សមាជិកព្រឹទ្ធសភាសហរដ្ឋអាមេរិក កាលពីថ្ងៃទី១៤ខែកក្កដា បានបង្ហាញកំណែទម្រង់ថ្មីនៃសេចក្តីព្រាងច្បាប់ដាក់ទណ្ឌកម្មលើប្រទេសរុស្ស៊ី ដែលជាគំនិតផ្ដួចផ្ដើមដោយសមាជិកព្រឹទ្ធសភាដ៏លេចធ្លោ លោក លីនស៊ី ហ្គ្រេហាម (Lindsey Graham) ដែលទើបទទួលមរណភាព ដោយកំណែទម្រង់ថ្មីនេះបានកាត់បន្ថយការគំរាមកំហែងនៃការដំឡើងពន្ធលើប្រទេសចិន ឥណ្ឌា និងប្រទេសដទៃទៀតដែលនាំចូលប្រេង និងហ្គាសពីរុស្ស៊ី។
លោក ហ្គ្រេហាម ដែលបានទទួលមរណភាពភ្លាមៗ កាលពីថ្ងៃទី១១ខែកក្កដា បានប្រកាសអំឡុងដំណើរទស្សនកិច្ចទៅកាន់ប្រទេសអ៊ុយក្រែន កាលពីមួយថ្ងៃមុននោះថា លោកបានឈានដល់កិច្ចព្រមព្រៀងជាមួយប្រធានាធិបតី លោក ដូណាល់ ត្រាំ ដើម្បីជំរុញសេចក្តីព្រាងច្បាប់នេះទៅមុខ បន្ទាប់ពីវាត្រូវបានដាក់ស្នើអស់រយៈពេលជាងមួយឆ្នាំមកហើយ ពោលគឺតាំងពីខែមេសា ឆ្នាំ២០២៥។
កំណែថ្មីនៃវិធានការនេះ បានកាត់បន្ថយការដំឡើងពន្ធដែលអាចដាក់លើប្រទេសទីបីដែលទិញប្រេង និងហ្គាសធម្មជាតិពីរុស្ស៊ី មកនៅត្រឹមកម្រិតអតិបរមា ១០០% លើប្រទេសអ្នកបញ្ជាទិញកំពូលទាំងប្រាំ ពីសំណើដើមដែលមានរហូតដល់ទៅ ៥០០% លើទាំងអស់គ្នា។ វាក៏អនុញ្ញាតឱ្យមានការលើកលែងសម្រាប់ប្រទេសណាដែលនាំចូលហ្គាសធម្មជាតិពីរុស្ស៊ីតិចជាង ១៥% នៃការនាំចេញសរុបរបស់រុស្ស៊ី និងកំពុងចាត់វិធានការកាត់បន្ថយការនាំចូលទាំងនោះ។
វិធានការនេះ ក៏ដាក់ទណ្ឌកម្មផងដែរលើក្រុមនាវាដឹកប្រេងស្រមោលរបស់រុស្ស៊ី ស្ថាប័នហិរញ្ញវត្ថុរុស្ស៊ី រួមទាំងធនាគារកណ្តាល និងលើគម្រោងថាមពលធំៗបំផុតរបស់រដ្ឋរុស្ស៊ី។ បន្ថែមពីនេះ វារួមបញ្ចូលទាំងការចែងដែលអនុញ្ញាតឱ្យលោក ត្រាំ អាចលើកលែងទណ្ឌកម្មបាន ប្រសិនបើវាបម្រើដល់ផលប្រយោជន៍ជាតិរបស់សហរដ្ឋអាមេរិក។
លោក ត្រាំ បានប្រាប់អ្នកយកព័ត៌មាននៅសេតវិមាន កាលពីព្រឹកថ្ងៃអង្គារថា ទណ្ឌកម្មលើប្រទេសអ៊ីរ៉ង់ និងក្រុមហេហ្សបូឡា (Hezbollah) អាចនឹងត្រូវបន្ថែមទៅក្នុងសេចក្តីព្រាងច្បាប់នេះ ប៉ុន្តែសមាជិកព្រឹទ្ធសភាខាងគណបក្សប្រជាធិបតេយ្យ លោក រីឆាត ប្លូមេនថល (Richard Blumenthal) បានបង្ហាញការប្រុងប្រយុទ្ធដោយលើកឡើងថា យើងគួរតែបន្តជំរុញសេចក្តីព្រាងច្បាប់នេះទៅមុខ ជាជាងការបើកវាឡើងវិញដើម្បីដាក់គោលដៅផ្សេងទៀត៕
