ប្រជាពលរដ្ឋរស់នៅ និងអ្នកធ្វើដំណើរឆ្លងកាត់ក្រុងបាត់ដំបង ជានិច្ចកាលតែងត្អូញត្អែរ និងដង្ហោយសុំឱ្យអាជ្ញាធរពន្លឿនការកែលម្អផ្លូវក្នុងក្រុងជាបន្ទាន់ ក្រោយពេលកំណាត់ផ្លូវមួយចំនួនបានប្រែជារណ្តៅដី បែកក្រហេងក្រហូង និងដក់ទឹក ដែលបង្កហានិភ័យគ្រោះថ្នាក់ចរាចរណ៍ខ្ពស់ក្នុងរដូវវស្សានេះ។
ជាក់ស្តែង ផ្អែកតាមការពិនិត្យស្ថានភាពដងផ្លូវក្នុងក្រុងបាត់ដំបង ដូចជាករណីដងផ្លូវលេខ ៥២០ (ចំណុចក្បែរស្ថានីយប្រេងឥន្ធនៈ) និងកំណាត់ផ្លូវមួយចំនួនទៀត គេសង្កេតឃើញថា ផ្ទៃផ្លូវបានរងការខូចខាតជាជង្ហុកជ្រៅៗ ដែលនៅពេលមានភ្លៀងធ្លាក់ បានក្លាយជាថ្លុកទឹកកខ្វក់ បំបាំងភ្នែកអ្នកធ្វើដំណើរ ងាយនឹងបង្កឱ្យមានគ្រោះថ្នាក់ចរាចរណ៍ជាយថាហេតុ។
ពលរដ្ឋនៅក្រុងបាត់ដំបង កញ្ញា អ៊ូ រក្សា ប្រាប់វីអូឌីនៅថ្ងៃទី១៤ ខែកក្កដា ថា ផ្លូវជាច្រើនខ្សែនៅតែបន្តមានជង្ហុក គ្មានការកែលម្អ ទោះបីបានបញ្ចប់ការដ្ឋានសាងសង់លូជាច្រើនខែ ខណៈផ្លូវខ្លះមិនស្ថិតក្នុងគម្រោងអភិវឌ្ឍន៍របស់ អេឌីប៊ី (ADB)។ កញ្ញាបន្តថា ផ្លូវមួយចំនួនរអិលខ្លាំង ខណៈជង្ហុកតាមផ្លូវមួយចំនួន ត្រូវបានអាជ្ញាធរយកថ្មមកចាក់បំពេញ តែជិះបានមួយរយៈក៏ត្រឡប់ទៅសភាពដើមវិញ ដែលធ្វើឱ្យផ្លូវទាំងនោះខ្ទេចខ្ទាំខួបប្រាំងខួបវស្សា។
កញ្ញា អ៊ូ រក្សា និយាយថា៖ «អត់មានភ្លៀងគឺហុយ បើមានភ្លៀងគឺរអិល ហើយសំខាន់គ្រលុកទៀត ដក់ទឹកច្រើន យើងពិបាកធ្វើដំណើរខ្លាំងមែនទែន»។
ពលរដ្ឋរូបនេះ បន្តថា ស្ថានភាពផ្លូវបែបនេះ បានធ្វើឱ្យយានជំនិះងាយរងការខូចខាត ហើយពេលខ្លះក៏មានករណីគ្រោះថ្នាក់ចរាចរណ៍បណ្ដាលមកពីការរអិល និងធ្លាក់ជង្ហុកនេះផងដែរ ជាពិសេសគឺការធ្វើដំណើរនៅពេលយប់ ដែលងាយរងគ្រោះដល់ស្ត្រីមានផ្ទៃពោះ អ្នកជំងឺ និងកុមារ។ កញ្ញាបន្ថែមថា ក្រៅពីការលំបាកធ្វើដំណើរ ផ្លូវក្នុងក្រុងបាត់ដំបងនៅពេលនេះ ក៏កំពុងទាញទម្លាក់គុណភាពនៃការរស់នៅរបស់ពលរដ្ឋ និងមុខមាត់ទេសចរណ៍នៃខេត្តបាត់ដំបងទាំងមូលផងដែរ។
កញ្ញា អ៊ូ រក្សា បន្តថា៖ «ស្នើសុំឱ្យធ្វើផ្លូវឱ្យរួចរាល់មក ព្រោះថាបើអត់មានផ្លូវស្អាតទេ វាប៉ះពាល់ច្រើនដែរ ខាងវិស័យទេសចរណ៍ ក៏វារាងធ្លាក់ចុះទៅតាមហ្នឹងដែរ។ ដ្បិតតែខេត្តបាត់ដំបងយើងជាខេត្តស៊ីវិល័យ ជាខេត្តដ៏ចំណាស់មួយមែន តែបើសិនជាហេដ្ឋារចនាសម្ព័ន្ធយើងអត់ស្អាត ក៏អត់មានភ្ញៀវទេសចរណាគាត់ចង់មកលេងច្រើនដែរ សូម្បីតែអ្នកបាត់ដំបងក៏ពិបាកក្នុងការដើរលេង ឬការប្រកបរបររកស៊ីផ្សេងៗដែរ»។
