បានដាក់ក្រុមហ៊ុន Huione Group ចូលក្នុងបញ្ជីខ្មៅ និងកាត់ផ្តាច់ចេញពីប្រព័ន្ធហិរញ្ញវត្ថុ។
ចំណែក ធនាគារជាតិ ក៏បានប្រកាសដកអាជ្ញាប័ណ្ណ និងធ្វើការជម្រះបញ្ជីក្រុមហ៊ុននេះ។ យ៉ាងណា ក្រុមហ៊ុននេះ បានលួចប្តូរឈ្មោះទៅជា H-Pay មុនពេលប្រឈមមុខនឹងការដកប្រាក់យ៉ាងគំហុក។
ទន្ទឹមនឹងនេះ លោក ហ៊ុន តូ ក៏ចេញមុខបដិសេធលែងពាក់ព័ន្ធថែមទៀត ទោះលោកទទួលស្គាល់ថា មានភាគហ៊ុន ៣០ភាគរយ ក្នុងក្រុមហ៊ុន Huione Pay តាំងពីឆ្នាំ២០២០ ក៏ដោយ។
ចំណែក មន្ត្រីបក្សប្រឆាំង និងអ្នកឃ្លាំមើល ធ្លាប់អះអាងថា អតិថិជនហួយវ័ន នឹងមិនទទួលបានលុយរបស់ខ្លួនវិញ តាមរយៈប្រព័ន្ធច្បាប់នៅកម្ពុជាឡើយ បើគ្មានសម្ពាធពីអន្តរជាតិ និងការស៊ើបអង្កេតពីស្ថាប័នឃ្លាំមើលហិរញ្ញវត្ថុពិភពលោក ឬចាប់ខ្លួនលោក ហ៊ុន តូ ឱ្យមកទទួលខុសត្រូវទេនោះ៕
