សមាជិកព្រឹទ្ធសភាខាងគណបក្សប្រជាធិបតេយ្យ កាលពីថ្ងៃទី១៤ខែកក្កដា បានរារាំងការវិវឌ្ឍទៅមុខនៃសេចក្តីព្រាងច្បាប់ការពារជាតិដ៏សំខាន់ចាំបាច់មួយ (NDAA) ដើម្បីតវ៉ាប្រឆាំងនឹងការបន្តសកម្មភាពអរិភាពរបស់លោក ដូណាល់ ត្រាំ ជាមួយប្រទេសអ៊ីរ៉ង់។
ការបង្អាក់សេចក្តីព្រាងច្បាប់នេះ បានកើតឡើងចំពេលមានការវាយបកគ្នាយ៉ាងខ្លាំងក្លាបំផុត រវាងប្រទេសទាំងពីរក្នុងរយៈពេលប៉ុន្មានថ្ងៃចុងក្រោយនេះ។
សមាជិកគណបក្សប្រជាធិបតេយ្យ បានបដិសេធមិនផ្តល់សំឡេងគាំទ្រឱ្យគ្រប់ ៦០ សំឡេង តាមការកំណត់របស់ព្រឹទ្ធសភាឡើយ ដោយសារសហរដ្ឋអាមេរិកនៅតែបន្តជាប់ពាក់ព័ន្ធក្នុងជម្លោះ បើទោះបីជាមានការអនុម័តសេចក្តីសម្រេចចិត្ត ស្តីពីអំណាចសង្គ្រាមកាលពីខែមុន ក្នុងបំណងបង្ខំឱ្យមានការឈប់បាញ់គ្នាក៏ដោយ។
លោកឆាក់ ស៊ូម័រ (Chuck Schumer)មេដឹកនាំជាន់ខ្ពស់នៃគណបក្សប្រជាធិបតេយ្យ បានប្រកាសថា គណបក្សរបស់លោកមិនអាចធ្វើដូចជាគ្មានរឿងអ្វីកើតឡើងបានទេ ខណៈប្រទេសកំពុងប្រឈមនឹងវិបត្តិសន្តិសុខជាតិដ៏បន្ទាន់បំផុត។
លោកបានបន្ថែមថា៖ «លោក ត្រាំ គ្មានផែនការ និងគ្មានយុទ្ធសាស្ត្រដកថយតាំងពីថ្ងៃដំបូងនៃសង្គ្រាមដ៏ធ្វេសប្រហែសនេះម៉្លេះ។ ឥឡូវនេះយើងឈានចូលដល់ថ្ងៃទី១៣៦ ហើយ ប៉ុន្តែគ្មានអ្វីផ្លាស់ប្តូរទាល់តែសោះ»។
កាលពីដើមសប្តាហ៍នេះ លោក ត្រាំ បានគំរាមប្រមូលកម្រៃ «ការពារសន្តិសុខ» ២០% លើនាវាឆ្លងកាត់ច្រកសមុទ្រ ហរមូស (Hormuz) ប៉ុន្តែលោកបានដកថយវិញ កាលពីថ្ងៃទី១៤ខែកក្កដា ខណៈពេលដែលបានប្តេជ្ញាបន្តការបិទខ្ទប់កំពង់ផែរបស់អ៊ីរ៉ង់។ លោកបានលើកឡើងថា វាមិនយុត្តិធម៌ទេដែលអាមេរិកត្រូវការពារច្រកសមុទ្រនេះសម្រាប់ពិភពលោកទាំងមូល។
ទង្វើនេះបានធ្វើឱ្យសមាជិកគណបក្សសាធារណរដ្ឋខឹងសម្បារយ៉ាងខ្លាំង ចំពោះការរារាំងច្បាប់ NDAA ដែលនឹងអនុញ្ញាតឱ្យមានការចំណាយលើវិស័យការពារជាតិចំនួន ១.១៥ ទ្រីលានដុល្លារ សម្រាប់ថវិកាជាតិឆ្នាំខាងមុខ។
លោក ចន ធូន (John Thune) មេដឹកនាំសំឡេងភាគច្រើនខាងគណបក្សសាធារណរដ្ឋ បានរិះគន់ថា៖ «ខ្ញុំពិតជាសង្ឃឹមថា គណបក្សប្រជាធិបតេយ្យនឹងមិនយកនយោបាយមកដាក់ពីមុខការគាំទ្រ ចំពោះបុរសនិងស្ត្រីរបស់យើង ដែលកំពុងពាក់ឯកសណ្ឋាននោះទេ»៕