ស្ថានភាពផ្លូវដក់ភក់រអិល និងការបើកបរខ្វះការប្រុងប្រយ័ត្នរបស់រថយន្តដឹកជញ្ជូនធំៗ កំពុងបង្កជាក្តីបារម្ភទ្វេដងដល់ស្ត្រីមានផ្ទៃពោះ។ ជាក់ស្តែង អ្នកស្រី ព្រហ្ម រមនា ដែលជាប្រជាពលរដ្ឋរស់នៅស្រុកថ្មគោល និងមានគម្រោងសម្រាលបុត្រនៅក្នុងដំណាច់ខែកញ្ញាខាងមុខនេះ បានរៀបរាប់ថា ស្ថានភាពផ្លូវដ៏លំបាកនាខែវស្សានេះ បានធ្វើឱ្យអ្នកស្រីមានការភ័យខ្លាចយ៉ាងខ្លាំង រាល់ពេលធ្វើដំណើរពេលទៅពិនិត្យផ្ទៃពោះនៅទីរួមខេត្តម្ដងៗ ព្រោះការរលាក់ និងភាពរអិលនៃដងផ្លូវ អាចបង្កហានិភ័យខ្ពស់ដល់សុវត្ថិភាពមាតា និងទារកក្នុងផ្ទៃ។
អ្នកស្រីថា៖ «ពេលឡើងទៅបាត់ដំបងម្តងៗ អត់ចង់ទៅទេ តែយើងជៀសអត់បាន យើងត្រូវតែទៅ ភ័យខ្លាច ខែនេះគឺខែភ្លៀងរលឹមច្រែៗជិះមិនស្រួលរអិលដួល ពិបាកប៉ះពាល់ គ្រោះថ្នាក់ទាំងយើង ប្តីយើងទាំងអស់គ្នា ជាពិសេសកូនក្មេងទៅរៀនគ្នាជិះក៏មានបញ្ហាដែរ»។
បើយោងតាមលិខិតបំភ្លឺផ្លូវការរបស់រដ្ឋបាលខេត្តបាត់ដំបង កាលពីខែកក្កដា ឆ្នាំ២០២៥ បានបង្ហាញថា គម្រោងគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ ក្រោមហិរញ្ញប្បទានជាង ៥០លានដុល្លារ របស់ធនាគារអភិវឌ្ឍន៍អាស៊ី (ADB) នៅត្រើយខាងកើតស្ទឹងសង្កែ គឺត្រូវបានអនុវត្តបញ្ចប់ ១០០ ភាគរយហើយ។ ដោយឡែក គម្រោងនៅត្រើយខាងលិចស្ទឹង ដែលជាគម្រោងផ្គត់ផ្គង់ទឹកស្អាត និងអនាម័យខេត្ត សម្រេចបានប្រមាណ ៧៦ ភាគរយ គិតត្រឹមចុងឆ្នាំ២០២៥។ រដ្ឋបាលខេត្ត បានបញ្ជាក់ថា ភាពយឺតយ៉ាវនៅប៉ែកខាងលិចក្នុងសង្កាត់ស្វាយប៉ោ ចំការសំរោង ស្លាកែត និងឃុំអូរតាគីនេះ គឺដោយសារតែភាពស្មុគស្មាញនៃរចនាសម្ព័ន្ធប្រព័ន្ធលូក្រោមដី ដែលសេសសល់តាំងពីសម័យអាណានិគមបារាំងមកម្ល៉េះ។
អភិបាលខេត្តបាត់ដំបង លោក សុខ លូ ប្រាប់វីអូឌីថា ការស្ថាបនាផ្លូវក្នុងក្រុងសរុបចំនួន ២១ខ្សែ ស្ថិតក្រោមហិរញ្ញប្បទានរបស់ធនាគារអភិវឌ្ឍន៍អាស៊ី (ADB) និងគ្រប់គ្រងការដេញថ្លៃដោយផ្ទាល់ពីក្រសួងសាធារណការ និងដឹកជញ្ជូន។ លោកអភិបាលខេត្ត បន្តថា ផ្អែកតាមព័ត៌មានបឋម ដំណើរការដេញថ្លៃអាចនឹងធ្វើឡើងនៅសប្តាហ៍ក្រោយ ប៉ុន្តែព័ត៌មានលម្អិតផ្លូវការយ៉ាងណានោះ គឺត្រូវរង់ចាំការសម្រេច និងប្រកាសពីខាងក្រសួង ដែលជាម្ចាស់គម្រោងផ្ទាល់ ព្រោះថ្នាក់ខេត្តមិនមានសមត្ថកិច្ចលើកញ្ចប់ថវិកានេះឡើយ។
