រដ្ឋាភិបាលលោក ហ៊ុន ម៉ាណែត តាមរយៈក្រសួងការពារជាតិ នៅតែបន្តអះអាងថា ខ្លួនប្រកាន់ជំហរយ៉ាងម៉ឺងម៉ាត់ការពារខ្សែព្រំដែនអន្តរជាតិមិនកែប្រែ កម្ពុជា-ថៃ ដែលបន្សល់ទុកពីសម័យបារាំង ទោះថៃបង្កើនការឈ្លានពានឥតឈប់ ចាប់ពីមានបទឈប់បាញ់ជាងកន្លះឆ្នាំមកនេះក្តី។
បើតាមក្រសួងការពារជាតិ នៅថ្ងៃអង្គារ ទី១៤ ខែកក្កដានេះ ក្រុមអ្នកសង្កេតការណ៍អាស៊ានប្រចាំកម្ពុជា បានចុះទៅពិនិត្យមណ្ឌលសុវត្ថិភាពមួយកន្លែងទៀត នៅវត្តពើងអង្កាម ហៅវត្ត បាក់កាំ ឃុំឈានមុខ ស្រុកត្បែងមានជ័យ ខេត្តព្រះវិហារ ដែលមានជនភៀសសឹកចំនួន ២៩៥គ្រួសារ។
រហូតមកទល់ពេលនេះ ជនភៀសសឹកទាំងអស់នោះ នៅមិនទាន់អាចវិលត្រឡប់ទៅលំនៅដ្ឋានរបស់ពួកគាត់វិញបាននៅឡើយទេ ដោយសារការចូលកាន់កាប់ទឹកដីកម្ពុជា ដោយខុសច្បាប់ពីសំណាក់កងកម្លាំងយោធាថៃ នៅតំបន់មួយចំនួនតាមរយៈការរាយបន្លាលួស ដាក់ទូកុងតឺន័រ រួមទាំងផ្ទះសម្បែងក៏ត្រូវបានយោធាថៃបំផ្លិចបំផ្លាញផងដែរ។
មួយវិញទៀត ការចុះសង្កេតការណ៍ ផ្ទៀងផ្ទាត់ និងចុះសួរសុខទុក្ខដល់ជនភៀសសឹក ដែលមិនទាន់អាចវិលត្រលប់ទៅផ្ទះសម្បែងវិញបាន ពីសំណាក់ក្រុមអ្នកសង្កេតការណ៍អាស៊ាននេះ ក្រសួងថា គូសបញ្ជាក់ពីភាពចាំបាច់ជាដាច់ខាត ក្នុងការចាប់ផ្តើមកិច្ចការវាស់វែងខ័ណ្ឌសីមាដោយគណៈកម្មការចម្រុះខ័ណ្ឌសីមាព្រំដែនគោក (JBC) កម្ពុជា-ថៃ ឱ្យបានឆាប់បំផុត។
ការជំរុញនេះ ស្របតាមកិច្ចព្រមព្រៀងដែលមានស្រាប់ ដូចមានចែងនៅក្នុងចំនុចទីបីនៃសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥ ដើម្បីអនុញ្ញាតឱ្យប្រជាពលរដ្ឋស៊ីវិលស្លូតត្រង់របស់កម្ពុជា អាចវិលត្រលប់ទៅលំនៅដ្ឋានវិញដោយមិនមានការរារាំង ព្រមទាំងដោយសុវត្ថិភាព និងកិត្តិយស។
ក្រសួងសង្កត់ធ្ងន់ថា៖ «កម្ពុជាប្រកាន់ជំហរយ៉ាងម៉ឺងម៉ាត់ ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ»។ ហើយថា កម្ពុជាមិនទទួលស្គាល់ជាដាច់ខាត នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ។
ក្រោយមានកិច្ចព្រមព្រៀងបទឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ លោកនាយករដ្ឋមន្ត្រី ហ៊ុន ម៉ាណែត បានទទួលស្គាល់ និងថ្លែងជាសាធារណៈថា ទាហានថៃពិតជាបានបន្តឈរជើងនៅតាមតំបន់មួយចំនួនដែលជាដីមានជម្លោះ និងបំពានហួសពីខ្សែបន្ទាត់ព្រំដែនកម្ពុជា។ តាមរបាយការណ៍ពីគណបក្សប្រឆាំង តំបន់ជាង៧០ ទីតាំង រួមទាំងតំបន់បឹងត្រកួន ខេត្តបន្ទាយមានជ័យ ដែលរងការហ៊ុមព័ទ្ធដោយបន្លាលួស និងទូកុងតឺន័រពីយោធាថៃ។
រីឯយន្តការដោះស្រាយបច្ចុប្បន្ន រដ្ឋាភិបាលលោក ហ៊ុន ម៉ាណែត បានបង្វែរយុទ្ធសាស្ត្រមកប្រើប្រាស់កិច្ចចរចាទ្វេភាគីតាមរយៈគណៈកម្មាធិការព្រំដែនរួម (JBC) និងជំរុញឱ្យភាគីថៃតែងតាំងប្រធាន (JBC) ថ្មីដើម្បីចុះវាស់វែងនិងបោះបង្គោលព្រំដែនក្នុងតំបន់ក្តៅឱ្យបានឆាប់រហ័ស។
ប៉ុន្តែសម្រាប់អ្នកតាមដាន ដែលមិនចំណុះឱ្យរដ្ឋាភិបាល បាននិយាយថា ថៃនឹងមិនឱ្យដីខ្មែរចំនួនជាង៧០ទីតាំងនោះមកវិញ តាមការចរចាដោយយន្តការទ្វេភាគីទេ បើកម្ពុជាមិនប្តឹងថៃទៅតុលាការយុត្តិធម៌អន្តរជាតិ(ICJ) ឬប្រើកិច្ចព្រមព្រៀងសន្តិភាពទីក្រុងប៉ារីស និងប្រើសិទ្ធិស្វ័យការពារ ដើម្បីទប់ទល់ទៅនឹងទង្វើ ឈ្លានពាននៅលើដីជាក់ស្តែងទេនោះ៕