លោកថា៖ «ចំពោះផ្លូវសាធារណការ ២១ខ្សែហ្នឹង អាហ្នឹងក៏សួរទៅក្រសួង ព្រោះគាត់ដេញថ្លៃនៅក្រសួង ហើយគម្រោងហិរញ្ញប្បទានរបស់ ADB ហើយនឹងឆាប់ៗបានដឹងហើយ មិនទាន់អាឆាប់ៗហ្នឹងនៅឡើយទេ បាទ តាមព័ត៌មាន»។
ជុំវិញរឿងនេះ មន្ត្រីអង្គការលីកាដូប្រចាំខេត្តបាត់ដំបង លោក អ៊ិន គង់ជិត កត់សម្គាល់ឃើញថា ស្ថានភាពផ្លូវថ្នល់នៅក្នុងក្រុងបាត់ដំបង នាពេលបច្ចុប្បន្ន គឺមិនទាន់មានការប្រែប្រួល ឬរីកចម្រើនអ្វីឡើយ បើធៀបនឹងឆ្នាំមុនៗ។ លោកបានបន្តថា ប្រជាពលរដ្ឋនៅក្នុងក្រុងកំពុងតែរអ៊ូរទាំយ៉ាងខ្លាំង ចំពោះភាពយឺតយ៉ាវនៃការស្ថាបនាផ្លូវលេខ ៣ ខណៈដែលខាងភាគីអាជ្ញាធរវិញ បានរុញរានិងទម្លាក់កំហុសទៅលើភាពរអាក់រអួលនៃគម្រោងរបស់ធនាគារអភិវឌ្ឍន៍អាស៊ី (ADB) ដែលជាគម្រោងថ្នាក់ជាតិរបស់ក្រសួងសាធារណការ និងដឹកជញ្ជូន។
លោកមានប្រសាសន៍ថា៖ «រដ្ឋបាលខេត្តគួរលើកគម្រោងទៅថ្នាក់ជាតិ ដើម្បីស្នើសុំថវិកាមកសាងសង់ផ្លូវនៅតាមជនបទហ្នឹង ឱ្យបានល្អ ហើយប្រកបដោយគុណភាព។ ស្រុកខ្មែរយើង សម្បូរធនធានធម្មជាតិ ដូចជា ដីគ្រួសក្រហម យើងមើលនៅភ្នំដំរីរលំ គ្រាន់តែក្រុមហ៊ុនកាយយកអាចម៍ដីក្រហមហ្នឹង យកមកលក់ បួនដប់ឆ្នាំហើយ អត់ទាន់អស់ទៀត បាទអញ្ចឹង ធនធានយើងមានស្រាប់»។
ក្រុងបាត់ដំបង ដែលជាទីក្រុងបេតិកភណ្ឌ និងទេសចរណ៍ដ៏សំខាន់មួយ កំពុងស្ថិតក្នុងដំណើរការអនុវត្ត «គម្រោងគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២» ក្រោមហិរញ្ញប្បទានរបស់ធនាគារអភិវឌ្ឍន៍អាស៊ី (ADB)។ គម្រោងខ្នាតធំនេះ ផ្តោតចម្បងលើការស្ថាបនាប្រព័ន្ធលូរំដោះទឹកភ្លៀង ទឹកកខ្វក់ និងស្ថានីយប្រព្រឹត្តិកម្ម ដើម្បីលើកកម្ពស់សោភ័ណភាព និងដោះស្រាយបញ្ហាលិចលង់ក្នុងក្រុងប្រកបដោយចីរភាព។
ទោះជាយ៉ាងណា ក្នុងដំណាក់កាលអនុវត្តការដ្ឋាន កិច្ចការស្តារផ្ទៃផ្លូវឡើងវិញ ហាក់នៅមានភាពយឺតយ៉ាវ ដែលបណ្តាលឱ្យកំណាត់ផ្លូវមួយចំនួនក្នុងក្រុង ធ្លាក់ចុះដុនដាប និងដក់ទឹកថ្លុកធំៗនៅពេលរដូវវស្សាមកដល់។ ស្ថានភាពនេះ បានបង្កើតជាក្តីកង្វល់រួមរបស់ប្រជាពលរដ្ឋ ស្របពេលដែល «ច្បាប់ស្តីពីផ្លូវថ្នល់» និង «គោលនយោបាយជាតិគណនេយ្យភាពសង្គម» បានចែងច្បាស់ពីកាតព្វកិច្ចរបស់អាជ្ញាធរ និងភាគីពាក់ព័ន្ធ ក្នុងការធានាសុវត្ថិភាព ក៏ដូចជាការឆ្លើយតបចំពោះការផ្តល់សេវាហេដ្ឋារចនាសម្ព័ន្ធជូនពលរដ្ឋ៕
